བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གནས་ཚུལ་སྤེལ་བ་ལྟར་ན། ཟླ་སྔོན་མའི་ཚེས་ ༢༦ ཉིན་ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ། རྨ་ཆུ་རྫོང་དངུལ་རྭ་ཞང་ཁུལ་སྐོར་སྡེ་བའི་གོ་བྷེ་ཚང་གི་དཀོན་མཆོག་ཚེ་འཕེལ་འབོད་པ་ཀན་ལྷོ་བོད་རིགས་རང་སྐྱོང་ཁུལ་རྒྱལ་ཁབ་བདེ་འཇགས་མི་སྣས་ཆབ་སྲིད་ཀྱི་དོགས་གཞིའི་འོག་གློ་བུར་འཛིན་བཟུང་གིས་དེ་གའི་སྤྱི་བདེ་ལྟ་སྲུང་ཁང་དུ་བཀག་ཉར་བྱས་ཡོད་པ་དང༌། ཁོང་འཇུ་བཟུང་སྐབས་རང་ཁྱིམ་སྔོག་བཤེར་གྱིས་གློག་ཀླད་དང་དོགས་ཡོད་ཅ་དངོས་རིགས་འཕྲོག་འཁྱེར་བྱས་ཡོད་འདུག
ཁོང་ནི་ ༡༩༧༠ ལོར་སྐྱེས་ཤིང༌ཆུང་དུས་དངུལ་རྭ་ཞང་སློབ་ཆུང་ནས་རྨ་ཆུ་རྫོང་བོད་སློབ་འབྲིང་བར་བོད་རྒྱ་གཉིས་ལ་སློབ་གཉེར་བྱས། ༡༩༨༩ ལོར་རྒྱ་གར་ལ་བཙན་བྱོལ་དུ་ཡོང་སྟེ་སུ་ཇཱ་སློབ་གྲྭར་ལོ་གསུམ་ཙམ་རིང་བོད་དབྱིན་གཉིས་སློབ་གཉེར་བྱས། ༡༩༩༤ ལོར་ཕྱིར་བོད་དུ་ལོག ༡༩༩༥ ལོའི་བོད་ཟླ་ ༣ པའི་ནང་ཀན་སུའུ་ཞིང་ཆེན་རྒྱལ་ཁབ་བདེ་འཇགས་ཐིང་ཟེར་བས་ཆབ་སྲིད་ཀྱི་དོགས་གཞིའི་འོག་འཛིན་བཟུང་གིས་ཟླ་གཉིས་ལྷག་ལ་བཙོན་འཇུག་གིས་ཚ་འདྲི་དང་གཅར་རྡུང་བྱས། ༡༩༩༦ ལོར་ལོར་པེ་ཅིང་མི་རིགས་སློབ་ཆེན་དུ་རྒྱ་དབྱིན་གཉིས་སློབ་སྦྱོང་གནང་བ་དང༌། ༡༩༩༧ ལོར་ལན་ཀྲུའུ་ནུབ་བྱང་མི་རིགས་སློབ་ཆེན་གྱི་ཕྱི་གླིང་སྐད་ཡིག་སྡེ་ཁག་ཏུ་ལོ་གཉིས་རིང་ལ་དབྱིན་ཡིག་སློབ་སྦྱོང་གནང༌།
༡༩༩༩ ལོར་ལན་ཀྲུའུ་ནུབ་བྱང་མི་རིགས་སློབ་ཆེན་གྱི་བོད་ཡིག་སྡེ་ཁག་ཏུ་བོད་ཀྱི་རིག་གནས་སྐོར་སློབ་སྦྱོང་གིས་སློབ་མཐར་ཕྱིན། དེ་རྗེས་རྨ་ཆུ་རྫོང་དངུལ་རྭ་ཞང་སློབ་ཆུང་གི་བོད་དགེའི་ལས་འགན་འཁུར་སྐབས་དཔེ་བཟང་ཅན་གྱི་དགེ་རྒན་ལ་བདམས་ཐོན་གྱིས་ཕུལ་བྱུང་དགེ་རྒན་གྱི་བྱ་དགའ་ཐོབ། ༢༠༠༤ ལོ་ནས་རྨ་ཆུ་རྫོང་བོད་རིགས་སློབ་འབྲིང་དུ་ལས་བསྒྱུར་གྱིས་རྫོང་སློབ་འབྲིང་གི་བོད་དབྱིན་གཉིས་ཀྱི་དགེ་རྒན་ཀྱི་ལས་ཀ་བྱས།
༢༠༠༥ ལོར་ན་གཞོན་སྙན་ངག་པ་སྐྱབས་ཆེན་བདེ་གྲོལ་མཉམ་དུ་འགྲོ་གྲོན་སྒེར་གཏོང་གིས་མཆོད་མེ་བོད་ཀྱི་རྩོམ་རིགས་དྲ་བ་གསར་འཛུགས་བྱས་ཏེ། བོད་ཀྱི་རྩོམ་རིགས་བྱ་གཞག་དར་སྤེལ་གྱི་སྡིངས་ཆ་གསར་བསྐྲུན་ཐད་ཤུགས་སྣོན་བརྒྱབ། རྒྱ་གཞུང་གིས་ ༢༠༠༧ དང་ ༢༠༠༨ ལོ་གཉིས་ནང་དྲ་རྒྱ་བཀག་བསྡོམས་ཐེངས་ཁ་ཤས་བྱས་ཀྱང་དཀའ་ངལ་ལ་གདོང་ལེན་གྱིས་མུ་མཐུད་མཆོད་མེ་བོད་ཀྱི་རྩོམ་རིགས་དྲ་བའི་ལས་དོན་རྒྱུན་འཁྱོངས་གནང་བཞིན་ཡོད།
མཆོད་མེ་བོད་ཀྱི་རྩོམ་རིགས་དྲ་བ་དེ་ཧ་ཅང་ཡག་པོ་འདུག དེར་བརྟེན་ད་དུང་མུ་མཐུད་བསྟུན་ཤེས་བྱས་ཏེ་དྲ་བ་འདི་གཉེར་ཐུབ་ན་ཡག་པོ་འདུག འོན་ཀྱང་དཀའ་ལས་ཡོད་ལོས་ཤེས།