གླུ་བ་གྲགས་ཆེན་མའེ་ཁལ་རྗེག་སོན་སྐུ་གྲོངས་མི་འདུག

དེ་རིང་འཛམ་གླིང་གི་གླུ་གར་སྒྱུ་རྩལ་པ་གྲགས་ཆེན་མའེ་ཁལ་རྗེག་སོན་གྱིས་དབྱིན་ཇུའི་རྒྱལ་ས་ལོན་ཏོན་ནང་། མི་ལོ་བཅུ་གཉིས་རྗེས་ཀྱི་གླུ་གར་ཆེད་ཚོགས་ཐོག་མ་དང་། དབྱིན་ཡུལ་ནང་གི་མའེ་ཁལ་གྱི་གླུ་གར་ཆེད་ཚོགས་མཐའ་མ་དེ་བསྡུ་རྒྱུ་གཏན་འཁེལ་ཡོད་ཀྱང་། ཟླ་སྔོན་མའི་ཕྱི་ཚེས་ཉེར་དྲུག་ཉིན་ཁོང་གློ་བར་དུ་སྐུ་གཤེགས་པའི་གནས་ཚུལ་ཐོན་ཡོད། འོན་ཀྱང་མི་མང་པོ་ཞིག་གིས་མའེ་ཁལ་འདི་ལྟར་འདས་གྲངས་སུ་སོང་བར་ཡིད་མ་ཆེས་པར། དེ་རིང་དབྱིན་ཇུའིོ་རྒྱལ་ས་ལོན་ཏོན་གྱི་གར་སྟེགས་སྟེང་སླེབས་རྒྱུར་རེ་སྒུག་བྱས་ཡོད།  

ཨ་རིའི་བརྙན་འཕྲིན་ཁང་ཞིག་གིས་མའེ་ཁལ་རྗེག་སོན་སྐུ་གྲོངས་ཡོད་པ་མ་རེད། ཟླ་ ༦ ཚེས་ ༢༥ ཉིན་སྐུ་གྲོངས་བའི་གསལ་བསྒྲགས་དེ་ཁོ་རང་གིས་ཆེད་དུ་བཟོས་པ་རེད། གང་ཡིན་ཟེར་ན། ཟླ་ ༧ ཚེས་ ༡༣ ཉིན་དབྱིན་ཇིའི་རྒྱལ་ས་ལོན་ཏོན་ནས་མའེ་ཁལ་གྱིས་གླུ་གར་ཆེད་ཚོགས་བསྡུ་རྒྱུ་འཛམ་གླིང་ལ་གསལ་བསྒྲགས་བྱས་ཡོད་སྟབས། ཉིན་དེར་ཁོང་གིས་མི་རྣམས་ཧང་སང་དུ་འཇུག་འཆར་རེད། སྔོན་མ་ནས་མའེ་ཁལ་གྱིས་གླུ་གར་ཆེད་ཚོགས་བསྡུ་སྐབས།  གཞན་དང་མི་འདྲ་བའི་ཁྱད་ཆོས་ངོམ་སྟེ། མི་རྣམས་ཧང་སང་དུ་འཇུག་གིན་ཡོད། ཐ་ན། ཁོང་གིས་གླུ་གར་འཁྲབ་སྟོན་བྱ་སའི་གར་སྟེགས་ཀྱི་ཇུས་འགོད་དང་། དཀར་དམར་གློག་སྒྲོན་གྱི་སྟངས་སྟབས། རོལ་མོའི་རམས་འདེགས་ཀྱི་འགྱུར་ཁུག་སོགས་ཀྱང་སྔར་བྱུང་མ་མྱོང་བ་རྐྱང་རྐྱང་སྒྲིག་སྦྱོར་བྱས་ཏེ། མི་རྣམས་ཧང་སང་བའི་བྱ་འགུལ་མང་པོ་སྤེལ་སྲོལ་ཡོད་སྟབས། ཐེངས་འདིར་ཡང་ཁོང་སྐུ་གཤེགས་སོང་། ཞེས་འཛམ་གླིང་ལ་ཁྱབ་བསྒྲགས་བྱས་ཏེ། མི་ཚང་མར་སྡུག་བསྔལ་དང་གདུང་སེམས། བསམ་གཞིགས་དང་དོགས་པ་མང་པོ་ཞིག་བསླངས་རྗེས། ཟླ་ ༧ ཚེས་ ༡༣ ཉིན་གློ་བུར་དུ་རྒྱལ་ས་ལོན་ཏོན་གྱི་གར་སྟེགས་སྟེང་འབུད་རྒྱུ་རེད། ཅེས་བསྒྲགས་ཡོད།

འོན་ཀྱང་། མའེ་ཁལ་རྗེག་སོན་སྐུ་གྲོངས་སོང་། ཟླ་སྔོན་མའི་ཕྱི་ཚེས་ ༢༦ ཉིན་གྱི་ཨ་རིའི་ཕྱི་དྲོའི་ཆུ་ཚོད་ ༥ སྟེང་། ཨ་རིའི་ལོ་སིན་རྗི་གྲོང་ཁྱེར་གྱི་སྨན་ཁང་ཞིག་ནས་སྐུ་གྲོངས་པ་འཛམ་གླིང་ཡོངས་ཁྱབ་ཏུ་གསལ་བསྒྲགས་བསྐྱངས་ཡོད་ལ། ཕྱི་ཚེས་ ༧ ཉིན་མི་མང་ཁྲི་སྟོང་མང་པོའི་ངུ་འབོད་ཁྲོད་འདས་མཆོད་ཀྱང་བསྒྲུབས་ཟིན། ཁོང་གི་སྨན་པས་བཤད་པ་ལྟར་ན། མའེ་ཁལ་སྙིང་གི་ནད་གཞི་ཞིག་གི་དབང་གིས་སྐུ་གྲོངས་ཤིང་། ཁོང་ལ་སྙིང་དང་ཁྲག་ཤེད་ཀྱི་ནད་ཚ་སྔར་ནས་ཡོད་ཟེར། འོན་ཀྱང་། ཐེངས་འདིར་ཁོང་གློ་བུར་དུ་སྐུ་གྲོངས་བ་དེས་མི་རྣམས་ལ་དོགས་གཞི་ཆེན་པོ་ཞིག་བསླངས་ཡོད་སྟབས། ཞིབ་བཤེར་ལས་ཁུངས་དང་ཉེན་རྟོག་ལས་ཁུངས། སྨན་ཁང་བཅས་མཉམ་སྒྲིལ་གྱིས་ཞིབ་འཇུག་བྱས་སྐབས། སྔོན་མ་ནས་མའེ་ཁལ་ལ་སྙིང་དང་ཁྲག་ཤེད་ཀྱི་ནད་ཚའི་དབང་གིས་དབུགས་འགག་པ་དང་། བརྒྱལ་འབོག་གི་གནས་ཚུལ་ཡང་ཡང་བྱུང་གིན་ཡོད་ལ། ཁོའི་ཞབས་ཞུ་བ་ཚོས་དབུགས་བསྐྱར་དུ་མཐུད་ཆེད་བྲང་ཁ་ནས་ཤུགས་ཀྱིས་མནན་ཏེ་རྩུབ་རུས་གཉིས་བཅག་འདུག ད་དུང་ཁོའི་ཕོ་བའི་ནང་གི་སུམ་ཆ་གཅིག་ཙམ་སྨན་རིགས་དང་མྱོས་རྫས་རིགས་རེད་ཟེར།

མའེ་ཁལ་སྐུ་གྲོངས་མ་ཐག་འཛམ་གླིང་གི་མི་དམངས་ས་ཡ་མང་པོས་མྱ་ངན་བྱས་ཤིང་། ལྷག་པར་དུ་བུད་མེད་ཁྲི་སྟོང་མང་པོས་ཕངས་སེམས་དང་ཡིད་གདུང་ཚད་མེད་བྱས་ཡོད། ཐ་ན་མའེ་ཁལ་གྲོངས་བའི་སྡུག་བསྔལ་མ་བཟོད་པར་ད་བར་མི་གྲངས་ ༡༢ ཙམ་གྱིས་རང་ཤི་བརྒྱབས་ཡོད་འདུག ཨ་རིའི་སྲིད་འཛིན་ཨོ་བྷ་མ་དང་གྲོས་ཚོགས་གོང་མའི་ཚོགས་གཙོ་ལྕམ་ནན་སི་ཕེ་ལོ་སི། ཨ་ཧྤི་རི་ཁའི་སྲིད་འཛིན། དེ་མིན་འཛམ་གླིང་རྒྱལ་ཁབ་ཁག་གི་གནད་ཡོད་མི་སྣ་དང་སྒྱུ་རྩལ་པ། གླུ་བ་གླུ་མ་གྲགས་ཆེན། རོལ་མོ་སྒྲིག་སྦྱོར་གྲགས་ཆེན་གང་མང་ཞིག་གིས་མྱ་ངན་གྱི་གུས་ཚིག་ཕུལ་ཡོད། ཉིན་འདི་འགར་འཛམ་གླིང་གི་གསར་འགྱུར་བརྒྱུད་ལམ་ཆེ་གྲས་ BBC དང་ CNN བཙོས་པའི་གསར་ལམ་ཁག་ནས་གནས་ཚུལ་རྒྱང་སྲིང་དང་བགྲོ་གླེང་ཤུགས་ཆེན་བྱས་ཡོད་ལ། བོད་ནང་གི་མཚོ་སྔོན་རླུང་འཕྲིན་ཁང་ནས་ཀྱང་། ༼ འཛམ་གླིང་མི་དམངས་ཀྱིས་གླུ་གར་སྒྱུ་རྩལ་བ་གྲགས་ཅན་མའེ་ཁལ་ལ་རྗེས་དྲན་གྱི་རྣམ་པ་ལ་འཕྲོས་ཏེ། བོད་ཀྱི་གླུ་གར་སྒྱུ་རྩལ་གྱི་ད་ལྟའི་གནས་བབ་དང་རྒྱུན་འཛིན་པའི་བྱ་སྤྱོད་ལ་དཔྱད་པ ༽ ཞེས་བའི་བརྗོད་གཞིའི་ཐོག་ཆེད་སྒྲིག་བགྲོ་གླེང་བྱས་ཡོད། མི་མང་པོ་ཞིག་གིས་མའེ་ཁལ་ནི་འཛམ་གླིང་གི་རོལ་མོའི་རྒྱལ་སྲས་དང་། ཡུ་རོབ་གླིང་དང་ཨ་རིའི་གླིང་གི་དུས་རབས་ཀྱི་དབྱེ་མཚམས་འབྱེད་པའི་གླུ་བ། ལྷའི་སྤྲུལ་བ་མི་ཡུལ་གྱི་གླུ་གར་སྒྱུ་རྩལ་པ་སོགས་སུའང་འབོད།

མའེ་ཁལ་རྗེག་སོན་ནི་འཛམ་གླིང་གི་གླུ་བ་གྲགས་ཆེན་ཙམ་དུ་མ་ཟད། ཞབས་བྲོ་བ་གྲགས་ཆེན་དང་གླུ་ཚིག་རྩོམ་པ་པོ་གྲགས་ཆེན། རོལ་མོ་སྒྲིག་སྦྱོར་བ་གྲགས་ཆེན། འཁྲབ་ཁྲིད་པ་གྲགས་ཆེན། འབྱོར་ལྡན་པ་གྲགས་ཆེན། གཞན་ཕན་དགེ་སྒྲུབ་པ་གྲགས་ཆེན་བཅས་ཡིན། ཁོང་ལ་ད་བར་འཛམ་གླིང་གི་ཆེས་མཐོ་བའི་བྱ་དགའ་ ༡༢ ཙམ་ཐོབ་ཡོད་པ་མ་ཟད། འཛམ་གླིང་ཅི་ཉའེ་སི་ Genius ཟིན་ཐོར་ཡང་བཀོད་ཡོད་འདུག སྤྱི་ལོ་ ༡༩༧༩ ལོར་ཁོས་གླུ་གར་ཆེད་སྒྲིག་གི་བརྙན་འཁོར་ཞིག་བཏོན་པར་འཛམ་གླིང་གི་རོལ་མོའི་སྒྱུ་རྩལ་ཕུལ་བྱུང་བྱ་དགའ་ཐོབ་ཅིང་། ༡༩༨༤ ལོར་བརྙན་འཁོར་ཞིག་བཏོན་པར་བྱེ་བ་གཉིས་དང་ས་ཡ་བདུན་ ༢༧༠༠༠༠༠༠ ཙམ་བྲིན་ཡོད།  ༡༩༨༠ ལོར་ཁོས་ཨ་རིའི་རྒྱལ་ནང་བསྐོར་དེ་གླུ་གར་ཆེད་ཚོགས་བསྡུས་ཤིང་། ཡོང་འབབ་ཨ་སྒོར་ས་ཡ་ལྔ་ ༥༠༠༠༠༠༠ སླེབས་ཤིང་། ཨ་རིའི་སྐྱུ་རྩལ་པ་དག་ལས་ཡོང་འབབ་རྩེ་ཕུལ་ཆགས། ད་བར་ཁོང་གི་གླུ་གར་གྱི་བརྙན་འཁོར་དང་སྒྲ་ཐག་དུང་ཕྱུར་གསུམ་ ༣༠༠༠༠༠༠༠༠ ཙམ་བཙོང་དེ་འཛམ་གླིང་ལོ་རྒྱུས་སྟེང་གི་ཚད་གཞི་ཆེས་མཐོ་བའི་ཟིན་ཐོ་བསྐྲུན་ཡོད།

མའེ་ཁལ་རྗེག་སོན་གྱི་མི་ཚེ་གང་བོར་ཡོང་འབབ་ཨ་སྒོར་དུང་ཕྱུར་ལྔ་ ༥༠༠༠༠༠༠༠༠ ལྷག་བྱུང་ཡོད་པ་དང་། ཁོས་འཛམ་གླིང་དུ་སྙིང་རྗེ་རོགས་སྐྱོར་ཚོགས་པ་ ༣༩ ཙམ་བཙུགས་ཏེ། ཉམས་ཐག་རོགས་སྐྱོར་གྱི་ལས་གཞི་འདྲ་མིན་ཐད། ཨ་སྒོར་དུང་ཕྱུར་གསུམ་ ༣༠༠༠༠༠༠༠༠ ཙམ་བཏང་ཡོད་འདུག་ལ། དེ་ནི་འཛམ་གླིང་ནང་མི་སྒེར་གྱིས་བཏང་བའི་སྙིང་རྗེ་རོགས་སྐྱོར་མ་དངུལ་ཚད་གཞི་ཆེས་མཐོ་ཤོས་དེ་ཆགས་ཡོད་འདུག མའེ་ཁལ་གྱིས་ད་ལོའི་ཟླ་ ༧ ཚེས་ ༡༣ ཉིན་ནས་མགོ་འཛུགས་ཀྱིས་དབྱིན་ཇི་རྒྱལ་ས་ལོན་ཏོན་ནས་གླུ་དབྱངས་ཆེད་ཚོགས་ཐེངས་ ༥༠ ཙམ་བསྡུ་རྒྱུ་ཡིན་པ་གསལ་བསྒྲགས་བྱས་མ་ཐག འཛིན་བྱང་འབུམ་བདུན་དང་ཁྲི་ལྔ་ ༧༥༠༠༠༠ ཙམ་ཆུ་ཚོད་ ༤ ནང་བཙོང་ཚར་ཡོད་འདུག གཞན། ཟླ་སྔོན་མའི་ཕྱི་ཚེས་ ༢༦ ཉིན་མའེ་ཁལ་སྐུ་གྲོངས་པ་འཛམ་གླིང་ལ་ཁྱབ་བསྒྲགས་བྱས་མ་ཐག འཛམ་གླིང་ཚོང་རའི་མའེ་ཁལ་གྱི་གླུ་གར་བརྙན་འཁོར་དང་སྒྲ་ཐག་ཡོངས་ཀྱི་གོང་ཚད་འཕར་ཡོད་པ་མ་ཟད། རྒྱ་ནག་པེ་ཅིན་དང་ཧོང་ཀུང་གཉིས་ནང་མའེ་ཁལ་དང་འབྲེལ་ཡོད་ཀྱི་བརྙན་འཁོར་ཡོངས་རྫོགས་ཚར་ཡོད་པའི་གནས་ཚུལ་ཡང་ཐོན་འདུག

ཡང་ཕྱོགས་གཞན་ཞིག་ནས་གླེང་ན་མའེ་ཁལ་རྗེག་སོན་ནི་ཡོན་ཏན་ཀུན་ལྡན་སྐྱོན་ཀུན་བྲལ་ཞིག་མིན་པར། ཁོང་ལ་གཞན་གྱི་གནོན་ཤུགས་དང་། ཉེན་ཁ། མིང་ཆལ་སོགས་འདྲ་མིན་ཞིག་བྱུང་མྱང་ལ། ཐ་ན། སྤྱི་ལོ་ ༢༠༠༣ ལོའི་ཟླ་ ༡༡ ཙམ་ལ་ཁོས་བྱིས་པ་ལོ་ ༡༤ ཅན་ཞིག་ལ་ཚུལ་མིན་བྱས་སྐོར་གྱི་ཉེས་འཛུགས་འོག་འཛིན་བཟུང་བྱས་ཏེ། ལོ་གཅིག་དང་ཟླ་བ་ལྔའི་རིང་བདེན་དཔང་འཚོལ་ཞིབ་དང་། འདྲི་རྩད་བྱས་མཐར་ཁྲིམས་ཁང་གིས་ཉེས་པ་མེད་པ་གསལ་བསྒྲགས་བྱས་ཡོད། ཁོང་གིས་མེས་པོ་དམ་པ་མི་རིགས་ནག་པོའི་རུས་བརྒྱུད་ཀྱི་ངོ་པགས་བརྗེས་ Cosmetic Sargery ཏེ། མི་རིགས་ནག་པོའི་སེམས་ལ་རྨ་བཟོས་རབས་བསྒྲགས་ཏེ་ངོ་རྒོལ་བྱེད་མཁན་བྱུང་ཞིང་། ལ་ལས་དེ་ནི་ཁོ་ལ་པགས་བའི་ན་ཚ་ vertigo skin disease ཞེས་པ་ཞིག་ཕོག་སྟེ་ངོ་ལྤགས་མི་བརྗེ་ཐབས་མེད་བྱུང་ཚུལ་ཡང་བཤད། མའེ་ཁལ་སྨྱོས་ཏེ་སོ་སོའི་ཕྲུ་གུ་ཐོག་ཁང་ནས་མར་གཡུག་རྩིས་བྱས་ཚུལ་དང་། ཐེངས་འདིར་འཆི་རྐྱེན་ཡང་མྱོས་རྫས་ Demerol  སྤྱོད་རྒྱུ་མང་དྲགས་ཚུལ། ཁོང་ལ་ད་ལྟ་ཨ་སྒོར་དུང་ཕྱིར་བཅུ་ ༡༠༠༠༠༠༠༠༠༠ གྱི་བུ་ལོན་ཡོད་སྐོར་ཡང་བརྗོད།  

མའེ་ཁལ་རྗེག་སོན་ལ་མིང་སྲིང་དགུ་ཡོད་པ་ལས་ཁོ་རང་བདུན་པ་དེ་ཡིན་པ་དང་། ཁོང་གི་སྲིང་མོ་རྗ་ནེ་ཊེ་རྗེག་སོན་ Janet Jakson ཞུ་བ་དེ་ཡང་འཛམ་གླིང་གི་གཞས་མ་སྐད་གྲགས་ཅན་ཞིག་ཡིན། ༡༩༩༤  ལོར་མའེ་ཁལ་རྗེག་སོན་གྱིས་ལེ་ས་མེ་རཱེ་ Lisa Marie ཟེར་བའི་བུད་མེད་ཅིག་དང་གཉེན་སྒྲིག་བྱས་ཏེ། བུ་མོ་ Prince Michael ཞུ་སྐྱེས་རྗེས་ ༡༩༩༦ ལོར་སླར་ཡང་ཐོར་ཡོད་འདུག་ལ། ལོ་དེར་བསྐྱར་དུ་ཌེབ་བྷེ་རའོ་ Debbie Rowe ཟེར་བའི་བུད་མེད་ཅིག་དང་མཉམ་འདུག་བྱས་ཏེ། བུ་མོ་ Paris Michael དང་། Prince Michael ཞུ་བ་གཉིས་སྐྱེས་ཡོད། མི་ལ་ལས་ཌེབ་བྷེ་རའོ་ Debbie Rowe ཟེར་བ་དེ་ནི་མའེ་ཁལ་གྱི་སྐྱེས་དམན་མིན་པར་ཞབས་ཞུ་མ་ཡིན་པ་དང་། ཁོ་རང་གི་རིགས་རྫས་བུ་མོ་དེའི་ཁོག་པར་སྐྱེད་སྲིང་བྱས་ཏེ་བུ་མོ་དེ་གཉིས་སྐྱེས་ཚུལ་བརྗོད། གང་ལྟར། ད་ལྟ་ཁོང་གི་ཕ་མ་གཉིས་དང་བྱིས་པ་གསུམ་བཅས་ཤུལ་དུ་ཡོད་པ་དང་། བྱིས་པ་གསུམ་མུ་མཐུད་དུ་མའེ་ཁལ་གྱི་ཕ་མ་གཉིས་ཀྱིས་གཉོར་རྒྱུ་ཁྲིམས་ཁང་གིས་ཐག་གཅོད་བྱས་ཡོད། མའེ་ཁལ་གྱིས་སྔོན་མ་ནས་ཨ་རིའི་ཁ་ལེ་ཧྥོ་ནའེ་ཡ་མངའ་སྡེ་ནང་ནེ་བིར་ལན་ཌི་ Neverland Valley Ranch ཟེར་བའི་གླིང་ཕྲན་ཞིག་ཉོས་ཏེ། གཞིས་ཁ་ཆེན་པོ་ཞིག་བརྒྱབས་ཡོད་པ་མ་ཟད། གཞིས་ཀ་དེར་རི་དྭགས་ར་བ་དང་། མཚོ་གླིང་། རོལ་རྩེད་དོ་ར་སོགས་སྣོད་ཀྱི་བཀོད་པ་མཛེས་ཤིང་ལྟ་ན་སྡུག་པ་ཞིག་བཟོས་ཡོད་སྟབས། མའེ་ཁལ་གྲོངས་མ་ཐག་ཨ་རིའི་ཁུལ་གྱི་རྒྱུ་ཆེན་མང་པོས་གླིང་ཕྲན་དེ་ཉོ་རྩོད་བྱས་ཏེ། ད་ལྟ་རིན་གོང་ལྡབ་ཁ་ཤས་འཕར་ཡོད་འདུག

༼གཤམ་དུ་མའེ་ཁལ་རྗེག་སོན་གྱི་སྒྱུ་རྩལ་དང་འབྲེལ་བའི་ལོ་རྒྱུས་ཕྱོཊ་བསྡུས་བཀོད་ཡོད།༽

༨ ༽ སྤྱི་ལོ་ ༡༩༥༨ ལོའི་ཟླ་ ༨ ཚེས་ ༢༩ ཉིན་ཨ་རིའི་ཨེན་ཊི་ཡ་ནའི་གྲོང་ཁྱེར་གྱི་མི་རིགས་ནག་པོའི་ཁྱིམ་རྒྱུད་ཅིག་ཏུ་མའེ་ཁལ་རྗེག་སོན་སྐུ་འཁྲུངས་ཤིང་ལོ་ ༥ སྟེང་ནས་གླུ་གར་སྒྱུ་རྩལ་གྱི་ལས་རིགས་ལ་ཞུགས།

སྤྱི་ལོ་ ༡༩༦༨ ལོར་མའེ་ཁལ་ཞུགས་སའི་རོལ་མོ་ཚོགས་པས་ས་གནས་དེའི་ steel town སྒྲ་བརྙན་ཁང་དང་མཉམ་འབྲེལ་གྱིས་ཆེད་བསྒྲིགས་བརྙན་འཁོར་ཐོག་མ་  bigbog ཞེས་པ་འགྲེམ་སྤེལ་བྱས་ཏེ་སྤྱི་ཚོགས་ནང་གདེང་འཇོག་ཆེན་པོ་ཐོབ།

སྤྱི་ལོ་ ༡༩༧༠ ལོར་མའེ་ཁལ་གྱི་གླུ་གཞས་ ༤ ལ་ལོ་དེའི་གླུ་གཞས་ཨང་རིམ་བྱང་བུའི་སྟེང་གི་བྱ་དགའ་ཨང་དང་པོ་ཐོབ་རྗེས་རྒྱལ་ཁམས་བསྐོར་ནས་གླུ་ལེན་ཆེད་ཚོགས་བསྡུ་མགོ་བརྩམས།  
སྤྱི་ལོ་ ༡༩༧༡ ལོའི་ཟླ་ ༡༢ པར་ཁོང་གི་གླུ་གཞས་ལ་ཨང་བཞི་པའི་འབྲས་རྟགས་ཐོབ་སྟེ་མི་སྒེར་གྱིས་འཁྲབ་སྟོན་མགོ་འཛུགས་བྱས།  
སྤྱི་ལོ་ ༡༩༧༢ ལོའི་ཟླ་ ༡ པོར་ཁོའི་གླུ་གཞས་ཆེད་བསྒྲིགས་བརྙན་འཁོར་ཐོག་མ་འགྲེམ་སྤེལ་བྱས་ཤིང་དེའི་ཁྲོད་ཀྱི་གླུ་གཞས་གཉིས་གླུ་གཞས་ལེགས་ཤས་བཅུ་ཡི་གྲས་སུ་བདམས།  སྤྱི་ལོ་ ༡༩༧༣ དང་ ༡༩༧༥ ལོ་གཉིས་ལ་གླུ་གཞས་ཆེད་བསྒྲིགས་བརྙན་འཁོར་རེ་འགྲེམ་སྤེལ་བྱས་ཡོད་ཀྱང་། ཡིད་ཚིམས་པའི་གྲུབ་འབྲས་མ་བྱུང་།

སྤྱི་ལོ་ ༡༩༧༩ ལོར་བརྙན་འཁོར་ཞིག་བཀྲམས་པའི་ནང་གི་གླུ་གཞས་གཅིག་ལ་འཛམ་གླིང་གི་རིམ་པ་ཆེས་མཐོ་བའི་རོལ་མོ་སྒྱུ་རྩལ་གྱི་བྱ་དགའ་དང་། འཛམ་གླིང་གླུ་བ་ཕུལ་བྱུང་གི་མཚན་སྙན་ཐོབ།

སྤྱི་ལོ་ ༡༩༨༠ ལོར་ཁོས་ཆེད་བསྒྲིགས་བརྙན་འཁོར་གསར་པ་ཞིག་འགྲེམ་སྤེལ་དང་ཆབས་ཅིག ཨ་རིའི་རྒྱལ་ནང་བསྐོར་བའི་གླུ་གར་ཆེད་ཚོགས་བསྡུས་ཏེ། ཡོང་སྒོ་ཨ་སྒོར་ས་ཡ་ལྔ་ལ་སླེབས་ཏེ་ལོ་དེའི་ཨ་རིའི་སྒྱུ་རྩལ་པ་དག་ལས་ཡོང་སྒོ་ཆེ་ཤོས་ཆགས།

སྤྱི་ལོ་ ༡༩༨༣ ལོའི་ཟླ་ ༣ པར་ཁོས་བྲིས་པའི་གླུ་ཚིག་ལ་ཨ་རིའི་གླུ་གཞས་ཨང་རིམ་བྱང་བུའི་སྟེང་གི་ཨང་དང་པོ་ཐོབ་པ་དང་མཉམ་དུ་དབྱིན་ཇི་ནས་ཀྱང་ཨང་དང་པོའི་བྱ་དགའ་བསྩལ།

སྤྱི་ལོ་ ༡༩༨༤  ལོའི་ཟླ་ ༢ པར་སྐབས་ཉེར་དྲུག་པའི་གླུ་གཞས་ཕུལ་བྱུང་བྱ་འགའི་མཛད་སྒོའི་སྟེང་། ཁོ་ལ་ཆེས་མཐོའི་བྱ་དགའ་རིགས་བརྒྱད་ཐོབ་ཅིང་། ལོ་དེའི་ཆེད་བསྒྲིགས་བརྙན་འཁོར་གསར་བའི་བྲིན་ཚད་བྱེ་བ་གཉིས་དང་ས་ཡ་བདུན་ཟིན་ཏེ་ Genius ཟིན་མཐོར་བཀོད།

སྤྱི་ལོ་ ༢༠༠༢ ལོའི་ཟླ་ ༡ པོར་ཁོ་ལ་ཨ་རིའི“དུས་རབས་ཀྱི་སྒྱུ་རྩལ་པ”ཞེས་པའི་རོལ་མོའི་མཚན་སྙན་ཐོབ།

སྤྱི་ལོ་ ༢༠༠༣ ལོའི་ཟླ་ ༡༠ བར་ལོ་ཨ་རིའི་རླུང་འཕྲིན་རོལ་མོའི་བྱ་དགའི་མཛད་སྒོའི་སྟེང་། མི་ཆོས་རིང་ལུགས་ཀྱི་བྱ་དགའ་ཐོབ། འོན་ཀྱང་། ལོ་དེའི་ཟླ་ ༡༡ པར་མ་ཉེས་ཁ་གཡོག་ཐེབས་ཏེ་འཛིན་བཟུང་བྱས་ཤིང་། ལོ་གཅིག་དང་ཟླ་བ་ལྔའི་རྗེས་སུ་ཁྲིམས་ཁང་ནས་དཀར་འདོན་བྱས།

སྤྱི་ལོ་ ༢༠༠༦ ལོའི་ཟླ ༥ བར་ཉི་ཧོང་རྒྱལ་ས་ཏུང་ཅིན་ནས་ཁོ་ལ་ཨེ་ཤ་ཡའི་“ངོ་མཚར་བའི་སྒྱུ་རྩལ་པ”ཞེས་པའི་བྱ་དགའ་ཐོབ།

སྤྱི་ལོ་ ༢༠༠༩ ལོའི་ཟླ་ ༦ ཚེས་ ༢༦ ཉིན་གྱི་ཨ་རིའི་ཆུ་ཚོད་ ༥ སྟེང་། སྙིང་གི་ནད་གཞི་ཞིག་གི་དབང་གིས་ཨ་རའི་ལོ་སིན་རྗིར་སྨན་ཁང་ཞིག་ནས་སྐུ་གཤེགས་ཡོད།