ཆབ་སྲིད་ཀྱི་ལས་འགུལ་ལྟ་བུ་སྤེལ་རྒྱུ་གལ་ཆེ་ཡང་གཞི་རིམ་སློབ་མ་ཚོར་རིག་གནས་ཀྱི་རྨང་གཞི་བརྟན་པོར་འཛུགས་རྒྱུ་དེ་བས་ཀྱང་གལ་ཆེན་པོ་རེད་ཟེར།
ཟླ་འདིའི་ཚེས་ ༡༠ ཉིན་ནས་བཟུང་ཟླ་གཅིག་ཙམ་རིང་གངས་ལྗོངས་རང་བདེན་རྩོད་ལེན་མཐུན་ཚོགས་ཀྱིས་གོ་སྒྲིག་འོག སྦེལ་ཀོབ་ལུགས་བདེ་གཉིས་ཀྱི་གཞི་རིམ་སློབ་གྲྭ་ཁག་གི་སློབ་ཕྲུག་ཚོར་རིག་གནས་འཆད་ཁྲིད་ཀྱི་ལས་རིམ་ཞིག་མགོ་འཛུགས་གནང་ཡོད་ལ། དེ་ནི་དབྱར་གནང་གི་སྐབས་དང་བསྟུན་སློབ་ཕྲུག་ཚོའི་ཉིན་རེའི་དུས་ཚོད་འཕྲོ་བརླག་ཏུ་མི་འགྲོ་བ་དང་བོད་ཀྱི་སྐད་ཡིག་ལ་སྔར་བས་ཀྱང་གཞི་རྐང་བརྟན་པོར་འཛུགས་ཐུབ་ཆེད་ཡིན་འདུག ཚེས་ ༡༠ ཉིན་ལུགས་ཟུང་བསམ་འགྲུབ་གླིང་གི་གཞིས་མགོ་དང་ལུགས་བདེ་གཉིས་ཀྱི་བརྒྱ་དཔོན་རྣམ་པ། སློབ་མ་བརྒྱ་ལྷག་དང་སློབ་མའི་ཕ་མ་སོགས་ལུགས་ཟུང་བསམ་འགྲུབ་གླིང་མི་མང་ཚོགས་ཁང་ནང་མཉམ་འཛོམས་ཀྱིས་ཐེངས་འདིའི་ལས་གཞིའི་སྐོར་ངོ་སྤྲོད་དང་གསུང་བཤད་གནང་ཡོད། ཉིན་དེར་གངས་ལྗོངས་རང་བདེན་རྩོད་ལེན་མཐུན་ཚོགས་ཀྱི་ཚོགས་གཙོ་བློ་བཟང་དཔལ་ལྡན་ལགས་ཀྱིས་གསུངས་དོན། བོད་ཀྱི་སྐད་ཡིག་སུམ་རྟགས་དག་གསུམ་དང་རྒྱལ་རབས་ལོ་རྒྱུས། ནང་ཆོས་བགྲོ་གླེང་སོགས་རིག་གནས་འཆད་ཁྲིད་ཀྱི་ལས་གཞི་འདི་འདྲ་ཞིག་གོ་སྒྲིག་བྱེད་དགོས་དོན་ནི། སློབ་གྲྭ་ཁག་ཏུ་བོད་ཡིག་སློབ་ཀྱིན་ཡོད་ནའང་། སློབ་གྲྭ་ཐོན་ཚར་དུས་བོད་རང་གི་སྐད་ཡིག་དང་རིག་གཞུང་ཐོག་རང་རྐྱ་འཕེར་བའི་སློབ་མ་ཐོན་ཐུབ་ཀྱི་མེད་སྟབས། སློབ་མ་ཚོར་བོད་ཡིག་གི་རྨང་གཞི་བརྟན་པོ་བཟོ་བ་དང་། བོད་ཀྱི་སྐད་ཡིག་རྒྱུན་གནས་ཐུབ་ཆེད་ཡིན་པ་མ་ཟད། འདི་ནི་༸གོང་ས་མཆོག་གི་རླབས་ཆེན་གྱི་དགོངས་གཞི་གལ་ཆེན་ཞིག་ཀྱང་རེད་ཅེས་གསུངས་ཡོད།
དེ་བཞིན་ལུགས་ཟུང་བསམ་འགྲུབ་གླིང་གཞིས་མགོ་བཀྲ་ཤིས་དབང་འདུས་ལགས་ཀྱིས། མི་རྒན་པ་ཚོ་དང་དེང་རབས་ན་གཞོན་གཉིས་བསྡུར་ན་དེང་རབས་ན་གཞོན་ཚོར་མཛུབ་མོ་འཛུགས་ཆོག་ཆོག་གི་བོད་ཡིག་ཤེས་མཁན་ཉུང་ཉུང་རེད་ལ། དེང་སྐབས་གཞུང་ཞབས་ལས་བྱེད་པའི་ནང་དུའང་གཏོང་ཡིག་འབྲི་ཐུབ་ཙམ་དང་སྙན་ཞུ་འབྲི་ཐུབ་ཙམ་ལས་གཞི་རྩའི་རྨང་གཞི་བརྟན་པོ་ཡོད་མཁན་ཧ་ཅང་དཀོན་པོར་གྱུར་ཡོད་སྟབས། འདི་ལྟ་བུའི་རིག་གནས་འཆད་ཁྲིད་ཀྱི་ལས་གཞི་འདི་ཧ་ཅང་གི་གལ་ཆེན་པོ་རེད། ང་རང་ཉིད་ཀྱིས་ཆུང་དུས་ནས་བོད་ཡིག་ཡག་པོ་སྦྱངས་མེད་སྟབས་ད་ལྟ་དངོས་སུ་ལས་ཀ་བྱེད་སྐབས། དཀའ་ངལ་འཕྲད་ཀྱིན་འདུག་ལ། གཏོང་ཡིག་ཅིག་འབྲི་དགོས་ཀྱང་ཡང་དང་རིམ་གྱིས་ཞུ་དག་གཏོང་དགོས་པ་དང་། གང་བསམ་པ་དེ་ལམ་སེང་འབྲི་ཆོག་ཆོག་ཅིག་མི་འདུག་ཅེས་སློབ་ཕྲུག་ཚོར་རང་གི་གནས་སྟངས་གསལ་བཤད་བྱས་ཐོག སློབ་ཕྲུར་ཚོར་བོད་ཡིག་སྦྱང་དགོས་པའི་གལ་ཆེན་རང་བཞིན་ངོ་སྤྲོད་གནང་བ་དང་། ཡང་ཁོང་གིས་གསུངས་དོན། ༸གོང་ས་མཆོག་གིས་རྒྱུན་དུ་གསུངས་བཞིན་པ་ལྟར་རིགས་གཅིག་རྐང་འཛིན་ཐོག་ཤུགས་རྒྱག་དགོས་པ་དང་། དེ་ཡང་དེང་དུས་ཀྱི་རིག་གནས་དང་འཕྲུལ་ཆས་རིགས་དེ་འདྲར་རིགས་གཅིག་རྐང་འཛིན་ཐོན་དགོས་ཀྱི་འདུག ད་ལྟ་ང་ཚོའི་མི་ཚང་མ་སྨན་ཞབས་པའི་སྟེང་ལ་འགྲོ་བསྡད་ཀྱིན་འདུག ལམ་ཁ་གཞན་འདེམས་དགོས་པ་རེད། རིགས་མི་འདྲ་བ་དེ་འདྲར་ཤུགས་རྒྱག་དགོས་པ་རེད་ཅེས་གསུངས་ཡོད། ཐེངས་འདིའི་རིག་གནས་འཆད་ཁྲིད་གནང་མཁན་ལ་ངྷ་ས་བོད་ཁྱིམ་སློབ་གྲྭའི་གཞི་རིམ་སློབ་གྲྭ་ཁག་གི་སློབ་དེབ་རྩོམ་སྒྲིག་པ་དང་ཉམས་ཞིབ་པ་བློ་བཟང་བསྟན་དར་ལགས་གདན་ཞུས་བྱས་ཡོད་པ་དང་། ཉིན་རེའི་ཞོགས་པའི་ཆུ་ཚོད་ ༩ ནས་ཆུ་ཚོད་ ༡༠ བར་འཛིན་གྲྭ་འཚོགས་རྒྱུ་དང་། དེའི་རྗེས་ཆུ་ཚོད་ ༡༢ བར་སློབ་ཕྲུག་དང་དགེ་རྒན་བར་དྲིས་པ་དྲིས་ལན་གྱི་བགྲོ་གླེང་དང་། ཉིན་རྒྱབ་ཆུ་ཚོད་ ༡ ནས་ ༢ བར་འཛིན་གྲྭ་འཚོགས་རྒྱུ་དང་། དེའི་རྗེས་ཆུ་ཚོད་ ༣ བར་བགྲོ་གླེང་གནང་རྒྱུ་ཡིན་འདུག
རེད་་་ནམ་ཡང་ང་ཚོས་སྐད་ཆ་རྫིགས་པོ་ཞིག་ལ་གཤོག་པ་བཙུགས་ཏེ་རླུང་ཁམས་འགྲིམས་རྒྱུ་ལས་ཁ་ཡོད་ལག་ཡོད་ཀྱི་དགོས་མཁོར་སྨན་པའི་ལས་དོན་རེའི་སྣེ་མོར་འཇུས་ཏེ་བོད་སྤྱི་ཚོགས་ཀྱི་ཞན་ཆ་གང་ན་མཆིས་བ་དེར་ནུས་ཤུགས་འདོན་དགོས།་་གོང་དུ་ཆབ་སྲིད་ཀྱི་ལས་འགུལ་ལས་སློབ་མ་ཚོར་རིག་གནས་ཀྱི་རྨང་གཞི་བརྟན་པོ་བཟོ་གལ་ཆེ་བར་བརྗོད་པ་དེར་ངས་གནས་ལུགས་ཤིག་གི་ཐད་ནས་རྒྱབ་སྐྱོར་ཞུ་གི་ཡོད།་་་་
མི་རིགས་དེར་ཤེས་ཡོན་གྱི་གནས་ཚད་ལེགས་པོ་ཞིག་ཡོད་ན།
མི་རིགས་དེ་ཡར་རྒྱྱས་སུ་འགྲོ་བའི་འགོ་ཚུགས་པས་ཤེས་ཡོན་གྱི་ལས་འགུལ་ནི་ལས་འགུལ་རྣམས་ཀྱི་ནས་ནས་མཆོག་ཡིན་པས། ངས་ཁྱོད་ཚོས་ཡི་རང་ཚད་མེད་ཡོད།
ཐུགས་རྗེ་ཆེ།
དངོས་ནད་གསར་འགྱུར་ཡག་པོ་འདུག། གངས་ལྗོངས་རང་བདེན་རྩོད་ལེན་མཐུན་ཚོགས་ཀྱི་ཚོགས་གཙོ་དང་ཚོགས་མི་ཡོངས། ད་དུང་སྐུ་ངོ་བཀྲ་ཤིས་དབང་འདུས་ལགས་ཡོངས་ལ་འཚམས་འདྲི་བཀྲ་ཤིས་བདེ་ལེགས་དང་། འདི་ལྟར་རླབས་ཆེན་གྱི་ལས་གཞི་དེ་འུ་ཅག་བོད་མི་རིགས་ཚང་གི་ཉི་གཞོན་བསུ་བྱེད་ཀྱི་ཕོ་ཉ་རང་ཡིན་དུས་དགའ་བོ་ཞེ་དྲག་བྱུང་ལ། མུ་འཐུད་དུ་འབད་རོགས། ཕྱོགས་ཡོངས་ནས་འབད་རོགས།
གངས་བདེན་མཐུན་ཚོགས་ཀྱི་དབུ་ལས་རྣམ་པར་བཀྲ་ཤིས་བདེ་ལེགས་ཞུ། ཐུགས་རྗེ་ཆེ་་་་་་་་་་་་་་་་་་་་་་་་་་་་་་
གངས་ལྗོངས་རང་བདེན་རྩོད་ལེམ་མཐུན་ཚོགས་ཀྱིས་རིག་གནས་འཆད་འཁྲིད་བྱེད་དགོས་པ་སླད་མར་བོད་དགེ་མཁོ་དགོས་མ་མཆིས་པའི་རེ་མདུན་མ་རེད་ལ་བོད་ཡིག་དགེ་རྒན་གྱིས་སློབ་འཁྲིད་ཡག་པོ་བྱས་མེད་པའི་རྣམ་འགྱུར་དེ་བས་ཡིན་རྒྱུ་མ་རེད་དེའི་ཕྱིར་བོད་དགེ་ངོ་དག་པ་ཞིག་ན་རྒྱབ་སྐྱོར་དང་སྐབས་དེར་ཁོང་རང་ནས་ཀྱང་རིག་གནས་འཆད་འཁྲིད་ཀྱི་དངས་བླང་དགེ་རྒན་ཡང་བྱེད་སྲིད་པ་རེད།
གངས་ལྗོངས་རང་བདེན་རྩོད་ལེན་མཐུན་ཚོགས་ཀྱིས་རླབས་ཆེ་བའི་ལས་གཞི་འདི་ལྟ་བུ་ཞིག་བརྩམས་པར་ང་ཚོས་བསྟོད་བསྔགས་ཕུལ་བ་ཙམ་གྱིས་ག་ལ་ཆོག དངོས་ཤུགས་བརྒྱུད་གསུམ་ནས་ཁ་ཡོད་ལག་ཡོད་ཀྱིས་རྒྱབ་སྐྱོར་གནང་དགོས། དཔེར་ན། ཁ་སང་སྐུ་ངོ་བཀྲ་ཤིས་དབང་འདུས་ལགས་ཀྱིས་ལོ་རྗེས་མའི་ལས་གཞིའི་འགྲོ་གྲོན་ཡོངས་རྫོངས་ཁོང་རང་ངོས་ནས་གཏོང་རྒྱུ་ཡིན་ཞེས་ཞལ་བཞེས་གནང་སོང་། ཁོང་མི་རིང་བར་སྦེལ་ཀོབ་སྐུ་ངོ་ནས་བརྗེ་སྤོར་བྱ་གཏན་འཁེལ་ཡོད་སྟབས་ཁོང་གིས་སྦེལ་ཀོབ་མི་མང་དང་སློབ་ཕྲུག་ཚོའི་ཆེད་དུ་ཕུལ་བའི་ཆེས་མཐའ་མཇུག་གི་བྱ་བཞག་དེ་ཡིན་ངེས་ཨང་།
འོན་ཀྱང་། ངས་འདི་ལྟ་བུའི་ལས་གཞི་རྩོམ་སྐབས་སེམས་ལ་གནད་དོན་གཞན་ཞིག་དྲན་ཡོང་གི་འདུག དེ་ནི་གལ་སྲིད་ང་ཚོས་ནམ་ནམ་ཞར་ཞར་ལ་སློབ་ཕྲུག་ཚོར་ཟུར་ཁྲིད་བྱེད་དགོས་པ་དང་། ཁོང་ཚོས་བོད་ཀྱི་སུམ་རྟགས་དག་གསུམ་ཙམ་ལའང་རང་མགོ་ཐོན་གྱི་མེད་ན། བོད་ཡིག་གི་དགེ་རྒན་དག་དགོས་གལ་མི་འདུག་སྙམ། ད་དུང་འདི་ལྟ་བུའི་ལས་གཞི་རྩོམ་སྐབས་བོད་གཞུང་ཤེས་རིག་ལས་ཁུངས་ཀྱིས་ཅི་ཞིག་དགོངས་ཀྱིན་ཡོད་དམ། སློབ་གྲྭའི་གཙོ་སྐྱོང་བ་ཚོས་ཅི་ཞིག་དགོངས་ཀྱི་ཡོད་དམ། བོད་དགེ་ཚོས་ཅི་ཞིག་དགོངས་ཀྱི་ཡོད་དམ།
རྗེས་སུ་ཡི་རང་ཡོད། ཡིན་ཡང་། གངས་ལྗོངས་རང་བདེན་རྩོད་ལེན་མཐུན་ཚོགས། ཞེས་པའི་མཚན་འདི་བདེ་བོ་ཞིག་ཁྱོན་ནས་མ་རེད། རང་བདེན་ཞེས་པ་དེ་རང་དབང་དང་བདེན་དོན་ཞེས་པའི་ཚིག་བསྡུས་པ་འདྲ།
གསལ་ཞུ།་་་་་་་་་《ཚོགས་པ་དང་ཚོགས་མིར་ཚོགས་པའི་ལས་སྣེ》་ཟེར་བའི་ཚོགས་པའི་ལས་སྣེ་ནི་ཚོགས་པ་འདིའི་ཁོངས་སུ་གཏོགས་པའི་གྲྭ་ཚང་ཁག་གི་ལས་སྣེ་དབང་འཛཱིན་པར་གོ་དགོས།
ངོ་མ་དེ་ཡག་བྱུང་།་་་སྔར་ངས་གོ་ཐོས་ལ་《གངས་ལྗོངས་རང་བདེན་རྩོད་ལེན་མཐུན་ཚོགས་》་ཟེར་བའི་ཚོགས་མི་ཕལ་ཆེར་གྲྭ་བ་ཡིན་པ་དང་།་ད་དུང་ཆེས་མང་བ་སེར་བྱེས་ཡིན་ཚུལ།་་མ་ཟད་སེར་བྱེས་ལས་སྣེ་དབང་འཛིན་པས་ཚོགས་པ་འདིར་སྔ་ཕྱིར་འགོག་རྐྱེན་བཟོས་ཚུལ་ཐོས་མྱོང་ཡོད།་་་བདེན་མིན་མི་ཤེས།་འོན་ཀྱང་ད་རེས་ཀྱི་བསྟོད་འོས་ཀྱི་ལས་འགུལ་འདི་དང་འདི་བཞིན་མིག་དཔེར་འོས་པའི་ལས་འགུལ་མང་དག་ཞིག་སྤྱི་ཚོགས་ཁྲོད་སྤེལ་དང་སྤེལ་མུས་ལ་དགའ་བསུ་ཞུ།་་་་་་་ཚོགས་པ་དང་ཚོགས་མིར་ཚོགས་པའི་ལས་སྣེ་ཁག་གི་འགོག་རྐྱེན་མེད་པར་བྱ་བ་ལེགས་གྲུབ་ཡོང་བའི་སྨོན་འདུན་ཞུ།
ངོ་མ་རླབས་ཆེན་གྱི་ལས་ཀ་རེད། འཚོགས་འདུ་རེ་འཚོགས་པ་ལས་འདི་ཧ་ཅང་ཡག་པོ་རེད། འདི་འདྲ་བྱས་ནས་ས་གནས་འདི་མགྱོགས་པོར་སད་པའི་རེ་བ་འདུག
བྱ་བ་འདིའི་མཇུག་མུ་མཐུད་དུ་སྐྱོང་ཐུབ་པར་རེ་སྐུལ་དང་། བྱ་བ་འདི་ཉིད་མགོ་རྩོམ་མཁན་གྱི་ལས་མི་ཡོངས་ལ་སྙིང་ཐག་པ་ནས་འཚམ་འདྲི་བཀྲ་ཤིས་བདེ་ལེགས་ཡོད། བོད་དོན་བོད་མིས་བྱེད་པ་ནི་བོད་མིར་སྐྱེ་བའི་དགོས་དམིགས་ཤིག་ཡིན་པ་ཚང་མས་མཁྱེན་གསལ་ཡིན་དུས། དེ་ཉིད་དང་དུ་ལེན་གྱི་རང་གི་ཚེ་སྲོག་ལས་ཀྱང་གལ་ཆེན་གྱི་བྱ་བཞག་ཞིག་ཡིན་པ་ནི་དེ་བས་ཀྱང་བཤད་མ་དགོས་པ་ཞིག་ཆགས་ཡོད་པ་རེད།
དེ་ནི་༧་གོང་ས་མཆོག་གིས་དགོངས་གཞི་དང་
བོད་ཀྱི་ཐུན་མང་མ་ཡིན་པའི་རིག་གཞུང་སྲུང་སྐྱོབ་ཀྱི་ལས་གཞི་རྒྱ་ཆེན་པོ་དེ་ལ་
ངས་ཡང་སྐྱར་གངས་ལྗོངས་རང་བདེན་རྩོད་ལེན་མཐུན་ཚོགས་ཀྱི་ཚོགས་གཙོ་བློ་བཟང་དཔལ་ལྡན་ལགས་ལ་མཚམ་དྲི
བཀྲ་ཤིས་བདེ་ལེགས་ཞུ་
ལས་གཞི་རྒྱ་ཆེན་པོ་དེ་འདྲ་ཞིག་སྤེལ་བ་དེ་ལ་ངས་གངས་ལྗོངས་རང་བདེན་རྩོད་ལེན་མཐུན་ཚོགས་ཀྱིས་ཚོག་ཙོ་དང་ཚོགས་མི་ཡོང་ལ་ རྒྱབ་སྐྱོར་དང་སེམས་གཏིང་ནས་གུས་མདུད་ཞུ་བཞིན་ཡོད་