གསོ་རིག གསར་འཕྲིན། སྤྱི་ལོ་ ༢༠༠༨ དབྱར་ཁ། འདོན་ཐེངས་ལས་བཤུས།
བོད་ཀྱི་གསོ་རིག་གི་སྤྱི་བཤད།
བོད་རིགས་མི་དམངས་ཀྱིས་འཛམ་གླིང་ས་མཐོའི་ཡུལ་དུ་རྒྱུན་རིང་འཚོ་གནས་བྱས་ཏེ་མི་ན་བར་གནས་པ་དང་ན་བ་གསོ་བའི་ཐབས་སམ་རིག་པ་མང་པོ་རྙེད་ནས་བོད་ཀྱི་གསོ་བ་རིག་པ་འདི་གསར་གཏོད་བྱས་ཤིང༌། གནའ་བོའི་ཞང་ཞུང་ལུགས་ཀྱི་སྨན་དཔྱད་ནས་བརྒྱུད་དེ་དུས་རབས་ཀྱི་འཕེལ་འགྲོས་དང་བསྟུན་བོད་ཀྱི་སྨན་དཔྱད་ཀྱི་རིག་པ་འདི་ཚད་ལྡན་ཅན་དང་མ་ལག་ཡོད་པ། ས་གནས་རང་བཞིན་དང་མི་རིགས་རང་ཉིད་ཀྱི་ཁྱད་ཆོས་ཡོད་པ་ཞིག་ཏུ་གྱུར་ཡོད། དེར་བརྟེན་བོད་ཀྱི་གསོ་རིག་ནི་ལོ་རྒྱུས་ཡུན་རིང་ལྡན་པ་ནང་དོན་ཕུན་སུམ་ཚོགས་པའི་འཛམ་གླིང་སྟེང་གི་གསོ་དཔྱད་རིག་པ་ཞིག་ཡིན།
འཁོར་བའི་གནས་སུ་སྐྱེ་བའི་འགྲོ་བ་མི་ལ་ཡང་སྐྱེ་རྒ་ན་འཆིའི་སྡུག་བསྔལ་འབྱུང་ཞིང༌། སྡུག་བསྔལ་དེ་ཡང་ཚེ་འདི་དང་སྐྱེ་བ་སྔ་མར་བསགས་པའི་ལས་ནས་བྱུང་བ་ཡིན་པར་འདོད།
ལུས་ཁམས་གྲུབ་བྱེད་འབྱུང་བ་ལྔ༌།
བོད་ཀྱི་གསོ་བ་རིག་པས་འཇིག་རྟེན་སྟེང་གི་སྐྱེ་དངོས་ཐམས་ཅད་ས་ཆུ་མེ་རླུང་ནམ་མཁའ་བཅས་འབྱུང་ལྔ་ཡིས་བསྐྱེད་ཅིང༌། མིའི་ལུས་ཁམས་འདི་ཡང་འབྱུང་བ་ལྔས་གྲུབ་ཡོད་པར་བཤད། འབྱུང་བ་ས་ཡིས་ལུས་ཁམས་ཀྱི་ཤ་དང་རུས་པ། སྣའི་དབང་པོ་དང་དྲི་འཛིན་སྐྱེད་པར་བྱེད། ཆུ་ཡིས་ཁྲག་དང་གཤེར་ཁུ། ལྕེ་ཡི་དབང་བོ་དང་རོ་འཛིན་སྐྱེད་པར་བྱེད། མེ་ཡིས་དྲོད་དང་མདོག་མདངས། མིག་གི་དབང་པོ་དང་མཐོང་ཚོར་སྐྱེད་པར་བྱེད། རླུང་གིས་དབུགས་དང་པགས་པའི་དབང་བོ་དང་རེག་བྱའི་ཚོར་བ་སྐྱེད་པར་བྱེད། ནམ་མཁའ་ཡིས་ལུས་ཁམས་ཀྱི་བུ་ག རྣ་བའི་དབང་པོ་དང་སྒྲ་འཛིན་སྐྱེད་པར་བྱེད།
ལུས་ཁམས་ཀྱི་འདུ་བ་རྣམ་གསུམ།
འབྱུང་བ་ལྔ་ཡིས་ལུས་ཁམས་སུ་གནས་པའི་ནུས་པའམ་འདུ་བ་སྟེ་རླུང་དང་མཁྲིས་པ། བད་ཀན་གསུམ་སྐྱེད་པར་བྱེད་ཅིང༌། འདུ་བ་རླུང་ནི་ཕྱི་ནང་དུ་རྒྱུ་བའི་དབུགས་རླུང་གི་རང་བཞིན་ཡིན་པས་འབྱུང་བ་རླུང་གིས་སྐྱེད་ལ། དེ་ཡིས་ལུས་སེམས་ཀྱི་འགུལ་སྐྱོད། ཁྲག་རྒྱུན་འཁོར་རྒྱུགས། དབུགས་གཏོང་ལེན། ཟས་ཟ་བ་དང་ཆུ་འཐུང་བ། དྭངས་སྙིགས་འབྱེད་དོར། བཤང་གཅིན་བཀག་གཏོང༌། མཆིལ་ལུད་འདོར་བ། སྐད་སྒྲ་འབྱིན་པ། རྩ་དཀར་གྱི་བྱེད་ལས། དབང་པོ་ལྔའི་ཤེས་པ་གསལ་བ། འདོད་ཆགས་དང་དངངས་སྐྲག་སྐྱེ་བ། ལུས་སེམས་གཉིས་ཀྱི་འབྲེལ་མཐུད་པ་ལྟ་བུ་བྱས་ཏེ་ཚེ་སྲོག་སྲུང་འཛིན་བྱེད་པ་ཡིན།
འདུ་བ་མཁྲིས་པ་ནི་དྲོད་དང་ཚ་བའི་རང་བཞིན་ཡིན་པས་འབྱུང་བ་མེ་ཡིས་སྐྱེད། དེ་ཡིས་ལསུ་ཁམས་ཀྱི་དྲོད་ཚད་སྲུང་འཛིན་དང་པགས་མདངས་གསོ་བ། བཀྲེས་ཤིང་སྐོམ་པ། བཟའ་བཏུང་ལེན་པ་དང་འཇུ་བ། བློ་སྟོབས་དང་རིག་སྟོབས་སྐྱེ་བ། ཞེ་སྡང་དང་ངར་ཤུགས་སྐྱེ་བའི་བྱ་བ་བྱེད། འདུ་བ་བད་ཀན་ནི་བསིལ་བའམ་ལྕི་བའི་རང་བཞིན་ཡིན་པས་འབྱུང་བ་ས་ཆུ་གཉིས་ཀྱིས་སྐྱེད། དེ་ཡིས་གཟུགས་པོ་དང་སེམས་པའི་བརྟན་ཆ་སྲུང་འཛིན་དང་ལུས་ཁམས་འཇམ་ཞིང་སྣུམ་པར་བྱེད་པ། གཉིད་ཁུག་པ། རུས་ཚིགས་ཀྱི་འབྲེལ་སྦྱོར། བཟོད་སེམས་སྐྱེ་ཞིང་ཡིད་རྨོངས་པའི་བྱ་བ་བྱེད།
ནད་མེད་དང་ནད་ཅན་གྱི་ལུས་པོ།
མིའི་ལུས་ཁམས་ཀྱི་འདུ་བ་རླུང་དང་མཁྲིས་པ། བད་ཀན་གསུམ་པོ་རང་ཉིད་ཀྱི་རང་བཞིན་ནམ་ཚད་གཞི་ལས་མ་འཕེལ། མ་ཟད། མ་འཁྲུགས་པར་བསྡད་དེ་ཆ་རྐྱེན་ངེས་ཅན་ཞིག་གི་འོག་ཕན་ཚུན་བརྟེན་རེས་དང་སྙོམ་སྒྲིག སྐུལ་འདེད། མཉམ་ལས་བྱས་ནས་ལུས་སེམས་གཉིས་ནད་མེད་བདེ་ཐང་དུ་གནས་པར་བྱེད། གལ་ཏེ་ཟས་དང་སྤྱོད་ལམ་མ་འགྲིག་པ། གནམ་གཤིས་དང་སེམས་ཁམས་ཀྱི་འགྱུར་ལྡོག་བཅས་ཀྱི་རྐྱེན་འཕྲད་དེ་འདུ་བ་གསུམ་པོ་རང་ཉིད་ཀྱི་ཚད་གཞི་ལས་འཕེལ་བ། ཟད་པ། འཁྲུགས་པ་བཅས་བྱུང་ན་ལུས་སེམས་གཉིས་ལ་མི་བདེ་བའི་ནད་འབྱུང་གི་ཡོད།
ནད་གཞི་བརྟག་ཐབས།
བོད་ཀྱི་གསོ་རིག་སྨད་པས་ནད་གཞི་བརྟག་དཔྱད་བྱེད་སྐབས་མིག་གིས་བལྟ་བ་དང་སོར་མོར་རེག་པ། སྐད་ཆ་དྲི་བ་བཅས་ཀྱི་ཐབས་ལམ་གསུམ་བེད་སྤྱོད་བྱེད་ཀྱི་ཡོད། མིག་གིས་བལྟ་བ་ནི་ནད་པའི་གཟུགས་པོའི་བོངས་དབྱིབས་དང་པགས་མདོག་ཁ་ལུད་དང་སྐྱུགས་པ། བཤང་བ་སོགས་ཀྱི་ཁ་དོག ལྷག་པར་དུ་དྲི་ཆུ་དང་ལྕེ་མདོག་ལ་ལྟ་ཞིབ་བྱེད་པ། སོར་མོས་རེག་པ་ནི་ནད་པའི་ལུས་པོའི་དྲོད་ཚད་དང་འབུར་འཇམ་སྲ་སྙི། ན་ཟུག་གཏོང་ས། ལྷག་པར་དུ་ལག་པའི་མཁྲིག་མར་ཡོད་པའི་འཕར་རྩའི་རྒྱུ་བ་ལ་བརྟག་དཔྱད་བྱེད་པ། སྐད་ཆ་དྲི་བ་ནི་སྨན་པས་ནད་པ་ལ་ནད་ཇི་ལྟར་བྱུང་བ་དང་གང་དུ་ན་བ། ནད་རྟགས་ཇི་ཡོད། སྨན་པ་སུ་དང་སྨན་གང་བསྟེན་པ། ཟས་སྤྱོད་ཀྱི་ཕན་གནོད་ཇི་ཡོད་བཅས་ཀྱི་དྲི་བ་དྲིས་ཏེ་ནད་གཞི་ངོས་འཛིན་བྱེད་ཀྱི་ཡོད།
སྨན་བཅོས།
བོད་ཀྱི་གསོ་རིག་གིས་མི་ཞིག་གི་བཟའ་བཏུང་དང་བྱ་སྤྱོད། བསམ་བློ་གཏོང་སྟངས་བཅས་ཀྱིས་མི་དེའི་ལུས་སེམས་ཀྱི་བདེ་ཐང་ཐག་གཅོད་བྱེད་ཀྱི་ཡོད་པར་འདོད་པ་ལྟར། བོད་སྨན་གྱི་ལུས་གསོ་ནད་བཅསོ་ཀྱི་རྩ་དོན་ནི་ཟས་དང་སྤྱོད་ལམ་ཡག་པོ་བསྟེན་ཏེ་ནད་རིགས་སྔོན་འགོག་བྱ་རྒྱུ་དང༌། ནད་རིགས་གང་ཞིག་ཡིན་ཡང་ཐོག་མར་ནད་བབ་ལ་བལྟས་ཏེ་ཟས་སྤྱོད་ཕན་པ་བསྟེན་པ་དང་གནོད་པ་སྤང་བའི་བཅོས་ཀ་སྤེལ་ཐབས་བྱེད། འོན་ཀྱང་ཟས་སྤྱོད་གཉིས་ཀྱིས་གསོ་བཅོས་ཀྱི་ནུས་པ་མ་ཐོན་ཚེ་སྨན་དང་དཔྱད་ཀྱི་བཅོས་ཐབས་ལག་བསྟར་བྱེད་ཀྱི་ཡོད།
སྨན་ལ་ཐང་དང་ཕྱེ་མ། རིལ་བུ། ཁེབས་སུལ། སྨན་ཆང༌། སྨན་ཁབ། བྱུགས་པ། སྨན་ཇ། སྟོབས་སྨན་བཅས་རིགས་མི་འདྲ་བ་མང་པོ་ཞིག་ཡོད་པ་དང༌། དཔྱད་བཅོས་ལ་བསྐུ་མཉེ་ (Massage)དང་ཡོ་གའི་ལུས་རྩལ། སྒོམ་རྒྱག་པ། གསོལ་བ་སྨོན་ལམ་འདེབས་པ། སྣ་སྨན། བཤལ་སྦྱང༌། སྨན་ཆུ་དང་སྨན་རླངས་ཀྱི་ལུམས། རྡོ་དང་སྣུམ་ཚ་བོའམ་གྲང་མོས་བདུག་པ། མེ་བུམ། གསེར་ཁབ། མེ་བཙའ་འཇོག་པ། དབྱུག་གཅོས་སོགས་ཀྱི་བཅོས་ཐབས་སྣ་མང་ཡོད།
