བོད་ཕྱི་ནང་ལ་འཁོད་པའི་རང་རིགས་སྐྱ་སེར་རྒན་གཞོན་མཐའ་དག་ལ༑ གངས་ཅན་བོད་མི་མང་གིས་རང་དབང་ཐོབ་ཐང་སྐྱར་གསོ་རྩོད་ལེན་བྱེད་པའི་ལས་འགུལ་ཆེན་པོ་ཞིག་བརྩམས་ནས་ད་ཕན་ལོ་ཉི་ཤུ་རྩ་བདུན་འཁོར་འགྲོ་གི་ཡོད་པ་རེད། ང་ཚོའི་བོད་མི་རིགས་ནི་ལྷག་བསམ་ལྡན་པ། ཡ་རབས་གཤིས་བཟང་ལྡན་པ། རྣམ་དཔྱོད་ཤེས་རབ་ལྡན་པའི་མི་རིགས་ཤིག་ཡིན་ཅིང༌། ད་ལྟ་འཛམ་གླིང་འདིའི་ནང་གི་མི་རིགས་འདྲ་འདྲའི་ནང་ནས་གཞུང་བཟང་ཚད་འཛིན་འོས་པའི་མི་རིགས་ཤིག་ཡིན་ངེས། དེ་འདྲའི་མི་རིགས་འདིས་ཉེ་བའི་ཆར་མི་རིགས་རང་ཉིད་ཀྱི་ཐོབ་ཐང་གི་དོན་དུ་དཀའ་ཚེགས་ཆེན་པོ་དྭང་དུ་བླངས་ནས་མི་གྲངས་ས་ཡ་བརྒལ་བ་དུས་མིན་འཆི་རྐྱེན་དུ་གྱུར། མི་མང་པོ་ཞིག་གི་ལུས་སེམས་ཐོག་དཀའ་སྡུག་མཐའ་ཡས་པ་ཞིག་མྱངས་པའི་རླབས་ཆེན་གྱི་མི་དེ་དག་ལ་ད་རིང་ང་ཚོས་རྗེས་དྲན་བྱེད་རྒྱུ་དང༌། མ་འོངས་པ་ལ་ཡང་དེ་ལྟ་བུའི་བྱས་རྗེས་ལྡན་པའི་མི་རིགས་ཀྱི་དཔའ་བོ་དཔའ་མོ་དེ་རྣམས་ཀྱི་དམིགས་ཡུལ་དང༌། རེ་འདུན་གང་ཡོད་པ་དེ་དག་ང་ཚོས་མཇུག་མཐུད་ནས་འགྲུབ་པའི་འབད་བརྩོན་བྱེད་དགོས་པས་ཚང་མས་སྔར་བཞིན་ལྷག་བསམ་ཞུམ་པ་མེད་པའི་སྙིང་སྟོབས་ཇེ་ཆེར་སྐྱེད་རྒྱུ་ཤིན་ཏུ་གལ་ཆེ།
ལྷག་པར་ཉེ་དུས་བོད་ནང་ཕྲན་བུའི་གནས་ཚུལ་བཟང་དུ་འགྲོ་གི་ཡོད་ན་ཡང༌། ཚང་མས་ང་རང་ཚོའི་ཐོག་མའི་དམ་བཅའ་བརྟན་པོ་སྙིང་ལ་བཀོད་པ་དེ་ནམ་ཡང་མི་བརྗེད་པ་དང༌། འགྱུར་བ་མེད་པར་གནས་ཀྱི་ཡོད་པ་དེ་བསྔགས་པར་འོས་པ་ཞིག་ཡིན་པས། ངོས་ནས་དེ་རིང་གི་གོ་སྐབས་འདིར་རྗེས་སུ་ཡི་རངས་དང༌། ཐུགས་རྗེ་ཆེ་ཞུ་གི་ཡོད།
བོད་ནི་ས་བབ་དང༌། མི་རིགས། རིག་གཞུང་གང་ཅིའི་ཆ་ནས་རྒྱལ་ཁབ་གཞན་དག་གང་ཞིག་ལས་ཐ་དད་ཡིན་ཀྱང༌། ད་ལྟའི་གནས་བབ་མི་སེར་སྤེལ་ཡུལ་ཞིག་ཏུ་ཆགས་ཡོད། བོད་མི་ཚོ་ཕྱི་མིའི་བཙན་འོག་ཏུ་སྡོད་འདོད་མེད་པ་བོད་དུ་ལྟ་སྐོར་འགྲོ་མཁན་གཟུར་གནས་ཕལ་མོ་ཆེར་མཐོང་ཚུལ་བྱུང་བཞིན་པ་ལྟར་རེད།
བོད་ཀྱི་བདེན་དོན་བསྒྲུབ་རྒྱུ་འདི་ཕྱི་ནང་རྒྱུ་རྐྱེན་མང་པོ་ཞིག་འཛོམས་པའི་ཐོག་ནས་ཡོང་དགོས་པ་དང༌། གཙོ་ཆེར་མི་རིགས་རང་ཉིད་ཀྱི་ཞུམ་པ་མེད་པའི་སྙིང་སྟོབས་དང༌། ལྷོད་པ་མེད་པའི་བརྩོན་འགྲུས་ལ་ལྟོས་པ་ཡིན་པས། མཐར་ཐུག་གི་དམིགས་ཡུལ་བཟང་པོ་མ་འགྲུབ་བར་དུ་ཚང་མས་སྔར་བཞིན་ཞུམ་པ་མེད་པའི་སྙིང་སྟོབས་རྒྱུན་བཅངས་ཐོག་ནས་འཕྲལ་སེལ་གྱི་བདེ་བ་ཅུང་ཟད་ལ་ཆོག་ཤེས་དང༌། ལྷོད་ཡངས་བག་མེད་ཀྱི་དབང་དུ་ནམ་ཡང་མ་སོང་བ་ཞིག་ངེས་པར་དུ་བྱེད་དགོས།
ད་ལྟའི་གནས་སྐབས་འདིར་དམིགས་བསལ་གྱི་གསལ་བཤད་དྲན་སྐུལ་བྱེད་དགོས་པ་ཞིག་ལ། སོ་སོའི་མི་རིགས་ཀྱི་རྣམ་པ་ཟུར་དོད་ཡོང་བའི་རྒྱུ་མཚན་གཙོ་བོ་གཅིག་རང་གི་རིག་གཞུང་འདི་དག་ཡིན་པས། སོ་སོའི་སྐད་ཡིག་དང༌། དེ་ལ་བརྟེན་པའི་རིག་གཞུང་ཆེ་ཆུང་ཁག ཐ་ན་གྱོན་གོས་ཆ་ལུགས། རྒྱུན་གྱི་གོམས་གཤིས་བཟང་པོའི་རིགས་བཅས་པ་དེ་དག་རང་གི་ཁྱད་ནོར་དགོས་པ་གལ་ཆེར་ངོས་བཟུང་བའི་ཐོག་ནས་གཅེས་ཞེན་གྱིས་ཉམས་པ་སོར་ཆུད། མི་ཉམས་གོང་འཕེལ་ཡོང་བའི་དོན་ལ་ཤུགས་སྣོན་ངེས་པར་རྒྱག་དགོས། འདི་དག་རྨང་གཞིར་ཡོད་པའི་ཐོག་ལ། དེང་དུས་ཀྱི་ཤེས་ཡོན་ཆ་ཚང་བ་ཞིག་ཡོང་བའི་ཆེད་དུ་གོ་སྐབས་དང་དུས་ཚོད་ཆུད་ཟོས་མ་བཏང་བར་མཐོང་རྒྱ་ཐོས་རྒྱ་བསྐྱེད་ཐབས་ལ་དྭང་དོད་འབད་བརྩོན་བྱེད་རྒྱུ་གལ་ཆེ། ལྷག་པར་ལོ་གཞོན་ཕོ་མོ་རྣམས་ནས་མི་ཚེ་གཅིག་གི་རྩ་ཆེའི་ལུས་སེམས་འཚར་ལོངས་བྱེད་པའི་དུས་ཚོད་བཟང་པོའི་སྐབས་ལ་བག་མེད་ཆང་འཐུང་དང༌། རྒྱན་པོ་འགྱེད་རྩེད་སོགས་རྣམ་གཡེང་གི་རྒྱུ་རྐྱེན་ཚབས་ཆེའི་རིགས་ལ་ངེས་པར་དོ་སྣང་ཆེན་པོས་དྲན་ཤེས་བག་ཡོད་བསྟེན་དགོས།
དེ་ནས་གནས་ཚུལ་གཅིག་ལ། བར་ལམ་རྒྱ་མིའི་སྲིད་བྱུས་འཛིན་སྟངས་དེ་སྔའི་གནས་ཚུལ་ལ་ལྟོས་ཏེ་ལྐུག་པ་ཨུ་ཚུགས་ཀྱི་བསམ་བློ་རང་མིན་པའི་ཐོག་ནས་འཛམ་གླིང་སྤྱིའི་འགྲོ་སྟངས་དང་མཐུན་ཐབས་རང་དོན་རང་གཅེས་བྱས་ནས་འགྱུར་བ་འགྲོ་དང་འགྲོ་བཞིན་པར་བསྔགས་བརྗོད་དང༌། དགའ་བསུ་འོས་པ་ཞིག་རེད། རང་ཅག་བོད་ཀྱི་ཐོག་ལ་ཡང་ཕྱོགས་གཅིག་ནས་སྲིད་བྱུས་གུ་ཡངས་དང༌། མང་ཚོགས་ཀྱི་དཔལ་འབྱོར་ཡར་རྒྱས་གཏོང་ཐབས། བོད་ཀྱི་རིག་གཞུང་ཐོག་ལ་ཡང་སྔར་དང་མི་འདྲ་བར་དོ་སྣང་ཕྲན་བུ་ཆེ་རུ་འགྲོ་བའི་གནས་ཚུལ་ཞིག་ཡོང་གི་ཡོད་ན་ཡང༌། དེ་དང་ཆབས་ཅིག་འདས་པའི་ལོ་སུམ་ཅུ་ལྷག་རིང་བོད་མིར་ཚེ་གཡོག་བཀོལ་སྤྱོད་རྡུང་རྡེག་གཏོང་ཡུལ་དུ་བལྟས་པ་མ་གཏོགས་དོན་དམ་ཤེས་ཡོན་སློབ་གསོ་འཐུས་ཤོར་བསམ་ཡུལ་ལས་འདས་པ་བཏང་བཞིན་དུ་ད་དུང་བོད་མིས་མི་འཇོན་པ་དང༌། མི་ཐུབ་པའི་རྒྱུ་མཚན་གྱིས་ལས་བཟོ་ལག་རྩལ་པ་སོགས་ཀྱི་མིང་བཏགས་ནས་རྒྱ་མི་ཤིན་ཏུ་ཕོན་ཆེན་པོ་དབུས་གཙང་གྲོང་སྡེ་ཆེ་ཁག་ལ་གསར་དུ་སླེབས་ཀྱི་ཡོད་པ་དང༌། ལྷག་དོན་མདོ་སྟོད་སྨད་ཀྱི་ས་ཁུལ་འགའ་ཤས་ལ་ས་ཆ་ཐོན་སྐྱེད་བཟང་ས་དང༌། མཐུན་རྐྱེན་འཛོམས་ས་ཁག་ལ་རྒྱ་མི་ཕོན་ཆེན་པོ་གཞིས་ཆགས་ཞིང་པ་བྱེད་པར་རིམ་བཞིན་འབྱོར་བསྡད་ཀྱིས་དོན་གྱི་བདག་པོ་བོད་མི་ཚོ་ལུང་ཁུག་ནང་འབྲོག་ཚོ་ལྟ་བུར་ཟུར་སྡོད་དགོས་པ་དེ་འདྲ་ཡོང་གི་ཡོད་འདུག་པས། ང་རང་ཚོའི་ལུང་པའི་ནང་རྒྱ་རིགས་ཁྱོན་ཆེན་པོ་ཡོང་སྡོད་བྱེད་པ་འདི་ལ་དོ་སྣང་ཞིབ་རྩིས་ཆེན་པོ་བྱེད་དགོས།
འཕྲལ་སེལ་གྱི་མི་རིགས་སྲིད་བྱུས་འདྲ་ཆགས་པོ་གང་འདྲ་ཞིག་བཤད་རུང༌། མི་རིགས་ཀྱི་ཁྱད་ཆོས་གང་ལ་ལྡན་སའི་རྩ་བའི་མི་རིགས་དེ་ག་མཐའ་མ་མངོན་མེད་སྡུག་ཟད་དུ་འགྲོ་བའི་གནས་ཚུལ་བྱུང་བ་ཡིན་ན། ཧ་ཅང་བློ་ཕམ་དང་ཉེན་ཚབས་ཆེན་པོ་རེད། དེ་ལ་ཚང་མས་དོ་སྣང་དམིགས་བསལ་བྱེད་དགོས་ཀྱི་འདུག ཕྱོགས་མཚུངས་བོད་ནང་སློབ་གྲྭ་ཡར་རྒྱས་གཏོང་གི་ཡོད་བརྗོད་བཞིན་དུ་བོད་ཕྲུག་བྱིས་པ་ཆུང་ངུ་མང་པོ་ཆ་རྐྱེན་དང་མཐུན་རྐྱེན་བཟང་བར་བསྙད་བཏགས་ནས་རྒྱ་ནག་ནང་ཁྲིད་དེ་རིམ་པས་བོད་མིའི་གོམས་གཤིས་ཀྱི་བསམ་སྤྱོད་རང་ཡལ་དུ་གཏོང་བའི་གནས་ཚུལ་མི་ཡོང་བའི་ངེས་པ་མི་འདུག་པས། འབྲེལ་ཡོད་ཕ་མ་སོགས་དང༌། ཕྲུ་གུ་སོ་སོའི་ངོས་ནས་རང་གི་མི་རིགས་ཀྱི་ཁྱད་ཆོས་གོམས་གཤིས་དེ་དག་རང་ཉིད་ས་ཁུལ་ཉེ་འགྱངས་གང་དུ་ཡོད་ཀྱང་མ་བརླག་མི་བརྗེད་པ་བྱེད་རྒྱུར་དོ་སྣང་ཆེན་པོའི་ཐོག་ནས་བདག་གཅེས་འབད་བརྩོན་ཆེན་པོ་བྱེད་དགོས།
བོད་ནང་རྒྱ་མིའི་དཔལ་འབྱོར་སྲིད་བྱུས་གསར་པ་དེའི་སྐོར་ལ་ཡང་ཡིད་གཟབ་བྱེད་དགོས་པའི་གནད་དོན་ཞིག་བརྗོད་འདོད་འདུག ༡༩༨༠ ལོ་ནས་བོད་ནང་དཔལ་འབྱོར་གྱི་འགྲོ་ལུགས་གུ་ཡངས་བཏང་བའི་ཁར། ཉེ་ཆར་རྒྱ་ནག་ནས་བོད་ནང་ཕྱི་རྒྱལ་གྱི་མ་རྩ་འཛུགས་འཇོག་བྱ་རྒྱུར་འབོད་བསྐུལ་བྱས་པ་དེས་བོད་མི་མང་ཚོགས་ཀྱི་འཚོ་བ་ཡར་རྒྱས་འགྲོ་གི་ཡོད་ན་དགའ་བསུ་ཞུ་འོས་པ་རེད། འོན་ཀྱང་འདས་པའི་ལོ་ ༢༧ རིང་བོད་ནང་གི་ཐོན་སྐྱེད་མཐའ་དག་རྒྱ་མིས་འཆར་གཞི་ལྡན་པའི་སྒོ་ནས་འཕྲོག་བཅོམ་བེད་སྤྱོད་བྱས་པ་དང༌། གཙོ་བོ་རྒྱ་ནག་གི་དཔལ་འབྱོར་ཡར་རྒྱས་དོན་དུ་བོད་དེ་རང་བྱུང་ཐོན་སྐྱེད་འབྱུང་ཁུངས་ཤིག་བཟོས་ཡོད། དེ་འདྲའི་བསམ་སྤྱོད་ལག་ལེན་མུ་མཐུད་བྱས་པ་དང༌། རྒྱ་ནག་ཁྱོན་གྱི་དཔལ་འབྱོར་དེང་རབས་ཅན་དུ་བསྒྱུར་རྒྱུའི་ཆེད་དུ་བོད་ནང་གི་གནས་སྟངས་དང༌། བོད་མིའི་དགོས་མཁོར་བསམ་གཞིགས་མེད་པར་བོད་ཀྱི་དཔལ་འབྱོར་འཆར་འགོད་འཚབ་འཚུབ་ཧོལ་རྒྱུགས་བྱས་ན། བོད་ནང་དཔལ་འབྱོར་ཟང་ཟིང་ཁུངས་མེད་དུ་འགྲོ་བས་མ་ཚད། བོད་ཀྱི་རང་བྱུང་སྐྱེ་དངོས་ཐོན་ཁུངས་ཁག་ཀྱང་ཉམས་ཆག་ཆེན་པོར་འགྱུར་ཉེན་ཡོད།
དེ་བཞིན་བོད་ཀྱི་རིག་གཞུང་ཁོངས་ནས་ཐ་སྙད་རིག་པའི་སྐོར་ཅི་རིགས་དང༌། སྔོན་དང་ཕྱིས་ཀྱི་ལོ་རྒྱུས་རིགས་བོད་ཡིག་ནང་ཐོན་དང་ཐོན་བཞིན་པ་བསྔགས་འོས་སུ་འདུག་ཀྱང༌། བཙན་དབང་འོག་ཡོད་པས་མཐའ་མའི་བཀའ་འཁྲོལ་ཆོག་མཆན་རྒྱ་མིའི་ངོ་འཛུམ་ལ་བལྟས་ནས་ལེན་དགོས་སྟབས་དོན་རྩ་འགངས་ཆེར་སྒྲོ་སྐུར་ཕྱོགས་ལྷུངས་བདེན་དོན་མིན་པ་མི་ཉུང་བ་ཞིག་ཡོང་གི་འདུག་པར་ཚང་མས་དོ་སྣང་དང༌། སླད་འདི་རིགས་མི་འབྱུང་ཞིང༌། དག་སེལ་གྱི་ཐབས་ཤེས་འབད་བརྩོན་ཕྱོགས་གང་ས་ནས་བྱེད་དགོས་འདུག
དེ་ནས་བར་ལམ་ལོ་ཤས་རིང་བོད་ནང་ནས་ཕྱི་རྒྱལ་ཁག་དང༌། དེ་དག་ནས་བོད་ནང་གཉེན་འཕྲད་དུ་འགྲོ་འོང་གི་གོ་སྐབས་བྱུང་བ་ནི་རང་གི་ཕ་མ་བུ་ཕྲུག་དང༌། གྲོགས་བཟའ་ཟླ་སོགས་དངོས་སུ་ཐུག་འཕྲད་ཕར་བཞག་ནས་གནས་ཚུལ་ཙམ་ཡང་ཐོས་རྒྱུ་མེད་པར་ལོ་མང་སོང་བའི་ཉེར་ལེན་གྱིས་གཉེན་འཕྲད་ལ་ཕར་འགྲོ་ཚུར་འོང་བྱེད་པའི་གནས་ཚུལ་དེ་བྱུང་བ་རེད། དེས་སྤྱི་སྒེར་རྒན་གཞོན་ཚང་མར་ཕན་ཐོགས་ཆེན་པོ་བྱུང་ཡོད། བོད་ནང་གཉེན་འཕྲད་འགྲོ་མཁན་དེ་དག་མི་དང་མིའི་བརྩེ་སེམས་ཀྱིས་རང་རང་སོ་སོའི་ཕ་མ་སྤུན་ཉེ་ཡོད་པ་རྣམས་ཐུག་འཕྲད་ཀྱི་རྩ་བར་ཕྱིན་པ་མ་གཏོགས། རྒྱ་མིའི་དབང་སྒྱུར་ལ་མོས་པ་དང༌། ད་ལྟའི་དངོས་ཡོད་གནས་ཚུལ་ལ་འདོད་པ་ཚིམས་ནས་ཕྱིན་པ་ཞིག་རྩ་བ་ནས་མིན་སྟབས་གནས་ཚུལ་འདི་དག་སྲིད་དོན་ཐོག་ནས་བེད་སྤྱོད་འཁྱོག་བཤད་བྱེད་པ་བྱུང་ན་སྙིང་པོ་མེད་པ་ཞིག་རེད། འགྲོ་ཀུན་བདེ་དགེས་འཚོ་བའི་སྨོན་ལམ་བཅས། ཏཱ་ལའི་བླ་མས། ཕྱི་ལོ་ ༡༩༨༦ ཟླ་ ༣ ཚེས་ ༡༠ ལ།། །།
