ལྔ་བཅུའི་དུས་དྲན་ཐད་སྤྱི་འཐུས་ཁག་ཅིག་གི་དགོངས་ཆར། (དུས་བབ་ཀྱི་དམིགས་བསལ་ལེ་ཚན།)

བོད་པ་རྣམས་སྐྱབས་བཅོལ་དུ་གྱར་ཏེ་ལོ་ངོ་ལྔ་བཅུ་འཁོར་བ་དང༌། བཙན་བྱོལ་བོད་མིའི་གཞུང་འབྲེལ་ཆབ་སྲིད་ཀྱི་མཛད་སྒོ། གསུམ་བཅིའི་དུས་དྲན་ཐེངས་ལྔ་བཅུ་འཁོར་བ་སོགས་ཀྱི་གལ་གནད་ཆེ་བའི་དུས་ཚོད་དང་བསྟུན་ཏེ། བོད་མི་མང་སྤྱི་འཐུས་ཁག་ཅིག་ལ་ལྔ་བཅུའི་དུས་དྲན་གཙི་སྲུང་བྱ་ཕྱོགས་དང༌། རྩ་དོན་འཐབ་རྩོད་ཀྱི་གནས་བབ། འབྱུང་འགྱུར་གྲ་སྒྲིག་གང་དགོས་སོགས་ཀྱི་ཐད་དགོངས་ཚུལ་བསྡུས་ཡོད།

རྒྱ་གར་ལྷོ་ཕྱོགས་དགའ་ལྡན་ཤར་བརྩེ་སོག་པ་ཁང་ཚན་ནས་ཕེབས་པའི་མདོ་སྨད་སྤྱི་འཐུས་གསེར་རྟ་ཚུལ་ཁྲིམས་འོད་ཟེར་ལགས་སུ། བོད་གཞུང་བཀའ་ཤག་གིས་ལོ་ངོ་ལྔ་བཅུའི་དུས་དྲན་སྲུང་གཙི་གོ་སྒྲིག་བྱེད་ཕྱོགས་ཐད། དགོངས་འཆར་ཅི་ཡོད་བཀའ་འདྲི་ཞུས་པའི་ལན་དུ་ཁོང་གིས་བརྗོད་དོན།

ད་སྐབས་བོད་པ་འདི་ནང་པ་སངས་རྒྱས་པའི་ཆོས་ཀྱི་བསྟི་གནས་ཤིག་ཆགས་ཡོད་པ་རེད། སྤྱི་བཏང་གི་ཆ་ནས། ཆོས་ཕྱོགས་ཀྱི་སྟེང་ནས་དུས་དྲན་སྲུང་གཙི་བྱེད་དགོས་པ་དེ་གལ་ཆེན་པོ་ཞིག་ཆགས་ཡོད་ལ། དེབ་དཔར་བསྐྲུན་དང་དཔེ་དེབ་དབུ་འབྱེད་ཀྱི་མཛད་སྒོ་སོགས་ཀྱང་སྤྱི་ཡོངས་ཀྱི་ཆ་ནས་ཧ་ལས་པའི་གཟི་བརྗིད་ཆེན་པོ་དང་ཡག་པོ་རེད། ང་རང་གི་བསམ་ཚུལ་ལ། དེབ་འགྲེམས་སྤེལ་དང་དཔར་སྐྲུན་བྱས་པ་དེ་ཚོར་ཀློག་མཁན་ཚད་ལྡན་རེ་ཡོང་དགོས་པ་གལ་ཆེན་པོ་རེད་བསམ་གྱིན་ཡོད། དེབ་ཕར་སྤྲད་པ་ཡིན་ནའང་དེར་དོ་སྣང་མ་བྱས་པར་གཡུག་བཞག་ནས་ལོ་གཅིག་གཉིས་སོང་བའི་རྗེས་ནས་ཐལ་རྡུལ་གྱི་ནང་ནས་བཏོན་ཏེ། སྔོན་མ་ཅིག་ལ་སྤྲད་སོང་གང་ཤེས་ཟེར་བ་འདྲ་བོ་ཞིག་མིན་པརའདོད་ཀྱིན་ཡོད། དེ་ལས་ཀྱང་གལ་ཆེ་བ་ཞིག་ནི། མི་མང་གི་བསམ་བློའི་གོ་རྟོག་མཐོ་རུ་གཏོང་རྒྱུ་དེ་རེད། སྤྱི་ཚོགས་བསམ་བློའི་གོ་རྟོག་ཡར་རྒྱས་སུ་གཏོང་རྒྱུ་དེ་གཟུངས་སྔགས་ཟློ་རྒྱུ་དང་མ་ཎི་བགྲང་རྒྱུ། ཚོགས་འཚོགས་རྒྱུ། དེབ་དཔར་སྐྲུན་བྱས་ནས་མི་མང་གི་ལག་ཏུ་བཞག་པ་ཙམ་གྱིས་ཡར་རྒྱས་འགྲོ་གི་མ་རེད། འདི་ལ་ངེས་ཅན་དུ་རྒྱུ་མཚན་ལྡན་པའི་སྒོ་ནས་མི་མང་ལ་སློབ་སྟོན་དང༌། གཟབ་སྦྱོང༌། རིག་གནས་དཔྱད་གླེང༌། བསམ་བློའི་དཔྱད་བསྡུར་སོགས་བརྒྱུད་དེ་སྤྱི་ཚོགས་ཀྱི་གནད་དོན་དང༌། མི་མང་གི་མཐུན་ལམ་སོགས་སྒྲུབ་སྟངས་ཀྱི་བསམ་བློའི་གོ་རྟོགས་མཐོ་རུ་གཏོང་རྒྱུ་ཧ་ལས་པའི་གལ་ཆེན་པོ་རེད། ཅེས་བརྗོད་སོང༌། ཡང་ཁོང་ལ་དགོན་སྡེའི་སྤྱི་ཚོགས་ཁྲོད་ཀྱི་བསམ་བློ་ཡར་རྒྱས་དང༌། མི་སྐྱའི་སྤྱི་ཚོགས་ཁྲོད་ཀྱི་བསམ་བློ་ཡར་རྒྱས་སྐོར་ལ་ཁྱད་པར་ཡོད་མེད་དྲིས་པར་ཁོང་གིས། ངའི་བསམ་པར་གྲྭ་བའི་སྤྱི་ཚོགས་ཀྱི་བསམ་བློ་ཡར་རྒྱས་གཏོང་བར་ལས་སླ་བོ་ཡོད་རེད་བསམ། སློབ་གཉེར་བྱེད་མཁན་གྱི་དགོན་སྡེ་ཞིག་ཡིན་ན། ཁོས་ཐོས་བསམ་གྱི་ཁྲོད་ནས་སློབ་གཉེར་བྱེད་ཀྱིན་ཡོད་སྟབས། ཁོ་ལ་རྒྱུ་མཚན་ལྡན་པའི་སྐད་ཆ་ཞིག་ལབ་ན་ལམ་སང་ངོ་འཕྲོད་རྒྱུ་དང༌། ལམ་སང་བསམ་བློ་ཡར་རྒྱས་འགྲོ་རྒྱུ་ལས་སླ་བོ་ཡོད། ཡང་གཞུང་ཆེན་མོར་སློབ་གཉེར་བྱེད་ཀྱིན་མེད་པའི་དགོན་སྡེ་དང་གྲོང་བ་དེ་ཚོར་ཏོག་ཙམ་ཁག་གི་རེད། ཅེས་གསུངས་སོང༌།

དབྱིན་ཡུལ་ནས་ཕེབས་པའི་ཡོ་རོབ་སྤྱི་འཐུས་བསོད་ནམས་ཚེ་རིང་ཕར་སེ་ལགས་སུ། བཙན་བྱོལ་གྱི་ལོ་ངོ་ལྔ་བཅུའི་རིང་གི་བོད་དོན་གྱི་གྲུབ་འབྲས་དང༌། བོད་ཕྱི་ནང་གཉིས་སུ་རྩ་དོན་ཐད་ལས་འགུལ་འདྲ་མིན་སྤེལ་བ་ལས་གྲུབ་འབྲས་དང་ནུས་པ་ཆེ་ཤོས་གང་ལ་ངོས་འཛིན་བྱེད་ཀྱིན་ཡོད་དམ།

༡༩༥༩ ནས་ད་ལྟ་བར་དུ་ང་ཚོས་ལས་ཀ་ཆེ་ཤོས་ག་རེ་བྱས་ཡོད་པ་རེད་ཟེར་ན། དང་པོ་དེ་ལ་བཙན་བྱོལ་གྱི་གཞུང་ཞིག་འཛུགས་ཐུབ་ཡོད་པ་རེད། གཉིས་པ་དེ་སློབ་གྲྭ་དང་དགོན་སྡེ་མང་བོ་ཞིག་འཛུགས་སྐྲུན་བྱས་ཐུབ་ཡོད་པ་རེད། གསུམ་པ་དེ་ལ་རྒྱལ་སྤྱིའི་ཐོག་བོད་དོན་ཁྱབ་བསྒྲགས་དང་དོ་སྣང་ཤུགས་ཆེན་བཟོ་ཐུབ་ཡོད་པ་རེད། ང་ཚོའི་བོད་དོན་འཐབ་རྩོད་འདི་དམག་བརྒྱབས་ཏེ་ཐོབ་རྒྱུ་མེད་པ་དེ་གཏན་འཁེལ་བ་ཡིན་སྟབས། བོད་ཀྱི་རྩ་དོན་འདི་འགྲུབ་བྱེད་ཀྱི་དམིགས་ཡུལ་ཆེ་ཤོས་དེ་རྒྱལ་སྤྱིའི་ཐོག་རྒྱབ་སྐྱོར་རག་ཡ་དེ་རེད། འདིའི་ཐད་ནས་ད་ལྟ་བར་དུ་ཧ་ལས་བའི་ལས་ཀ་ཡག་པོ་ཞིག་གྲུབ་ཡོད་བསམ། ན་ནིང་བོད་ས་ཡོངས་སུ་འོས་ལངས་ཆེན་མོ་བྱུང་ཡོད་པ་རེད། ང་ཚོ་ཕྱི་ལོགས་སུ་ཡོད་པའི་བོད་པ་ཚོས་ཀྱང་བོད་དོན་ཐོག་ཤུགས་རྒྱག་གི་ཡོད། བོད་ཀྱི་དཔའ་བོ་དཔའ་མོ་དེ་ཚོས་སོ་སོའི་རང་སྲོག་བློས་བཏང་ནས་རྒྱ་མི་ལ་ཁ་གཏད་བཅག་པ་རེད། འདིས་ཕྱི་ལོགས་ཀྱིབོད་པ་ཚོར་སེམས་ཤུགས་གསར་བ་ཞིག་སྤྲད་ཡོད་པ་རེད། དེ་གཅིག་རེད། གཉིས་ནས་རྒྱལ་སྤྱིའི་ཐོག་ལ་བོད་ཀྱི་གནས་སྟངས་འདི་རྒྱ་མིས་ག་རེ་ལབ་པ་དེ་བདེན་པ་མིན་པ་ཞིག་ར་འཕྲོད་ཡོད་པ་རེད། གསུམ་ནས་རྒྱལ་སྤྱིའི་ཐོག་ང་ཚོར་རོགས་པ་བྱེད་མཁན་གྱི་ཚོགས་པ་མང་བོ་ཞིག་ཡོད་པ་རེད། དེ་ཚོར་སྔར་ལས་རོགས་པ་བྱ་འདོད་ཀྱི་འདུན་པ་ཤུགས་ཆེན་པོ་འཕར་ཡོད། ན་ནིང་ཡུ་རོབ་དང་ཨ་རི་གཙོས་པའི་ཕྱི་རྒྱལ་ཡུལ་གྲུ་མང་པོ་ཞིག་ལ་བོད་དོན་གསལ་བོ་བྱུང་ཡོད། ཡིན་ནའང་བློ་ཕམ་པ་ཞིག་ནི། བོད་ནང་གི་གནས་ཚུལ་དེ་ཚོ་སྔར་ལས་ཛ་དྲག་དང་དམ་དྲག་ཆེ་རུ་ཕྱིན་སོང༌། ད་ལོའང་དམ་དྲག་ཆེ་རུ་བཏང་ནས་བོད་མི་དཀྱུས་མ་ཞིག་གི་འཚོ་བ་སྐྱེལ་སྟངས་ལའང་གནོད་སྐྱོན་བཏང་སྟེ། མཆོད་སྐོར་བྱ་མི་ཆོག་པ་སོགས་ཀྱི་གནས་ཚུལ་བྱུང་ཡོད་སྟབས། བོད་ནང་ལ་ཐོབ་དགོས་ཡ་དེ་ཐོབ་ཡོད་པ་མ་རེད། ད་དུང་ཡིན་ནའང་བཙན་བྱོལ་གཞུང་དམངས་གཉིས་ཀྱིས་རྒྱ་ནག་དང་འབྲེལ་བ་བྱས་ཏེ། བོད་ནང་གི་བདེ་འཇགས་ཡག་ཏུ་འགྲོ་རྒྱུ་དང༌། རྒྱ་མི་ཁོང་ཚོས་ཀྱང་བོད་དོན་ཐོག་དྲག་གནོན་གྱིས་འགྲོ་སོང་འབོར་ཆེན་གཏོང་མི་དགོས་པ་ཞིག་ཆགས་ན་བསམ་གྱིན་ཡོད། ཅེས་གསུངས་སོང༌།

འབྲས་ལྗོངས་ནས་ཕེབས་པའི་བཀའ་རྒྱུད་སྤྱི་འཐུས་ཀརྨ་ཤེས་རབ་མཐར་ཕྱིན་ལགས་སུ། ཐེངས་ཞེ་དགུ་བའི་གསུམ་བཅུའི་དུས་དྲན་ནས། ཐེངས་ལྔ་བཅུ་བའི་གསུམ་བཅུ་དུས་དྲན་བར་གྱི་བོད་ནང་གི་ཞི་བའི་གྱེན་ལངས་ཐད་བསམ་ཚུལ་གང་འདྲ་ཡོད་མེད་སྐོར་དྲིས་པར་ཁོང་གིས་བརྗོད་དོན།

བར་ལམ་བོད་ཆོལ་ཁ་གསུམ་གྱི་སྐྱ་སེར་ཕོ་མོ་རྒན་གཞོན་ཡོངས་སུ་རྫོགས་པའི་ལྷག་བསམ་རྣམ་དག་གིས་རང་གི་རྒྱལ་ཁབ་དང་མི་རིགས་ཀྱི་ཆེད་དུ་ྋགོང་ས་སྐྱབས་མགོན་ཆེན་པོའི་ཐུགས་དགོངས་ཀྱི་འོག་ནས་རྡོག་རྩ་གཅིག་སྒྲིལ་བྱས་ཏེ། འོས་ལངས་ཆེན་མོ་གནང་པ་དེ་ན་ཧ་ལས་པའི་གཟི་བརྗིད་དང་སྤོབས་པ་ཞིག་རེད། ང་ཚོ་བཙན་བྱོལ་བ་ཚོས་ཀྱང་དེ་བཞིན་བྱེད་ཀྱིན་ཡོད། ཁོར་ཡུག་དང་ཡུལ་དུས་ཀྱི་སྟེང་ནས་བཤད་ན་བརྒྱ་འགྱུར་སྟོང་འགྱུར་གྱི་ཁྱད་པར་ཆེན་པོ་ཡོད་པ་རེད། འདི་ནས་ལས་འགུལ་འདྲ་སྤེལ་བ་ཡིན་ནའང༌། ཧ་ལས་ན་བདུན་ཕྲག་གཅིག་ཙམ་ལ་བཀག་འགོག་དང་དུས་ཡུན་ཐུང་ཙམ་ལ་རྡུང་རྡུག་བྱེད་རྒྱུ་རེད། བོད་ནང་གི་བོད་མི་ཚོས་རྒྱ་མིས་རྡུང་རྡེག་དང་བཙོན་འཇུག དམར་གསོད་ཡོང་བ་ཤེས་བཞིན་ལས་འགུལ་སྤེལ་བ་དེ་ཧ་ཅང་སྙིང་སྟོབས་ཆེན་པོ་རེད། བོད་མི་རྣམས་རྒྱ་མིའི་བཙན་གནོན་གྱི་འོག་ཏུ་སྡོད་ཐུབ་ཀྱིན་མེད་པ་གསལ་བོ་རེད། དེར་བརྟེན། མ་འོངས་པར་ང་ཚོ་རང་བཙན་ཡིན་ན་འདྲ། དབུ་མའི་ལམ་ཡིན་ན་འདྲ། གང་གི་ཐད་ནས་ཀྱང་མངོན་འདོད་འགྲུབ་རྒྱུ་ཡིན་པར་ཡིད་ཆེས་བརྟན་པོ་ཡོད། ང་ཚོ་བཙན་བྱོལ་བོད་གཞུང་ངོས་ནས་ཀྱང་གང་ཐུབ་ཅི་ཐུབ་ཅིག་གནང་གིན་ཡོད་མོད། ཁོར་ཡུག་གི་གནས་སྟངས་དང་རྒྱུ་མཚན་མང་པོ་ཞིག་གི་དབང་གིས་ འབད་བརྩོན་བྱས་པ་དེ་དག་དག་ཅིག་འགྲུབ་ཀྱིན་མི་འདུག ང་ཚོའི་ནུས་པའི་འདང་གིན་མེད་པའི་ཚོར་བ་ཞིག་འདུག ཅེས་བརྗོད་བྱུང༌། ཡང་ཁོང་ལ་བོད་ཁམས་ཡོངས་སུ་ཛ་དྲག་གི་འོས་ལངས་ཐེངས་མང་བྱས་པའི་ཁྲོད་ནས་བོད་མིའི་མངོན་འདོད་དང་གྲུབ་འབྲས་གང་འདྲ་ཞིག་ཐོན་ཡོད་མེད་དྲིས་པར་ཁོང་གིས། གྲུབ་འབྲས་བླ་ན་མེད་པ་ཐོབ་ཡོད་པ་རེད་བསམ་གྱིན་ཡོད། གང་ཡིན་ཟེར་ན། སྔོན་མ་འཛམ་གླིང་ནང་བོད་དོན་ཧ་མི་གོ་མཁན་མང་པོ་ཡོད། ད་སྐབས་འཛམ་གླིང་གི་རྒྱལ་ཁབ་ཕལ་མོ་ཆེ་དང་མི་རིགས་ཕལ་མོ་ཆེའི་ནང་དུ། བོད་དོན་ཧ་མི་གོ་མཁན་ཉུང་ཉུང་རེད། དེ་གྲུབ་འབྲས་ཆེན་པོ་གཅིག་རེད། གཉིས་ནས་ལྔ་བཅུ་ང་བརྒྱད་སྐབས་ཀྱི་མྱོང་ཚོར་དེ་གཞིས་བྱེས་གཉིས་ཀྱི་རྒན་པོ་ཚོས་མ་གཏོགས་གཞོན་སྐྱེས་ཚོས་མི་ཤེས། ད་ཆ་བོད་པའི་གཞོན་སྐྱེས་ཚོའི་སེམས་སུའང་མ་འོངས་པར་སེམས་ཤུགས་སླེབས་ཡོད། དེ་ནི་ང་ཚོའི་མ་རྩ་ཧ་ཅང་རྩ་ཆེན་པོ་ཞིག་རེད་སྙམ། ཞེས་གསུངས་སོང༌།

རྒྱ་གར་གྱི་རྒྱལ་ས་ལྡི་ལི་ནས་ཕེབས་པའི་མདོ་སྟོད་སྤྱི་འཐུས་དབུ་དཀར་ཚང་གཡུ་སྒྲོན་ལགས་སུ། ཐེངས་ལྔ་བཅུ་བའི་གསུམ་བཅུའི་དུས་དྲན་སྐབས། བོད་ནང་སྔར་ལོ་ལྟར་གྱེན་ལངས་བྱུང་ཚེ་རྩ་དོན་ལ་ཕན་པ་ཡོད་མེད་ཀྱི་ངོས་འཛིན་གང་འདྲ་ཡོད་མེད་དྲིས་པར་ཁོ་མོས། 

ཐེངས་ལྔ་བཅུ་བའི་གསུམ་བཅུ་དུས་དྲན་དེ་སང་ཉིན་ཚོགས་ཡ་རེད། དེའི་སྐབས་སུ་ཏག་ཏག་བོད་ནང་དུ་ཛ་དྲག་གི་གནས་ཚུལ་བྱུང་པར་ང་རང་སྒེར་གྱི་ངོས་ནས་བློ་འཚབ་དང་དངངས་སྐྲག་ཆེན་པོ་ཡོད། ཐེངས་ལྔ་བཅུ་བའི་གསུམ་བཅུའི་དུས་དྲན་གྱི་ཉིན་མོ་དེ། ང་ཚོ་བཙན་བྱོལ་དུ་འབྱོར་ནས་ལོ་ངོ་ལྔ་བཅུ་འགོར་བའི་ཉིན་མོ་རེད། ད་ཐེངས་ཀྱི་གསུམ་བཅུའི་དུས་དྲན་དེ་དམིགས་བསལ་གྱི་ཉིན་མོ་ཞིག་ལ་འཁེལ་གྱིན་ཡོད་སྟབས། ང་རང་ལ་བློ་འཚབ་ཆེན་པོ་ཡོད། ཡིན་ནའང་ང་ཚོས་ལས་འགུལ་འདྲ་མིན་སྤེལ་དགོས་པ་རེད་བསམ་གྱིན་ཡོད། རྒྱ་ནག་གིས་ཁ་སང་དེ་རིང་ལྷ་ས་གཙོས་བོད་ཁམས་ཡོངས་སུ་དམག་མི་མང་བོ་འཕར་སྣོན་བྱས་ཏེ། དམ་དྲག་ཤུགས་ཆེན་པོ་བྱེད་ཀྱིན་ཡོད་པ་རེད།  གནས་ཚུལ་དེ་ཚོ་གོ་ཡོང་དུས་སོ་སོ་སྡོད་མི་ཚུགས་པ་འདྲ་བོ་ཞིག་རེད། དེར་བརྟེན། ང་ཚོའི་ངོས་ནས་ཀྱང་གང་ཐུབ་ཅི་ཐུབ་ཀྱིས་ལས་འགུལ་ད་དུང་མུ་མཐུད་དུ་སྤེལ་དགོས་པ་རེད་བསམ་གྱིན་འདུག བོད་ནང་གི་མི་དེ་ཚོས་རང་རང་གི་རང་སྲོག་བློས་གཏོང་བྱས་ཏེ། ལས་འགུལ་སྤེལ་གྱིན་ཡོད་པ་རེད། ད་ནི་ང་ཚོས་ལས་འགུལ་གྱི་རྣམ་པ་བསྒྱུར་དགོས་ཀྱིན་འདུག སྐད་འབོད་རྒྱག་རྒྱུ་ཡག་པོ་རེད་དེ། བོད་ནང་གི་བོད་མི་ཚོར་རྒྱབ་སྐྱོར་དང་མྱ་ངན་མཚོན་ཆེད། ང་ཚོས་ལས་འགུལ་འགྲོ་ཐབས་འདུག་ཐབས་ཙམ་མིན་པར། རྒྱལ་སྤྱིའི་ཐོག་ལ་འབོད་སྐད་ཞུ་ཡ་དང་ཆབ་སྲིད་ཀྱི་ལས་དོན་སོགས་ལས་འགུལ་འདྲ་མིན་སྤེལ་ཏེ། བོད་པ་མི་རེ་རེ་ངོས་ནས་དུས་ཚོད་རྩ་ཆེན་པོར་བརྩིས་ཏེ་ལས་འགུལ་འདྲ་མིན་སྤེལ་དགོས། ཐེངས་ལྔ་བཅུ་བའི་གསུམ་བཅུའི་དུས་དྲན་སྟེང༌། གསར་འགོད་པ་མང་བོ་ཞིག་ཐག་རིང་ནས་ཕེབས་འདུག ཁོང་ཚོ་ཐག་རིང་ནས་གསུམ་བཅུའི་དུས་དྲན་གྱི་ཉིན་མོ་བསམ་ནས་འདིར་ཡོང་དགོས་དོན། བོད་དོན་འདི་ཛ་དྲག་གི་ནང་གནས་ཡོད་པ་ཞིག་དང༌། ཐེངས་ལྔ་བཅུ་བའི་གསུམ་བཅུའི་དུས་དྲན་འདི་སྔར་ལས་ཛ་དྲག་གི་གནས་ཚུལ་ཆགས་པར་དོགས་ནས་ཡོང་བ་རེད། གནས་སྟངས་དེ་ལ་གཞིགས་ན། བོད་དོན་འདི་རྒྱལ་སྤྱིའི་ཐོག་ཚད་ག་འདྲ་ཞིག་ལ་སླེབས་ཡོད་མེད་གསལ་བོ་རེད། ལས་དོན་གལ་ཆེན་པོ་གཅིག་ནི་རྒྱལ་སྤྱིའི་ཐོག་བོད་དོན་ལ་དོ་སྣང་ཤུགས་ཆེ་རུ་གཏོང་ཐབས་དང༌། རྒྱལ་ཁབ་འདྲ་མིན་དང་མི་རིགས་འདྲ་མིན་གྱི་རྒྱབ་སྐྱོར་རག་ཐབས་བྱ་རྒྱུ་དེ་རེད། ལས་དོན་འདི་ཙམ་གཞན་ལས་ང་ཚོ་བཙན་བྱོལ་བའི་གནས་བབ་འོག་ནས་ལས་ཀ་བྱ་རྒྱུ་ཁག་པོ་རེད། ཅེས་གསུངས་སོང༌།

སིད་སུ་ནས་ཕེབས་པའི་ཡོ་རོབ་སྤྱི་འཐུས་སྨོན་དཀར་བསོད་ནམས་ཕུན་ཚོགས་ལགས་སུ། རྒྱ་ནག་གིས་བཙན་གྱིས་བོད་ཞི་བའི་བཅིངས་གྲོལ་བཏང་སྟེ་ལོ་ངོ་ལྔ་བཅུ་ཟེར་དེ་སྲུང་གཙི་བྱེད་དུ་བཅུག་ན། གནད་དོན་གང་འདྲ་འབྱུང་སྲིད་དམ་ཅེས་དྲིས་པའི་ལན་དུ་ཁོང་གིས་བརྗོད་དོན།

ན་ནིང་ཐེངས་བཞི་བཅུ་ཞེ་དགུ་བའི་གསུམ་བཅུའི་དུས་དྲན་ནས་བཟུང༌། བོད་ས་ཡོངས་སུ་ལས་འགུལ་ཤུགས་ཆེན་སྤེལ་ཡོད། དེ་ནི་བོད་ནང་ལ་རྒྱ་གཞུང་གི་སྲིད་ཇུས་ངན་པ་དེ་ལོ་བཞི་བཅུ་ཞེ་དགུའི་རིང་ལ་སྤེལ་ཞིང༌། ད་དུང་གུ་ཡངས་ཀྱི་རྣམ་པ་མེད་པར་མནར་གཅོད་དང་བཙན་འཛུལ་མུ་མཐུད་དུ་བྱེད་ཀྱིན་ཡོད་སྟབས། བོད་ནང་དུ་བཞུགས་པའི་སྤུན་ཟླ་ཚོས་ཟླ་བ་དང་ཟླ་བ་མཐུད་ནས་དཀའ་སྡུག་མྱངས་ཡོད། གནས་སྟངས་དེ་ྋགོང་ས་སྐྱབས་མགོན་ཆེན་པོ་གཙོས་ང་ཚོ་བྱེས་འབྱོར་བ་ཚོས་ཀྱང༌། གང་ཐུབ་ཅི་ཐུབ་ཀྱིས་རྒྱ་གཞུང་གིས་བོད་པའི་སྟེང་ལ་མནར་གཅོད་དང་བཙོན་འཇུག་དམར་གསོད་གཏོང་བཞིན་པའི་ངན་སྤྱོད་དེ་མཚམས་འཇོག་བྱེད་དགོས་སྐོར་རྒྱལ་སྤྱི་དང༌། གྲོས་ཚོགས་ཁག་དང་སྲིད་གཞུང་ཁག་མཉམ་སྤྲེལ་རྒྱལ་ཚོགས་སོགས་སུ་ཞུས་ཡོད་པ་རེད་དེ། རྒྱ་གཞུང་གི་དཔོན་རིགས་ཚོའི་དབང་ཆ་ཆེ་ཐག་ཆོད་དེ། དེ་ཙམ་གྱིས་ལེགས་འགྲུབ་བྱུང་ཡོད་པ་མ་རེད། རྒྱ་གཞུང་གིས་ལབ་པ་ལྟར་ན་ད་ལོ་བོད་ཞི་བའི་བཅིངས་འགྲོལ་ཐོབ་ནས་ལོ་ངོ་ལྔ་བཅུ་འཁོར་ཡོད་པ་རེད་ལ། ང་ཚོས་ངོས་ནས་བཙན་བྱོལ་དུ་འབྱོར་ནས་ལོ་ངོ་ལྔ་བཅུ་འཁོར་གྱིན་ཡོད་པ་རེད། དུས་ཚིགས་གནད་འགག་ཅན་འདི་ལ་བོད་གཞིས་བྱེས་གཉིས་ཀྱི་བོད་མི་ཚོས་ལས་འགུལ་སྤེལ་སྟངས་ཀྱི་ཐད་ནས་ཉེ་ལམ་ྋགོང་ས་མཆོག་གིས་གསལ་བོར་གསུངས་ཡོད་པ་རེད། ད་ལྟའི་ཆར་ཨ་མདོ་ས་ཁུལ་སོགས་མང་བོ་ཞིག་ན་ཡང་ཛ་དྲག་གི་ལས་འགུལ་དེ་མེ་བཞིན་འབར་ནས་ཡོང་གིན་འདུག ཡང་དང་བསྐྱར་དུ་དེ་འདྲ་ཡོང་དགོས་དོན་རྒྱ་མིའི་སྲིད་ཇུས་ཀྱི་མནར་གཅོད་དེས་དབང་གིས་རེད། དེ་ཚོར་ཐུགས་ཁག་ཡོད་པ་མ་རེད་དེ། ཞི་འཇམ་པོ་ཞིག་གི་འོག་ནས་གང་ཡག་ཅི་ཡག་ཞིག་ལ་དགོངས་པ་བཞེས་དགོས། འདི་ནས་ཕར་ལ་ཞུ་དགོས་པའང་འདི་ཡིན། གློ་བར་དུ་འོས་ལངས་བྱས་ཀྱང་འབྲས་བུ་མངོན་གསལ་ཞིག་ཐོན་རྒྱུ་ཁག་པོ་ཡིན་པ་མ་ཟད། རྡུང་རྡེག་དང་བཙོན་འཇུག་དམར་གསོད་མང་བོ་ཞིག་བྱུང་ཚེ་དཀའ་ངལ་ཆེན་པོ་རེད། དེ་འདྲ་མི་ཡོང་བའི་ཆེད་དུ་ག་རེ་བྱས་ན་ཡག་པོ་འདུག དེའི་ཐད་དགོངས་པ་བཞེས་རྒྱུ་གལ་ཆེན་པོ་རེད། གང་ཡིན་ཟེར་ན། ང ཚོ་བོད་ཀྱི་གཏམ་དཔེར། བྱ་མ་འདྲོག་གོང་ལ་སྒོང་བ་ལེན་ཐབས་ཞེས་པ་ལྟར། ང་ཚོས་ཞི་བའི་སྒོ་ནས་རྒྱ་གཞུང་ལ་བོད་དོན་འདི་ཧ་གོ་རུ་འཇུག་རྒྱུ་དེ་གལ་ཆེན་པོ་རེད། བོད་ནང་དུ་ལས་འགུལ་ག་འདྲ་ཞིག་སྤེལ་ནའང་མནར་སྤྱོད་ཚད་མེད་ཅིག་མྱོང་དགོས་ཀྱིན་ཡོད། ཐེངས་གཅིག་གཉིས་ཤིག་ལ་ལས་འགུལ་ཤུགས་ཆེ་ཙམ་སྤེལ་ཏེ། རང་གི་གཟུགས་པོ་འཕྲོ་ལྷག་ཏུ་བཏང༌། མི་ལུས་རིན་པོ་ཆེ་འདི་དུས་ཡུན་ཐུང་ཐུང་ཞིག་ལས་གནས་མ་ཐུབ་ན་བློ་ཕམ་པོ་རེད། འདི་འདྲའི་ཐོག་ཚང་མས་དགོངས་པ་ཆེ་བཞེས་གནང་དགོས། ཞེས་གསུངས་སོང༌།

རྒྱ་གར་གྱི་རྒྱལ་ས་ལྡི་ལི་ནས་ཕེབས་པའི་མདོ་སྟོད་སྤྱི་འཐུས་ཆོས་སྐྱོང་དབང་ཕྱུག་ལགས་སུ། ད་ལོ་ནས་བཟུང་ང་ཚོས་བཙན་བྱོལ་དུ་གྱི་ལོ་ངོ་ལྔ་བཅུའི་དུས་དྲན་སྲུང་གཙི་བྱེད་ཀྱིན་ཡོད་ལ། རྒྱ་གཞུང་གིས་བོད་ཞི་བའི་བཅིངས་འགྲོལ་བཏང་སྟེ་ལོ་ལྔ་བཅུའི་དུས་ཆེན་སྲུང་གཙི་བྱ་འཆར་ཡོད་པ་གཉིས་ལ་ལྟ་སྟངས་ཅི་འདྲ་ཡོད་སྐོར་དྲིས་པར་ཁོང་གིས་བརྗོད་དོན།

ང་ཚོ་བཙན་བྱོལ་དུ་ཡོང་དོན་གཙོ་བོ་བོད་ནང་ཟ་རྒྱུ་འཐུང་རྒྱུ་མེད་པ་དང༌། བོད་ནང་གི་ཁོར་ཡུག་སོགས་མ་འཕྲོད་པར་སྐྱབས་བཅོལ་དུ་ཡོང་བ་ཞིག་གཏན་ནས་མ་རེད། སྔོན་མ་བོད་ནང་དུ་ྋགོང་ས་མཆོག་གིས་དབུ་ཁྲིད་པའི་འོག་ནས་བོད་མི་ཚོ་འཚོ་བཞུགས་བྱས་སྐབས། རྒྱ་མིའི་དབང་འཛིན་པ་དེ་ཚོས་བོད་ཐོག་དྲག་གནོན་རབ་དང་རིམ་པ་མང་བོ་སྤེལ་བྱས་ཏེ། ང་ཚོ་འུ་ཐུག་ནས་རྒྱ་མིའི་གནོན་ཤུགས་དང་དྲག་གནོན་ཞིག་གི་འོག་ནས་སྐྱབས་བཅོལ་དུ་ཡོང་བ་རེད། དེ་བཞིན་ང་ཚོ་དཀའ་ངལ་ཞིག་གི་འོག་ནས་ཡོང་སྟེ་དཀའ་ངལ་ཞིག་གི་སྟེང་དུ་འཚོ་བ་རོལ་བའི་ལོ་ངོ་ལྔ་བཅུའི་རིང་སྡུག་བསྔལ་གྱི་ཚོར་བ་ཤུགས་ཆེན་པོ་ཡོད་པ་རེད། བོད་གཞིས་བྱེས་གཉིས་ཁ་བྲལ་དགོས་བའི་གནས་སྟངས་དང༌། དེ་བཞིན། བཙན་བྱོལ་ལ་འབྱོར་བའི་བོད་པ་ཚོས་སོ་སོའི་ས་ཞིང་དང་ཁྱིམ་གཞིས། གཞིས་ཆགས་དང་དགོན་སྡེ་ཁག གཞུང་སོགས་སྲ་བརྟན་དུ་བཏང་བའི་དཀའ་ངལ། བོད་ནང་ལྟ་བུར་མཚོན་ནའང་ལོ་ངོ་ལྔ་བཅུའི་རིང་དྲག་གནོན་དང༌། དམར་གསོད་བཙོན་འཇུག་སོགས་ཀྱི་སྐྱོ་སྡུག་གི་ལོ་ངོ་ལྔ་བཅུ་རེད། དེར་བརྟེན། སྔོན་མའི་དཀའ་ངལ་དང་སྐྱོ་སྡུག་གི་ལོ་ངོ་འདི་ཚོ་ད་དུང་ཡིན་ནའང་མྱ་ངན་གྱི་སྟེང་ནས་དུས་ཚིགས་དེ་དག་ཕྱིར་དྲན་གྱི་ཚུལ་དུ་དུས་དྲན་བྱེད་ཀྱིན་ཡོད། རྒྱ་མིས་བོད་ཞི་བའི་བཅིངས་འགྲོལ་ཐོབ་ནས་ལོ་ངོ་ལྔ་བཅུ་འགོར་བའི་དུས་ཆེན་ལབ་ཡ་དེ་ང་ཚོས་ཤེས་བཞིན་པ་རེད། རྒྱ་གཞུང་གིས་རྟག་པར་གསར་འགྱུར་བརྒྱུད་ལམ་ཁག་དུ་བཤད་ཀྱིན་ཡོད། ཀླ་ཀློའི་མི་རིགས་ཤིག་དང་གྲལ་རིམ་སྤྱི་ཚོགས་ཀྱི་ལམ་ལུགས་ཤིག བཀས་བཀོད་བརྒྱུད་འཛིན་གྱི་སྲོལ་ལུགས་ཤིག་ཁོང་ཚོས་བསྒྱུར་བཅོས་བཏང་ནས། སྔོན་མའི་བོད་དང་ད་ལྟའི་བོད་གཉིས་ཀྱི་བར་ལ་གནམ་ས་ལྟ་བུའི་ཁྱད་པར་ཡོད་ཚུལ་དང༌། ད་ལྟའི་བོད་ལ་བདེ་སྐྱིད་ཀྱི་ཁྱིམ་གཞིས་ཡོད་རབས་སོགས་རྫུན་གཏམ་མང་བོ་ལབ་ཀྱིན་ཡོད་པ་ཚང་མས་མཁྱེན་གསལ་རེད། དེ་འདྲ་རྫུན་གཏམ་མང་བོ་ལབ་ནས་སྔོན་མའི་བོད་ཀྱི་དཀའ་ངལ་དེ་ཚོ་ཁོང་ཚོས་སེལ་ཏེ། བོད་ཞི་བའི་བཅིངས་འགྲོལ་ཐོབ་ནས་དགའ་དགའ་སྤྲོ་སྤྲོ་དང་བདེ་སྐྱིད་ཀྱི་འཚོ་བར་རོལ་བཞིན་པའི་ངེས་འཛིན་ཐོག་ནས་དུས་ཆེན་ལབ་ཟེར་གྱིན་ཡོད། རྒྱ་མིའི་ངོས་ནས་རྫུན་གཏམ་འཁྱོག་བཤད་དེ་དག་བདེན་པར་བསྒྱུར་ཐབས་ལ་འབད་ཀྱིན་ཡོད། ང་ཚོས་བདེན་པ་དང་དངོས་ཡོད་གནས་སྟངས་དེ་རྒྱལ་སྤྱིའི་སྟེང་ལ་ར་སྤྲོད་ཐུབ་བྱ་དགོས། ཞེས་གསུངས་སོང༌།