རྨ་ཆུ་རྫོང་དབལ་པཎ་ཤང་གསར་མ་དགོན་གྱི་གར་འཆམ་སྐབས། རྒྱ་དམག་ཉིས་བརྒྱ་ཙམ་གྱིས་དགོན་པར་མཆོད་མཇལ་དུ་འགྲོ་མཁན་མི་མང་ལ་གང་བྱུང་ཉེས་རྡུང་བཏང་སྟབས་ཡུལ་མི་བོད་པ་དང་རྒྱའི་དམག་དཔུང་བར་ལག་འཛིང་ཤོར་ཡོད་འདུག
རྨ་ཆུའི་སྒྲོལ་དཀར་སྐྱབས་ལགས་ཀྱིས་དུས་བབ་ཀྱི་ཟིན་བྲིས་སུ་བཀོད་པ་ལྟར་ན། ཕྱི་ཚེས་ ༡༠ ཉིན་གྱི་ཆུ་ཚོད་ ༡༢ ཐོག་རྨ་ཆུ་རྫོང་དབལ་པཎ་ཤང་གསར་མ་དགོན་གྱི་གར་འཆམ་སྐབས། རྒྱ་དམག་ཉིས་བརྒྱ་ཙམ་གྱིས་དགོན་པར་མཆོད་མཇལ་ཞུ་བར་འགྲོ་མཁན་མི་མང་ལ་གང་བྱུང་ཉེས་རྡུང་དང་སྔོགས་བཤེར་གྱིས་ལྕགས་རྡོ་དང་གློ་གྲི་སོགས་འཕྲོགས་འཁྱེར་དང༌། དེ་བཞིན་དབལ་པཎ་ཤང་དུ་གཞུང་གྲུ་འཛིན་མཁན་ཤི་ལོག་ཟེར་བའི་ནང་སྔོགས་བཤེར་གྱིས་སྤྱང་ལྤགས་ཤིག་ཐོན་པར་མེ་མདའ་ཡོད་པར་བསྙད་དེ་སྤྱང་ལྤགས་འཕྲོག་འཁྱེར་གྱིས་ཁོ་པར་ཉེས་རྡུང་བཏང་བས། ཁོའི་གྲོགས་པོ་དཀོན་བྷེ་དང་བློ་བཟང༌། རྔ་པ་རུ་སྐོར་གྱི་གྲགས་པ་སོགས་ཡོང་སྟེ་དམག་མི་ཚོར་སྤྱང་ཀི་མེ་མདས་བསད་པའི་དཔང་རྟགས་མེད་པར་སྤྱང་ལྤགས་ཁྱེར་བ་ཡིན་ན་བཙན་འཕྲོགས་ཡིན་པས་ཁྲིམས་འཛིན་མི་སྣ་ཞིག་གི་ངོས་ནས་བཤད་ན་ཐལ་ཆ་ཆེ་བའི་བྱ་སྤྱོད་ཅིག་ཡིན་ཚུལ་བཤད་དེ་ཁ་རྩོད་སྐབས། དམག་དཔུང་གིས་ཁོང་ཚོར་ལག་ལྕགས་བརྒྱབ་སྟེ་འཛིན་བཟུང་བྱས་མཚམས། གར་འཆམ་ལ་མཆོད་མཇལ་ཞུ་མཁན་མང་ཚོགས་དང་དམག་དཔུང་ལག་འཛིང་གིས་དམག་མི་བརྒྱད་ལ་རྡོ་གཞུས་ཏེ་རྨས་སྐྱོན་ཕོག་ཡོད་འདུག་ལ། གོང་གསལ་འཛིན་བཟུང་བྱས་པའི་མི་བཞི་དེའང་ཚུར་འཕྲོགས་ཡོད་འདུག དཀོན་བྷེའི་མགོ་ལ་དམག་མིས་ཉེས་རྡུང་སྐབས་རྨས་སྐྱོན་ཚབས་ཆེན་ཕོག་སྟེ་དེང་སྐབས་ལན་ཀྲུའུ་སྨན་ཁང་དུ་ཡོད་ཅིང༌། བློ་བཟང་ལ་རྩིབས་རུས་གཉིས་བཅག་ཡོད་མོད་ད་ལྟའི་ཆར་རྔ་བ་རུ་སྐོར་གྱི་གྲགས་པ་མཉམ་བྲོས་བྱོལ་དུ་སོང་ཡོད་འདུག ཕྱི་ལོ་༢༠༠༩ ཟླ་༤ ཚེས་༡༢ ཉིན་རྨ་ཆུ་རྫོང་དབལ་བཎ་ཤང་གི་ཤི་ལོག་ཞུ་བ་ས་གནས་དམག་དཔུང་གི་འཇིགས་བསྐུལ་འོག་འཛིན་བཟུང་གིས་དེང་རྨ་ཆུ་རྫོང་བཀག་ཉར་ཁང་དུ་ཡོད་འདུག དེ་བཞིན་ཉིན་དེར་དབལ་བཎ་ཤང་གསར་མ་དགོན་གྱི་དོ་དམ་ཨུ་ཡོན་ལྷན་ཁང་གི་ལས་སྣེ་རྣམས་དང༌། དབལ་བཎ་ཤང་གི་ཤང་ཀྲང༌། རུ་ཆེན་ཁག ཚོ་དཔོན་ཁག་རྫོང་རིམ་པའི་འབྲེལ་ཡོད་མི་སྣས་འབོད་འགུགས་ཀྱིས་ཚོགས་འདུ་ཚོགས་ཏེ། ཀན་སུའུ་ཞིང་ཆེན་གྱི་མངའ་ཁོངས་སུ་རྨ་ཆུ་རྫོང་ཁ་བྲལ་གྱི་ཟིང་ཆ་ལངས་ས་གཙོ་བོ་ཞིག་ཆགས་ཡོད་པ་དང༌། ལྷག་དོན་དབལ་པཎ་རུ་དགོན་ནང་རྒྱལ་ཁབ་ཁ་བྲལ་དང་འབྲེལ་བའི་ལས་འགུལ་མང་པོ་ལངས་ཡོད་པས། ཐེངས་འདིར་ངེས་པར་རྒོ་ཤུལ་བློ་བཟང་གཙོས་ཉེས་ཅན་གཏེ་བོ་མི་ལྔ་འཛིན་བཟུང་བྱ་རྒྱུ་ཡིན་པའི་བཀའ་རྒྱ་བཏང་ཡོད་འདུག
ཕྱི་ལོ་༢༠༠༩ ཟླ་༣ ཚེས་༢༨ ཉིན་རྨ་ཆུ་རྫོང་གི་དགོན་པ་ཁག་ཏུ་དམག་དཔུང་གིས་གྲྭ་པ་རེར་འབྲས་རས་ཁུག་གཅིག་དང་ལག་ཁུག་གཅིག ཕོ་བྲང་པོ་ཏཱ་ལའི་འདྲ་པར་ངོས་སུ་དམར་ཤོག་ཚོགས་པའི་མཚོན་རྟགས་འཕྱར་བའི་དམག་དཔུང་ལ་གཟབ་འཕྱོར་སྤྲས་པའི་བོད་མི་འགས་དགའ་བསུ་བཞིན་ཡོད་པའི་པར་རིས་རེ་སྤྲད་ཡོད་འདུག་ཀྱང༌། དགོན་པའི་དོ་དོམ་ཨུ་ཡོན་ལྷན་ཁང་གི་ལས་སྣེ་དང་གྲྭ་པ་རྒན་པ་རེ་ཟུང་ལས་དགོན་པ་ཕལ་ཆེར་གྱི་གྲྭ་མང་དངོས་རྫུན་དེ་ལེན་དུ་ཡོང་ཡོད་མི་འདུག
རྒྱ་གཞུང་གི་རྒྱང་བསྒྲགས་ལས་ཁུངས་ཀྱི་འབྲེལ་ཡོད་མི་སྣས་དགོན་པ་དང་ཤང་ཁག་ཏུ་ཨ་རིའི་བརྙན་འཕྲིན་དང་ཨེ་ཤ་ཡ་རང་དབང་རླུང་འཕྲིན་སོགས་ལ་ལྟ་ཉན་བྱེད་མི་ཆོག་པའི་བཙན་བཀའ་བཏང་སྟེ། སྒེར་གྱིས་ཉོས་པའི་ཨ་རིའི་བརྙན་འཕྲིན་གཏོང་འཐེན་ཡོ་ཆས་བསྡུ་ལེན་གྱིས་ཚབ་ཏུ་རྒྱ་ནག་ནང་ཁུལ་བརྙན་འཕྲིན་ཡོངས་ལ་ལྟ་ཐུབ་པའི་ཡོ་ཆས་༡༧༠ ལྷག་བཙུགས་ཡོད་འདུག
