རྔ་བ་བསྭེ་དགོན་པའི་ནང་ཉེན་རྟོག་པའི་རླངས་འཁོར་ཞིག་གིས་ཉུང་མཐར་བོད་མི་ ༤ ཙམ་ལ་རྨས་སྐྱོན་བཟོས་ཡོད་ཀྱང༌། ད་ཆར་ཁོང་ཚོའི་གནས་སྟངས་གང་འདྲ་ཆགས་ཡོད་མེད་ཤེས་རྟོགས་ཐུབ་ཀྱིན་མི་འདུག་ཟེར།
ཀིརྟི་བྱེས་པ་གྲྭ་ཚང་གི་གྲྭ་ཚེ་རིང་ལགས་ཀྱིས་འདི་གར་གནས་ཚུལ་སྤྲད་པ་ལྟར་ན། རྔ་བའི་ཇོ་ནང་བསྭེ་དགོན་པར་ལོ་ལྟར་བོད་ཟླ་ ༡ ཚེས་ ༣ ནས་ ༡༥ བར་དགོན་པའི་སྨོན་ལམ་ཆེན་མོ་ཞིག་ཚོགས་ཀྱིན་ཡོད་ཀྱང༌། ད་ལོ་རྒྱ་གཞུང་གིས་ཚོགས་སུ་བཅུག་མེད་སྟབས། དེའི་ཚབ་ལ་ཕྱི་ཚེས་ ༣ ཉིན་བྱམས་པ་གླིང་སྐོར་གྱི་ཆོས་ཀྱི་བྱེད་སྒོ་སྤེལ་སྐབས། དགོན་པའི་དགེ་འདུན་པ་དང་མཐའ་འཁོར་གྱི་མི་དམངས་བརྒྱ་ཕྲག་འགའ་དགོན་པར་འདུ་འཛོམས་ཀྱིས་ཕྱག་མཆོད་བྱེད་སྐབས། དགོན་པའི་གླིང་བར་གྱི་མི་ཚོགས་ཁྲོད། ཉེན་རྟོག་རུ་ཁག་གི་རླངས་འཁོར་ཞིག་སླེབས་པར་མི་མང་དང་གྲྭ་བ་ཚོས་ལམ་ཁ་ཕྱེས་མེད་ཀྱང༌། ཉེན་རྟོག་པ་ཚོས་བཙན་ཚུགས་ཀྱིས་མི་ཚོགས་ཁྲོད་བསྐོར་ཏེ། ཉུང་མཐར་མི་ ༤ ཙམ་ལ་རྨས་སྐྱོན་བཟོས་ཡོད་འདུག ད་ཆར་ཁོང་ཚོ་སྨན་ཁང་དུ་ཕྱིན་ཡོད་མེད་དང་གནས་སྟངས་གང་འདྲ་ཡིན་མིན་ཤེས་རྟོགས་ཐུབ་ཀྱིན་མི་འདུག་ཟེར། དེའི་རྗེས་སླར་ཡང་དམག་མི་དང་ཉེན་རྟོག་པ་མང་པོ་སླེབས་ཏེ་དགོན་པ་དམ་དྲག་བྱེད་ཀྱིན་ཡོད་འདུག་ཟེར།
རྔ་བ་ཇོ་ནང་བསྭེ་དགོན་ཐུབ་བསྟན་ཕྱོགས་ལས་རྣམ་རྒྱལ་གླིང་ནི། ཇོ་ནང་བའི་དགོན་པ་ཆེ་གྲས་ཤིག་ཡིན་པ་དང༌། དགེ་འདུན་པ་ ༧༠༠ བྱལྷག་ཡོད་འདུག ལོ་སྔོན་མའི་སྤྱི་ཟླ་ ༣ ནས་ད་ལྟའི་བར་རྒྱ་ནག་གཞུང་ལ་ངོ་རྒོལ་ཤུགས་ཆེན་བྱེད་མཁན་གྱི་དགོན་པ་ཞིག་ཡིན་པ་དང༌། དགོན་པའི་དགེ་འདུན་པ་མང་པོ་ཞིག་འཛིན་བཟུང་བཙོན་འཇུག་བྱས་ཡོད་འདུག
