༸གོང་ས་མཆོག་ལ་མི་སེར་མཚན་མཐོང་།

ཟླ་འདིའི་ཕྱི་ཚེས་ ༢༩ ཉིན་བོད་མིའི་དབུ་ཁྲིད་སྤྱི་ནོར་༸གོང་ས་མཆོག་ལ་པོ་ལེན་ཌིའི་རྒྱལ་ས་ཝཱར་སའོ་རུ་ཡུལ་དེའི་མི་སེར་མཚན་མཐོང་གི་ཆེ་བསྟོད་གཟེངས་རྟགས་འབུལ་བཞེས་གནང་གཏན་འཁེལ་ཡོད་འདུག  

གཟའ་འཁོར་རྗེས་མའི་ནང་༧གོང་ས་མཆོག་པོ་ལན་ཌིའི་རྒྱལ་ས་ཝཱར་སའོ་ War Saw རུ་ཆིབས་བསྒྱུར་གནང་གཏན་འཁེལ་ཡོད་པ་དང་། སྐབས་དེ་དང་བསྟུན་ཏེ་ཡུལ་དེའི་མི་སེར་མཚན་མཐོང་གི་གཟེངས་རྟགས་ཤིག་དབུལ་འཆར་ཡོད་པའི་གནས་ཚུལ་ཟླ་འདིའི་ཕྱི་ཚེས་ ༢༣ ཉིན་ཨེ་ཤ་ཡའི་གསར་འགྱུར་དྲྭ་བར་སྤེལ་འདུག པོ་ལེན་ཌིའི་ཝར་སའོ་གྲོང་ཁྱེར་མགོ་ཁྲིད་ཧ་ན་གྷི་རོན་ཀེའེ་ཝེ་རྫི་མཆོག་གིས་གསུང་དོན། ཐེངས་འདིར་བོད་མིའི་དབུ་ཁྲིད་༧གོང་ས་ཏཱ་ལའི་བླ་མར་མི་སེར་མཚན་མཐོང་འབུལ་རྒྱུ་དེ། འདས་ལོར་ཁོང་པོ་ལེན་ཌི་རུ་འཚོང་ཟོག་ཚོགས་པའི་མགོ་ཁྲིད་ཟུར་པ་ལིཆ་ཝ་ལེསཱ་ཞེས་པས་གོ་སྒྲིག་ཞུས་པའི་ཚོགས་འདུར་ཕེབས་སྐབས་གཏན་འབེབས་བྱུང་ཡོད།  ༸གོང་ས་ཏཱ་ལའི་བླ་མ་མཆོག་ཡུལ་འདིར་ཕེབས་བསུ་ཞུ་རྒྱུ་དང་། ཝར་སའོ་ཡི་མི་སེར་མཚན་མཐོང་དབུལ་རྒྱུར་ངེད་ཚོར་མཚོན་ན་འགན་དབང་དང་དགའ་སྤོབས་ཆེན་པོ་ཞིག་རེད། ཕྱི་ཚེས་ ༢༨ ཉིན་༸གོང་ས་མཆོག་གིས་ཝར་སའོ་ཡི་མཐོ་སློབ་ཏུ། ཤེས་ཡོན་གྱི་རིན་ཐང་དང་རྒྱལ་སྤྱིའི་འགན་འཁུར། ཞེས་པའི་བརྗོད་གཞིའི་ཐོག་མང་ཚོགས་ལ་གསུང་བཤད་གནང་རྒྱུ་ཡིན་ལ། ཕྱི་ཚེས་ ༢༩ ཉིན་གྲོང་ཁྱེར་རྙིང་པའི་ལོ་རྒྱུས་ལྡན་པའི་ས་ཚིགས་རྒྱལ་པོའི་ཕོ་བྲང་ནས་ཁོང་ལ་མི་སེར་མཚན་མཐོང་དེ་འབུལ་རྒྱུ་ཡིན། ཞེས་གསུངས་འདུག 

དེ་བཞིན། དབྱིན་ཡུལ་ནང་རྟེན་གཞི་བྱས་པའི་པོ་ལན་ཌིའི་སྐུ་ཚབ་དོན་གཅོད་ཟུར་བའི་སྐུ་ཟླ་ལྕམ་རྗན་ངྷེ་ཌེ་བེ་རོན། Jayanti De Yerion ལགས་ཀྱིས་གོང་གི་གནས་ཚུལ་དེའི་ཐད་བརྗོད་དོན། འཛམ་གླིང་འདིའི་ཐོག་མི་སྣ་དྲག་ཤོས་གཉིས་ཡོད་ཅིང་། གཅིག་ནི་༸གོང་ས་ཏཱ་ལའི་བླ་མ་མཆོག་དང་། གཞན་ནི་ནེལ་སོན་མན་ཌེལཱ་གཉིས་རེད། པོ་ལེན་ཌི་ཡི་མང་ཚོགས་ཚོས་ད་བར་མན་ཌེལཱ་མཆོག་ཡུལ་འདིར་གདན་ཞུ་ཐུབ་མེད་ཀྱང་། ཐེངས་འདིར་༸གོང་ས་ཏཱ་ལའི་བླ་མ་མཆོག་ལ་མཇལ་བཅར་ཞུ་ཐུབ་པའི་བསོད་ནམས་ལྡན་ཡོད། ཅེས་དང་། ༸གོང་ས་ཏཱ་ལའི་བླ་མ་མཆོག་ནི་འདས་པའི་ལོ་ངོ་ ༢༠ རིང་ཡུལ་དེར་ཐེངས་ ༤ ཙམ་ཕེབས་ཏེ། ཡུལ་དེའི་མི་སེར་མང་པོ་ཞིག་ནང་ཆོས་ཀྱི་ཐོག་ཏུ་སྤྲོ་སྣང་འཕེལ་རྒྱས་ཕྱིན་ཡོད་པ་རེད། ཅེས་གསུངས་འདུག