ཀརྨ་པ་མཆོག་སུ་ཇཱ་སློབ་གྲྭར་ཕེབས་པ།

རྒྱ་གར་ཧི་མ་ཅལ་མངའ་སྡེ་ནང་ཡོད་པའི་སུ་ཇཱ་བོད་ཕྲུག་སློབ་གྲྭའི་དགེ་སློབ་ཡོངས་ནས་ཅི་ལྟར་གསོལ་བ་བཏབས་པ་ལྟར་༧དཔལ་རྒྱལ་བ་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་ཟླ་འདིའི་ཚེས་ ༡༧ ཉིན་རྒྱབ་སུ་ཇཱ་བོད་ཕྲུག་སློབ་གྲྭའི་ནང་ཆིབས་སྒྱུར་གནང་ཡོད་པ་དང་། ཞག་མ་གཉིས་རིང་ཞག་བཞུགས་ཀྱིས་ཉིན་གྲངས་གསུམ་རིང་ཆོས་ཕྱོགས་དང་འབྲེལ་བའི་མཛད་འཕྲིན་བསྐྱངས་ཡོད་པ་དང་། ཐེངས་འདི་ནི་༧དཔལ་རྒྱལ་བ་ཀརྨ་སྐུ་ཕྲེང་བཅུ་བདུན་པ་ཨོ་རྒྱན་འཕྲིན་ལས་རྡོ་རྗེ་མཆོག་སུ་ཇཱ་བོད་ཕྲུག་ཁྱིམ་སྡེར་ཕེབས་ཐེངས་གསུམ་པ་དེ་ཆགས་འདུག

ཕྱི་ཚེས་ ༡༨ ཉིན་སུ་ཇཱ་བོད་ཕྲུག་ཁྱིམ་སྡེའི་དགེ་སློབ་ཡོངས་དང་མི་དམངས་གཉིས་སྟོང་ལྷག་ལ་སྒྲོལ་དཀར་ཡིད་བཞིན་འཁོར་ལོའི་ཚེ་དབང་དང་འབྲེལ་བཀའ་སློབ་གཟབ་རྒྱས་གནང་དོན། སྤྱིར་འགྲོ་བ་མི་ཞིག་ཡིན་ན་འཛམ་གླིང་ལ་ཕན་པའི་མི་བྱེད་རྒྱུ་དང་དགོས་སུ་ང་ཚོ་བོད་རིགས་ཡིན་པའི་ཆ་ནས་ང་ཚོར་རང་གི་རྒྱལ་ཁབ་དང་མི་རིགས་ཀྱི་ཆེད་དུ་འགན་མང་བོ་ཞིག་ཡོད། ཁྱེད་རང་ཚོས་ཀྱང་འགན་དེ་རང་བཞིན་གྱིས་འཁུར་དགོས་པ་གལ་ཆེན་ཡིན། སློབ་ཕྲུག་མང་པོ་ཞིག་གིས་ལ་ལུང་མང་པོ་བརྒྱུད་ནས་འདིར་ཡོང་བ་རེད་མ་གཏོགས་གནམ་གྲུའི་ནང་ནས་འདིར་ལས་སླ་བོར་ཡོང་བ་དེ་འདྲ་མ་རེད། དེར་བརྟེན་སློབ་ཕྲུག་ཚོས་སློབ་སྦྱོང་གི་གོ་སྐབས་དཀོན་པོ་འདི་འཕྲོ་བརླག་ལ་མི་འགྲོ་བ་བྱ་དགོས་རྒྱུ་གལ་ཆེན་ཡིན་སྐོར་གསུངས་ཡོད་འདུག

ཕྱི་ཚེས་ ༡༨ ཉིན་རྒྱབ་སུ་ཇཱ་བོད་ཕྲུག་ཁྱིམ་སྡེའི་སློབ་ཕྲུག་ངོས་ནས་བཀའ་དྲིན་གཏང་རག་གི་ཚུལ་དུ་གཞས་བྲོ་འཁྲབ་ཡོད་པ་དང་། ཕྱི་ཚེས་ ༡༩ ཉིན་རེས་གཟའ་ཉི་མར་འཁེལ་ཡོད་ཀྱང་། འཛིན་རིམ་ཆ་ཚང་ཚོགས་ནས་༧དཔལ་རྒྱལ་བ་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་འཛིན་གྲྭའི་ནང་མཉམ་ཞུགས་ཀྱིས་གཟིགས་སྐོར་གནང་ནས་ཉིན་འདིའི་ཕྱི་དྲོའི་དུས་ཚོད་ ༤ ཙམ་ལ་ཕྱིར་བཞུགས་སྒར་རྒྱུད་སྟོད་གྲྭ་ཚང་དུ་ཕེབས་ཡོད་འདུག