བཙོན་པ་ ༨ གློད་གྲོལ།

དེ་རིང་འདི་གར་གནས་ཚུལ་འབྱོར་བ་ལྟར་ན། མདོ་སྨད་མང་ར་ཀླུ་ཚང་དགོན་པའི་དགེ་འདུན་པ་དྲུག་དང༌། སུམ་མདོ་ཞང་གི་བོད་རིགས་ལས་བྱེད་བཀྲ་ཤིས་དོན་འགྲུབ། ཁོང་གི་སྤུན་ཆུང་སྦྱིན་པ་རྒྱ་མཚོ་བཅས་བསྡོམས་པའི་མི་ ༨ གློད་གྲོལ་བཏང་ཡོད་འདུག

ཉེ་སྔོན་ཕྱི་ཟླ་ ༢ ཚེས་ ༢༥ ཉིན་མདོ་སྨད་མང་ར་ཀླུ་ཚང་དགོན་པའི་དགེ་འདུན་པ་ཚོས་ཞི་བའི་མར་མེ་ཁྲོམ་སྐོར་བྱས་ཏེ། རྒྱ་གཞུང་ལ་ངོ་རྒོལ་བྱས་པའི་ཁྲོད་ནས་དགེ་འདུན་པ་ ༡༠༩ ཙམ་འཛིན་བཟུང་བཀག་གཉར་བྱས་ཡོད་ལ། ཟླ་ ༣ ཚེས་ ༢༡ ཉིན་དགེ་འདུན་པ་ ༡༠༣ ཙམ་གློད་གྲོལ་བཏང་ཡོད་ཀྱང། གྲྭ་འཇམ་དབྱངས་ཤེས་རབ་དང་འཇམ་དབྱངས་དངོས་གྲུབ། འཇམ་དབྱངས་མཁྱེན་རབ། ལུང་རྟོགས། ཀུན་བཟང་། ཐབས་མཁས་རྒྱ་མཚོ་བཅས་གྲྭ་བ་ ༦ མུ་མཐུད་བཀའ་ཉར་བྱས་ཡོད་མོད། ཉིན་འགའི་སྔོན་ལ་གོང་གི་གྲྭ་བ་དྲུག་དང་སུམ་མདོ་ཞིང་གི་ལས་བྱེད་བཀྲ་ཤིས་དོན་འགྲུབ། སྐབས་དེར་བོར་བརླག་ཏུ་ཕྱིན་པའི་བཀྲ་ཤིས་དོན་འགྲུབ་ཀྱི་སྤུན་ཆུང་སྦྱིན་པ་རྒྱ་མཚོ་བཅས་གློད་གྲོལ་བཏང་ཡོད་འདུག

འོན་ཀྱང་། གོང་གི་མི་དེ་དག་ད་བར་བཙོན་ཁང་ནས་གནས་སྟངས་ཅི་བྱུང་དང་གློད་གྲོལ་སྐབས་དངུལ་སྤྲད་ཡོད་མེད། དེ་བཞིན་ཁོང་རྣམས་ཕྱིར་རང་རང་གི་ལས་གནས་སུ་ཞུགས་ཆོག་མིན་བཅས་ཀྱི་གནས་ཚུལ་གང་ཡང་ཤེས་རྟོགས་བྱུང་མི་འདུག