མཐོ་རིམ་སློབ་མས་བོད་ཀྱི་རིག་གནས་བགྲོ་གླེང་།

སྤྱིར་ང་ལ་དེ་རིང་གི་བརྗོད་གཞི་འདིའི་སྒང་ལ་སྐད་ཆ་བཤད་རྒྱུའི་སྤོབས་པ་གང་ཡང་མི་འདུག གང་ཡིན་ཟེར་ན། ད་ལྟ་ང་ཚོའི་སྤྱི་ཚོགས་ཀྱི་དཀའ་ངལ་གཙོ་བོ་དེ། ངའི་ཟོལ་འདྲ་བོ། རིག་གནས་གང་ལ་མཁས་པ་རེད་ཟེར་ན། མཐར་ཕྱིན་པ་སྣ་གཅིག་ཀྱང་མེད་པ། སློབ་སྦྱོང་ཁྱོན་ནས་མེད་དམ་ཟེར་ན། ཕྱོགས་ཚང་མ་ཁུངས་འཁྱོལ་ལ་མ་འཁྱོལ་བ་རེ་ཤེས་པ་རྐྱང་རྐྱང་གིས་ཁེངས་ཡོད། ཟབ་སྦྱོང་དང་ལས་འགུལ་འགའ་རེའི་ཐོག་སྐད་ཆ་བཤད་པ་ཙམ་གྱིས་མཁས་དབང་གི་མིང་འདོག་གིན་ཡོད། ངེས་པ་དོན་གྱི་མཁས་པ་ཞིག་བགྲང་དགོས་ན་ཕལ་ཆེར་མཛུབ་མོ་འཛུགས་ས་གཅིག་ཀྱང་མེད་པའི་ཚད་དུ་སླེབས་ཡོད་ཟེར།

ཕྱི་ཚེས་ ༢༧ ཉིན་ས་རཱ་བོད་ཀྱི་གཞོན་ནུའི་གོ་སྒྲིག་འོག ས་རཱ་མཐོ་སློབ་ཏུ་༼ བོད་ཀྱི་རིག་གནས་བགྲོ་གླེང་ཐེངས་གསུམ་པ ༽ དེ་འཚོགས་ཡོད་པ་དང་། རིག་གནས་བགྲོ་གླེང་འདིའི་འབུ་འབྱེད་མཛད་སྒོར་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་གིས་དབུས་པའི་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་གཞོན་ནུའི་ཚོགས་གཙོ་ཚེ་དབང་རིག་འཛིན། དེ་བཞིན་ངྷ་ས་རིག་ལམ་སློབ་གཉེར་ཁང་གི་འགན་འཛིན་བཅས་ཕེབས་ཡོད། ཕྱི་ཚེས་ ༢༧ ནས་ ༣༠ བར་ཉིན་གྲངས་ ༤ རིང་གི་བོད་ཀྱི་རིག་གནས་བགྲོ་གླེང་འདིར་རྒྱ་གར་ནང་གི་མཐོ་སློབ་ཁག་ ༡༠ ནས་སློབ་མ་ ༣༢ ཙམ་འཛུལ་ཞུགས་གནང་ཡོད།

སྐབས་དེར་ས་རཱ་མཐོ་སློབ་ཀྱི་སློབ་སྤྱི་མཆོག་གིས་ས་རཱ་བོད་ཀྱི་རིག་གནས་སློབ་གཉེར་ཁང་ངོ་སྤྲོད་དང་སྦྲགས། ས་རཱ་གཞོན་ནུའི་སྐུ་ཚབ་ཀྱིས་ཐེངས་འདིའི་བགྲོ་གླེང་གི་དམིགས་ཡུལ་བརྗོད་དོན། ཐེངས་འདིའི་བགྲོ་གླེང་ལ་དམིགས་ཡུལ་གཙོ་བོ་གསུམ་ཡོད། དང་པོ། ༧གོང་ས་མཆོག་གིས་མི་ལོ་ ༣༠ རིང་ཤེས་ཡོན་འཐུས་ཤོར་ཕྱིན་སྐོར་ནན་གྱིས་གསུངས་པ་དེར། བོད་རིགས་མཐོ་རིམ་སློབ་མ་ཚོར་ངོས་འཛིན་དང་དགོངས་འཆར་གང་འདྲ་ཡོད་པ། གཉིས་པ། བོད་ཀྱི་རིག་གནས་བགྲོ་གླེང་སྔ་མ་གཉིས་ཀྱི་ནང་དོན་ལྟར། རྒྱ་གར་མཐོ་སློབ་ཁག་གི་སློབ་ཕྲུག་ཚོའི་འབྲེལ་ལམ་ཇེ་ཟབ་དང་བོད་ཡིག་བོད་སྐད་ལ་འདྲིས་གོམས་ཆེ་རུ་གཏོང་རྒྱུ། གསུམ་པ། བོད་གཞིས་བྱེས་གཉིས་སུ་གྱེས་ཏེ་མི་ལོ་ ༥༠ འཁོར་བའི་དུས་དྲན་དང་བསྟུན་ཏེ། བཙན་བྱོལ་བོད་མིའི་ཤེས་ཡོན་གནས་བབ་ལ་ཕྱིར་རྟོག་དང་འབྱུང་འགྱུར་ཇི་ལྟར་འཕེལ་རྒྱས་སུ་གཏོང་རྒྱུར་བགྲོ་གླེང་བཅས་ཡིན། ཞེས་ངོ་སྤྲོད་གནང་བྱུང་།

དེའི་རྗེས་བོད་ཀྱི་གཞོན་ནུའི་ཚོགས་གཙོ་ཚེ་དབང་རིག་འཛིན་ལགས་ཀྱིས་གཏམ་བཤད་ཡིག་ཐོག་ནས་སྒྲོག་སྦྱང་གནང་བའི་སྙིང་དོན། རིག་གནས་ནི་མི་རིགས་དང་རྒྱལ་ཁབ་ཀྱི་མཚོན་རྟགས་དང་ཡར་རྒྱས་འཛུགས་སྐྲུན་གྱི་ལག་ཆ་ཉག་གཅིག་ཡིན། ད་ཆར་བོད་ཀྱི་ངོ་བོ་དང་ངོས་འཛིན་ལ་ཕྱོགས་འདྲ་མིན་ནས་འཇིག་ཉེན་འཕྲད་བཞིན་པའི་སྐབས་འདིར། བོད་ཀྱི་རིག་གནས་ནི་དེ་བས་ཀྱང་ང་ཚོའི་བླ་སྲོག་དང་སྟོབས་ཤུགས་གལ་ཆེན་ཞིག་ཆགས་ཡོད་སྟབས། དེ་རིང་གི་བརྗོད་གཞི་འདི་ཧ་ཅང་གི་གལ་ཆེན་དང་རིན་ཐང་ཅན་ཞིག་ཏུ་ངོས་འཛིན་བྱེད་ཀྱིན་ཡོད། ཅེས་དང་།  

ཉེ་རབས་བཙན་བྱོལ་བོད་མིའི་སྤྱི་ཚོགས་ནང་སྤྱི་ཡོངས་ཤེས་ཚད་དང་ཡང་སྒོས་རིགས་གཅིག་རྐང་འཛིན་ཐད་འཐུས་ཤོར་ཕྱིན་པ་ནི། དམངས་གཙོའི་སྤྱི་ཚོགས་ཤིག་གི་ངོས་ནས་ཐུན་མོང་གི་ནོར་འཁྲུལ་ཞིག་ཏུ་ངོས་འཛིན་དགོས་པ་ཆགས་ཡོད། མཛུབ་མོ་གཞན་ལ་འཛུགས་རྒྱུ་མ་ཡིན་པར་རང་ཉིད་ནས་མགོ་བཙུགས་ཏེ། སྐྱོན་དག་སེལ་དང་མ་འོངས་ལེགས་བཅོས་མདུན་སྐྱོད་ཀྱི་ཁ་ཕྱོགས་སྟོན་ཐུབ་དགོས། ཐུན་མིན་རིག་གནས་དར་སྤེལ་དང་རྒྱུན་འཛིན་ཡོང་བར་ངེས་པར་ཚང་དགོས་པ་ནི། རང་གི་རིག་གནས་དང་རང་གི་མི་རིགས་ལ་སྤོབས་སེམས་དང་གཅེས་ཞེན་གྱི་འདུན་པ་ལྷོད་མེད་རང་ཚུགས་ཅན་ཞིག་དགོས་ལ། དེ་དང་མཐུན་པའི་སློབ་གསོའི་ཁ་ཕྱོགས་དང་སློབ་ཚན་གྱི་རིམ་པ་ཞིག་ཀྱང་མེད་དུ་མི་རུང་བའི་ཆ་རྐྱེན་ཡིན། ཞེས་སྒྲོག་སྦྱོང་གནང་སོང་།

བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གསུང་བཤད་གནང་དོན། སྤྱིར་ང་ལ་དེ་རིང་གི་བརྗོད་གཞི་འདིའི་སྒང་ལ་སྐད་ཆ་བཤད་རྒྱུའི་སྤོབས་པ་གང་ཡང་མི་འདུག གང་ཡིན་ཟེར་ན། ད་ལྟ་ང་ཚོའི་སྤྱི་ཚོགས་ཀྱི་དཀའ་ངལ་གཙོ་བོ་དེ། ངའི་ཟོལ་འདྲ་བོ། རིག་གནས་གང་ལ་མཁས་པ་རེད་ཟེར་ན། མཐར་ཕྱིན་པ་སྣ་གཅིག་ཀྱང་མེད་པ། སློབ་སྦྱོང་ཁྱོན་ནས་མེད་དམ་ཟེར་ན། ཕྱོགས་ཚང་མ་ཁུངས་འཁྱོལ་ལ་མ་འཁྱོལ་བ་རེ་ཤེས་པ་རྐྱང་རྐྱང་གིས་ཁེངས་ཡོད། ཟབ་སྦྱོང་དང་ལས་འགུལ་འགའ་རེའི་ཐོག་སྐད་ཆ་བཤད་པ་ཙམ་གྱིས་མཁས་དབང་གི་མིང་འདོག་གིན་ཡོད། ངེས་པ་དོན་གྱི་མཁས་པ་ཞིག་བགྲང་དགོས་ན་ཕལ་ཆེར་མཛུབ་མོ་འཛུགས་ས་ཞིག་མེད་པའི་ཚད་དུ་སླེབས་ཡོད། ལྷག་པར་དུ་སློབ་མ་ཞིག་ལ་མཚོན་ན། ཤེས་ཡོན་ཅི་ཙམ་སྦྱང་བ་དེ་ཙམ་གྱིས་བསམ་བློ་དང་ཀུན་སྤྱོད་ཡར་རྒྱས་སུ་གཏོང་དགོས། དེང་གི་སྤྱི་ཚོགས་ནང་ཤེས་ཡོན་པ་ཡིན་ཟེར་མཁན་མང་ཡང་། བསམ་བློ་དང་སྤྱོད་པའི་ཐད་ནས་ལྟ་ས་གང་ཡང་མེད་མཁན་མང་པོ་ཡོང་བསྡད་ཡོད། 

ང་བྷེལ་ཀོབ་གཞིས་ཆགས་ཀྱི་བྱིས་པ་དགུ་ཡོད་པའི་ཁྱིམ་ཚང་ཞིག་གི་བུ་ཕྲུག་གསུམ་པ་ཡིན། ནང་ལ་དཔལ་འབྱོར་གྱི་དཀའ་ངལ་ཡོད་སྟབས་སོ་སོའི་འདོད་པ་ལྟར། རིགས་གཅིག་རྐང་འཛིན་སོགས་གནས་རིམ་མཐོ་བའི་སློབ་སྦྱོང་རག་ཡོད་པ་མ་རེད། ངས་དཔལ་འབྱོར་ལ་སློབ་སྦྱོང་བྱས་ཡོད་ཀྱང་། སྐབས་དེར་རང་ཉིད་ལ་འཚམ་པའི་མཐོ་སློབ་གང་དུ་ཡོད་པ་དང་། དེ་ལ་ཇི་ལྟར་འཛུལ་དགོས་པ་སོགས་ཤེས་ཀྱིན་ཡོད་པ་མ་རེད། གཞི་རིམ་སློབ་གྲྭའི་སྐབས་སུ་ཞིང་ལས་དང་ཁྱིམ་ལས། ཐ་ན་བ་ཕྱུགས་ཀྱི་འོ་མ་ཡང་བཞོ་དགོས་པ་རེད། མཐོ་སློབ་སྐབས་སུའང་དགོང་མོའི་ཆུ་ཚོད་ ༧ ནས་ ༡༡ བར་ཟ་ཁང་ནས་ལས་ཀ་བྱས་པ་ཡིན། ང་ཚོའི་སྔོན་མ་དག་གིས་དེ་བས་ཀྱང་དཀའ་ལས་བརྒྱབས་ཡོད། སྔ་མ་དག་གི་གྲུབ་འབྲས་ཟེར་ན་འདྲ་ལ། དུས་ཀྱི་འགྱུར་འགྲོས་ཟེར་ནའང་འདྲ། ཁྱེད་ཅག་ལ་ཐོབ་ཡོད་པའི་སྐལ་བ་བཟང་པོ་དང་མཐུན་རྐྱེན་འཛོམ་པོ། གོ་སྐབས་ཡག་པོ་འདི་ཆུད་ཟོས་སུ་མ་སོང་བ་གནང་དགོས། ཞེས་གསུངས་བྱུང་།

མཇུག་མཐར་སྐུ་མགྲོན་གཙོ་བོ་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་གིས་གསུངས་བཤད་གནང་དོན། དེ་རིང་འདིར་ཕེབས་པ་ཚོས་བགྲོ་གླེང་གི་ཆ་ཤས་ལེན་པ་ཙམ་མ་ཡིན་པར་བགྲོ་གླེང་གི་མཐའ་སྡོམ་ཁག་བོད་རིགས་ན་གཞོན་སྤྱི་ཡོངས་ཀྱིས་སྤྱོད་ཐུབ་པ་དང་། དེ་ལ་བརྟེན་ནས་བོད་ཀྱི་རིག་གནས་དང་ལེགས་བྱང་གོང་འཕེལ་ལ་ཕན་ཐོགས་པ་ཞིག་ལ་དགོངས་པ་བཞེས་དགོས། ཁྱེད་ཅག་གིས་བགྲོ་གླེང་འདིའི་མཚན་ལ། བོད་ཀྱི་རིག་གནས་བགྲོ་གླེང་བཏགས་འདུག དེ་ལ་དཔྱད་ཞིབ་མང་པོ་བྱས་ཏེ་བཏགས་པ་ཞིག་ཡིན་ནམ། ཡང་ན། དགོངས་པར་གང་འཁོར་སྟབས་བདེ་བོས་བཏགས་པ་ཡིན། ངས་ཤེས་ཀྱིན་མེད་མོད། སྤྱི་ཡོངས་ཀྱིས་བོད་ཀྱི་རིག་གནས་ཞེས་པའི་སྐབས་སུ་བོད་པ་རང་གི་རིག་གནས་ཡིན་པ། ལུང་པ་གཞན་པའི་རིག་གནས་མ་ཡིན་པ་ཞིག་འཚོལ་རྒྱུ་ཅུང་དཀའ་མོ་ཡིན། སྐད་ཡིག་འཕུད་པའི་རིག་གནས་ཟེར་བ་དེ་སྤྱི་ཡོངས་ལ་ཁྱབ་པ་ཞིག་ཡིན།

བོད་ཀྱི་ནང་དོན་རིག་པ་ཟེར་སྐབས་བོན་དང་ཆོས་གཉིས་སུ་འདུ་བ་རེད། བོན་དེ་བོད་ནས་བྱུང་ངམ་གཞན་ཞིག་ནས་བྱུང་བ་ཡིན། ངས་གསལ་བོ་ཤེས་ཀྱིན་མེད་མོད། ཆོས་ལ་མཚོན་ན་ནང་ཆོས་ཡོངས་རྫོགས་རྒྱ་གར་ནས་བྱུང་བ་རེད། འོན་ཀྱང་། བོད་པའི་ནང་བསྟན་རིག་པ་ཟེར་བར་རྒྱུ་མཚན་གཉིས་ཡོད། དང་པོ། བོད་སྐད་ནང་ཡོད་པའི་ནང་ཆོས་ཆ་ཚང་ལ་སྤུས་དག་པོ་འདི་ལྟ་བུ་ཞིག་གཞན་པའི་སྐད་རིགས་གང་དུའང་ཡོད་པ་མ་རེད། གཉིས་པ། སྤྱིར་སངས་རྒྱས་ཀྱི་བཀའ་དང་རྒྱ་གར་གྱི་བསྟན་བཅོས་ལ་གཞི་བཅོལ་ཡོད་ཀྱང་། རྒྱ་གར་མཁས་པའི་དགོངས་པར་མ་འཁོར་བའི་གནད་མང་པོ་ཞིག་བོད་པའི་མཁས་པ་ཚོས་བཀྲལ་ཡོད། རྒྱ་མཚན་འདི་དག་ལ་བརྟེན་ཏེ་བོད་ཀྱི་ནང་དོན་རིག་པ་ཟེར་ན་མི་ཆོག་པ་མེད། ཅེས་བོད་ཀྱི་རིག་གནས་ཆེ་བ་ལྔ་དང་ཆུང་བ་ལྔ་རེ་རེ་བཞིན་བོད་རང་གི་ཐུན་མིན་གྱི་ཁྱད་ཆོས་ལྡན་ཚུལ་ལུང་དང་རིགས་པས་བསྒྲུབས་སོང་།

བགྲོ་གླེང་དབུ་འཛུགས་མཛད་སྒོ་གྲུབ་མ་ཐག་ས་རཱ་གཞོན་ནུའི་ཚོགས་གཙོ་བཟོད་པ་ལགས་སུ་བགྲོ་གླེང་གི་སྔ་ཕྱི་དང་དབུ་འཛུགས་མཛད་སྒོའི་གཏམ་བཤད་ཁག་གི་ཐད་དགོངས་ཚུལ་དྲིས་པར་ཁོང་གིས། ང་ཚོས་སྔོན་མ་ནས་འདི་ལྟ་བུའི་བགྲོ་གླེང་ཞིག་གལ་ཆེ་བར་མཐོང་སྟེ་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གི་མདུན་དུ་བཅར་སྐབས། ཁོང་གིས་ཧ་ཅང་དོ་སྣང་ཆེན་པོས་སྐུ་སྒེར་ཡིག་ཚང་ལ་འབྲེལ་བ་ཞུས་ཏེ་ཧིན་སྒོར་ཆིག་འབུམ་བསྩལ་བྱུང་། དེའི་རྗེས་དཔལ་རྒྱལ་བ་ཀརྨ་པ་མཆོག་གིས་ཧིན་སྒོར་ལྔ་ཁྲི་བསྩལ་སོང་། དེའི་སྟེང་ས་རཱ་གཞོན་ནུའི་ངོས་ནས་ཧིན་སྒོར་ལྔ་ཁྲི་བཅས་གྲ་སྒྲིག་གིས་ཐེངས་འདིའི་བགྲོ་གླེང་མགོ་འཛུགས་ཞུ་ཐུབ་པ་བྱུང་སོང་།

ཐོག་མར་ང་ཚོས་མཐོ་སློབ་ཁག་ ༡༣ ལ་མགྲོན་བརྡ་བཏང་ཡོད་ཀྱང་། འབྲི་གུང་དང་མན་ལོ། ནོར་གླིང་གསུམ་ཞུགས་ཐུབ་མ་སོང་། བགྲོ་གླེང་ལ་དངོས་སུ་ཞུགས་ཡོད་པ་སློབ་གྲྭ་ཁག་ ༡༠ ནས་སློབ་མ་ ༣༢ ཙམ་ཡོད། དེ་རིང་གི་བགྲོ་གླེང་དབུ་འཛུགས་གཏམ་བཤད་ཁག་ང་ཚོའི་དམིགས་ཡུལ་ནང་བཞིན་ཞིག་བྱུང་མ་སོང་། གང་ཡིན་ཟེར་ན། བགྲོ་གླེང་འདིའི་དམིགས་ས་གཙོ་བོ་༧གོང་ས་མཆོག་གིས་ལོ་ངོ་ ༣༠ ཤེས་ཡོན་འཐུས་ཤོར་བཏང་འདུག་གསུངས་ཡོད། མཐོ་རིམ་སློབ་མའི་ངོས་ནས་འཐུས་ཤོར་ངོས་འཛིན་བྱེད་སྟངས་དང་། དེ་ལ་བཅོས་སྒྱུར་དང་ཁ་ཕྱོགས་གསར་བ་འཚོལ་ཐབས་སྐོར་ཡིན་སྟབས། དེ་ལ་ལམ་སྟོན་གསལ་བཤད་དང་གནད་དུ་འཁེལ་བའི་ཁ་ཕྱོགས་གསལ་སྟོན་བྱ་དགོས་པར་མཐོང་སོང་། ཞེས་བརྗོད་སོང་།