གྲྭ་བ་དྲུག་བཀག་ཉར།

གྲྭ་བ་དྲུག་བཀག་ཉར།མདོ་སྨད་ཀླུ་ཚང་དགོན་པའི་གྲྭ་པ་ ༡༠༩ འཛིན་བཟུང་བྱས་པའི་ཁྲོད་ཀྱི་གྲྭ་པ་ ༡༠༣ གློད་གྲོལ་དང༌། གྲྭ་བ་ ༦ ད་དུང་མུ་མཐུད་བཀག་ཉར་བྱས་ཡོད་འདུག 
དེ་རིང་འདི་གར་གནས་ཚུལ་འབྱོར་བ་ལྟར་ན། ད་ལོའི་ལོ་གསར་ཚེ་གཅིག་ཉིན་མདོ་སྨད་མང་ར་ཀླུ་ཚང་དགོན་པའི་དགེ་འདུན་པ་ཚོས་རྫོང་སྲིད་གཞུང་སྒོ་མདུན་བར་ཞི་བའི་མར་མེ་ཁྲོམ་སྐོར་གྱིས་རྒྱ་གཞུང་ལ་ངོ་རྒོལ་གྱི་ལས་འགུལ་སྤེལ་བའི་ཁྲོད། གྲྭ་བ་ ༡༠༩ ཙམ་འཛིན་བཟུང་བཀག་ཉར་བྱས་ཡོད་པ་དང༌། དེ་རིང་སྔ་དྲོ་དགེ་འདུན་པ་ ༡༠༣ ཙམ་གློད་གྲོལ་བཏང་ཡོད་ཀྱང༌། སུམ་མདོ་ཞང་གོང་བ་སྡེ་བའི་འཇམ་དབྱངས་ཤེས་རབ་དང་འཇམ་དབྱངས་དངོས་གྲུབ། རུ་མང་སྡེ་བའི་འཇམ་དབྱངས་མཁྱེན་རབ་དང་ལུང་རྟོགས། མགོ་མང་ཞང་ཚ་ནག་སྡེ་བའི་ཀུན་བཟང་དང༌། སུམ་མདོ་ཞང་མཐའ་བ་སྡེ་བའི་ཐབས་མཁས་རྒྱ་མཚོ་བཅས་དགེ་འདུན་པ་ ༦  ད་དུང་མུ་མཐུད་དུ་བཀག་ཉར་བྱས་ཡོད་འདུག་པ་མ་ཟད། ས་གནས་ཡོངས་དམ་དྲག་ཤུགས་ཆེན་བྱས་ཏེ། ཡུལ་མི་དགོན་པར་འགྲོ་རྒྱུར་ཡང་མཆོག་མཆན་ཞུ་དགོས་ཤིང༌། ཁ་སང་རྒྱ་གཞུང་འབྲེལ་ཡོད་སྡེ་ཁག་གིས་བཀའ་རྒྱ་བཏང་སྟེ། ཕྱི་ཕྱོགས་ནས་སློབ་གཉེར་དུ་ཡོང་ཡོད་པ་ཚོ་ཀླུ་ཚང་དགོན་ནས་ཕྱིར་ལོག་དགོས་ཚུལ་བརྗོད་ཡོད་འདུག