མི་ཟེར་བ་འདིས་རང་གི་གང་བཤད་ཚུལ་བདེན་པ་འཛིན་རྒྱུར་དགའ་བ་ཞིག་ལས་སྐྱེ་བ་ནས་བཟུང་དེ། རྩོད་རྙོག་བྱེད་རྒྱུ་ཡང་དེ་ནས་བཟུང་དེ་མགོ་བཙུགས་པ་རེད། མགོ་བཙུགས་ཉིན་དེ་ནས་མི་མཐོ་དམན་བར་གསུམ་ཚང་མས་རྩོད་པ་བྱེད་ཀྱི་ཡོད། རྩོད་པ་རྩོད་རྒྱུ་དེ་ཡང་གཏན་ནས་མི་འདྲ། ཆེ་ཆུང་མི་འདྲ། ནུས་པ་མི་འདྲ། རྒྱུ་མཚན་མི་འདྲ། དགོས་འཁོ་མི་འདྲ། གཏན་ནས་མི་འདྲ་བའི་རྩོད་རྙོག་མང་བོ་མང་བོ་ཞིག་མིའི་རིགས་ཀྱི་བྲང་ཁོག་ནང་དུ་མེ་ལྕེ་བཞིན་ཏུ་འབར་བཞིན་ཡོད།
དེ་ན་ང་རང་ཡང་མི་ཞིག་རེད། ངས་གང་ཞིག་རྩོད་དགོས་ཀྱི་ཡོད་དམ་ཟེར་ནས་ངས་རང་ཉིད་ལ་དྲི་བ་ཞིག་དྲིས་དུས། ངས་རྩོད་རྒྱུ་དེ་ནི་རང་གི་ཉལ་ས་དྲོན་མོ་དེ་མི་གཞན་གྱིས་བཙན་འཕྲོག་བྱས་པ་དེར་ཕྱིར་རང་ཉིད་ལ་ཐོབ་རྒྱུར་འབད་བརྩོན་དང་རྩོད་པ་རྒྱག་དགོས་པ་དེ་རེད། འོན་ཀྱང་། ངའི་ཉལ་ས་འཕྲོག་མཁན་གྱི་མི་དེ་ནི་སྟོབས་ཆེན་ཞིག་ཡིན་སྟབས། ངའི་འགྲམ་གྱི་མི་མང་བོ་ཞིག་ཁོ་ལ་རེ་དགོས་ཀྱི་ཡོད་སྟབས། ཁོང་ཚོས་ངའི་ཉལ་ས་ཁོས་འཕྲོག་པ་ཤེས་ཀྱང་། ཁ་རོག་གེར་བསྡོད་པ་འམ་མཚམས་རེར་དེ་འདྲ་མ་བྱེད་ཟེར་ནས་ཁ་ཡག་རེ་བཤད་པ་ལས། ང་རང་གི་ཉལ་ས་དྲོན་མོ་དེ་ང་རང་ཕྱིར་ཐོབ་ཐབས་སུ་ཁོང་ཚོས་ཁ་སེམས་མཐུན་པའི་རོགས་རམ་ཞིག་བྱེད་མཁན་དངོས་ནས་དཀོན་པོ་རེད།
དེས་ནས་ངས་རང་གི་རྩོད་རྙོག་འདི་ཁ་རོག་གེར་བཞག་ནས་ང་རང་ཉལ་ས་གཡར་མ་ཞིག་ལ་མགོ་བོ་བཞག་ནས་ཤི་རྒྱུར་སྒུག་དགོས་ཀྱི་ཡོད་དམ་ཟེར་ནས་རང་གིས་རང་ལ་དྲི་བ་གཉིས་པ་ཞིག་སླེབས་སོང་། རེད། རང་ཉིད་མི་གཅིག་གང་དུ་སོང་ཡང་མི་སྐྱོན་མོད། ངའི་ཉལ་ས་དྲོན་མོ་དེ་ཕྱིར་རང་གི་ལག་ཏུ་མ་རེག་པ་ཡིན་ན། ངའི་མེས་པོ་དེ་དག་གིས་ང་རང་ལ་བཞག་པའི་གཅེས་ནོར་ཡིན་སྟབས། ངས་རང་གི་མེས་པོ་དག་ལ་ཕྱི་མ་ནས་ཅི་ཞིག་བཤད་དགོས་ཀྱི་ཡོད་པ་རེད་ཅེས་རང་གི་རང་ལ་ལན་འདྲ་བོ་ཞིག་འདེབས་ཁུལ་བྱས་དེ། ད་ནི་ངས་ཀྱང་རྩོད་རྙོག་དེ་བཟང་ངན་གང་དུ་སླེབས་རེག་བར་ཏུ་རྩོད་རྒྱུར་སེམས་ཐག་བཅད་ཟིན་པ་ཡིན། ཡིན་ཡང་། ང་རང་ལ་ཁོང་ཚོས་རོགས་བྱེད་སྲིད་དམ། ཕལ་ཆེར། ཁོང་ཚོས་ད་དུང་ཡང་སྔར་བཞིན་ཁ་གཡང་རེ་བསྒྲགས་ནས་ལྟད་མོ་ལྟ་མཁན་ལས་གང་ཡང་མི་བྱེད་མཁན་དེ་རྣམས་ཆགས་སྲིད་དམ། དེ་འདྲར་ཆགས་ཉིན། ད་ནི་ངས་རང་གི་མེས་པོ་དག་ལ་དངོས་ནས་ཅི་ཞིག་ཟེར་བསམ་ཞོར་རྩོད་རྙོག གང་ནས་མཇུག་བསྡུ་སྲིད་པ་ཡིན། མུ་མཐུད་དུ་རྩོད་རྒྱུ་དེ་ནི་ངས་ཕྲག་པར་ལྷུང་བའི་ལས་འགན་ཡིན་པ་རེད། རྩོད་རྙོག་ང་རང་སྐྱེ་དུས་ནས་མགོ་བཙུགས་འདུག ང་སྐྱེ་དུས་ནས་ངའི་ཉལ་ས་དྲོན་མོ་གཞན་ལག་ན་འདུག མི་ཟེར་བ་འདི་གཉིད་སྐྱིད་པོ་ཞིག་ཁུགས་འདོད་ཀྱང་། ཉལ་ས་དྲོན་མོ་ཞིག་མེད་དུས། རྩོད་པ་ལོས་རྒྱག རྒྱག་ངེས་ཡིན། རྒྱག་དགོས་པ་ཡང་བཟོས་ཡོད་པ་རེད། ད་ནི་རྩོད་རྙོག་འགྲིག་པའི་རེ་བ་ཞིག་ཡོད་རྒྱུའི་ཕྱོགས་སུ་བསམ་བློ་གཏོང་མཁན་ཞིག་ཡོད་ཀྱང་རུང་མེད་ཀྱང་རུང་། ངས་རྩོད་རྒྱག་རྒྱུ་ཡིན།
འཇམ་མགོན་ལགས། རྩོད་པ་ལོས་རྒྱག བྱ་བྱེའི་འབའ་འབུ་ཚུན་ཆད་ཀྱིས་རྩོད་པ་རྒྱག་གི་ཡོད་པ་རེད། ཡིན་ཡང་། དེ་དག་གིས་སྨྲ་མི་ཤེས་པའི་དཀའ་ངལ་དང་བསམ་ཤེས་གནང་ཐུབ་མིན་གྱི་དཀའ་ངལ་སོགས་མང་བོ་ཡོད་པ་རེད། འུ་ཅག་ལས་དེ་ལས་བརྒལ་བའི་ཆ་རྐྱེན་མང་བོ་ཞིག་ཡོད་དུས། འུ་ཅག་གིས་རྩོད་པ་ལོས་རྒྱག ངེད་ཅག་ཚང་མས་ཤུ་རེ་ལོས་བྱེད། ཉིད་ཀྱིས་དཔུང་བ་མཉམ་གཤིབ་བྱེད་རྒྱུར་རྒྱབ་སྐྱོར་གནང་བ་དེར་ཐུགས་རྗེ་ཆེ།
གངས་རིའི་གླིང་བུ་ལགས། ངས་ནམ་ཡང་རང་རྒྱལ་ནས་གཞན་ཕམ་འཇུག་འདོད་མེད་ཀྱང་། གཞན་རྒྱལ་ནས་རང་མི་སྡུག་ལ་གཏད་པ་རིག་ན་དངོས་ནས་མི་འདོད་ཀི འདིས་ཚོར་བ་འདི་ང་ལ་ཡོད་ལ་ཁྱེད་རང་ལ་ཡང་ཡོད་ངེས་ཡིན་དུས། ངེད་ཅག་གིས་རྩོད་རྒྱག་དུས་སུ། རང་རིགས་ཀྱི་ཕམ་ཁ་དོན་མེད་དང་ཉེས་མེད་དུ་མྱོང་བཞིན་པ་དེ་དག་གི་ཆེད་དུ་ཡིན་པ་ཐུགས་འཇག་འཚལ།
མི་སུ་ཡིན་ན་ཡང་རང་ཕྱོགས་རྒྱལ་བ་དང་གཞན་ཕྱོགས་ཕམ་པའི་རྩོད་པ་རྒྱག་འདོད་མེད་མཁན་ཞིག་ཕར་ཆར་མེད་པ་རེད།ཡིན་ན་ཡང་་་་རྩོད་པའི་ཁ་ཕྱོགས་དང་རྩོད་པའི་རྒྱུ་མཚན་དང་རྩོད་པའི་རིགས་ལམ་སོགས་མ་ཤེས་པར་རྩོད་པ་བྱས་ན་དོན་མེད་ཀྱི་ངལ་བ་ཞིག་བ་མ་རེད་དམ།
གྲོགས་ཤ་ཁྲག་རུས་གསུམ་ལགས། རྩོད་དེ་མུ་མཐུད་རྒྱག་དགོས། རང་ས་སྤར་མོ་གང་བོ་དེའི་སླད་དུ་ང་ཚོ་ཚང་མའི་དཔུང་བ་མཉམ་སྦྲེལ་ནས་འགྲོ།
གཉའ་འབྲོང་ལགས། ཕེབས་པ་ཐུགས་རྗེ་ཆེ། རྐང་རྗེས་རེ་བཞག་པ་དེ་ཡང་དགའ་འོས་པ་ཞིག་ལོས་ཡིན།
བཀླགས་ཟིན་ཤ་ཁྲག་ལགས་ལ་ཐུགས་རྗེ་ཆེ་ཞུ་འདོད་བྱུང་།
ཨརྱ་ལགས། ཉིད་ཀྱིས་བསམ་ཚུལ་ལྷུག་པོེར་གནང་བ་དགའ་བསུ་ཞུ། ཡིན་ཡང་། ཉིད་ཀྱིས་འདི་འདྲ་ཞིག་གསུང་བ་དེ་ནི་ཡག་པོ་ཞིག་གོ་མ་སོང་། འོན་ཀྱང་ཁྱོད་ལའང་ཞན་ཆ་ཞིག་མེད་དམ་སྙམ་པ་ནི་གཞན་རྟེན་གྱི་བསམ་བློའི་དྲི་མ་དེ་རེད་ཟེར་བཞིན་འདུག ང་སུ་ལ་བརྟེན་བཞིན་ཡོད་མེད་དེའི་བསྐོར་ལ་གསལ་བཤད་རེ་གནང་ཐུབ་ན་ཡག་པོ་འདུག དེ་ནས་བདེན་པ་ཡིན་ན་ངས་རང་གི་ནོར་འཁྲུལ་ལ་ཁས་ལེན་ལོས་བྱེད། དེ་འདྲ་མིན་ཚེ། ཉིད་ཀྱིས་ང་རང་གི་རྩོམ་ཡིག་འདིས་ནང་གི་གང་ཞིག་གཞན་བརྟེན་ཆགས་ཀྱི་ཡོད་པ་དེར་བསམ་ཚུལ་བསྐྱར་མ་ཞིག་གནང་རོགས།
ཨ་ཅེ་ཆུ་སྐྱེས་སྒྲོལ་མ་ལགས། ཉིད་ཀྱིས་དེ་ལྟར་ཁ་གསལ་བོ་སྒོ་ནས་རྒྱབ་སྐྱོར་གནང་བ་དེར་ཐུགས་རྗེ་ཆེ། ངེད་ཅག་ཚང་མས་མུ་མཐུད་དུ་འཇོན་ཚོད་ནུས་ཚོད་ཅིག་ལོས་རྩོད། འདི་ནི་འུ་ཅག་གི་ཕྲག་པར་ལྷུང་བའི་ལྡོག་མེད་ཀྱི་ལས་འགན་ཞིག་རེད།
ཐུགས་རྗེ་ཆེ་གནང༌།-རང་གི་མིང་གྲགས་དང་ཐོབ་ཐང་ཆེད་དུ་མ་ཡིན་པར་རྩོད་དང༌། ང་ཚོས་རྒྱབ་ལ་ཡོང་ཆོག རྩོད་དགོས་པ་ནི་བོད་མི་ཚང་མའི་ལས་འགན་རེད།
རྩོད་རྒྱག་དགོས་པ་རེད་ལ་ཁྱོད་ཀྱིས་༼ངས་རྩོད་རྒྱག་རྒྱུ་ཡིན། ༽ཟེར་བར་རྗེས་སུ་ཡི་རངས་ཡོད། འོན་ཀྱང་ཁྱོད་ལའང་ཞན་ཆ་ཞིག་མེད་དམ་སྙམ་པ་ནི་གཞན་རྟེན་གྱི་བསམ་བློའི་དྲི་མ་དེ་རེད། ང་ཚོས་ཐ་ཤལ་གྱི་བསམ་བློ་དེ་མ་དོར་བར་དུ་དུས་ནམ་ཡང་རང་དབང་རང་བཙན་གང་ཡང་ཐོབ་མི་སྲིད་ལ་བོད་མི་རིགས་འདིའང་ཉམས་ཅེ་ཆུང་ནས་ཅེ་ཆུང་དུ་འགྲོ་ངེས་རེད། །