མདོ་སྨད་དགེ་ལུཌ་ལོ་རྒྱུས་ཆེན་མོ་ཡིན་ནམ།

ནོར་བཅོས། ཧོར་འདུལ་གསོལ་འདེབས་གང་མང་གསོག་བསྒྲུབ་བྱེད་རྒྱུ་ལས་ཞེས་བཅོས་དགོས།

ཧོར་འཇིགས་ཀྱི་དེབ་དེར་དཀའ་ལསཆེན་པོ་རྒབ་ཡོད་པ་དང་། ལས་གཞི་གལ་ཆེན་ཡིན་པ་བདེན་པ་རེད། ང་ཚོས་ཡ་ཡོ་མེད་པའི་གདེངས་འཇོག་ཅིག་བྱེད་དགོས། ཡིན་ན་ཡང་། ད་ལྟ་ནས་གླེང་སློང་བྱས་པ་དེས་ཁོང་དང་ཁོང་གི་བརྩམ་ཆོས་ལ་ཤེས་རྟོགས་དང་དོ་སྣང་གི་མཐུན་རྐྱེན་ལྟ་བུ་རེད། དོན་དངོས་མ་མཁྱོགས་པར་སྨོན།
དོན་དག་གཞན་ཞིག་ནི་ཟླ་འགའི་སྔོན་ངས་ལྡི་ལིའི་ཨར་ཆ་ན་པར་ཁང་དུ་སྐུ་ཞབས་ཁོང་གིས་དེབ་དུག་ཀ་ཤོག་སྒམ་ཞིག་ཏུ་བསྣམས་ནས་ཐ་མའི་དག་བཅོས་ཆེད་སླེབས་ཀྱི་འདུག ཡིན་ན་ཡང་དེབ་ཆ་ཚང་ཚར་ཁ་ཤས་བཟོས་ཟིན་པར་མ་ཟད་ཁོས་གོང་ས་མཆོག་དང་ཆ་ལ་དེབ་དྲུག་ཀ་ཅོག་ཙེ་ཞིག་དུ་བཤམས་ཏེ་པར་གཏབ་འདུག་པ་ངས་དངོས་སུ་མཐོང་བྱུང་། དེ་ནི་འབྱུང་འགྱུར་ལོ་རྒྱུུས་ཆེན་མོའི་མདུན་ཤོག་ནང་མའི་ཆེད་དུ་ཡིན་ངེས།
གནས་སྐབས་དེ་ཡིན།

གསེར་རྟ་ཆོས་དབྱངས་ཀྱིས་ཅི་ཞིག་བཤད་རྩིས་ཡིན་མི་ཤེས་གི་ཕལ་ཆེར་འདི་ལའང་ཆོལ་ཁ་ཆོས་ལུགས་ཀྱི་ཞེན་ཁོག་ངན་པ་དེའི་དྲི་བྲོ་བ་འདྲ། ཁོས་གསེར་རྟ་མདོ་སྨད་མིན་པ་འདྲ་ཞིག་བཤད་ནས་ཡང་བསྐྱར་གསེར་རྟའི་དགོན་པ་ཡོངས་རྙིང་མ་ཡིན་རབས་དང་དེ་དག་ལ་ཀུན་མཁྱེན་གཉིས་པས་མ་ཁྱབ་པས་ན་ཀུན་མཁྱེན་མདོ་སྨད་བསྟན་པའི་བདག་པོ་མིན་པར་བསྒྲུབས་འདུག་ལ་འདིར་ཧམ་བཤད་ཀྱི་ཆ་ཡང་ཅུང་ཙམ་འདུག་སྟེ་གསེར་རྟའི་སེ་ར་དགོན་པ་དགེ་ལུགས་མིན་ནམ་ཡང་ན་གསེར་རྟའི་ཁོངས་མིན། སྤྱིར་ཧོར་འཇིགས་ཀྱིས་ཏེ་ལྟར་བཤད་པ་སྤྱིར་བཏང་ལས་མཐའ་བཟུང་བ་དེ་འདྲའང་རེད་དམ། གཞན་ཁ་བ་དཀར་པོས་ཤར་ཕྱོགས་ཨ་མདོའི་ས་ཆ་དེ་བོད་གཞུང་གི་མངའ་ཁོངས་ཡིན་ཚུལ་དེ་ཨེ་ཇེབ་ཀྱི་མཆོད་རྟེན་ཟུར་གསུམ་དེ་ལ་དཔེ་བླངས་ནས་བརྗོད་སོང་ཟེར་བ་དེའང་ཧོར་འཇིགས་ཀྱིས་མདོ་སྨད་བོད་གཞུང་གི་མངའ་ཁོངས་ཡིན་པའི་དཔེར་བཞག་པ་རེད་དམ་མདོ་སྨད་ལ་དགའ་ལྡན་ཕོ་བྲང་གིས་དབང་ཤུགས་ཅི་ཙམ་ཁྱབ་པའི་དཔེར་བཞག་པ་རེད་ཡག་པོ་ཉན་དགོས་འདུག་ལ་ད་དུང་དཔེ་ཆ་དངོས་སུ་མཐོང་དུས་སྐད་ཆ་བཤད་ན་འོས་འཚམས་རེད་འདོད། གཞན་ཁ་ཤས་ཤིག་གིས་ཧོར་འཇིགས་ཀྱི་མི་གཞི་ངན་རབས་དང་ཁོ་ལ་བྱས་ཉེས་མང་རབས་བཤད་འདུག་པ་འདི་དག་གིས་ཅི་ཞིག་བཤད་རྩིས་ཐེ་ཚོམ་ལས་སྐབས་དོན་དང་འབྲེལ་བ་ཞིག་འདུག་གམ། གལ་སྲིད་དེ་དག་ལ་འབྲེལ་བ་ཞིག་ཡོད་རྩིས་བྱེད་ན་ང་ཚོ་ཆོས་ལ་མི་རྟོན་གང་ཟག་ལ་རྟོན་སོང་བ་མིན་ནམ། ཡང་བཤད་སྟངས་གཞན་ཞིག་བྱས་ན་ང་ཚོ་དོན་དངོས་ལ་གཞོལ་མ་ཐུབ་པ་མིན་ནམ། དོན་དངོས་ལས་ཕྱོགས་རེས་ཞེན་ཁོག་གི་སྐད་ཆ་འདི་དག་ང་ཚོའི་ཁོར་ཡུག་འདིར་ཡོང་ས་མེད་ན་བཟང་གི

ཨ་རོགས་ཚོ། བསམ་བློ་་ཞིབ་ཏུ་བཏང་ན་གསེར་རྟ་ཆོས་དབྱིངས་ལའང་རྒྱུ་མཚན་ཞིག་བཤད་རྒྱུ་མེད་ན་ཆང་མ་འཐུང་གོང་ལ་ར་བཟི་བའི་ཉམས་ཤིག་ཐོན་དོན་མི་འདུག་ག མདོ་སྨད་ལོ་རྒྱུས་ཆེན་མོ་བཀྲམས་ཡོད་མེད་ལ་མ་ལྟོས་པར་གལ་སྲིད་ཁོང་དངོས་སུ་དྲ་ཐོག་འདིར་ཕེབས་ཡོད་ན་ང་ཚོས་ཁོང་དང་མཉམ་དུ་རྩོད་གླེང་བྱས་ཀྱང་དོན་སྙིང་ཅུང་ཡོད་པ་ལས། དེ་མིན་གྱི་འུར་ཤོད་བྱས་པ་ལ་དོན་སྙིང་མི་འདུག་ག།

སྤྱིར་བཏང་དམིགས་ཀྱིས་བསལ་བ་དག །བསྟན་བཅོས་ཀུན་ལ་རབ་ཏུ་གཅེས། །ཞེས་དང་། གང་ཟག་ལ་མི་རྟོན་ཆོས་ལ་རྟོན་སོགས་བརླབས་ཆེ་བའི་རྟོན་བཞིའི་རྣམ་བཞག་ཅིག་གྱང་ང་ཚོར་བསྟན་ཡོད་པ་མ་ཡིན་ནམ། དཔྡད་བརྗོད་ངོ་མ་རེ་བྱེད་འདོད་ཡོད་ན་ཧོར་འཇིགས་ཀྱི་མི་གཞི་མདོ་སྨད་ལོ་སྒྱུས་གཉིས་གཏན་ནས་སྦྱར་དགོས་དོན་མི་འདུག

དེབ་དེ་ཚོ་མི་མང་གིས་གང་ལ་གང་མཚམ་བལྟས་ཚར་བའི་རྗེས་ལ་བསམ་ཚུལ་བཏོན་ན་དོན་སྙིང་མི་འདུག་གམ། དེབ་དེ་བཟང་ངན་གང་ཞིག་ཡིན་ཀྱང་མི་མང་གིས་ལྟ་དགོས་པ་གལ་ཆེན་རེད་འདོད།

དགོངས་དག དམིགས་བསལ་ཞིག

ཐོག་མ་ཁྱེད་རྣམས་པ་ཚོས་ཧོར་གཙང་འཇིགས་མེད་ལགས་ཀྱིས་རྩོམ་པའི་མདོ་སྨད་ལོ་རྒྱུས་ཆེན་མོ་ཟེར་བ་དེ་ཡག་པོ་ཞིག་ཀློག དེ་ནས་དགག་སྒྲུབ་རེ་མཛད་ན་ཤིན་ཏུ་ལེགས། དེ་མ་གཏོགས་ཡིན་ས་རེད། བསམ་གྱི་འདུག མི་ཚོས་དེ་འདྲ་ཟེར་གྱི་འདུག ཞེས་བསམ་ཚད་འཕངས་མ་ཡོང་རོགས།
༸གོང་ས་མཆོག་གིས་ཧོར་གཙང་འཇིགས་མེད་ལགས་དམིགས་གསལ་ལོ་རྒྱུས་དེའི་ཆེད་དུ་བཏང་ཡོད་པ་འདྲ། དེ་འདྲ་ཡིན་དུས། ཧོར་གཙང་འཇིགས་མེད་ལགས་ཀྱིས་མ་རང་པ་ལོ་རྒྱུས་ཞིག་བྲིས་ཡོད་རྒྱུ་ནམ་ཡང་བསམ་གྱི་མི་འདུག

ཁ་སངས་པོར་བཤད་ན་འདི་འདྲ་རེད། ཧོར་གཙང་འཇིགས་མེད་ཀྱི་དྲང་བདེན་གྱི་བསླུས་པའི་སློང་མོ་བའི་ནང་དུ་དགེ་ཆོས་ཀྱི་འདོད་པའི་བསྟན་བཅོས་འདི་སྔགས་ཉམས་ལེན་དང་འབྲེལ་ཡོད་མེད་སྐོར་ལ་བདུད་འཇོམས་གདོང་ཐོག་སོགས་ཀྱིས་ཤེས་མི་འདུག་མདོག་མདོག་གི་ཟུར་ཟའི་ཚིག་ཁ་ཤས་ཤིག་ཐོན་ཡོད་པ་རེད། དེ་བཞིན་ྐླུ་སྒྲུབ་དགོང་རྒྱན་ལ་དགག་ཡིག་འབྲི་མཁན་བརྒྱད་ཡིན་ནམ་དགུ་ཡིན་ནམ་ཅིག་བྱུང་བའི་ནང་ནས་མང་ཆེ་བ་ཨ་མདོ་བ་ཡིན་པས་མ་འགྲིགས་མདོག་མདོག་ཅིག་བཤད་འདུག དགེ་ཆོས་མདོ་སྨད་པ་ཡིན་སྟབས་ཆོལ་ཁའི་ལ་རྒྱ་བརྩི་དགོས་མདོག་མདོག་ཅིག་ཡིན་ངེས་རེད། བདུད་འཇོམས་དང་ྐླུ་དགོང་ལ་འབྲེལ་བ་གང་ཡོད་འདི་རེད་ཟེར་བ་ཞིག་མི་འདུག་མོད་ྐླུ་སྒྲུབ་དགོང་རྒྱན་གྱི་མཇུག་ཏུ་བདུད་འཇོམས་པས་ཆེ་བསྟོད་ཀྱི་ཤོ་ལོ་ཀ་ཁ་ཤས་ཤིག་བྲིས་ཡོད་པ་རེད། ངས་དོན་མེད་དུ་དམའ་འབེབས་གང་ཡང་མིན། ཁྱེད་ཚོས་ཧོར་འཇིགས་ཀྱི་དེབ་དྲང་བདེན་གྱི་བསླུས་པའི་སློང་མོ་བ་ཞེས་པ་དེ་ྐློག་དང་གསལ་པོར་ཤེས་ཀྱི་རེད། ངས་དེབ་དེ་ལོ་མང་པོའི་སྔོན་དུ་བྐླགས་སྟབས་ལམ་ཙམ་ལས་དྲན་གྱིན་མི་འདུག གཅིག་བྱས་ན་ངས་ནོར་ཡང་ཡོད་སྲིད།

གོང་ནས་དྲ་གྲོགས་ཤིག་གིས་ཧོར་འཇིགས་ཀྱིས་དགེ་ཆོས་ཀྱི་ཀླུ་སྒྲུབ་དགོངས་རྒྱན་བདུད་འཇོམས་རིན་པོ་ཆེར་ཆང་རིན་དུ་བྲིས་པ་རེད་ཅེས་བྲིས་ཡོད་ལུགས་ཤིག་བརྗོད་པར། དགེ་ཆོས་དང་བདུད་འཇོམས་རིན་པོ་ཆེ་གཉིས་མཇལ་འཕྲད་བྱུང་ལུགས་དགེ་ཆོས་ཀྱི་ལོ་རྒྱུས་ཁོང་གི་དགེ་ཕྲུག་ཧོར་ཁང་དང་རག་ར་ལྟ་བུས་བྲིས་པའི་ནང་དུ་ཁ་གསལ་གང་ཡང་མེད་ལ། ཀླུ་དགོངས་ཟིན་བྲིས་སུ་འདེབས་པ་པོ་ནི་ཉག་རོང་ཟླ་བ་བཟང་པོ་ཡིན་པ་ཡོངས་གྲགས་རེད། ཟླ་བཟང་གིས་ཀླུ་དགོངས་ཀྱི་མཇུག་ཏུ་བདུད་འཇོམས་རིན་པོ་ཆེའི་སྐོར་ཅི་ཡང་བྲིས་མེད་པར་བལྟས་ན་དགེ་ཆོས་ཀྱི་ཀླུ་སྒྲུབ་དགོངས་རྒྱན་དང་བདུད་འཇོམས་རིན་པོ་ཆེའི་ཨ་རག་གཉིས་ལ་འབྲེལ་བ་ཅང་མོད་ཚོད་རེད། ཡིན་ན་ཡང་མི་རྒན་ཤེར་རྒྱམ་མམ་གོ་འཇོ་བླ་ཆུང་གིས་ཟི་ཁྲོན་དཔར་མའི་དགེ་ཆོས་ཀྱི་རྣམ་ཐར་གྱི་མགོ་བརྗོད་དུ་འདོད་པའི་བསྟན་བཅོས་དེང་སང་ཀློག་རྒྱུ་ཡོད་པ་འདི་བདུད་འཇོམས་རིན་པོ་ཆེའི་བཀའ་དྲིན་ཡིན་ཞེས་བརྗོད་ལུགས་ལ་བརྟགས་ན། བདུད་འཇོམས་རིན་པོ་ཆེ་ཡང་དགེ་ཆོས་ཀྱི་གསུང་རྩོམ་ལ་དོ་སྣང་ཡོད་མཁན་ཞིག་ཡིན་པ་གསལ་སྟོན་བྱས་འདུག སྐབས་དེའི་རྙིང་མའི་བླ་ཆེན་ཚོའི་ཁྲོད་དུ་སྨིན་གླིང་གཅུང་རིན་པོ་ཆེ་དེ་དང་དགེ་ཆོས་ལ་འབྲེལ་བ་ཡོད་པ་དེ་ནི་ཤེར་རྒྱམ་པའི་མགོ་བརྗོད་དེའི་ནང་དུ་ཧ་ཅང་གསལ་བོ་རེད།

ས་གསུམ་ན་འགྲན་པའི་ཟླ་དང་བྲལ་བ་ཅེས་བརྗོད་ན། ཁྱོད་ཀྱིས་དགག་པ་རྒྱག་གམ་མི་རྒྱག ངས་ཧོར་འཇིགས་ཤེས་ཀྱི་མེད་ལ་ཁོའི་རྩོམ་ཡང་མཐོང་མ་མྱོང༌། འོན་ཀྱང་མདོ་སྨད་ལོ་རྒྱུས་དྲང་བོར་བྲིས་མེད་ན་དེ་ལ་ངེས་པར་དུ་རྣམ་དཔྱོད་ཅན་རྣམས་ཀྱིས་ལུང་དང་རིག་པས་བསྒྲུབ་ནས་དགག་པ་རྒྱག་རྒྱུ་སྨོས་ཅི་དགོས།

བསམ་ཚུལ་འདོན་མཁན་ཚོས། མདོ་སྨད་ལོ་རྒྱུས་ཆེན་མོའི་དེབ་དེ་ཚོ་མ་བཀླགས་གོང་ནས་སྡོམ་རྒྱག་རྒྱུ་འདི་འོས་པོ་མི་འདུག དང་པོ་དེབ་དེ་ཚོ་སླེབས་བཅུག གཉིས་པར་དེབ་དེ་ཚོ་བཀླགས། གསུམ་པར་བསམ་ཚུལ་སྤེལ་བ་ཡིན་ན། འཆར་ཅན་གྱི་ལོ་གསར་ལ་དམིགས་བསལ་གྱི་གསལ་བསྒྲགས་དགོས་དང་མི་དགོས་ཤེས་རྒྱུ་རེད། དེ་དུས་བུ་སྐྱེས་པ་ལ་མིང་བཏགས་ཆོག་གི་རེད། ཆང་དྲངས་པ་ལ་གཏམ་བཤད་ཆོག་གི་རེད། བདེན་ཡོད་འགྲོ་སའི་ལམ་དང༌། བདེན་མེད་གཅུར་སའི་འཕྲང་གང་ལ་འབུད་དགོས་ཀྱི་ཚོད་དེ་ནས་ཐིག་ཡོང་གི་རེད། དྲ་གྲོགས་ཚོ། གླེང་སློང་བྱས་པ་ཡག་པོ་འདུག་སྟེ། ཅུང་སྔ་དྲགས་པ་མིན་འགྲོ།

དྲ་གྲོགས་ཚོ། ཧོར་ཚང་གི་ཞི་ལིའི་དེབ་མ་མཐོང་བའི་གོང་དུ་སྐད་ཆ་གང་བཤད་ཀྱང་གནད་དུ་འཁེལ་བ་ཡོང་ཐུབ་ཀྱི་མ་རེད། སྤྱིར་བཏང་རྩོམ་པ་པོའི་མི་གཞི་དང་བརྩམ་ཆོས་ཀྱི་བར་ལ་འབྲེལ་བ་དམ་པོ་ཞིག་ཡོད་པར་བརྟེན། ཧོར་ཚང་གི་ལོ་རྒྱུས་ང་ཚོའི་མི་སྔར་སླེབས་སྐབས་ཡ་མཚར་བའི་ལྟད་མོ་སྣ་ཚོགས་ཡོད་རྒྱུ་རེད་བསམ་གྱི་ཡོད། ཁོས་འཇམ་བཞད་མདོ་སྨད་བསྟན་པའི་བདག་པོ་རེད་ཟེར་བ་དང་། མདོ་སྨད་ཀྱི་དགོན་སྡེ་ཡོངས་རྫོགས་དབུས་ཀྱི་གདན་ས་ཁག་ལ་འབྲེལ་ཡོད་པ་རེད་ཟེར་བ་སོགས་ཀྱི་གཏམ་གྱིས་ང་ཚོར་ཁོའི་ལོ་རྒྱུས་ཀྱི་ཁ་ཕྱོགས་གསལ་པོ་བསྟན་ཚར་ཡོད། མ་གཞི་ཧོར་ཚང་འདི་སྟོང་ལབ་བྱེད་པར་དགའ་མཁན་ཞིག་དང་། རང་གིས་ལྔ་བཅུ་ཐམ་པ་ཤེས་ཀྱི་ཡོད་ན་ཧམ་པས་བརྒྱ་ཐམ་པ་བྱས་ནས་བཤད་མཁན་ཞིག་ཡིན། འདིས་བྱ་སྤྱོད་མཚོན་ཐུབ་པས་ཁོའི་ལོ་རྒྱུས་ལ་འདིའི་ཞེད་མང་པོ་ཞིག་སླེབས་ཡོད་པ་སྨོས་མ་དགོས། ཧོར་ཚང་གི་སྙན་རྩོམ་བྲིས་ན་ཚིག་སྦྱོར་སྙན་པོ་ཞིག་ཡོད་ཀྱང་བྲིས་ཚད་མི་ཁ་གྲམ་མཆུ་ཤ་སྟག་མ་གཏོགས་མི་རིགས་དང་རྒྱལ་ཁབ་ལ་ཕན་པའི་སྐད་ཆ་སྣ་གཅིག་ཀྱང་མི་འདུག་ཟེར་ནས་བཤད་ཀྱང་ཧམ་པར་མི་འགྱུར།

ཁོང་གི་དེབ་གཅིག་གཉིས་ཤིག་བཀྲམས་ཡོད་ཚོད་ཀྱང་དེབ་དྲུག་པོ་ཆ་ཚང་པར་བསྐྲུན་ཟིན་ཡོད་ཚོད་མི་འདུག་ཅིང༌། ཁག་ཅིག་ད་ལྟ་རྒྱ་གར་གྱི་རྒྱལ་ས་ལྡི་ལི་ཨར་ཆ་ན་པར་སྐྲུན་ཁང་ནས་པར་སྐྲུན་བྱེད་བཞིན་པ་རེད་འདུག་ཟེར། ང་ཚོ་ཚང་མས་ཐོག་མར་དེབ་དེ་བཀླག་ན་ཡག་པོ་ཡོད་འགྲོ། ཡིན་ནའང་ཁ་སྔོན་ཨ་རིའི་རླུང་འཕྲིན་ཁང་གི་ཀུན་གླེང་བརྙན་འཕྲིན་ནང་བལ་ཡུལ་ནས་མི་ཞིག་གིས་མདོ་སྨད་ཀྱི་བོན་དགོན་ཁག་ཅིག་དང་འབྲེལ་བའི་དྲི་བ་ཞིག་ཧོར་གཙང་འཇིགས་མེད་ལགས་སུ་ཕུལ་སོང་ཡང་ལན་བསྐྱོན་གནང་མ་སོང་བས་ཡ་མཚན་འདྲ་བྱུང༌། སྤྱིར་བཏང་ཁོང་གིས་ལོ་རྒྱུས་བྲིས་པའི་སྐབས་སུ་གཡུང་དྲུང་བོན་དང་འབྲེལ་བའི་ཐོག་ཞིབ་འཇུག་དང་བཅར་འདྲི་དེ་འདྲ་གནང་སོང་ཡང་བྲིས་ཚར་རྗེས་ག་འདྲ་བྲིས་གནང་ཡོད་མེད་ཤེས་རྟོགས་ཅི་ཡང་མ་བྱུང༌། གང་ལགས་ཤེ་ན། དེབ་དེ་ད་ལྟ་སྤྱི་ཚོགས་ཁྲོད་མཐོང་རྒྱུ་མེད་པས་ཡིན།

ཨ་རོགས་སྤོབས་པ། ངས་བལྟས་ན་ཆོས་དབྱིངས་ཀྱིས་མིང་གི་མགོར་གསེར་རྟ་དང་། མཇུག་ཏུ་ནོར་གླིང་དྲུད་ཡོང་བ་དེ་ཁོང་གི་གཟི་བརྗིད་ཅིག་རེད་བསམ་གྱི་འདུག གང་ཡིན་ཟེར་ན་དེང་སང་མི་མང་པོ་ཞིག་གིས་མིང་རྫུན་མ་བཟོས་ནས་གོ་སྐབས་བྱུང་ཚད་ལ་ཆོས་ལུགས་དང་ཆོལ་ཁ་སྒེར་གྱི་སྙིང་ནད་ཡན་ཆད་དྲ་ཐོག་ནས་རྩོད་ཀྱི་ཡོད་པ་དང་། ཡང་ན་སྙིང་ནད་མིན་རུང་ཕྲག་དོག་དང་དོན་མེད་ཀྱི་ཀྱག་ཀྱག་ཚུན་ཆད་བྱས་ཏེ་སྤྱི་ཚོགས་ནང་ནས་འབུར་དུ་ཐོན་པའི་མི་རྣམས་ནག་པོ་བཟོ་བཞིན་ཡོད་པ་རེད། དཔེར་ན་ཁར་སང་ཁར་ཉིན་འཆི་མེད་དགའ་ཚལ་གླིང་ལེགས་གྲུབ་བྱུང་བ་ཞེས་པའི་འོག་གི་མཆན་དེ་ཚོར་གཅིག་ལྟོས་དང། དེར་བརྟེན་ཁོང་གིས་གསེར་རྟ་ཆོས་དབྱིངས་ཞེས་སྨྲོས་པ་དེས་མིང་རྫུན་མ་བེད་སྤྱོད་གཏོང་གི་མེད་པ་དང་། ནོར་གླིང་ཞེས་བྲིས་པ་དེས་ད་སྐབས་ཀྱི་སྡོད་གནས་གསལ་བོར་བསྟན་ཡོད་པས་ངས་བལྟས་ན་ཁོང་མི་རང་གཤིས་དྲང་པོ་དང་དོན་གྱི་སྤོབས་པ་ཁོག་ལ་ཡོད་མཁན་ཞིག་རེད་འདུག་བསམ་གྱི་ཡོད། དེ་བཞིན་ཁྱོས་ཀྱིས་ཆོས་བརྒྱུད་ཀྱི་ན་ཚ་ཞིག་དྲུད་ནས་ཟེར་བ་དེ་ཡང་ཡག་པོ་མ་རེད། ཆོས་བརྒྱུད་དང་འབྲེལ་བ་ཡོད་པའི་རྩོམ་ཡིག་སྤེལ་དུས་ཆོས་བརྒྱུད་ཀྱི་སྐད་ཆ་མི་བཤད་རང་བཤད་རེད་པ། གལ་ཏེ་བཀུར་འོས་སྐུ་ཞབས་ཧོར་གཙང་གིས་ཆོས་བརྒྱུད་ཀྱི་ཐོག་ནས་དཀྱོག་འབྲི་གནང་ཡོད་ན་ཆོས་བརྒྱུད་གཞན་པའི་མིས་བདེན་དོན་གྱི་སྐད་ཆ་བཤད་པ་དེ་འོས་བབ་ཅིག་རེད། མི་མང་པོ་ཞིག་གིས་ཁོང་གི་དེབ་དེ་ཚོ་ད་བར་མཐོང་མེད་ཀྱང་ཁོང་གིས་གསར་འགོད་པར་ལན་རྒྱག་སྟངས་ཀྱི་ཐོག་ནས་ཐེ་ཚོམ་སྣ་ཚོགས་ཤིག་རང་བཞིན་གྱིས་སླེབས་ཀྱི་ཡོད་པ་རེད། དཔེར་ན་ཁོང་གིས་སྔོན་བདུད་འཇོམས་རིན་པོ་ཆེ་ནང་པ་ཡིན་མིན་གྱི་ཐེ་ཚོམ་ཡོད་ཚུལ་སོགས་ཆོས་ལུགས་ཀྱི་ན་ཚ་དང་འབྲེལ་བའི་དཔྱད་བརྗོད་རྣ་བ་ལ་མི་འགྲོ་བ་མང་པོ་སྤེལ་མྱོང་བ་རེད། སྐབས་དེར་ང་ཡང་འཐད་པ་རྩ་ནས་མ་བྱུང་མོད། སྨྱུག་ཁ་ནང་ལ་བསྐོར་རྒྱུ་དེ་ཐབས་སྡུག་གི་ལས་ཀ་ཞིག་རེད་བསམ་ནས་བཟོད་སྲན་བྱས་པ་ཡིན། གལ་ཏེ་ད་དུང་ཁོང་གིས་མུ་མཐུད་དུ་དེ་འདྲ་གནང་གི་ཡོད་ན་སྤྱི་ཚོགས་ཀྱི་ནང་དུ་ལན་རྒྱག་མཁན་མང་པོ་སླེབས་ཡོང་བ་ཆོས་ཉིད་རེད། གལ་དེ་བསམ་གཟས་ནས་དོན་དངོས་ལས་བརྒལ་བའི་དཀྱོག་འབྲི་གནང་ཡོད་ན་ད་ཐེངས་རྒད་པོ་ངས་ཀྱང་བདེན་གཏམ་ངོ་མ་རེ་འབྲི་ཨེ་ཤེས་བལྟ་གི་ཡིན། སྤོབས་པ། བདེན་དོན་ཟེར་བ་དེ་ཆེ་རྒྱལ་དོན་ནས་ཆུང་བཟའ་འཁོན་གྱི་བར་ཡན་ཆད་དོན་དག་ཆེ་ཆུང་ཐམས་ཅད་ཀྱི་ཐོག་ལ་མ་རྩོད་རང་རྩོད་ཅིག་རེད་ཡ།
ད་དུང་སྲིན་བུས་ཟོས་པའི་ཤིང་ལ་སྟབས་ལྟས་དབང་གིས་ཡི་གེའི་གཟུགས་རིས་བྱུང་བ་ཞེས་སོགས་ཁྱེད་ཀྱིས་ཀྱང་ཐོག་མ་ཉིད་ནས་ཁོང་ལ་འཁོན་སེམས་ཤིག་ཡོད་པའི་རྣམ་འགྱུར་འདྲ་ཞིག་ཐོན་འདུག་པ་དེས། ཁྱེད་ཀྱང་རྩ་མི་ཚང་བ་ཞིག་ཡིན་པར་གསལ་བཤད་བྱེད་ཀྱི་ཡོད་དམ། སྐད་ཆ་སོམས་ལ་ཤོད། རྩམ་པ་ལྡོད་ལ་མྱིད།།

ནོར་གླིང་ཆོས་དབྱིངས་ལགས། ཁྱེད་ཀྱིས་དེབ་རྒན་དེ་ཚང་མ་ཀློག་ཚར་ཡོད་དམ། མེད་ན་གོ་ཐོས་བྱུང་ཞེས་འདི་འདྲའི་ཁོང་ཁྲོ་ཟོས་ན་གོ་ཐོས་འདྲ་མིན་ཡོང་གི་རེད། གོང་དུ་བཤད་པ་ལྟར་དང་པོ་ཀློག་དགོས་ལ་ཀློག་སྐབས་ཀྱང་ཀློག་ཚར་བའི་རྗེས་རྙོག་དྲ་ཞིག་ཅི་ལྟར་བཤད་པར་བསམ་བློ་བཏང་ནས་མ་ཀློག དཔེར་ན་སྒྲུང་རྩོམ་ཞིག་ཀློག་སྐབས་ཀྱང་དང་པོ་མགོ་བརྩམས་པ་ནས་སྐྱོན་ཞིག་གི་ཆེད་དུ་ཀློག་པ་ཡིན་ན་དགེ་མཚན་ཆེར་མི་འདུག་ལ་ཁྱེད་ཀྱིས་སྒྲུང་དེའི་ཡང་སྙིང་རྟོགས་རྒྱུར་ཡང་བཀག་རྒྱ་ཧ་ཅང་ཆེ་བ་ལྟར་རོ། ཁོང་ཁྲོ་མ་ཟ་ནོར་གླིང་པ། ལྷོད་ལྷོད་གསུང་ཡ་གྲོགས་པོ་ལགས།

མི་སུ་ཞིག་ཡིན་ན་ཡང་སྐྱོན་དང་ཡོན་ཏན་གཉིས་ཀ་ཡོད་པ་སྨྲོས་ཅི་དགོས། དེར་བརྟེན་སྐུ་ཞབས་ཧོར་གཙང་འཇིགས་མེད་མཆོག་ལ་ཡང་སྐྱོན་དང་ཡོན་ཏན་གཉིས་ཀ་ཡོད་ངེས་ཡིན། འོན་ཀྱང་ང་ཚོས་ངེས་པར་དུ་ཤེས་དགོས་པ་ཞིག་ནི་ཁོང་ང་ཚོ་བཙན་བྱོལ་བའི་མི་ལོ་ལྔ་བཅུའི་རིང་གི་རྩོམ་པ་པོ་གྲགས་ཤོས་དེ་རེད། ཁོང་ཤེས་རབ་ཆེ། ཁོང་བརྩོན་འགྲུས་ཆེ། གལ་ཏེ་ཁོང་གི་མདོ་སྨད་ལོ་རྒྱུས་ནང་དགག་གཞག་བྱེད་དགོས་པའི་གནད་དོན་འདྲ་ཡོད་ན། ཐད་ཀར་ཁོང་ལ་དྲང་པོའི་བགྲོ་གླེང་བྱེད་པའམ། ཡང་ན་འཕགས་བོད་གཉིས་སུ་མི་ལོ་སྟོང་ཕྲག་དུ་མའི་རིང་དར་བའི་ལུགས་སྲོལ་ལྟར་ལུང་དང་རིགས་པ་དངོས་ཡོད་ཀྱི་ལོ་རྒྱུས་བཅས་ཀྱི་ཐོག་ནས་ཚུལ་མཐུན་གྱི་དགག་ཡིག་བྲིས་ན་དེ་ལུགས་སྲོལ་དང་མཐུན་པ་ཞིག་རེད། མདོར་བསྡུ་ན་ལོ་རྒྱུས་རྩོམ་པ་པོར་གུས་བརྩི་དང་ལོ་རྒྱུས་ཀྱི་ཐོག་ལ་བགྲོ་གླེང་བྱས་ན་དེ་ཡ་རབས་ཀྱི་ལུགས་སྲོལ་རེད།
དེ་མིན་མིང་རྫུན་མ་རེ་བཟོས་ནས་གོང་འོག་ཀུན་ལ་ཕྲག་དོག་དང་། ཟུར་ཟ་དང་། ཚིག་རྩུབ། ཁྱད་གསོད། འཕྱ་སྨོད། སྐུར་འདེབས་སོགས་བྱས་བསྡད་ན་དེ་རང་གཞན་གཉིས་ཀ་ནག་པོ་བཟོ་སྤྱད་མ་གཏོགས་མེད།
ད་དུང་ཞུ་རྒྱུ་གལ་ཆེན་ཞིག་ལ། གལ་ཏེ་མདོ་སྨད་ལོ་རྒྱུས་སུ་མདོ་སྨད་ཀྱི་ཆོས་སྲིད་ཡོངས་རྫོགས་དགེ་ལུགས་པས་བཏུམས་བཞག་ཡོད་ན་དེ་ནི་ཁོང་གིས་ནོར་བ་ལས་གཞན་གང་ཡང་མིན། དེ་བཞིན་འཇམ་བཞད་འཇིགས་མེད་དབང་པོ་མདོ་སྨད་ཀྱི་བསྟན་པའི་བདག་པོ་ཞེས་བཤད་ན་ཆོག་གི་རེད་ཅེས་བཤད་སོང་བ་ངས་ཀྱང་གོ་སོང་། དེ་ཁོང་གི་ཧམ་བཤད་དང་ཞེན་ཁོག་གི་སྐད་ཆ་རེད། དཔེར་ན་འཇམ་བཞད་སྐུ་ཕྲེང་དང་པོ་དང་སྨིན་གླིང་གི་བར་མཐུ་དང་དམག་གི་དུ་རྙོག་དྲ་ཞིག་གླེང་སྲོལ་ཡོད་པ་ཀུན་གྱིས་ཤེས་གསལ་བཞིན། ངའི་ཕ་ཡུལ་དུ་རྙིང་དགོན་ཉིས་བརྒྱ་སུམ་བརྒྱ་ཞིག་ཡོད་པ་དེ་དག་གིས་འཇམ་བཞད་རང་རང་གི་བསྟན་པའི་བདག་པོ་ལ་མི་བརྩི་བར་མ་ཟད། ད་དུང་མི་དགའ་བལྟ་མཁན་ཡང་ཉུང་ཉུང་མིན།
སྤྱིར་བཤད་ན་ཆོས་ལུགས་ཀྱི་འཐེན་ཁྱེར་དང་ཆོལ་ཁའི་འཐེན་ཁྱེར་འདི་སྐྱག་དྲི་བྲོ་བའི་ལས་ཀ་ཆེས་མ་རབ་དང་ཆེས་སྡུག་ཅག་ཅིག་རེད། འོན་ཀྱང་ཚུར་སྡོད་མ་བཅུག་པར་རྙོག་དྲ་ཡང་ཡང་བཟོས་བསྡད་ན་ཁ་བཟུང་ནས་འདུག་ཐབས་མེད་པ་བདེན་མོད། གོང་དུ་ཞུས་ཟིན་པ་ལྟར་གང་ཟག་ལ་གུས་བརྩི་དང་ལྟ་གྲུབ་ལ་དཔྱད་བརྗོད་སྤེལ་རྒྱུ་ཕྲན་གྱི་རེ་བ་ཡིན། ད་དུང་མདོ་སྨད་ལོ་རྒྱུས་ལ་དགག་བཞག་མ་བྱས་གོང་མདོ་སྨད་ལོ་རྒྱུས་ཞིབ་ཀློག་བྱེད་རྒྱུ་གལ་ཆེ། གལ་ཏེ་མདོ་སྨད་ལོ་རྒྱུས་སུ་དངོས་ཡོད་ལས་བརྒལ་ཏེ་བསམ་གཟས་ནས་དཀྱོག་བཤད་ཆེན་པོའི་རིགས་བྱས་ཡོད་ན་དེ་ལ་དགག་བཞག་བྱེད་རྒྱུ་དེ་འོས་པའི་བྱ་བ་ཞིག་རེད་ལ། སྐབས་དེར་དགག་བཞག་བྱེད་མཁན་ཚོར་ཕྲག་དོག་ཅན་དང་། རྒྱ་མིའི་སོ་བ་སོགས་སུ་བསྙད་ན་དེ་ནི་བསྙད་པ་པོའི་སྐྱོན་ཁོ་ན་ཡིན་པས་སེམས་ཁུར་བྱེད་དགོས་དོན་ཅི་ཡང་མེད།

བརྟག་དཔྱད་མེད་པའི་གཏམ་བཤད་ཀྱིས་དང་རང་མགོ་གཅོད་པའི་སྟ་རེ་ཡིན་འགྲོ།