ད་ལྟའི་ཆར་བོད་ནང་གི་གནས་སྟངས་ཐབས་སྐྱོ་བོ་དང་ཛ་དྲག་གི་སྐབས་འདིར་བོད་མི་མང་པོ་ཞིག་ཞི་རྒོལ་ལ་ཞུགས་ཏེ་རྒྱ་ནག་གིས་མནར་གཅོད་སྡུག་སྦྱོང་གཏོང་གི་ཡོད་ལ། ཁ་ཤས་ཤིག་རང་སྲོག་ཀྱང་ཤོར་གི་ཡོད་པ་རེད། ཡིན་ཡང་དཔའ་བོ་འདི་དག་གི་རྒྱབ་ཏུ་ཡོད་པའི་ཨ་མ་དང་བཟའ་ཟླ་བུད་མེད་དེ་ཚོས་རང་སེམས་ཀྱི་སྡུག་བསྔལ་མནན་སྟེ། ད་དུང་༧གོང་ས་མཆོག་དང་བོད་མི་ས་ཡ་དྲུག་གི་དོན་དུ་ཡིན་པར་རྒྱབ་སྐྱོར་དང་བློས་གཏོང་བྱེད་བཞིན་པ་འདི་ཚོ་མིག་དཔེ་ལྟ་ས་རེད་ལ། འདི་ཚོའི་སྙིང་སྟོབས་དང་བློས་གཏོང་གི་སྤོབས་པ་ལ་ང་ཚོས་ཁ་མིག་ཡར་ལྟ་བྱ་དགོས་ཀྱི་ཡོད་པ་རེད་ཟེར།
ཕྱི་ཚེས་ ༡༨ ཉིན་གྱི་ཕྱི་དྲོ་ང་རང་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་ལགས་ཀྱི་མདུན་དུ་བཅར་ཏེ། བུད་མེད་སྐོར་ལ་སྤྱིར་བཏང་གི་བགྲོ་གླེང་ཐུང་ཐུང་ཞིག་བྱུང་ཞིང༌། འདི་ནི་ང་རང་ཁོ་མོའི་མདུན་ལ་བཅར་ནས་བོད་ཀྱི་བུད་མེད་སྐོར་ལ་བགྲོ་གླེང་བྱས་པ་ཐོག་མ་ཡིན་ལ། བཙན་བྱོལ་གྱི་བུད་མེད་ཁྲོད་གནས་རིམ་མཐོ་ཤོས་ཀྱི་བུད་མེད་ཅིག་དང་མཉམ་དུ་བུད་མེད་སྐོར་ལ་གླེང་སློང་བྱུང་བ་ཐོག་མ་དེ་ཡང་ཡིན། ངས་རང་ཉིད་ཀྱི་ཡོང་དོན་ཞུས་པ་དང་བསྟུན་ཁོང་གིས་ངེད་གཉིས་ཀྱི་བརྗོད་གཞིའི་གནད་ལྗིད་ས་དེར་དམིགས་ནས་བཀའ་མོལ་གྱི་མགོ་བཙུགས་སོང༌། བུད་མེད་ལ་ཐོབ་ཐང་སྤྲོད་མི་སྤྲོད་ཀྱི་གནད་དོན་ཅིག་མིན་པར། སྤྱི་ཚོགས་གང་འདྲ་ཞིག་ཡིན་ཡང་བུད་མེད་ཀྱིས་སྤྱི་ཚོགས་དེའི་མི་འབོར་ཕྱེད་ཀ་ཟིན་གྱི་ཡོད་པ་རེད། དེའི་རྐྱེན་གྱིས་ང་ཚོས་བཙན་བྱོལ་སྤྱི་ཚོགས་ཁྲོད་ཀྱི་མི་འབོར་ཕྱེད་ཀ་ནུས་མེད་ལ་འཇོག་རྒྱུ་ཡིན་ནམ་ཡང་ན། བོད་ཀྱི་རྩ་དོན་དང་འབྲེལ་བའི་སྤྱི་ཚོགས་དང་ནང་མི་ལ་ཕན་པའི་ནུས་པ་ལྡན་པ་ཞིག་བཟོ་རྒྱུ་ཡིན། འདི་དྲི་བ་རེད། ཟེར། རྒྱ་རི་སྒྲོལ་མ་ལགས་ཀྱིས་བཙན་བྱོལ་བོད་གཞུང་གིས་བུད་མེད་ལ་བཟུང་བའི་སྲིད་བྱུས་ཀྱི་ཐད་ནས་གསུངས་དོན། གཞུང་ཞིག་གི་ངོས་ནས་བུད་མེད་ཀྱི་ནུས་ཤུགས་སྤེལ་བའི་སྲིད་ཇུས་གཏན་འབེབས་བྱས་པ་དེར་ང་རང་གི་ངོས་ནས་རྒྱབ་སྐྱོར་ཡོད། ཡིན་ན་ཡང་གཞུང་ཞིག་ གི་ཁྲིམས་ཀྱི་ཐོག་ནས་འདྲ་མཉམ་དང་ནུས་ཤུགས་སྤེལ་བའི་སྲིད་བྱུས་གཏན་འབེབས་བྱས་པ་དེས་བུད་མེད་ཀྱི་གཞི་རྩའི་ནུས་པ་ཇེ་མཐོར་གཏོང་རྒྱུ་ཧ་ཅང་ཁག་པོ་རེད། གཙོ་བོ་ཐུག་ས་དེ་སྤྱི་ཚོགས་དང་བུད་མེད་མི་རེ་ངོ་རེ་ལ་རག་ལས་ཡོད་པར་འདོད། ཅེས་གསུངས་བྱུང་ལ། དེ་བཞིན་ཁོང་ཉིད་བོད་རིགས་མཐོ་རིམ་སློབ་མའི་ཚོགས་ཆེན་སྐབས་སློབ་ཕྲུག་ཚོའི་གོ་སྒྲིག་ལྟར་བུད་མེད་ཀྱི་ལས་འགན་སྐོར་བགྲོ་གླེང་ཞིག་ཡོད་པར་མཉམ་ཞུགས་བྱས་པའི་སྐོར་གསུངས་དོན། མཐོ་རིམ་བུ་མོ་ཚོས་རང་རང་གི་ཉམས་མྱོང་དང་འབྲེལ་བའི་ཐོག་གཏམ་བཤད་བྱས་པ་སོགས་བགྲོ་གླེང་འདི་བརྒྱུད་ནས་ང་རང་གིས་སྔོན་ཆད་ཐོས་མ་མྱོང་བ་དང་ཡང་ན་བསམ་བློར་འཁོར་མ་མྱོང་བ་མང་པོ་ཞིག་ཤེས་བྱུང༌། དངོས་ཡོད་གནས་ཚུལ་ཐོག་བུད་མེད་ཚོར་འཚར་ལོངས་ཀྱི་བརྒྱུད་རིམ་ཁྲོད་ནས་སློབ་གསོ་སྤྲོད་སྟངས་དེས་ཁྱད་པར་ཆེན་པོ་ཡོད་པའི་ཚོར་བ་ཤུགས་ཆེན་པོ་བྱུང་སོང༌། མཐོ་རིམ་བུ་མོ་ཁ་ཤས་ཀྱིས་རང་གི་ཕ་མས་སྐྱེས་པ་ཕོ་ལ་ཡོན་ཏན་དགོས་པ་དང་བུད་མེད་ལ་ལས་ཀ་དགོས་པ་རེད་ཅེས་སློབ་གསོ་རྒྱག་གི་འདུག་ཟེར་མཁན་ཡང་འདུག དེ་ཡིན་དུས་གཙོ་བོ་རང་ཁྱིམ་དང་སློབ་གྲྭ་སོགས་ཁོར་ཡུག་གང་དུ་འཚར་ལོངས་འབྱུང་བཞིན་པའི་བུ་མོ་ཚོ་ལ་མིའི་ལྷན་སྐྱེས་ཀྱི་ནུས་པ་དེ་གཅིག་མཚུངས་ཡིན་པའི་སློབ་གསོ་བརྟན་པོ་ཞིག་དགོས་པ་གལ་ཆེན་པོ་རེད་བསམ་གྱིན་ཡོད། ཅེས་གསུངས་བྱུང༌།
རྒྱ་རི་སྒྲོལ་མ་མཆོག་གིས་གསུང་བཤད་གནང་སྐབས་རང་གི་སྐད་ཆའི་ཚིག་རེ་རེ་ལའང་ཧ་ཅང་གི་དོ་སྣང་དང་བསམ་གཞིགས་བྱེད་ཀྱིན་འདུག་ལ། དེ་ལྟར་ངེད་གཉིས་ཀྱི་སྐད་ཆ་རིམ་བཞིན་རིགས་གཅིག་རྐང་འཛིན་གྱི་ཐོག་ལ་བབ་ཅིང༌། འདིའི་ཐད་ལ་ཁོང་གིས། སྤྱིར་རང་ལ་ཐུན་མིན་གྱི་ཡོན་ཏན་དང་ཡང་ན་ལྷན་སྐྱེས་ཀྱི་དང་བ་གང་ལ་ཡོད་མེད་དེ་འདེམ་དགོས་ལ། ང་རང་གི་ཉམས་མྱོང་ཐོག་བཤད་ན། བོད་ཀྱི་བུད་མེད་ཚོས་འབྲེལ་མཐུད་པ་དང་ཚོགས་འདུ་དང་རིག་རྩལ་གྱི་ལས་རིགས་དེ་འདྲ་གཙོ་གཉེར་བྱ་རྒྱུ་གཉིས་ནི་ང་ཚོའི་སྤྱི་ཚོགས་ལ་ནུས་པ་ཆེན་པོ་འདོན་ཐུབ་པའི་ཆེད་ལས་ཤིག་རེད། ང་ཚོའི་གནས་སྟངས་ནི་སྤྱི་ཚོགས་གཞན་གྱི་གནས་བབ་དང་འདྲ་མཚུངས་མིན་པས་ང་ཚོརཕྱི་འབྲེལ་གྱི་ནུས་པ་ཆེན་པོ་དགོས་ལ། མདོར་ན་ང་ཚོའི་སྤྱི་ཚོགས་སྤྱིའི་འཚོ་གནས་དང་ཁོར་ཡུག་སོགས་གཞན་ལ་བསྟེན་ཡོད་པས་ཕྱི་འབྲེལ་ནི་གལ་ཆེན་ནང་གི་དོན་ཆེན་རེད། དེ་བཞིན་ད་ལྟའི་ཆར་སྤྱི་ཚོགས་ཀྱི་ཟུར་སོ་སོ་ནས་མི་མང་གི་བསམ་བློའི་གོ་རྟོགས་དང་མི་རིགས་སྤྱིའི་རྩ་དོན་ལ་འགན་ལེན་གྱི་ནུས་པ་ཇེ་མཐོར་གཏོང་དགོས་ན། བགྲོ་གླེང་དང་ཚོགས་འདུ་གཙོས་པའི་འདུ་འཛོམས་རིགས་ཧ་ཅང་གི་གལ་ཆེན་པོ་རེད། དེར་བུད་མེད་ཚོས་དམིགས་བསལ་གྱིས་ནུས་པ་འདོན་ཐུབ་གི་རེད། དེ་བཞིན་འདས་པའི་ལོ་ལྔ་དྲུག་གི་སྔོན་དུ་གསར་འགོད་ལས་རིགས་གཉེར་མཁན་གྱི་བུད་མེད་ཤིན་ཏུ་ནས་ཉུང་ལ་ཕལ་ཆེར་མེད་ལབ་ན་ཡང་འགྲིག ད་ལྟ་གསར་འགོད་ལས་རིགས་ལ་བུད་མེད་ཁ་ཤས་ཡོད་པ་འདི་ཚོས་བོད་ཀྱི་ལོ་རྒྱུས་ཁྲོད་ཀྱི་སྟོང་ཆ་ཞིག་ཁ་གསབ་བྱས་ཡོད་པ་རེད། ལས་རིགས་འདིའི་རིགས་ལ་བུད་མེད་ཚོས་དམིགས་བསལ་གྱི་ནུས་པ་འདོན་ཐུབ་གི་རེད། དེང་རབས་ཀྱི་རྣམ་པའི་ཐོག་ནས་བཤད་ན་ཡང་བོད་ཀྱི་མཛངས་མའི་འགྲན་བསྡུར་ཡིན་ཡང་ང་རང་སྒེར་གྱི་ངོས་ནས་དེ་ཆབ་སྲིད་དང་འབྲེལ་བའི་ལས་འགུལ་སྙིང་རྗེ་མོ་ཞིག་རེད་འདོད་ཀྱིན་ཡོད་པས་མི་སྒེར་གྱི་ཐོག་ནས་རྒྱབ་སྐྱོར་བྱེད་མཁན་ཞིག་ཡིན། འདི་རིགས་གཅིག་རྐང་འཛིན་དེ་འདྲ་མ་ཡིན་ཡང་བོད་ཀྱི་བུད་མེད་ཅིག་གིས་བོད་ཀྱི་ཆབ་སྲིད་གནས་སྟངས་ལ་ལས་འགན་ཁུར་བའི་ངོ་བོའི་ཐོག་བསམ་བློ་གཏོང་ཆོག་གི་རེད། རྒྱ་དང་བོད་ཁ་ཁ་ཡིན་པ་རིགས་སོ་སོར་དབྱེ་འབྱེད་བྱེད་སྟངས་དེ་ཡང་གར་སྟེགས་སྙིང་རྗེ་བོ་ཞིག་ནས་དེང་རབས་ཀྱི་ན་གཞོན་མང་པོའི་དོ་སྣང་འདྲེན་ཐུབ་གི་ཡོད་པ་རེད། ཅེས་གསུངས་བྱུང༌།
ངས་ཁོང་ལ་བོད་ཀྱི་བུད་མེད་ཅིག་གིས་མི་རབས་གསར་བར་འགན་ལེན་སྟངས་ཀྱི་ཕྱོགས་ནས་གླེང་སློང་བྱེད་སྐབས། ཁོང་གིས་གསུངས་དོན། ང་རང་ཉིད་ནི་བོད་ཀྱི་བུད་མེད་ཀྱི་མིག་དཔེར་ལྟ་ས་དེ་འདྲ་ཞིག་ཆགས་མེད་དུས། བོད་ཀྱི་སྐད་ཡིག་དང་རིག་གཞུང་གི་སྒང་ལ་སྐད་ཆ་བཤད་ན་བདེ་བོ་མི་འདུག་ལ། བུད་མེད་ཅིག་ལ་མཚོན་ན་ཤེས་ཡོན་ཡོད་མེད་གང་ལྟར་ཡང་བོད་མིའི་ཡ་རབས་སྤྱོད་བཟང་སོགས་ཀྱི་ཐད་ནས་བུ་ཕྲུག་སྐྱེད་སྲིང་བྱེད་སྟངས་མང་པོ་ཡོད་པ་རེད་དེ། སྒེར་གྱི་ངོས་ནས་མཚམས་རེར་དཀའ་ངལ་ཞིག་ལ་ཆགས་ཡོང་དུས་སྐད་ཆ་བཤད་རྒྱུ་ཁག་པོ་འདུག ང་རང་གི་སེམས་འཚབ་ཆེ་ཤོས་དེ་༧གོང་ས་མཆོག་གི་བཀའ་དགོངས་འོག་བཙན་བྱོལ་སྤྱི་ཚོགས་ཁྲོད་ལས་འགན་གང་འདྲ་ཞིག་ལ་ཐུག་ཀྱང༌། ལྷག་བསམ་ཆེན་པོས་ལས་འགན་གྱི་ངོ་བོ་རང་གི་ཐོག་ནས་ལས་ཀ་བྱས་བསྡད་ཡོད། ལས་འགན་འཁུར་རྒྱུ་འདིའི་ཁྲོད་ནས་མཚམས་རེར་ང་རང་གི་བྱེད་སྟངས་དེ་ཚོ་སྐྱོན་དང་དགེ་མཚན་གང་ལ་འགྱུར་གི་ཡོད་པ་ཧ་མ་གོ་དུས་སེམས་འཚབ་ཆེན་པོ་ཡོང་གི་འདུག ཡིན་ན་ཡང་ང་ཚོའི་ལྟ་ས་དེ་ཐག་རིང་པོ་ལ་མ་སོང་བར་ ༡༩༥༩ ལོའི་ཚུན་ཆད་ནས་བལྟས་ན། བུད་མེད་མང་པོ་ཞིག་གིས་ཁྱིམ་དང་བུ་ཕྲུག བཟའ་ཚང་སོགས་བློས་བཏང་ནས་ཆབ་སྲིད་ཀྱི་འཐབ་རྩོད་ནང་དུ་ཞུགས་ཡོད་པ་དེ་ཚོ་རེད་ལ། དམིགས་བསལ་གྱིས་ད་ལྟའི་ཆར་བོད་ནང་གི་གནས་སྟངས་ཐབས་སྐྱོ་བོ་དང་ཛ་དྲག་གི་སྐབས་འདིར་བོད་མི་མང་པོ་ཞིག་ཞི་རྒོལ་ལ་ཞུགས་ཏེ་རྒྱ་ནག་གིས་མནར་གཅོད་སྡུག་སྦྱོང་གཏོང་གི་ཡོད་ལ། ཁ་ཤས་ཤིག་རང་སྲོག་ཀྱང་ཤོར་གི་ཡོད་པ་རེད། ཡིན་ཡང་དཔའ་བོ་འདི་དག་གི་རྒྱབ་ཏུ་ཡོད་པའི་ཨ་མ་དང་བཟའ་ཟླ་བུད་མེད་དེ་ཚོས་རང་སེམས་ཀྱི་སྡུག་བསྔལ་མནན་སྟེ། ད་དུང་༧གོང་ས་མཆོག་དང་བོད་མི་ས་ཡ་དྲུག་གི་དོན་དུ་ཡིན་པར་རྒྱབ་སྐྱོར་དང་བློས་གཏོང་བྱེད་བཞིན་པ་འདི་ཚོ་མིག་དཔེ་ལྟ་ས་རེད་ལ། འདི་ཚོའི་སྙིང་སྟོབས་དང་བློས་གཏོང་གི་སྤོབས་པ་ལ་ང་ཚོས་ཁ་མིག་ཡར་ལྟ་བྱ་དགོས་ཀྱི་ཡོད་པ་རེད། ཅེས་བཤད་ཞོར་ཁོང་མོའི་སྐད་ངག་འདར་གྱིན་འདུག་ལ་མིག་མཐར་མཆི་མ་འཁྱིལ་ནས་འོད་འཁྱུག་གེར་བུད་སོང༌། མཚམས་དེར་ངེད་གཉིས་ཀྱི་གླེང་མོལ་ཡང་རེ་ཞིག་དལ་ཅག་གེར་གྱུར་སོང་ལ། ཕར་བལྟས་ཚོད་ཀྱིས་དཔའ་བོ་དཔའ་མོ་དེ་དག་ལ་སྐར་ཆ་འགའ་ཤས་རིང་མགོ་སྒུར་ཏེ་ངག་བཅད་གུས་འདུད་ཞུ་བཞིན་པ་ལྟར་གྱུར། དེ་ནི་ཁོ་མོའི་སེམས་ཁམས་ནས་སླེབས་པའི་ཚོར་བ་ཡིན་ངེས་ལ། ཁོ་མོའི་རྣམ་པ་དེས་ངའི་སྣ་ཁུང་ལ་ཡང་ཙག་ཤད་ཅིག་བསླངས་སོང༌།
ངས་མུ་མཐུད་དུ་གླེང་མོལ་གྱི་མཇུག་སྐྱོང་འདོད་པས་ཁོང་ལ། བོད་ཀྱི་བུད་མེད་ཚོ་ལ་གནོན་ཤུགས་དང་འགག་རྡོ་གཞན་ཞིག་ཡོད་པ་ནི། བུད་མེད་རང་ཉིད་བུད་མེད་ཀྱི་གནོན་ཤུགས་ལས་ཐར་ཐུབ་ཀྱིན་མེད་པར་བརྗོད་སྐབས། ཁོང་གིས། དེ་ལ་ངས་ཀྱང་ངོས་ལེན་བྱེད་ཀྱིན་ཡོད་ལ། ཐོག་མར་ཨ་མས་བུ་མོ་ལ་སློབ་གསོ་སྐྱོན་སྟངས་དང་བུ་མོ་ལ་རྒྱབ་སྐྱོར་བྱེད་པ་ནས་མགོ་བཙུགས་ཏེ། གཅེན་མོས་གཅུང་མོ་ལ་རྒྱབ་སྐྱོར་བྱེད་པ། གྲོགས་མོས་གྲོགས་མོ་ལ་རྒྱབ་སྐྱོར་བྱས་ནས་སྤྱི་ཚོགས་ནང་དུ་བུད་མེད་ཀྱིས་བུད་མེད་ལ་རྒྱབ་སྐྱོར་དང་སྐུལ་སློང་བྱ་དགོས་པ་དེ་ནི་ཧ་ཅང་གི་གནད་འགག་ཞིག་རེད། བུད་མེད་མང་པོ་ཞིག་གི་སྤྱོད་སྟངས་དང་མདུན་བསྐྱོད་ཀྱི་བསམ་བློ་ལ་བཀག་འགོག་དང་དམའ་འབེབས་བྱེད་མཁན་ཕལ་ཆེ་ཤོས་དང་ཤུགས་རྐྱེན་ཆེ་ཤོས་དེ་བུད་མེད་ཀྱིས་རང་གི་ནང་ཁུལ་དུ་སྤྲོད་ཀྱི་ཡོད་དུས། བུད་མེད་ཀྱིས་བུད་མེད་ལ་རྒྱབ་སྐྱོར་དང་བུད་མེད་རང་ཉིད་བུད་མེད་ཀྱི་གནོན་ཤུགས་ལས་ཐར་དགོས་པ་ཧ་ཅང་གནད་འགག་ཆགས་འདུག ཁྲིམས་ཀྱི་ཐོག་ནས་འདྲ་མཉམ་ཡིན་ཡང་ཆོག་མོད། དངོས་ཡོད་སྤྱི་ཚོགས་ཁྲོད་དུ་ད་དུང་བུད་མེད་ལ་དཀའ་ངལ་ཡོད་དུས། དེ་སེལ་ཐབས་ལ་བུད་མེད་རང་གི་ནང་ཁུལ་ནས་ཕན་ཚུན་མཐོང་ཆེན་དང་རྒྱབ་སྐྱོར་བྱེད་པ་ནས་མགོ་འཛུགས་དགོས་པར་མཐོང༌། ཞེས་གསུངས་བྱུང༌། སྐབས་དེར་ཁོང་གིས་ཆུ་ཚོད་ལ་ལྟ་ཙམ་བྱས་ཏེ། ང་རང་ཚོགས་འདུའི་བར་ནས་ཡོང་བ་ཡིན་པས་ད་ཚོགས་ཐོག་ལ་མ་སོང་ན་འགྲིག་གི་མི་འདུག་ཅེས་གསུངས་བྱུང་བས་ངས་ཀྱང་རང་གི་གསར་འགོད་ལས་རིགས་ཀྱི་ཅ་ལག་རྣམས་བསྡུས་ནས་ཡོང་དགོས་བྱུང་སོང༌།
གསར་འགོད་པ། ཚེ་རིང་སྐྱིད།
