ཅི་ཞིག་ལ་མཉམ་སྤེལ་ཚབ་སྤྱོད་སྨན་དཔྱད་ CAM ཟེར་རམ།

གསོ་རིག  གསར་འཕྲིན།  སྤྱི་ལོ་ ༢༠༠༨ དབྱར་ཁ། འདོན་ཐེངས་ལས་བཤུས།

ཅི་ཞིག་ལ་མཉམ་སྤེལ་ཚབ་སྤྱོད་སྨན་དཔྱད་ CAM ཟེར་རམ།
ཨ་མེ་རི་ཀ་སྤྱི་མཐུན་རྒྱལ་ཁབ་ཀྱི་རྒྱལ་ཡོངས་འཕྲོད་བསྟེན་ལས་ཁང་ (National Institute of Health       གིས་རྒྱལ་ཡོངས་མཉམ་སྤེལ་ཚབ་སྤྱོད་སྨན་དཔྱད་ལྟེ་གནས་ (National Center for Complementary and Alternative Medicine ) ཞེས་པའི་ཡན་ལག་ལས་ཁུངས་ཤིག་བཙུགས་ཏེ། རྒྱལ་ཁབ་འདིར་ལག་ལེན་བྱེད་བཞིན་པའི་རྒྱུན་སྤྱོད་གསོ་དཔྱད་དམ་ནུབ་ཕྱོགས་གསོ་དཔྱད་ (Conventional Medicine) ཀྱི་ཁྱབ་ཁོངས་སུ་མ་གཏོགས་པའི་སྨན་བཅོས་འཕྲོད་བསྟེན་བདེ་ཐང་དང་འབྲེལ་བའི་ནད་བཅོས་ལུས་གསོའི་སྨན་དཔྱད་རྣམས་ལ་མཉམ་སྤེལ་ཚབ་སྤྱོད་སྨན་དཔྱད་ (Complementary and Altermative Medicine)  ཞེས་མིང་འདོགས་བྱས་ཏེ་དེའི་ཐད་ལ་སྟངས་འཛིན་ཞིབ་འཇུག་དང་ཁྲིམས་ཐོག་ལས་དོན་བྱེད་ཀྱི་ཡོད། བོད་ཀྱི་གསོ་བ་རིག་པ་ཡང་འདིའི་ཁོངས་གཏོགས་ཡིན་དགོས་སྙམ། སྒྱུར་མཁན་གྱི་གསལ་བཤད།
མཉམ་སྤེལ་ཚབ་སྤྱོད་སྨན་དཔྱད་ནི་ད་ལྟའི་ཆར་རྒྱུན་སྤྱོད་གསོ་དཔྱད་ཀྱི་ཁྱབ་ཁོངས་སུ་མེད་པའི་སྨན་བཅོས་འཕྲོད་བསྟེན་གྱི་གཞུང་ལུགས་དང༌། ལག་ལེན། ཐོན་རྫས་འདྲ་མིན་ཡོད་པ་དེ་དག་ལ་གོ་དགོས། རྒྱུན་སྤྱོད་གསོ་དཔྱད་ནི་འཚོ་བྱེད་སྨན་པ་ (M.D.)  འམ་རུས་བཅོས་སྨན་པ་ (D.O.) ཡི་གོ་མིང་ཡོད་མཁན། དེ་དང་འབྲེལ་ཡོད་ལུས་རྩལ་དཔྱད་བཅོས་སྨན་ཞབས་ (Physical therapist) དང༌། སེམས་ཁམས་བརྟག་ཞིབ་སྨན་པ་ (Psychologist) དེབ་སྐྱེལ་ནད་གཡོག (Registered nurse)  བཅས་ཀྱིས་ལག་ལེན་བྱེད་པའི་སྨན་དཔྱད་ཅིག་ཡིན། འཕྲོད་བསྟེན་དོན་གཉེར་ཅན་རེ་འགས་མཉམ་སྤེལ་ཚབ་སྤྱོད་སྨན་དཔྱད་དང་རྒྱུན་སྤྱོད་གསོ་དཔྱད་གཉིས་ཀ་ལག་ལེན་བྱེད་ཀྱི་ཡོད། ཚན་རིག་གི་ཞིབ་འཇུག་བརྒྱུད་ནས་མཉམ་སྤེལ་ཚབ་སྤྱོད་སྨན་དཔྱད་ཀྱི་བཅོས་ཐབས་རེ་ཟུང་གིས་ནད་ལ་ཕན་ནུས་འདོན་ཞིང་བདེ་འཇགས་ཡིན་པར་ཡིད་འཕེར་ཁུངས་སྐྱེལ་བྱེད་ཐུབ་ཡོད་མོད། འོན་ཀྱང་བཅོས་ཐབས་མང་ཆེ་བ་ནི་ད་རུང་འཆར་གཞི་ཚད་ལྡན་ཅན་གྱི་ཚན་རིག་གི་ལམ་ནས་ཞིབ་འཇུག་བྱེད་རྒྱུར་ལྷག་སྟེ་བསྡད་ཡོད། ཡིན་ནའང་ཁུངས་འཕེར་ཡིག་ཆ་ལྟར་ན། དེང་དུས་ཨ་རིའི་མི་གྲངས་སུམ་ཅ་གཅིག་གིས་སྲོལ་རྒྱུན་སྔོ་སྨན་རིགས་ཀྱི་སྨན་བཅོས་ལ་བསྟེན་གཏུགས་བྱེད་ཀྱི་ཡོད་ལ། དེའི་ཆེད་ལོ་རེར་ཆ་སྙོམས་ཨ་སྒོར་དུང་ཕྱུར་མང་པོའི་འགྲོ་སོང་གཏོང་གི་ཡོད་པར་བཤད།
མཉམ་སྤེལ་སྨན་དཔྱད་དང་ཚབ་སྤྱོད་སྨན་དཔྱད་གཉིས་ལ་ཁྱད་པར་ཡོད་པར། མཉམ་སྤེལ་སྨན་དཔྱད་ནི་རྒྱུན་སྤྱོད་གསོ་དཔྱད་ཀྱི་བཅོས་ཀ་སྤེལ་བ་དང་མཉམ་དུ་ལུགས་གཞན་གྱི་བཅོས་ཐབས་ཡང་ཟུང་དུ་ལག་ལེན་བྱེད་པ་ཞིག་ལ་ཟེར། དཔེར་ན། བསྐུ་མཉེའི་ (Massage) གསོ་ཚུལ་བསྟེན་ཏེ་ནད་པ་གང་ཞིག་གི་གཤག་བཅོས་བྱས་རྗེས་མི་བདེ་བའི་སྣང་ཚུལ་ཉུང་དུ་གཏོང་བར་རོགས་ཕན་བྱེད་པ་ལྟ་བུ་ཡིན། ཚབ་སྤྱོད་སྨན་དཔྱད་ནི་རྒྱུན་སྤྱོད་སྨན་དཔྱད་ཀྱི་བཅོས་ཀ་མ་སྤེལ་བར་དེའི་ཚབ་ཏུ་ལུགས་གཞན་གྱི་བཅོས་ཐབས་ཁོ་ན་བེད་སྤྱོད་བྱེད་པ་ཞིག་ལ་ཟེར། དཔེར་ན། འབྲས་ནད་ཀན་སར་ལ་རྒྱུན་སྤྱོད་གསོ་དཔྱད་སྨན་པས་ངོ་སྤྲོད་བྱས་པའི་གཤག་བཅོས་དང་འོད་འགྱེད་བཅོས་ཐབས (radioation) རྫས་སྦྱོར་བཅོས་ཐབས་ (Chemotherapy) མི་སྤེལ་བར་དེ་དག་གི་ཚབ་ཏུ་དམིགས་བསལ་ཀྱི་ཟས་སྤྱོད་བསྟེན་སྟངས་ཀྱི་བཅོས་ཐབས་སམ་ཡང་ན་བོད་སྨན་དང་རྒྱ་གར་སྨན་བེད་སྤྱོད་བྱེད་པ་ལྟ་བུ་ཡིན།
མཐུན་སྡེབ་སྨན་དཔྱད་ (Integrative medicine) ནི་རྒྱུན་སྤྱོད་གསོ་དཔྱད་དང༌། ཆེས་བདེ་འཇགས་ཡིན་པ་དང་ནད་ལ་ཕན་ནུས་འདོན་པར་ཁུངས་སྐྱེལ་ར་སྤྲོད་ཡོད་པའི་མཉམ་སྤེལ་ཚབ་སྤྱོད་སྨན་དཔྱད་གཉིས་ཀྱི་བཅོས་ཐབས་ཁག་ཅིག་ཟླ་སྒྲིལ་གྱིས་མཐུན་སྡེབ་བྱས་ཏེ་བཅོས་ཀ་སྤེལ་བ་ཞིག་ལ་ཟེར། རེ་འགར་འདི་ལ་མཐུན་བསྡེབས་སྨན་དཔྱད་ (Integrated medicine) ཀྱང་ཟེར།
NCCAM”CAM Basics” ནས་བཏུས་ཏེ་བསྒྱུར།