སྟེང་ན་ལྷ་ཞིག་ཡོད་པར་བོད་པས་འདོད།།
འོག་ན་ཀླུ་ཞིག་ཡོད་སྙམ་བོད་པ་ཡོད།།
བར་དུ་མི་ཡི་རིགས་ཤིག་དངོས་ཡོད་རེད།།
དངོས་ཡོད་འཚོ་བའི་ཀྱོག་ལམ་རིང་མོ་འདིར།།
བདེན་རྫུན་ཅི་ཡིན་མིག་མཐོང་ལག་ཟིན་ལས།།
གང་ཡང་མི་ཤེས་ངེད་ཅག་རྨོངས་པའི་མིག།
གཞན་སྐྱོན་ལས་གཞན་མི་མཐོང་བོད་པའི་གཤིས།།
རང་ལས་གཞན་གཅེས་ཚིག་དེ་རྣ་ལ་ཉན།།
དོན་དུ་ལག་ལེན་རང་དོན་ཁོ་ན་ལས།།
མི་བྱེད་བོད་པའི་མི་ཚོ་ཡ་རེ་ང་།།
ནང་ཁུལ་ཕྱོགས་རུས་ཆེ་བའི་རང་རློམ་ལྕི།།
ཕྱི་ལ་བདེན་རྫུན་ཙམ་ཡང་བཤད་མི་འཕོད།།
སྐད་ཡིག་གཅེས་ནོར་ཟེར་ནས་རྟག་དུ་གླེང་།།
དོན་ལ་རང་གི་ཕྲུ་གུས་བོད་སྐད་ཙམ།།
བཤད་པ་གོ་རྒྱུ་དཀའ་བའི་དུས་རབས་འདི།།
བོད་ཀྱི་མི་རབས་གསར་བ་ཡིན་ནམ་ཅི།།
གཞུང་ཞབས་ཡིན་ཟེར་རྐུབ་སྟེགས་སྲུང་མཁན་དང་།།
སྐུ་ངོ་ཡིན་གསུང་བརྫིག་པོ་བྱེད་མཁན་ཚོས།།
རང་གི་སྐད་ལས་གཞན་མིས་སྐད་ལ་དུངས།།
འདི་འདྲ་འདི་ཡང་བོད་པའི་སྐུ་དཔོན་རེད།།
བསམ་ཞིང་བསམ་ན་བོད་མིང་ཡོད་མཁན་དང་།།
བོད་ཡིག་བོད་སྐད་ཤེས་པ་མ་ངེས་ཤིང་།།
བོད་ལ་ཤ་ཚ་ཡོད་མེད་བཤད་དཀའ་བའི།།
དུས་ཀྱི་ཚོང་རྫས་མི་རིགས་ལས་ངན་འདི།།
ནང་ལ་བསྐོར་ན་བློ་སྤོབས་སྟོབས་ཤུགས་ལྡན།།
རང་སེམས་གཏུབ་པར་གཏུབ་ཀྱང་ན་ཟུག་མེད།།
རང་ཤ་རྗེན་པར་ཟོས་ཀྱང་ཡ་ང་མེད།།
རང་ཡུལ་རྩ་མེད་བཏང་ཀྱང་རྒོལ་ལན་མེད།།
འདི་འདྲའི་བོད་པ་ཞིག་གིས་གང་ཞིག་བྱེད།།
སྙིང་གཏམ་མི་གོ་ཆགས་ཚིགས་གོ་བ་དང་།།
ལར་ཞེན་མི་འདོད་རང་དབང་གླེང་བ་དང་།།
བདེན་པ་མི་འཚོལ་རྫུ་འབག་གཉེར་བ་འདིས།།
གནའ་དེང་བོད་པའི་ལས་དབང་རླུང་གིས་འཁུར།།
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།
དྲ་གྲོགས་ལགས། དངོས་ནས་ཐུགས་རྗེ་ཆེ། བསྟོད་བསྔགས་གནང་ས་དེ་ནི་ང་རང་ལྟ་བུ་ཞིག་ཆགས་ཀྱི་མེད་པ་རེད། ཡིན་ཡང་སྐུ་ཉིད་ནས་བསྟོད་བསྔགས་གནང་ཟིན་སྟབས། ངས་ཀྱང་དེ་ལ་ཐུགས་རྗེ་ཆེ་ཞེས་ལན་ཞིག་ཕུལ་བ་ཡིན། ངེད་ཅག་གིས་ལས་འགན་ཟེར་ན་འདྲ། རང་གི་སྐད་ཡིག་བེད་སྤྱོད་བྱེད་སའི་ཁོར་ཡུག་འདི་འདྲའི་བཟང་བོ་ཞིག་དུས་བབ་ཚང་དང་དྲ་རྒྱ་གཞན་དག་གིས་བོད་རིགས་སྤུན་ཟླ་དག་གིས་སྐུ་དྲིན་གྱིས་ངེད་ཅག་གིས་རང་རང་གི་བོད་ལ་བཅིངས་པའི་བསམ་འདུན་གླེང་ས་ཞིག་ཡོད་དུས་རང་རང་གིས་ཐུབ་ཚོད་ཅིག་བྱེད་ཀྱི་ཡོད་པ་དེ་ནི་ང་རང་གཅིག་བུ་མིན་པར་འདིར་འཛོམ་གྱི་དྲ་གྲོགས་ཚང་མ་གཅིག་མཚུངས་ལོས་ཡིན།
དྲ་གྲོགས་ཁྱེད་ཀྱི་བརྩོན་སེམས་ལ་དངོས་གནས་དགའ་སོང་། མ་ཟད་ཁྱེད་རང་དྲང་ཚུགས་ལྡན་ཞིང་། བློ་སེམས་དཀར་བ་ཞིག་ཀྱང་ལོས་ཡིན་བསམ་གྱི་ཡོད་ལ་དེ་ལྟར་ཡིན་པའི་སྨོན་ལམ་ཡོད། ཁྱེད་ཀྱི་རྩོམ་ཡིག་ཚོར་བལྟས་ན་དངོས་གནས་བློ་དཀར་ཞིག་ཡིན་པ་འདྲ།
དྲ་གྲོགས་ཆུ་ཐིགས་སྔོན་མོ་ལགས། ཡིན་དང་ཡིན། ངས་ཀྱང་རང་གིས་ཤེས་ཚོད་ཐུབ་ཚོད་ཀྱིས་ཤུ་རེ་བྱེད་ཀྱི་ཡོད་ལ། ཡར་རྒྱས་ཤིག་འགྲོ་རྒྱུར་ཡང་རེ་བ་བྱེད་ཀྱི་ཡོད། ཉིན་དང་མཚན་ཟེར་ན་བཤད་དཀའ་ཡང་། ཉིན་མོ་ལས་ཀའི་བར་གསེང་ནས་ཀྱང་ཟིན་བྲིས་སྤེལ་ཕྱོགས་དང་རང་གིས་སྤུན་གྲོགས་དག་ལ་ཟིན་བྲིས་གང་འདྲ་ཞིག་སྤེལ་དགོས་མིན་བསྐོར་ལ་ཡང་བསམ་བློ་གཏོང་བཞིན་ཡོད།
དྲ་གྲོགས་ཁྱོད་དངོས་གནས་བརྩོན་སེམས་ཅན་ཞིག་རེད། ཁྱོད་མི་འགྱངས་པར་ཡར་རྒྱས་ལ་འགྲོ་རྒྱུ་ཡིན་པ་ཁོ་ཐག་རེད། རང་ཉིད་ཡར་རྒྱས་ལ་འགྲོ་རྒྱུའི་གཞི་རྩ་རྒྱུན་མཐུད་རྒྱུ་དེ་རེད། མ་ཟད་གང་ཡིན་སར་དོ་སྣང་བྱེད་དགོས་་་དེ་ལྟར་བྱས་ན་རིམ་གྱིས་ཡར་རྒྱས་ལཏན་ཏན་འགྲོ། དེ་འདྲ་ཨེ་རེད།