ཕྱི་ཚེས་ ༢༥ དང་བོད་ཟླ་དང་པོའི་ཚེས་ ༡ ཉིན་ྋགོང་ས་མཆོག་གིས་ཕོ་བྲང་གཟིམ་ཆུང་དུ་མདོ་སྨད་སྤྱི་ཟུར་རོང་བོ་བློ་བཟང་སྙན་གྲགས་ལགས་ཀྱིས་བརྩམས་པའི་སེར་བྱེས་ངོ་སྤྲོད་གཏེར་གྱི་ཁ་བྱང་ཞེས་པའི་སེར་བྱེས་གྲྭ་ཚང་གི་ལོ་རྒྱུས་དེབ་ཅིག་དབུ་འབྱེད་གནང་ཡོད། 
དེབ་དེ་ནི་བཙན་བྱོལ་བོད་གཞུང་བཙུགས་ནས་ལོ་འཁོར་ལྔ་བཅུ་འཁོར་བ་དང༌། འཕགས་ཡུལ་ལྷོ་ཕྱོགས་ཀྱི་ཆོས་གྲྭ་ཆེན་པོ་སེར་བྱེས་མཁས་སྙན་གྲྭ་ཚང་ཕྱག་བཏབས་ནས་ལོ་བཞི་བཅུ་འཁོར་བའི་རྗེས་དྲན་དང་དགའ་སྟོན་རྟེན་འབྲེལ་དུ་ སྤེལ་གནང་འདུག་ལ། དེབ་ནང་དུ་བོད་ཕྱི་ནང་གི་སེར་བྱེས་གྲྭ་ཚང་གཉིས་ཀྱི་འབྲེལ་ཡོད་པར་རིས་ཚོན་ཁྲ་ཅན་ཤོག་ངོས་ ༡༠༠ ཙམ་དང་བོད་ཡིག་ཐོག་ཤོག་ངོས་ ༥༠ ། དབྱིན་ཡིག་ཐོག་ཤོག་ངོས་ ༤༡ ། རྒྱ་ཡིག་ཐོག་ཤོག་ངོས་ ༣༠ ། ཀར་ན་ཌ་མངའ་སྡེའི་སྐད་ཡིག་སྟེང་ཤོག་ངོས་ ༧༨ བཅས་བོད་རྒྱ་དབྱིན་གསུམ་དང༌། མངའ་སྡེ་གཞུང་གི་སྐད་ཡིག་བཅས་སྐད་ཡིག་མི་འདྲ་བ་གསུམ་གྱི་སྟེང་བསྒྱུར་ཡོད་འདུག
ནང་གསེས་སྡེ་ཚན་གྱི་ས་བཅད་དུ། གདན་ས་ཆེན་མོ་སེ་ར་ཐེག་ཆེན་གླིང་དང་སེར་བྱེས་མཁས་སྙན་གྲྭ་ཚང༌། འཕགས་ཡུལ་སེར་བྱེས་མཁས་སྙན་གྲྭ་ཚང༌། སེར་བྱེས་གྲུབ་ཆའི་སྡེ་ཚན། སེར་བྱེས་སློབ་གཉེར་ཁང༌། སེར་བྱེས་ཡི་དམ་རྟ་མགྲིན་ཁང་སོགས་ཉི་ཤུ་ལྷག་དང༌། དེ་དག་གི་ནང་གསེས་སྡེ་ཚན་ཉེར་ལྔ་ཙམ་ཡོད་འདུག
སེར་བྱེས་ངོ་སྤྲོད་གཏེར་གྱི་ཁ་བྱང་གི་གསལ་བཤད་དུ། སེ་ར་ཐེག་ཆེན་གླིང་གི་ཡ་གྱལ་སེར་བྱེས་མཁས་སྙན་གྲྭ་ཚང་འདི་ཉིད་མུས་སྲད་པ་ཀུན་མཁྱེན་བློ་གྲོས་རིན་ཆེན་སེང་གེ་དེ་ཉིད་ཀྱིས་ཕྱག་བཏབ་པ་ནས་མི་ལོ་ལྔ་བརྒྱ་ལྷག་ཙམ་གྱི་རིང་དགེ་འདུན་པའི་ཞལ་གྲངས་དང༌། སློབ་གཉེར། སྒྲིག་གཞི། རྟེན་དང་བརྟེན་པའི་འཛུགས་སྐྲུན། དཔལ་འབྱོར་རྟེན་གཞི་བཅས་འོག་མིན་གྱི་བཀོད་པ་དང་ཚུལ་མཚུངས་པ་དེ་ལྟར་ཡང༌། ཕྱི་ལོ་ ༡༩༥༩ ལོ་ནས་རྒྱ་ནག་གིས་བོད་མི་རིགས་རིག་གཞུང་བཅས་དང་བཅས་པ་རྩ་བརླག་ཏུ་གཏོང་བའི་སྦྱོར་ངན་རིམ་བསྟུད་དུ་བརྩམས་པའི་ལོ་རྒྱུས་ཀྱི་དཀྱོགས་མཚམས་ནང༌། ྋགོང་ས་མཆོག་གི་རླབས་ཆེན་དགོངས་བཞེད་དང་ལམ་སྟོན་འོག བོད་ཕྱི་ནང་གཉིས་ཀའི་སེར་བྱེས་མཁས་སྙན་གྲྭ་ཚང་ངམ་ཡ་རབས་དང་སྙིང་རྗེའི་གྲྭ་ཚང་ཞེས་ཡོངས་སུ་གྲགས་པའི་སྣོད་བཅུད་ཀྱི་བཀོད་པ་བརྙན་པར་གྱི་ལམ་ནས་མཚོན་ཐབས་གཙོ་བོར་བྱས་ཤིང༌།
བཙན་བྱོལ་དུ་ཕེབས་པའི་བརྒྱུད་རིམ་དང༌། སྦག་ས་ཆོས་སྒར་དུ་གནས་བཅས་པའི་ལོ་རབས་དྲུག་ཅུའི་ནང་གི་གནས་སྟངས། ལོ་རབས་བདུན་བཅུའི་ལོ་མགོར་རྒྱ་གར་ལྷོ་ཕྱོགས་མེའི་སོར་རྫོང་ཁོངས་སྦེལ་ཀོབ་བོད་པའི་གཞིས་ཆགས་སུ་གནས་སྦོར་བྱས་རྗེས་ཀྱི་འཛུགས་སྐྲུན་དང་འཕེལ་རིམ། སྔར་སྲོལ་འཆད་ཉན་རྒྱུན་འཛིན་དང༌། སྲ་བརྟན་གོང་འཕེལ། ན་ལེན་ཊའི་པཎ་གྲུབ་ཚོའི་ལེགས་བཤད་གཞི་ལ་བཞག་སྟེ། ྋརྗེ་ཡབ་སྲས་དང་རྗེ་བཙུན་ཆོས་ཀྱི་རྒྱལ་མཚན་ཡས་སྲས་ཀྱི་བསྟན་བཅོས་ཀྱིས་མིག་བྱས་ཏེ། རྒྱལ་བའི་དགོངས་པ་གཏན་འབེབས་དང་ལག་ལེན་བྱེད་པའི་བརྒྱུད་རིམ། དུས་རབས་ཉི་ཤུ་བ་དང་ཉེར་གཅིག་པའི་ནང་ཞིང་གཤེགས་ཡོངས་གྲགས་བླ་སྤྲུལ་དགེ་བཤེས་མཁས་དབང་ཁག་ཅིག་གི་སྐུ་དཔར་སྟོང་ལ་ཉེ་བ་མང་བོ་ཞིག་ཐབས་འཚོལ་གྱིས་ལག་ཏུ་གང་ཡོང་ཕྱོགས་བསྒྲིགས་བྱས་ཏེ། རིག་དངོས་སྲུང་སྐྱོབ་དང་གཞན་ཡང༌། ཡོངས་གྲགས་ཞིང་གཤེགས་བླ་སྤྲུལ་དང་མཁས་དབང་ཁག་ཅིག་གི་སྐུ་པར་དང་ཞལ་བཞུགས་བླ་སྤྲུལ་དང་མཁས་དཔང་རེ་ཟུང་ལས་གཞན་གྱི་སྣང་བརྙན་བཅས་སྐད་བཞིར་ཕབ་བསྒྱུར་གྱི་ལམ་ནས་སྤྱི་དོན་ལྟ་བུ་ཞིག་སྟེ། ནང་དོན་རེ་རེ་བཞིན་ལྷུ་ལག་གྲོལ་དེ་ལུང་རིགས་རྒྱས་བཤད་ཀྱི་སྤྲོས་པ་བརྐྱངས་ན་ཆོས་འབྱུང་ཆེན་མོ་ཞིག་ཅེས་ཀྱང་ཡོང་ངེས་སོ། །ཞེས་གསལ་ཡོད་འདུག
དེབ་འདི་མདོ་སྨད་སྤྱི་ཟུར་རོང་བོ་བློ་བཟང་སྙན་གྲགས་ལགས་ཀྱིས་བོད་ཡིག་ཐོག་བརྩམས་ཏེ། ཝཱར་ན་མཐོ་སློབ་ཀྱི་སློབ་དགེ་བློ་བཟང་ནོར་བུ་ཤཱསྟྲི་ལགས་ཀྱིས་དབྱིན་ཡིག་ཏུ་བསྒྱུར་བ་དང༌། བོད་གཞུང་ཐེ་ཝན་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་རྒྱ་ཡིག་དང༌། ཀར་ཎ་ཊ་ཀའི་ཡིག་སྒྱུར་ཊི་ཨེན་པུ་རུ་ཤོ་ཐཱ་མ་རཱ་ཨོ་ལགས་ཀྱིས་ཀར་ཎ་ཊ་མངའ་སྡེ་སྐད་ཡིག་ཏུ་བསྒྱུར་ཡོད་འདུག
འདི་གའི་གསར་འགོད་པ་ཨ་རིག་འགྱུར་མེད་ཀྱིས་རྒྱ་གར་ལྷོ་ཕྱོགས་བཏང་བའི་གནས་ཚུལ།
ཁོང་ལ་བཀྲ་ཤེས་བདེ་ལེགས་ཞུ།
དྲ་སྤོབས་པ་མཐའ་ཡས་ལགས།
འདས་ཟིན་པའི་ལོ་རྒྱུས་གླེང་དོན་མེད་ལ། གལ་སྲིད་ཁྱེད་ལ་ན་ཟུག་རེ་མཆིས་ཚེ་གླེང་ཡང་ཆོག
སེར་བྱེས་ངོ་སྤྲོད་ཨེ། སྐད་ཡིག་མང་པོར་བསྒྱུར་བ་ཡག་པོ་རེད། དེ་མིན་རང་རེ་བོད་པ་ཚང་ལ་མཚོན་ན་སེར་བྱེས་ཚང་ངོ་མ་འཕྲོད་མཁན་ཞིག་སུ་ཡོད། སེར་བྱེས་ཚང་གི་ཕ་ཆེ་རབས་དང་མ་གཉན་རབས་ཚོ་གླེང་མ་གླེང་ཡོད་མེད་མི་ཤེས། དེ་ལས་སེར་བྱེས་ཚང་གིས་བྱས་ཤིང་བསག་པའི་དཀར་ནག་ལས་ཀྱི་རི་མོ་དེ་ཚོ་མ་འཆོལ་བར་སྟོན་ཐུབ་པའི་དེབ་ཅིག་འབྲི་མཁན་རེ་བྱུང་ན་ཅི་མ་རུང་། སེར་བྱེས་ཚང་དང་འབྲེལ་བའི་སྟག་བྲག་གཡུལ་འགྱེད་སོགས