ཉེ་ཆར་བལ་ཡུལ་ནང་བོད་དོན་བགྲོ་གླེང་ཚོགས་འདུ་ཞིག་འཚོགས་ཏེ། བལ་ཡུལ་ནའེ་རོ་སློབ་གྲྭ་ཆེན་མོའི་མཁས་དབང་ཨ་ནན་མཆོག་གིས་བལ་ཡུལ་གྱིས་སོ་སོའི་རྒྱལ་པོར་མི་སྐྲག་པར་གཞན་པའི་མགོ་བར་སྐྲག་པ་དང་། སོ་སོའི་ཨ་ཕ་མི་བརྩི་བར་ཁྱིམ་མཚེས་ཨ་ཕར་བརྩི་བའི་སྤྱོད་ངན་དེ་དོར་ནས་རང་ཚུགས་ཐུབ་པ་ལ་ཁ་ཕྱོགས་རྒྱུ་གལ་ཆེན་ཡིན། ཞེས་གསུངས་ཡོད།
ཟླ་འདིའི་ཕྱི་ཚེས་ ༣ ཉིན་བལ་ཡུལ་གྱི་འགྲོ་བ་མིའི་ཐོབ་ཐང་ཚོགས་པས་གོ་སྒྲིག་འོག རྒྱ་གར་དང་ཧྥ་རན་སི་བཅས་ནས་མཁས་དབང་དང་ཆབ་སྲིད་སྲིད་དོན་པ། བོད་དོན་རྒྱབ་སྐྱོར་བ་ཁག་གཅིག་བཅས་འདན་ཞུས་ཐོག བོད་དོན་སྐོར་གྱི་བགྲོ་གླེང་ཚོགས་འདུ་ཞིག་འཚོགས་ཡོད། ཚོགས་འདུའི་ཐོག་རྒྱ་གར་གྲོས་ཚོགས་གྱི་ཚོགས་མི་དང་རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་བྷེ་རྒྱ་ཤེས་བྷུ་ཤན་ཏེ་བཱ་རེ་དང་། རྒྱ་གར་ཧིན་བོད་མཛའ་འབྲེལ་ཚོགས་པའི་དྲུང་ཆེ། ནེ་རོའི་སློབ་གྲྭ་ཆེན་མོའི་མཁས་དབང་ཨ་ནན་ཀོའུ་མར། ཧྥ་རན་སི་ནས་བོད་དོན་རྒྱབ་སྐྱོར་བ་ཧྥུ་རན་སེསུ། བལ་ཡུལ་གྱི་འགྲོ་བ་མིའི་ཐོབ་ཐང་ཚོགས་པའི་ཚོགས་གཙོ་སྐུ་ཞབས་སོའུ་ཏེབ། བོད་མི་མང་སྤྱི་འཐུས་ཚེ་བརྟན་ནོར་བུ་ཚོགས་ཞུགས་གནང་སྟེ། རིམ་པ་བཞིན་བོད་དོན་དང་འབྲེལ་བའི་བརྗོད་གཞི་འདྲ་མིན་སྟེང་གཏམ་བཤད་གནང་ཡོད།
ཚོགས་ཐོག་ནས་བོད་མི་ཚོའི་བདེན་པའི་འཐབ་རྩོད་དང་ཞི་བའི་ལས་འགུལ་ཁག་ལ་བལ་ཡུལ་གཞུང་དམངས་གཉིས་ནས་རྒྱབ་སྐྱོར་འཚོལ་ཐབས་བྱ་རྒྱུ་ནི་གལ་ཆེན་ཡིན་པ་དང་། དེ་ཡང་ཐོག་མར་བོད་མི་ཚོས་བལ་ཡུལ་གྱི་སྐད་ཡིག་ཐོག བོད་དོན་སྐོར་གྱི་ཚགས་པར་འདོན་རྒྱུ་དང་། བལ་ཡུལ་མཐོ་སློབ་ཁག་གཙོས་བའི་སློབ་གྲྭ་ཁག་ཏུ་ནང་ཆོས་སྡེ་ཚན་དང་བོད་ཀྱི་རིག་གནས་སྡེ་ཚན་འཛུགས་རྒྱུ། བལ་བོའི་གྲོས་ཚོགས་དང་མི་དམངས་ཁྲོད་བོད་གྱི་གྲོགས་པོ་དང་མཛའ་འབྲེལ་ཚོགས་པ་འཛུགས་རྒྱུ། ལྷག་པར་བལ་ཡུལ་ཧི་མ་ལ་ཡའི་ནང་བའི་མི་རིགས་ཚོ་ལ་བོད་མི་ཚོས་མཛའ་འབྲེལ་དམ་པོ་འཛུགས་རྒྱུ་སོགས་ཧ་ཅང་གལ་ཆེན་ཚུལ་དང་། ལྷག་པར་མཁས་དབང་ཨ་ནན་མཆོག་གིས་བལ་ཡུལ་གྱིས་སོ་སོའི་རྒྱལ་པོར་མི་སྐྲག་པར་གཞན་པའི་མགོ་བར་སྐྲག་པ་དང་། སོ་སོའི་ཨ་ཕར་མི་བརྩི་བར་ཁྱིམ་མཚེས་ཨ་ཕར་བརྩི་བའི་སྤྱོད་ངན་དེ་དོར་ནས་རང་ཚུགས་ཐུབ་པ་ལ་ཁ་ཕྱོགས་རྒྱུ་གལ་ཆེན་ཡིན་སྐོར་བཅས་གསུངས་སོང་།
ཡིན་ཡང་ཟླ་འདིའི་ཟླ་འགོར་བལ་ཡུལ་བོད་ཀྱི་བདེ་དོན་ལས་ཁུངས་ནས་གནས་ཡུལ་རྒྱལ་ནང་གི་གནས་སྟངས་དང་བསྟུན་པ་བྱས་ནས་བོད་མི་ཚོས་བོད་དོན་འཐབ་རྩོད་གྱི་ལས་འགུལ་སྤེལ་མཚམས་འཇོག་དགོས་པའི་འབོད་སྐུལ་ཡིག་ཆ་གང་སར་བཀྲམས་པ་དང་། བོད་མི་ཚོས་ལས་འགུལ་སྤེལ་ནས་དཀའ་ངལ་དང་རྙོག་དྲ་རིགས་འཕྲད་ཚེས་འབྲེལ་བ་མེད་ཚུལ་ཀྱང་འཁོད་ཡོད། གསལ་བསྒྲགས་དེའི་ཐད་བོད་མི་དང་ལྷག་དོན་སྔོན་མ་ནས་བོད་དོན་ལས་འགུལ་སྤེལ་མཁན་དྭངས་བླངས་བ་ཚོའི་ཁྲོད་འདོད་པ་མ་ཁེངས་བའི་བསམ་ཚུལ་སྟོན་མཁན་དང་བློ་ཕམ་བྱེད་མཁན་མང་པོ་ཡོང་བཞིན་པ་རེད། གོང་གི་གནས་ཚུལ་དེ་སྐུ་ཞབས་ཀླུ་ལགས་ཀྱི་ཟིན་བྲིས་ལས་འདྲེན་བཀོད་བྱས།
