རང་ཡུལ་དུ་ལོག་དགོས་བྱུང་།

ངས་རང་གིི་ཕ་མ་གཉིས་ལོ་ལོན་རྒན་རྒོན་ཡིན་པ་དང་གཉོར་སྐྱོང་བྱ་མཁན་མེད་པ་ཤེས་བཞིན་དུ། འདི་ལྟར་ས་མཐའ་ནས་བལྟས་བསྡད་པ་ཡིན་ན་སློབ་སྦྱོང་ཇི་འདྲ་བྱས་ཀྱང་ཕན་པ་ཅི་ཡང་མི་འདུག་ཟེར། 

    དུས་རྟག་ཏུ་དྲན་གདུང་གི་ཁྲོད་ན་འཚོ་བ་ནི་བྱེས་འབྱོར་བ་ཚོ་རེད་ལ། དུས་ནམ་ཡང་རེ་སྒུག་གི་ཁྲོད་འཚོ་བ་ནི་གཞིས་སུ་ལུས་པའི་ཕ་མ་ཚོ་རེད། མི་ལོ་ལྔ་བཅུའི་དུས་ཡུན་དེའི་ཁྲོད་བྱེས་འབྱོར་བ་ཚོས་ཕ་མ་དང་སྤུན་ཟླའི་ཆེད་རང་ཉིད་ཀྱི་སློབ་སྦྱོང་དང་མ་འོངས་མདུན་ལམ་བློས་གཏོང་གིས་ཕྱིར་གངས་རི་བརྒྱུད་དེ་སྲོག་ཤོར་བའང་གང་མང་ཡོད་སྟབས། ཁོ་རང་ལྟ་བུའི་ལོ་ཆུང་ཞིག་ཕྱིར་རང་ཡུལ་དུ་ལོག་ཀྱང་ད་ལྟའི་དུས་འདིར་ཕ་མར་བདག་སྐྱོང་བྱ་རྒྱུ་ཕར་ཞོག་ཐ་ན་ཐུག་འཕྲད་བྱ་ཐུབ་མིན་ཡང་བཤད་དཀའ་བའི་གནས་ཡིན་ནའང། ཕ་མ་དང་བུ་ཕྲུག་གི་བརྩེ་བ་ཟབ་མོ་དེས་ཡོད་ཚད་བློས་གཏོང་གིས་ཆས་བཞིན་པའི་སྙིང་སྟོབས་ནི་བསྔགས་བརྗོད་ཀྱི་གནས་ཤིག་རེད་བསམ་བྱུང་།

    ཕྱི་ཚེས་ ༡༧ ཉིན་འདི་གའི་གསར་འགོད་པ་ངྷ་ས་དབུས་སྣེ་ལེན་ཁང་དུ་སོང་བ་ཡིན་ལ། ཕོའི་ཉལ་ཁང་དུ་གསར་འབྱོར་བ་མང་པོ་ཞིག་སླེབས་འདུག མི་ཁ་ཤས་ཤིག་མཉམ་དུ་ཁ་བརྡ་བྱེད་བཞིན་བསྡད་འདུག  ཉལ་ཁང་གི་སྒོ་འགྲམ་ཏག་ཏག་ཏུ་ལོ་ན་གཞོན་པའི་ཕོ་གསར་ཞིག་མལ་ཁྲིའི་སྟེང་དུ་བསྡད་དེ་དེབ་ཅིག་ཀློག་བཞིན་བསྡད་འདུག་པ་དེར། གྲོགས་པོ་ཁྱེད་རང་ག་དུས་སླེབས་པ་ཡིན་ཅེས་དྲིས་པར། ཁོས། ང་ཡུལ་ནས་ཡོང་མཁན་ཞིག་མིན་པར་ཕྱིར་རང་ཡུལ་དུ་ལོག་འགྲོ་མཁན་ཞིག་ཡིན། ཅེས་བརྗོད་བྱུང། ངས་འདི་ལྟ་བུའི་ལོ་ཆུང་ཞིག་ཕྱིར་རང་ཡུལ་དུ་ལོག་པར་རྒྱུ་རྐྱེན་ཅི་ཞིག་ཡིན་ནམ་སྙམ་སྟེ་ཁོ་ལ་ཞིབ་ཕྲའི་གནས་ཚུལ་དྲིས་པ་ཡིན། ཕ་ཡུལ་ཉི་འོད་ (དགོས་དབང་གིས་ཕ་ཡུལ་གྱི་མིང་ངོ་མ་བྲིས་མེད)རྫོང་་ཡིན་ཞིང་ད་ལྟ་རང་ལོ་ ༡༨ ཡིན་པའི་རྡོ་རྗེ་དོན་གྲུབ་(དགོས་དབང་གིས་མིང་དངོས་བྲིས་མེད་) ནི། སྔོན་མ་ཉི་འོད་རྫོང་སློབ་ཆུང་ལོ་རེིམ་ལྔ་བ་ཐོན་རྗེས་ཕ་མ་གཉིས་ཀྱིས་རྒྱ་གར་ཏུ་སློབ་གཉེར་ལ་བཏང་འདུག་ལ། ཁོང་ཚོ་ནང་མི་ ༦ ཡོད་པའི་ཁྲོད་ཀྱི་ཕ་མ་གཉིས་དང་སྤུན་གཅིག་མ་གཏོགས་གཞན་གསུམ་རྒྱ་གར་དང་ཕྱི་རྒྱལ་དུ་ཡོད་འདུག  ཁོང་རང་བོད་ཁྱིམ་སུ་ཇཱ་སློབ་གྲྭའི་ནང་ལོ་གཅིག་དང་ཟླ་ཁ་ཤས་ཤིག་ལ་སློབ་སྦྱོང་གི་གོ་སྐབས་ཐོབ་ནའང་། ཉེ་ཆར་ཕ་མ་གཉིས་ཀྱིས་ཕ་ཡུལ་ནས་ཁ་པར་ཐོན་ཏེ་ཁོའི་སྤུན་ཚོའི་གཅིག་ཡུལ་ལ་ལོག་སྟེ་ཕ་མ་གཉིས་ལ་བདག་སྐྱོང་བྱ་རོགས་ཞེས་པའི་བརྡ་འབྱོར་བྱུང་བས་ཁོའི་སྤུན་ཆེ་བས་སློབ་གྲྭ་ནས་རྩ་དགོངས་ཞུས་ཏེ་འགྲོ་དགོས་ཚུལ་བཤད་སྟབས། ཕྱིར་རང་ཡུལ་ཏུ་ཕ་མ་གཉིས་ལ་ལྟ་སྐྱོང་དུ་ལོག་གིན་ཡོད་འདུག  ངས་ཁོ་རང་ལ་སློབ་སྦྱོང་གི་གོ་སྐབས་ཆེས་བཟང་བའི་གཞོན་དུས་འདི་བསྐྱུར་ཏེ། འདི་ལྟར་ཕྱིར་ཕ་མར་བདག་སྐྱོང་བྱེད་དུ་འགྲོ་བར་སེམས་ཚོར་གང་འདྲ་ཡོད་མེད་དྲིས་པར། ཁོང་གིས། སྤྱིར་འདི་རུ་༧གོང་ས་མཆོག་གི་ཐུགས་རྗེ་བཀའ་དྲིན་དང་ཕ་མ་ལྟ་བུའི་དགེ་རྒན་རྣམ་པའི་བྱམས་སྐྱོང་འོག་དུས་ཡུན་རིང་པོ་ཞིག་ལ་སློབ་སྦྱོང་བྱ་རྒྱུའི་འདུན་པ་ཡོད་ལ་དམིགས་ཡུལ་ཡང་ཡོད། སློབ་སྦྱོང་ཡག་པོ་ཞིག་བྱས་ཏེ་བོད་གཞུང་དང་བོད་མི་རིགས་ལ་ཞབས་ཞུ་སྒྲུབ་ཐུབ་མཁན་ཞིག་བྱ་རྒྱུའི་འདུན་པ་ཡོད། ད་ལྟའི་ང་རང་ལ་མཚོན་ན་སློབ་སྦྱོང་དེ་ཧ་ཅང་གི་གལ་ཆེན་དུ་མཐོང་གི་འདུག  ཡིན་ནའང། སློབ་སྦྱོང་གལ་ཆེན་པོ་རེད་ལ་ཕ་མ་དེ་ལས་ཀྱང་གལ་ཆེན་པོ་རེད། ད་ལྟ་ངའི་ཕ་མ་གཉིས་ལོ་ལོན་རྒན་རྒོན་ཡིན་པ་དང་གཉོར་སྐྱོང་བྱ་མཁན་མེད་པ་ཤེས་བཞིན་དུ།  ངས་འདི་ལྟར་ས་མཐའ་ནས་བལྟས་བསྡད་པ་ཡིན་ན་ང་ཚོས་སློབ་སྦྱོང་ཇི་འདྲ་བྱས་ཀྱང་ཕན་པ་ཅི་ཡང་མི་འདུག་བསམ། ང་ཚོ་ལོ་ན་གཞོན་པ་དག་གིས་རང་ཉིད་ཀྱི་མི་ཚེ་འགྲིག་འགྲོ་ནའང་ལོ་ན་རྒན་པོའི་ཕ་མ་དེ་དག་ལ་གཉོར་སྐྱོང་བྱ་རྒྱུ་དེའང་རང་ཉིད་ཀྱི་མི་ཚེའི་བྱ་བ་གལ་ཆེན་ཞིག་ཏུ་མཐོང་གི་འདུག  ད་ལྟ་ང་ཕྱིར་ཕ་ཡུལ་དུ་ལོག་པ་ཡིན་ན་རྒྱ་མིས་སྡུག་པོ་གཏོང་བ་དང་སློབ་སྦྱོང་གི་གོ་སྐབས་རག་ཁག་པོ་ཡིན་རྒྱུ་རེད་བསམ་ལ། དེ་ལྟ་ནའང་། ངས་རང་གི་ཕ་མ་གཉིས་ལ་བདག་སྐྱོང་ཡག་པོ་བྱས་ཏེ་བདེ་སྐྱིད་ཀྱི་འཚོ་བ་ཞིག་སྐྲུན་རྒྱུ་ཡིན། ཅེས་བརྗོད་བྱུང།

གསར་འགོད་པ། དོན་གོ