སྐྱབས་རྗེ་ཀིརྟི་རིན་པོ་ཆེ་བློ་བཟང་བསྟན་འཛིན་མཆོག་གིས་རྩོམ་གནང་མཛད་པའི་ཉམས་མྱོང་རྒན་པོའི་སྙིང་གཏམ་དམར་རྗེན་དུ་གསལ་བའི་ལུགས་ཟུང་གི་བསླབ་བྱ་དོན་ཚན་སོ་གཉིས་ཅན་དེ་ནི། སྤྱི་ལོ་ ༢༠༠༩ ཟླ་ ༥ ཚེས་ ༥ ཉིན་བཞུགས་སྒར་ངྷ་རམ་ས་ལའི་འཕགས་ཡུལ་ཀིརྟིའི་བྱེས་པ་གྲྭ་ཚང་ནས་འགྲེམས་སྤེལ་ཞུས་ཡོད། དཔེ་དེབ་འདིར་བསྡོམས་པའི་ལེའུ་ཆེན་པོ་གསུམ་དང་ཆུང་བ་སོ་གཉིས། ཤོག་ངོས་ ༡༤༣ བཅས་ཡོད་ཅིང་། ནང་དོན་གཙོ་བོ་ལྷ་ཆོས་དགེ་བ་བཅུ་དང་མི་ཆོས་གཙང་མ་བཅུ་དྲུག་རེ་རེ་བཞིན་གཏིང་ཟབ་ཅིང་གོ་བསླ་བ། རྒྱ་ཆེ་ཞིང་ཁ་གསལ་བ། དུས་རབས་དང་མཐུན་པའི་འགྲེལ་སྟངས་ཐུན་མོང་མ་ཡིན་པ་སྤྱད་དེ། བྱ་སྤྱོད་ཆོས་དང་མཐུན་ཞིང་མི་ཚེ་དོན་དང་ལྡན་པར་སྤྱོད་ཚུལ་རྒྱས་པར་བསྟན་ཡོད་ལ། ཆང་དང་ཐ་མག དུག་སྨྱོས་རྫས། འཁྲིག་སྤྱོད་ཀྱི་འགོ་ནད། རྒྱན་འཛུགས་ཤོ་རྒྱག ནག་ཚོང་། གཞན། མི་རིགས་ཀྱི་སྐད་ཡིག་གོམས་གཤིས་སྲུང་སྐྱོབ་བྱེད་སྟངས་དང་། ཚུལ་དང་མཐུན་ཞིང་འཚེ་བ་སྤོང་པའི་དཔལ་འབྱོར་སྒྲུབ་སྟངས། རང་བྱུང་ཁོར་ཡུག་སྲུང་སྐྱོབ་དང་། སྐྱེས་ཁམས་འཐོན་རྫས་བག་ཡོད་ཀྱིས་སྤྱོད་ཚུལ་བཅས་གལ་འགེངས་ཆེ་བའི་ཁ་ཏ་བསླབ་བྱ་ཁག་ཅིག་ཀྱང་ཁ་སྣོན་གྱི་ཚུལ་དུ་གསུངས་ཡོད།
དཔེ་དེབ་འདིའི་སྔོན་གླེང་དུ། རོང་ཆེན་བསྟན་པའི་སྒྲོན་མེ། ཀིརྟི་སྐུ་ཕྲེང་བཅུ་གཅིག་པ་བློ་བཟང་བསྟན་འཛིན་མཆོག་གིས། བླང་དོར་བསླབ་བྱ་སོ་གཉིས་ཀྱི་ཁ་གཏད་ཡུལ་རྗེས་འཇུག་སྐལ་ལྡན་བུ་སློབ་རྣམས་ལ་ཟབ་གསལ་གསུང་གི་བདུད་རྕི་བསྩལ་དོན། ངོས་རང་ལོ་བཅུ་དྲུག་ནས་བཟུང་མི་ཡུལ་ས་མཐར་གྱར་བའི་དབང་གིས་ལུས་ཕྱི་རྒྱལ་དུ་ཡོད་ནའང་། བརྩེ་སེམས་དང་ཕན་པ་སྒྲུབ་འདོད་ཀྱི་བསམ་པ་ནི་ཉིན་མཚན་དུས་དྲུག་ཏུ་ཁྱེད་རྣམས་དང་ཁ་བྲལ་མ་མྱོང་། འོན་ཀྱང་། རེ་སྨོན་གྱི་ཡུལ་དུ་བྱེད་རྒྱུ་ཙམ་ལས་སྐྱིད་སྡུག་མཉམ་གཤིབ་ཀྱིས་འགྲོགས་འདྲིས་བྱེད་པའི་གོ་སྐབས་ནི་ད་ལྟའི་བར་འབྱུང་ཐུབ་མེད་སྟབས། ད་ལམ་སློབ་བརྒྱུད་མི་མང་སྤྱི་དང་ལྷག་པར་ཤེས་ཡོན་སློབ་སྦྱོང་གི་གོ་སྐབས་མ་ཐོབ་པའི་ཞིང་འབྲོག་མི་མང་རྣམས་ཀྱི་ཉིན་རེའི་འཚོ་བའི་ནང་གི་བྱ་སྤྱོད་དང་འབྲེལ་ནས། ལྷ་ཆོས་དང་མི་ཆོས་ཏེ་ལུགས་ཟུང་གི་བསླབ་བྱ་གཞུང་ཆེན་མོའི་ཐ་སྙད་མ་བཀོལ་བར་གོ་བདེ་བའི་ཕལ་སྐད་ཀྱིས་མིང་ཚིག་བེད་སྤྱོད་ཀྱིས་རང་ཉིད་ལོ་རྒན་བདུན་ཅུར་སོན་ལ་ཉེ་བའི་ཉམས་མྱོང་རྒན་པོའི་བསླབ་བྱ་དོན་ཚན་སོ་གཉིས་ཅན་གྱི་ཁ་བརྡ་ཞིག་འདིར་ཞུ་འདོད་བྱུང་བས། ལེགས་པར་ཉོན་ལ་ཡིད་ལ་ཟུངས་ཤིག་ཅེས་རེ་འདུན་ཞུ་གི་ཡོད། ཅེས་བཀོད་འདུག
༧རོང་ཆེན་བསྟན་པའི་སྒྲོན་མེ་༧སྐྱབས་རྗེ་ཀིརྟི་རིན་པོ་ཆེ་ཁོང་ནས་ལམ་སྟོན་སློབ་གསོ་འདི་ཙམ་མིན་པར། བོད་མི་རིགས་ཀྱི་ཁ་སྟབས་འདིར་གནག་ཐོག་གཙགས་ཁེལ་གྱིས་ལུགས་ཟུང་བསླབ་བྱ་མང་མང་བསྩལ་གནང་འདུག་ལ།
དེའི་གྲུབ་འབྲས་ཀྱང་བོད་ཕྱི་ནང་གཉིས་ལས་བོད་ནང་ལ་ཧ་ཅང་གི་ཕན་རླབས་བྱུང་འདུག་པ་ཡོངས་སུ་གྲགས།
ལྷག་པར་ཕྱི་ལོ་ ༡༩༨༤ ལོར་ནང་དོན་གཞུང་འབྲེལ་གྱིས་བོད་ནང་གཟིགས་སྐོར་ཕེབས་སྐབས་བོད་ཀྱི་སྤྱི་དོན་ལ་མིག་སྨན་མིག་ཐོག་ཏུ་ཁེལ་བའི་མཛད་འཕྲིན་བསྐྱངས་གནང་པ་སོགས་རྣམ་ཐར་གསེར་ཕྲེང་ལས་མཇལ་སོང་ལ།
ད་ལྟ་བར་སྐུ་ཚེ་ཧྲིལ་བོ་འདིའི་རིང་བོད་མི་རིགས་རིག་གཞུང་དང་བཅས་ཉམས་པ་སླར་གསོ་དང་། མི་ཉམས་གོང་འཕེལ། མཐོར་འདེགས་འཐུས་ཚང་ཅན་དུ་བསྒྱུར་ཐབས་ཁོ་ནའི་ཆེད་ཕྱག་ལས་གནང་དང་གནང་མུས་ཡིན་འདུག་པར་གུས་འདུད་དང་།
སྐུ་ཚེ་ཡུན་ནས་ཡུན་ཏུ་བརྟན་པའི་སྨོན་འདུན་ཤུགས་དྲག་ཞུ།
༸སྐྱབས་མཆོག་ཀིརྟི་རིན་པོ་ཆེའི་མཛད་སྙན་དང་མཛད་བཟང་སྔར་ནས་ཐོས་མྱོང་ལ། དམ་པ་གང་གིས་ཀིརྟི་དགོན་ཁག་གིས་གཙོས་དགོན་སྡེ་མང་པོར་མང་ཇ་དཀར་སྐྱོངས་སུ་སྒྱུར་ནས་སེམས་ཅན་སྟོང་ཕྲག་མང་པོར་སྲོག་གི་སྦྱིན་གཏོང་གནང་བ་སོགས་བསམ་གྱི་མི་ཁྱབ་པའི་རྣམ་ཐར་ལ་སྙིང་ནས་དད་པའི་ཕྱག་འཚལ་ལོ།
སྐུ་ཚེ་བརྟན་པ་སྨོན།
བཙན་བྱོལ་བའི་སྤྱི་ཚོགས་སྤྱི་དང་ལྷག་པར་བོད་མིའི་སློབ་གྲྭ་ཁག་ཏུ་བོད་མི་རང་གི་བཟང་པོའི་སྤྱོད་ལམ་དང་གོམས་གཤིས་ཁག་ཉམས་ཆག་ཏུ་འགྲོ་བཞིན་སྐབས་འདིར། རིན་པོ་ཆེ་ཁོང་གིས་དམིགས་གཏད་གཙོ་བོ་བོད་ནང་གི་འབྲེལ་ཡོད་མང་ཚོགས་ལ་དགོངས་ནས་ཉམས་མྱོང་རྒན་པོའི་བསླབ་བྱ་འདི་བཀའ་རྩོམ་མཛད་པ་ཞིག་ཡིན་ཀྱང་། བཙན་བྱོལ་བའི་སྤྱི་ཚོགས་ནང་ཁ་ཚ་དགོས་གཏུགས་སུ་གྱུར་ཡོད་སྟབས་སློབ་གྲྭ་ཁག་གི་འཛིན་སྐྱོང་ལས་བྱེད་དང་དགེ་རྒན་རྣམ་པས་དོ་སྣང་ཞུས་ནས་ཀུན་སྤྱོད་ཀྱི་སློབ་ཚན་གྲས་སུ་འཇོག་ཐུབ་ན་ཤིན་ཏུ་བཟང་། བསླབ་བྱ་འདི་ནང་དོན་ཟབ་ལ་གོ་བ་ལོན་ཚིག་བརྗོད་སླ་བོ་ཞིག་ཏུ་མཛད་འདུག་པས་ང་ཚོའི་གཞི་རིམ་སློབ་གྲྭ་ཁག་ལ་ཤིན་ཏུ་འཚམས།་
༸ སྐྱབས་རྗེ་ཀརྟི་རིན་པོ་ཆེ་མཆོག་ནི་ངེས་པ་དོན་གྱི་སྐྱེས་བུ་དམ་པ་ཞིག་ཡིན་སྟབས་ཉམས་མྱོང་རྒན་པོའི་བསླབ་བྱ་སོ་གཉིས་དེ་ཡང་ཚད་ལྡན་ཞིག་ཡིན་པར་སོང་དེས་བསྟན་དང་འགྲོ་ལ་ཕན་ཅིང་ཁོང་སྐུ་ཁམས་བཟང་ཞིང་ཞབས་པད་ཡུན་དུ་བརྟན་པའི་སྨོན་ལམ་འདེབས།
བཟོ་བཅོས། རྣལ་མ་ཞིག་ཏུ་
མཛད་པ་པོའི་ཐུན་མོང་མ་ཡིན་པའི་མཛད་པ་རྣམ་ཐར་ཇི་ལྟར་ཡིན་མངོན་དཔག་དཀའ་ཡང་། ཐུན་མོང་སྣང་ངོར་༸འཕགས་མཆོག་ཕྱག་ན་པདྨོའི་རྗེས་འཇུག་རྣལ་མ་་ཏུ་མངོན།
སྐུ་ཚེ་ཡུན་དུ་གནས་པའི་སྨོན་འདུན་ཞུ།།
རིན་པོ་ཆེ་མཆོག་ནི་གཞན་ཕན་གྱི་ཕྱག་ཟུང་རིང་ཞིང་ལུགས་གཉིས་ཀྱི་སྤྱན་ཟུང་ཡངས་པའི་སྐྱེས་བུ་དམ་པ་ཞིག་རེད།