རྒྱ་ནག་གི་གོ་ལ་རང་བཞིན་གྱི་གསར་འགྱུར་བརྒྱུད་ལམ།

བརྒྱུད་ལམ་༼གོ་ལ་ཅན་དུ་ཕྱོགས་ཤིག༽ ༼རྒྱལ་སྤྱིའི་ལས་དོན་གྱི་ཐོག་ལ་རྒྱ་ནག་གི་བསམ་ཚུལ་གོ་རུ་ཆུག༽ འདི་ལྟའི་འབོད་ཚིག་དང་རེ་སྐུལ་གྱི་འོག་ཏུ་ད་ཆར་རྒྱ་ནག་གིས་སི་ཨིན་ཨིན་ལ་དཔེ་བླངས་ཏེ། དུས་ཚོད་ ༢༤ རིང་གི་དབྱིན་སྐད་ཀྱི་གསར་འགྱུར་བརྒྱུད་ལམ་ཞིག་ཚུད་པའི་ཨ་སྒོར་ཐེར་འབུམ་ལྷག་གི་མ་དངུལ་བཏང་སྟེ། ཕྱི་རྒྱལ་ཁག་ཏུ་གསར་འགྱུར་གྱི་ལས་དོན་རྒྱ་བསྐྱེད་བྱ་རྒྱུ་ཡིན་འདུག

རྒྱ་ནག་གི་གསར་འགོད་བརྒྱུད་ལམ་གོ་ལ་ཅན་དུ་ཕྱོགས་དགོས་པའི་འཆར་གཞི་འདི་ནི་ ༢༠༠༢ ལོར་ཧུའུ་ཅིན་ཐའོ་སྲིད་འཛིན་ལ་སླེབས་རྗེས་ནས་མགོ་བཙུགས་ཤིང་། དུས་དེ་ནས་བཟུང་གཞུང་གཉེར་བརྒྱུད་ལམ་ཁག་གིས་ཕྱི་རྒྱལ་ཁག་ཏུ་གསར་འགྱུར་དུས་ཐོག་ལ་སྤེལ་རྒྱུའི་ལས་དོན་ཐད་སྔར་ལས་ཚགས་ཚུད་ལ་བཏང་བ་དང་། ཕྱི་རྒྱལ་གྱི་སྐད་ཡིག་ནང་གི་བརྒྱུད་ལམ་ཇེ་མང་ལ་བཏང་སྟེ་རྒྱ་ནག་དབུས་གཞུང་གི་གལ་ཆེའི་རྒྱལ་སྤྱིའི་གསར་འགྱུར་ཁག་དུས་ཐོག་ལ་གཏོང་བར་ཤུགས་སྣོན་བྱས་ཡོད་པ་རེད།

ཡིན་ཡང་ད་ཆར་ལས་གཞི་འདིའི་ཐད་ནས་རྒྱ་ནག་གི་ཕུགས་རྒྱང་རིང་བའི་དམིགས་ཡུལ་ཁག་ལ་དྲི་བ་དང་དོགས་བློང་ཡོང་གི་ཡོད། གནད་དོན་གཅིག་ནི། སྲོལ་རྒྱུན་དུ་ཏང་ཀྲུང་དབྱང་གི་༼མིད་པ་དང་ལྕེ་༽རུ་གྱུར་བའི་དབུས་གཞུང་གི་བརྙན་འཕྲིན་བརྒྱུད་ལམ་ CCTV དེ་ཨ་རིའི་ CNN དང་དབྱིན་ཇིའི་ BBC ལྟ་བུའི་ཁ་གཏད་འགྲན་རྩོད་ཀྱི་ནང་ཞུགས་གི་རེད་དམ། ཡང་མིན་ན། རྒྱ་ནག་གིས་རྒྱལ་སྤྱི་རང་བཞིན་གྱི་ལྟ་མཁན་ལ་རེ་བ་རྒྱག་བཞིན་པ་འདིས་ད་བར་འགོག་སྡོམ་འོག་ཚུད་པའི་གསར་འགོད་ཀྱི་ལས་དོན་དེ་ཇེ་ལྷོད་ལ་འགྲོ་གི་རེད་དམ།

རྒྱ་ནག་གི་དཔལ་འབྱོར་གོང་འཕེལ་དུ་ཕྱིན་པ་དང་མཉམ་དུ་བརྒྱུད་ལམ་ཤུགས་ཆེ་རུ་བཏང་སྟེ་གོ་ལ་རང་བཞིན་གྱི་སྟོབས་ཤུགས་ཀྱང་རྒྱས་དགོས་པའི་མངོན་འདོད་དང་། འཛམ་གླིང་གི་ལས་དོན་གང་ཅིའི་ཐད་ཐེ་བྱུས་ཀྱི་སྐད་ཤུགས་མཐོན་པོ་ཞིག་རྒྱལ་སྤྱིའི་སྟེང་སླེབས་དགོས་པ་ནི་རང་བཞིན་གྱི་གནས་ཚུལ་ཞིག་རེད། རྒྱལ་ཁབ་མང་པོ་ཞིག་གིས་འདི་ལྟར་སྒྲུབ་ཀྱིན་པ་ནི། ཨ་རིའི་རླུང་འཕྲིན་ཁང་དང་འཇར་མན་གྱི་ Deutsche Welle ལྟ་བུ་སྲིད་གཞུང་གིས་སྦྱིན་བདག་བྱེད་ཀྱིན་པའི་བརྒྱུད་ལམ་ཁག་རེད། དེས་ན་རྒྱ་ནག་དང་མི་འདྲ་ས་དེ་གང་རེད།

འདིའི་མི་འདྲ་ས་ལྟེ་བ་ནི་རྒྱ་ནག་གཞུང་དང་གུང་ཁྲན་ཏང་གཉིས་ཀྱིས་གསར་འགྱུར་བརྒྱུད་ལམ་ལ་འགོག་སྡོམ་དམ་དྲག་བྱེད་ཀྱིན་པ་དེར་ཐུག་ཡོད་པ་རེད། དེ་ལྟར་ཡང་། ཉེ་བའི་ལོ་ཤས་ནས་ཀྲུང་དབྱང་བརྙན་འཕྲིན་ཁང་ CCTV དང་མི་དམངས་ཉིན་རེའི་ཚགས་པར་གྱི་གསར་འགྱུར་སྤེལ་སྟངས་ནི་སྔར་དང་བསྡུར་ན་ཅུང་གུ་ཡངས་དང་། དེང་རབས་ཀྱི་རྣམ་པ་ཆེ་བ། ཆབ་སྲིད་ཤུགས་ཆུང་དུ་ཕྱིན་ཡོད་པ་རེད། ཡིན་ནའང་། གཞི་རྩའི་རྩ་དོན་དེ། གཞུང་གིས་གཉེར་བའི་གསར་འགྱུར་བརྒྱུད་ལམ་དག་གིས་སྤེལ་བའི་གསར་འགྱུར་གྱིས་ངེས་པར་དུ་གཞུང་གི་ལྟ་བ་དང་ལངས་ཕྱོགས་གསལ་སྟོན་བྱེད་དགོས་པའི་གཞི་རྩའི་རྩ་དོན་དེར་འགྱུར་བ་ཕྱིན་མེད།

དབྱེ་ཞིབ་ལྟར་ན། རྒྱ་ནག་གི་གསར་འགྱུར་བརྒྱུད་ལམ་གྱིས་ཕྱི་ནང་གཉིས་མི་འདྲ་བའི་རྩ་དོན་གཞིར་བཟུང་སྟེ། ཕྱི་བསྒྲགས་ཀྱི་གནས་ཚུལ་དང་། རྒྱལ་ནང་གི་གསར་འགྱུར་གཉིས་ཁ་ཁར་ཕྱེ་ནས་སྤེལ་རྒྱུ་ཡིན་འདུག རྒྱ་ནག་གཞུང་གིས་རྒྱ་སྒོར་ཐེར་འབུམ་ ༤༥ ཡི་མ་དངུལ་བཏང་སྟེ་བརྒྱུད་ལམ་ཇེ་མགྱོགས་དང་ཇེ་མང་དུ་བཏང་ཡང་། ཁོང་ཚོའི་གཞི་རྩའི་དམིགས་ཡུལ་ལ་འགྱུར་བ་མི་ཐེབས་པར་བཤད།

རྒྱ་ནག་གཞུང་གི་བརྒྱུད་ལམ་རྒྱ་སྐྱེད་ཀྱི་ལས་འཆར་ཏེ། ཀྲུང་གོའི་ CNN འདིའི་ནང་དུ། དབྱིན་སྐད་གཅིག་པུ་མིན་པར། ཉེ་བའི་ཆ་ནས་ཀྲུང་དབྱང་བརྙན་འཕྲིན་ཁང་གིས་ཧྥ་རན་སིའི་སྐད་དང་། སི་པན་ནེ་ཤིའི་སྐད་དུ་བརྙན་འཕྲིན་ཐད་གཏོང་གི་ལས་རིམ་བཅུག་ཡོད་ལ། ལོ་འདིར་ཨ་རབ་ཀྱི་སྐད་དང་ར་ཤི་ཡའི་སྐད་ཀྱི་བརྙན་འཕྲིན་ལེ་ཚན་ཡང་ཀྲུང་དབྱང་བརྙན་འཕྲིན་ཁང་གི་བརྒྱུད་ལམ་དུ་འཇུག་རྩིས་ཡོད་པ་རེད། ཨ་རིའི་གསར་འགྱུར་སྡེ་ཚན་ཁག་གིས་ཕྱི་རྒྱལ་གྱི་ཡན་ལག་གསར་ཁང་རྣམས་ཕྱིར་བསྡུ་དང་ཚོད་འཛིན་བྱེད་ཀྱིན་པའི་དུས་སྐབས་ཤིག་ལ། རྒྱ་ནག་ཞིན་ཧྭ་གསར་ཁང་གིས་ཁོང་ཚོའི་ཕྱི་རྒྱལ་གྱི་ཡན་ལག་གསར་ཁང་ ༡༠༠ ནས་ ༡༨༦ ལ་རྒྱ་སྐྱེད་བྱས་ཡོད་པ་རེད།