ཨ་རིའི་སྲིད་འཛིན་ཊོམ་ཕུའི་གཞུང་གིས་སྐུ་ཞབས་རི་ལེ་བྷར་ནེ་སི་ལགས་ཨ་རིའི་བོད་དོན་དམིགས་བསལ་འབྲེལ་མཐུད་པར་བསྐོ་གཞག་གནང་ཡོད་འདུག
ཉེ་ལམ་ཨ་རིའི་ནེའུ་ཡོག་ཏུ་རྟེན་གཞི་བྱས་པའི་ཨ་ཊི་ལན་ཊེཀ་ལྷན་ཚོགས་(Atlantic Council) སྲིད་བྱུས་ཉམས་ཞིབ་ཁང་གིས་སྲིད་སྐྱོང་སྤེན་པ་ཚེ་རིང་མཆོག་ལ་བཅར་འདྲི་ཞུ་སྐབས། སྲིད་སྐྱོང་མཆོག་གིས་ད་ལྟའི་ཆར་གཞུང་འབྲེལ་གསལ་བསྒྲགས་གང་ཡང་བྱས་མེད་ཀྱང་། ཨ་རིའི་བོད་དོན་དམིགས་བསལ་འབྲེལ་མཐུད་པ་བསྐོ་གཞག་བྱས་ཡོད་པར་ཡིད་ཆེས་བྱེད་ཀྱི་ཡོད་ཅེས་གསུངས་འདུག
ད་ལན་ཨ་རིས་སྐུ་ཞབས་རི་ལེ་བྷར་ནེ་སི་ལགས་བོད་དོན་དམིགས་བསལ་འབྲེལ་མཐུད་པར་བསྐོ་གཞག་གནང་བ་གཞུང་འབྲེལ་གསལ་བསྒྲགས་བྱས་ཚེ། ཁོང་ནི་ཨ་རིའི་བོད་དོན་དམིགས་བསལ་འབྲེལ་མཐུད་པ་སྐབས་བརྒྱད་པ་དེ་ཆགས་ཀྱི་ཡོད་པ་དང་། ཕྱི་ལོ་ ༢༠༢༡ ལོར་བྷའེ་ཌན་གཞུང་གིས་ལྕམ་ཨ་ཛི་རཱ་ཛེ་ཡ་ལགས་ཨ་རིའི་བོད་དོན་དམིགས་བསལ་འབྲེལ་མཐུད་པར་བསྐོ་གཞག་གནང་། ཕྱི་ལོ་ ༢༠༢༠ ལོའི་ཟླ་ ༡༠ ནང་སྲིད་འཛིན་ཊོམ་ཕུའི་གཞུང་གིས་སྐུ་ཞབས་རོ་བྷར་ཊི་ཨེ་ཌེ་སི་ཊོ་རོ་ (Robert A. Destro) ལགས་བོད་དོན་དམིགས་བསལ་འབྲེལ་མཐུད་པར་བསྐོ་གཞག་གནང་། ཕྱི་ལོ་ ༢༠༡༤ ལོར་ལྕམ་ས་རཱ་སི་ཝལ་ (Sarah Sewall) ལགས་དང་། ཕྱི་ལོ་ ༢༠༠༩ ལོར་ལྕམ་མ་རེ་ཡ་ཨོ་ཊེ་རོའོ་ (Maria Otero) ལགས། ཕྱི་ལོ་ ༢༠༠༡ ལོར་ལྕམ་པོ་ལཱ་ཌོ་བྷིར་ཡན་སི་ཀེ་ (paula dobriansky) ལགས། ཕྱི་ལོ་ ༡༩༩༩ ལོར་འདས་པོ་ལྕམ་ཇོ་ལེ་ཡ་ (Julia taft) ལགས། ཕྱི་ལོ་ ༡༩༩༧ ལོར་ཨ་རིའི་བོད་དོན་དམིགས་བསལ་འབྲེལ་མཐུད་པ་ཐོག་མ་སྐུ་ཞབས་ (Gregory Craig) ལགས་བསྐོ་གཞག་བྱུང་།
སྐུ་ཞབས་རི་ལེ་བྷར་ནེ་སི་ལགས་ནི་ཨ་རིའི་ཕྱི་སྲིད་ལྷན་ཁང་གི་དམངས་གཙོ་དང་། འགྲོ་བ་མིའི་ཐོབ་ཐང་། ངལ་རྩོལ་བཅས་ཀྱི་འགན་འཁུར་དྲུང་ཆེ་ལས་རོགས་ཡིན་པ་དང་། དེ་སྔ་ཕྱི་སྲིད་ལྷན་ཁང་གི་དྲུང་ཆེ་གཞོན་པའི་ཆབ་སྲིད་ལས་དོན་གྱི་སློབ་སྟོན་པ་རྒན་པ་དང་། དམངས་གཙོ་དང་འགྲོ་བ་མིའི་ཐོབ་ཐང་། ངལ་རྩོལ་བཅས་ཀྱི་དྲུང་ཆེ་ལས་རོགས་གཞོན་པ། རྒྱལ་སྤྱིའི་ཚོགས་སྡེའི་ལས་དོན་གྱི་དྲུང་ཆེ་ལས་རོགས་གཞོན་པ། རྒྱལ་སྤྱིའི་ཆོས་དད་རང་དབང་གི་དོན་གཅོད་པའི་སློབ་སྟོན་པ་གཙོ་བོ་བཅས་ཀྱི་ཕྱག་ལས་གནང་མྱོང་། ཁོང་ཨ་རིའི་ཊེག་ཟ་སི་མངའ་སྡེའི་ཨུ་ཝལ་དཱེ་ནས་ཡིན་པ་དང་ཝང་ཤིན་ཊོན་དང་ལི་གཙུག་ལག་སློབ་གཉེར་ཁང་ནས་ཆབ་སྲིད་ཀྱི་ཉེ་བའི་གཙུག་ལག་རབ་འབྱམས་པའི་སློབ་གཉེར་གནང་། ཊེག་ཟ་སིའི་ཨེ་ཨེམ་གཙུག་ལག་སློབ་གཉེར་ཁང་ནས་རྒྱལ་སྤྱིའི་འབྲེལ་ལམ་ཐོག་གཙུག་ལག་རབ་འབྱམས་པའི་སློབ་མཐར་ཕྱིན།
གསར་འགོད་པ། སྐལ་བཟང་སྦྱིན་པ།
