རྭ་རྒྱ་དགོན་པར་མུ་མཐུད་ཆབ་སྲིད་སློབ་གསོ་སྤེལ་བཞིན་པ་མ་ཟད། གྲྭ་བ་གསུམ་འཛིན་བཟུང་བཀག་ཉར་བྱས་ཡོད་འདུག
ཕྱི་ཚེས་ ༢༡ ཉིན་སེ་ར་དགོན་པའི་གྲྭ་རྭ་རྒྱ་བློ་དབང་ལགས་ཀྱིས་འདི་གའི་གསར་འགོད་པར་འགྲེལ་བརྗོད་གནང་བ་ལྟར་ན། འདིའི་སྔོན་མདོ་སྨད་རྭ་རྒྱ་ཁུལ་དུ་རྒྱ་གཞུང་ལ་ཞི་བའི་ངོ་རྒོལ་གྱི་ལས་འགུལ་བྱུང་བ་ནས་ད་བར། ཉིན་རེ་བཞིན་གནས་སྟངས་ཧ་ཅང་ཛ་དྲག་ཏུ་སོང་བ་མ་ཟད། ཆབ་སྲིད་ཀྱི་གནད་དོན་གང་ཡང་མེད་པར་རང་གི་ཁྱིམ་མི་ཚུན་ཆད་ལ་ཁ་པར་བཏང་ནའང་། རྒྱ་གཞུང་གིས་ལམ་སང་འདྲི་རྩད་དང་བསུན་བཙུར་བྱེད་ཀྱིན་ཡོད་སྟབས། ད་བར་ཕ་ཡུལ་ཕྱོགས་སུ་འབྲེལ་གཏུགས་མང་བོ་བྱེད་མ་ཐུབ་པར་ལྷག་སོང་མོད། དེ་རིང་གནས་ཚུལ་ཤེས་རྟོགས་བྱུང་བ་ལྟར་ན། མདོ་སྨད་རྭ་རྒྱ་དགོན་པར་རྒྱ་གཞུང་གིས་ལས་བྱེད་མི་སྣ་ཉི་ཤུ་ལྷག་གཏན་སྡོད་ཀྱིས་གྲྭ་བ་རྣམས་ལ་ཆབ་སྲིད་སློབ་གསོ་སྤེལ་མུས་ཡིིན་པ་མ་ཟད། འདི་ལོའི་བོད་ཟླ་ ༤ ཚེས་ ༡༣ ནས་ ༡༥ བར་གྱི་ཤིང་སློང་མགོ་འཛུགས་མ་བྱས་གོང་རྒྱ་གཞུང་གིས་གྲྭ་བ་རྣམས་ལ་རྒྱ་ནག་གི་ཆབ་སྲིད་རྩ་ཁྲིམས་སྐོར་གྱི་ཡིག་རྒྱུགས་ཤིག་བཏང་ཡོད་ནའང་། ཤིང་སློང་གྲོལ་རྗེས་གྲྭ་པ་རྣམས་ཀྱི་ཡིག་རྒྱུགས་ཡག་པོ་འཕྲོད་མེད་པ་དང་། ཆབ་སྲིད་ཀྱི་གོ་རྟོགས་མཐོ་རུ་གཏོང་དགོས་སྐོར་ཁྱབ་བསྒྲགས་བྱས་པ་མ་ཟད། དེ་སྔོན་ཉིན་བཅུ་ནས་བཅོ་ལྔའི་བར་གྱི་གུང་སེང་དུ་འགྲོ་ཆོག་པར་བརྗོད་ཡོད་ཀྱང་། གློ་བུར་དུ་དུས་ཚོད་ལ་འགྱུར་ལྡོག་བཏང་སྟེ། ཆབ་སྲིད་སློབ་གསོའི་ལས་འགུལ་སྤེལ་མགོ་བརྩམས་པ་དང་། གལ་སྲིད་གྲྭ་བ་རྣམས་ཀྱིས་རྗེས་ཕྱོགས་བོད་དོན་ཆེད་ལས་འགུལ་གང་ཡང་མི་སྤེལ་བའི་ཁས་ལེན་དང་ས་རྟགས་མ་བརྒྱབ་ཚེ། མུ་མཐུད་ཕྱི་ཟླ་ ༨ བར་ཆབ་སྲིད་སློབ་གསོའི་ལས་འགུལ་རྒྱུན་འཁྱོངས་དང་། གཅིག་བྱས་ན་དེ་བས་ཀྱང་དུས་ཚོད་འཕར་འགྱང་གིས་ལས་འགུལ་སྤེལ་དགོས་སྐོར་བརྗོེད་ཡོད་འདུག 
དེ་སྔོན་མཚོ་སྔོན་ཞིང་ཆེན་འཐབ་ཕྱོགས་གཅིག་གྱུར་ཁང་གི་མཐོ་རིམ་དཔོན་རིགས་ཁག་ཅིག་རྭ རྒྱ་དགོན་པར་ཡོང་སྟེ། ཚོགས་འདུ་ཞིག་བསྡུས་སྐབས་། རྭ་རྒྱ་དགོན་འབྲོག་གི་མི་མང་ཚོས་ཞི་བའི་ལས་འགུལ་སླེལ་བ་དེ་ཁ་བྲལ་གྱི་བྱ་སྤྱོད་སྤེལ་བར་ངོས་འཛིན་གྱི་མིན་པས། ཐེངས་འདིར་ཁྱེད་རང་ཚོས་ངོས་ནས་ཀྱང་སེམས་སྟེང་གི་སྐད་ཆ་དག་མ་གསང་བར་དྲང་མོར་ཤོད་ཅེས་བརྗོད་འདུག་ལ། སྐབས་དེར་དགོན་པའི་བླ་གྲྭ་ཁག་ཅིག་གིས། དེང་སྐབས་རྒྱ་གཞུང་གིས་བོད་ཐོག་འཛིན་པའི་སྲིད་བྱུས་ཡག་པོ་མེད་ཐོག གྲྭ་བ་ལ་གྲྭ་བའི་འདུ་ཤེས་དང་རྒྱ་ནག་གི་འབངས་མི་ཞིག་གི་འདུ་ཤེས་ཕར་ཟད། མིའི་འདུ་ཤེས་ཀྱང་འཛིན་གྱི་མེད་པར་མིག་ནང་གི་ཚེར་མ་རུ་གྱུར་ཡོད་པས། གནད་དོན་འདི་གཞུང་ཕྱོགས་ནས་ལེགས་བཅོས་བྱ་དགོས་པ་མ་ཟད། ༸གོང་ས་མཆོག་བོད་དུ་གདན་འདྲེན་བྱ་དགོས། དེ་ནི་བོད་མིའི་སེམས་སྟེང་གི་མངོན་འདོད་དེ་ཡིན་པས་ཇི་ལྟར་བཀག་ཀྱང་ཁོག་གི་མ་རེད་ཅེས་བརྗོད་འདུགཡིན་ནའང་། དགོན་པར་ཆབ་སྲིད་ཀྱི་སློབ་གསོ་སྤེལ་མགོ་བརྩམས་པ་ནས་ད་བར་གྲྭ་བ་ཁག་ཅིག་ཆབ་སྲིད་ཀྱི་དོགས་གཞིའི་འོག་བཀག་སྐྱིལ་དང་འདྲི་རྩད་བྱེད་བཞིན་པ་མ་ཟད། ཕ་ཡུལ་ཐུན་ཏེ་མགར་རྩེ་ནས་ཡིན་ཞིང་རྭ་རྒྱ་དགོན་དུས་འཁོར་གྲྭ་ཚང་གི་གྲྭ་ཡར་འཕེལ་བཟང་བོ་དང་བློ་གྲོས། ཕ་ཡུལ་ཇ་སག་སྡེ་བའི་ཡིན་ཞིང་རྭ་རྒྱ་དགོན་དུས་འཁོར་གྲྭ་ཚང་གི་ངག་དབང་བཟང་བོ་བཅས་བཟུང་འདུག
དེང་སྐབས་རྒྱ་གཞུང་གིས་རྭ་རྒྱ་དགོན་པའི་གྲྭ་བ་རྣམས་ཀྱིས་ཆབ་སྲིད་ཀྱི་ལས་འགུལ་གང་ཡང་མ་སྤེལ་བར་རྒྱ་ནག་གི་རྩ་ཁྲིམས་ལ་སློབ་སྦྱོང་དང་འགྲོ་ཤེས་འདུག་ཤེས་བྱས་ཚེ། རྭ་རྒྱ་དགོན་པར་རྒྱ་སྒོར་ཁྲི་མང་བོས་འགྲོ་སོང་བཏང་སྟེ། དགོན་པ་ཡར་རྒྱས་གཏོང་རྒྱུ་དང་གྲྭ་མང་གི་འཚོ་བ་ལེགས་བཅོས་བཅས་བྱ་རྒྱུ་ཡིན་སྐོར་བསྒྲགས་འདུག་ནའང་། དགོན་པའི་བླ་གྲྭ་སུ་གཅིག་གིས་ཀྱང་དངུལ་གྱི་རོགས་དངུལ་བླངས་ཏེ་ཆབ་སྲིད་ཀྱི་ལས་འགུལ་མི་སྤེལ་རྒྱུའི་རྒྱ་གཞུང་གི་དགོས་འདུན་དེར་ཁས་ལེན་གང་ཡང་བྱས་ཡོད་མི་འདུག དེ་མིན་མི་མང་གིས་འདིའི་སྔོན་བཟུང་བའི་གྲྭ་བ་དང་མི་སྐྱ་རྣམས་གློད་གྲོལ་ཡོང་བར་འབོད་སྐུལ་བྱེད་བཞིན་འདུག་ཀྱང་ད་བར་སུ་གཅིག་ཀྱང་གློད་གྲོལ་བཏང་མེད་འདུག ད་ལྟའི་བར་དངོས་སུ་འཛིན་བཟུང་བྱས་པའི་བརྡ་ཐོ་འབྱོར་བའི་མི་བཅུ་གསུམ་བྱུང་ཡོད་ལ། གཞན་མང་བོ་ཞིག་དུས་ཚོད་ངེས་མེད་ཀྱིས་བཀག་སྐྱིལ་དང་འདྲི་རྩད་སྣ་ཚོགས་བྱས་རྗེས་གློད་ཡོད་ནའང་། ནམ་འབོད་འགུགས་བྱས་ན་འགྲོ་དགོས་ཀྱི་ཡོད་འདུག
གསལ་བཤད།
འདྲ་པར་དང་བོ། གྲྭ་ཡར་འཕེལ་བཟང་བོ།
འདྲ་པར་གཉིས་པ། གྲྭ་ངག་དབང་བཟང་བོ།
འདྲ་པར་གསུམ་པ། གྲྭ་བློ་གྲོས་དོན་ཡོད།
འདྲ་པར་བཞི་བ། དེ་སྔོན་ཕྱི་ཟླ་གསུམ་པའི་ནང་བཟུང་བའི་གྲྭ་བློ་དར་ལགས་བཅས་ཡིན།
ར་རྒྱ་དགོན་པ་འདི་མདོ་སྨད་ཀྱི་རུ་འདྲེན་ལྟ་བུ་ཞིག་ཆགས་ཀྱི་འདུག དེ་བས།གནས་སྟངས་ཀྱང་ཛ་དྲག་ཆགས་ཀྱི་འདུག ཚང་མ་ལོས་དོ་སྣང་དང་གནས་ཚུལ་བསྡུ་སྒྲུག་བྱེད་འོས་པར་མཐོང་།