ཕྱི་དངོས་པོ་ཡར་རྒྱས་ཕྱིན་པ་མཉམ་དུ་ནང་སེམས་རྒྱུད་ཀྱང་ཡར་རྒྱས་གཏོང་རྒྱུ་གལ་འགངས་ཆེན་པོ་རེད་ཅེས་དཔལ་༸ས་སྐྱ་གོང་མ་རིན་པོ་ཆེ་མཆོག་གིས་སློབ་ཕྲུག་རྣམས་ལ་གསུངས་ཡོད།
ཕྱི་ཚེས་ ༡༡ ཉིན་གཉའ་ཁྲི་ཆོས་རིག་ཞབས་ཞུ་རེས་མེད་བོད་ཀྱི་དཔེ་མཛོད་ཁང་གི་གོ་སྒྲིག་འོག དཔལ་༸ས་སྐྱ་གོང་མ་རིན་པོ་ཆེ་མཆོག་གིས་སྦེལ་ཀོབ་བོད་ཁྱིམ་སློབ་གྲྭའི་འཛིན་རིམ་བཅུ་བ་ཡན་དང་སྦེལ་ཀོབ་དབུས་ཉིན་སློབ་ཀྱི་འཛིན་རིམ་བཅུ་བ་ཡན་གྱི་སློབ་ཕྲུག་རྣམས་ལ་ནང་ཆོས་ངོ་སྤྲོད་གནང་ཡོད་ལ། ནང་ཆོས་ངོ་སྤྲོད་གྲུབ་རྗེས་སློབ་ཕྲུག་ཚོས་ནང་ཆོས་དང་འབྲེལ་བའི་དྲི་བ་དྲིས་ལན་ཡང་བྱས་ཡོད། ཉིན་དེར་རིན་པོ་ཆེ་ཁོང་གིས་སློབ་ཕྲུག་རྣམས་ལ་གསུངས་དོན། མི་སུ་འདྲ་ཞིག་ཡིན་རུང་དེའི་རྒྱུད་ལ་སོ་སོའི་ཆོས་ལུགས་དང་སོ་སོའི་ཕ་ཡུལ། ས་སོའི་རིག་གཞུང་ལ་ཞེན་ཁོག་དང་དང་དོད། ཡིད་ཆེས་བྱེད་པའི་གཤིས་ཀ་ཞིག་རང་བཞིན་གྱིས་འཇགས་ཡོད་པ་རེད། ཡིན་ནའང་། ང་ཚོའི་སོ་སོའི་ཆོས་ལུགས་ཡིན་པའི་རྒྱུ་མཚན་ཙམ་མིན་པར་ནང་པ་སངས་རྒྱས་ཀྱི་ཆོས་ལུགས་ནི་དོན་དངོས་ཐོག དཔེ་ཆའི་ནང་། འགྲོ་བའི་སྡུག་བསྔལ་སྨན་བྱེད་པོ། །བདེ་བ་ཐམས་ཅད་འབྱུང་བའི་གནས། །བསྟན་པ་ཡུན་རིང་བཀུར་བསྟི་དང་། །བཅས་ཏེ་ཡུན་རིང་གནས་གྱུར་ཅིག །ཅེས་གསུངས་པ་ལྟར། སྡུག་བསྔལ་མ་ལུས་པ་སེལ་བ་དང་བདེ་སྐྱིད་མཐའ་དག་འབྱུང་བའི་གཞི་རྩ་དངོས་གནས་དེ་ཆགས་ཡོད་པ་རེད། དེ་གང་རེད་ཅེ་ན། ཤར་ཕྱོགས་པ་དང་ནུབ་ཕྱོགས་པ་སོགས་མི་སུ་འདྲ་ཞིག་ཡིན་ནའང་། སྡུག་བསྔལ་མི་འདོད་པ་དང་བདེ་སྐྱིད་འདོད་མཁན་ཤ་སྟག་རེད། དེར་བརྟེན་སྡུག་བསྔལ་སེལ་བ་དང་བདེ་སྐྱིད་ཐོབ་པའི་ཆེད་དུ་མི་སྒེར་དང་ཚོགས་པ་ཁག རྒྱལ་ཁབ་ཁག་བཅས་ཚང་མས་འབད་བརྩོན་བྱས་ཏེ་ཡར་རྒྱས་གཏོང་གི་ཡོད་ལ། ཡར་རྒྱས་བཏང་སྟེ་འདས་པའི་དུས་རབས་ནང་ཚན་རིག་དང་འཕྲུལ་འཁོར་སོགས་ཧ་ལས་པའི་ཡར་རྒྱས་ཕྱིན་ཏེ། མིའི་སྤྱི་ཚོགས་ལ་ཕན་ཐོགས་ཆེན་པོ་བྱུང་ཡོད། དཔེར་ན་ལོ་མང་བོའི་སྔོན་ལ་གཏན་ནས་བཅོས་མི་ཐུབ་པའི་ནད་ཚ་ཁ་ཤས་དེ་རིང་ཁ་སང་ལས་སླ་བོའི་ཐོག་ནས་སྨན་བཅོས་བྱེད་ཐུབ་ཀྱི་ཡོད་པ་དང་། སྔོན་མ་གཏན་ནས་འགྲོ་མི་ཐུབ་པའི་ལུང་པ་ཁ་ཤས་ནང་དེ་རིང་ཁ་སང་ཆུ་ཚོད་གཅིག་གཉིས་ནང་དུ་སླེབས་ཐུབ་ཀྱི་ཡོད་པ་རེད། དེ་བཞིན་སྔོན་མར་ལུང་པ་ཕན་ཚུན་བར་འབྲེལ་གཏུགས་བྱེད་ཐུབ་ཀྱི་མེད་སར་དེང་སྐབས་ལས་སླ་བོར་འབྲེལ་གཏུགས་བྱེད་ཐུབ་ཀྱིན་ཡོད། དེ་ལྟར་ཕྱི་དངོས་པོའི་དཔལ་ཡོན་ཡར་རྒྱས་འགྲོ་བཞིན་ཡོད་ནའང་། དོན་དངོས་ཚན་རིག་དང་འཕྲུལ་འཁོར་ཡར་རྒྱས་ཕྱིན་པ་དེས་ང་ཚོའི་སེམས་ཀྱི་ཞི་བདེ་དང་བདེ་སྐྱིད་བསྐྲུན་ཐུབ་ཀྱི་བསྒྲུབ་ཐུབ་ཀྱི་མེད་པ་མ་ཟད། ཕྱི་དངོས་པའི་ཚན་རིག་ཅི་ཙམ་གྱིས་ཡར་རྒྱས་ཕྱིན་པ་དང་མཉམ་དུ་ནང་སེམས་རྒྱུད་ཡར་རྒྱས་འགྲོ་མ་ཐུབ་པར། མིའི་སེམ
ས་རྒྱུད་ཉོན་མོངས་པ་ཤུགས་ཆེན་པོ་ཡོད་མཁན་ཚོའི་དབང་འོག་ཏུ་ཕྱིན་ཚེ། འཛམ་གླིང་ནང་ཧ་ལས་པའི་གོད་ཆགས་དང་དཀའ་སྡུག་ཆེན་པོ་མྱོང་བའི་ཉེན་ཆ་ཆེན་པོ་ཡོད་པ་རེད། དེ་གང་ཡིན་ཟེར་ན་ཕྱི་དངོས་པོ་ཡར་རྒྱས་ཕྱིན་པ་དེས་བཟང་ཕྱོགས་ནས་བལྟས་ན་ཕན་ཐོགས་ཆེན་པོ་བྱུང་ཡོད་ཀྱང་། སྡུག་ཕྱོགས་ནས་བལྟ་སྐབས་གཏོར་བཤིག་གཏོང་བ་དང་། མིའི་ཚེ་སྲོག་ལ་ཉེན་ཁ་ཡོང་བའི་རྒྱུ་བསྐྲུན་བཞིན་ཡོད་པ་རེད། རྒྱུ་མཚན་དེར་བརྟེན་ནས་ཕྱི་དངོས་པོ་ཡར་རྒྱས་ཕྱིན་པ་དང་ནང་སེམས་རྒྱུད་ཀྱང་ཡར་རྒྱས་གཏོང་དགོས་པ་དེ་ཧ་ཅང་གི་གལ་ཆེན་པོ་རེད་ལ། ནང་སེམས་རྒྱུད་ཡར་རྒྱས་གཏོང་རྒྱུ་ནི་ཕྱི་དངོས་པོ་དང་འཁྲུལ་འཁོར་ལ་བརྟེན་ནས་ཡར་རྒྱས་གཏོང་རྒྱུ་མེད་པར། ཆོས་ཀྱི་བསླབ་བྱའི་ཐོག་ནས་ནང་སེམས་བཟོ་བཅོས་རྒྱག་དགོས་ཀྱི་ཡོད་པ་རེད་ཅེས་གསུངས་ཡོད། གཞན་ཡང་འཛམ་གླིང་ནང་ཆོས་ལུགས་མི་འདྲ་བ་མང་བོ་ཡོད་པ་དང་། ཆོས་ལུགས་སོ་སོར་ལེགས་པའི་ཆ་མང་བོ་ཞིག་ཀྱང་ཡོད་ལ། མིའི་སྤྱི་ཚོགས་ལ་ཆོས་ལུགས་འདྲ་མི་འདྲ་མང་བོ་ཡོད་པ་དེ་དག་གིས་ཕན་པའང་ངེས་ཅན་ཡོང་གི་ཡོད་ནའང་། དེ་དག་ལས་ནང་པ་སངས་རྒྱས་པའི་ཆོས་ནི་རྩ་ཆེན་པོ་རེད་ཟེར་བ་ཙམ་མིན་པར། རིག་པའི་ལམ་ནས་བཤད་དུ་ཡོད་པ་དང་རྒྱུ་མཚན་གྱི་ཐོག་ནས་དཀོན་མཆོག་རྩ་ཆེན་པོ་ཟེར་བ་ཙམ་མིན་པར་དཀོན་མཆོག་རྩ་ཆེན་པོ་ཡིན་པ་རིག་པས་བསྒྲུབ་དུ་ཡོད་པར་བརྟེན། དེ་རིང་ཁ་སང་མི་ཚང་མས་རིག་པས་དཔྱད་སྐབས། དངོས་གནས་ནང་པ་སངས་རྒྱས་པའི་ཆོས་ནི་གཞན་དང་མི་འདྲ་བར་འཚམ་པོ་ཞིག་ཆགས་བསྡད་ཀྱི་ཡོད་པ་རེད། དེ་ཉམས་ལེན་བྱས་ན་ཕན་ཐོགས་འདུག་ཅེས་བརྗོད་ཀྱིན་ཡོད་སྐོར་སོགས་གསུངས་ཡོད།
རིན་པོ་ཆེ་ཁོང་ཕྱི་ཚེས་ ༡༢ ཉིན་རྣམ་གྲོལ་གླིང་དང་སེ་ར་དགོན་པར་ཆིབས་བསྒྱུར་བསྐྱངས་ཏེ། ཆོས་ཕྱོགས་ཀྱི་མཛད་པ་ཁག་མུ་མཐུད་བསྐྱངས་དང་སྐྱོང་བཞིན་ཡོད་པ་རེད།
ལྡུད་ཅིག འཐུངས་ཤིག མུ་མཐུད་དུ་གཉིད་སྨན་ལྡུད་པ་དང་འཐུང་བར་རེམ་དང་། གང་ལྟར་ང་ཚོ་ཤི་རྒྱུ་ནི་རེད། དེ་བས་གཉིད་ནས་ཤི་ན་འཇིགས་དངངས་ཡོད་ནི་མ་རེད།
འགྲོ་མགོན་ཆོས་རྒྱལ་འཕགས་པས་དགོས་དབང་གིས་ཆབ་སྲིད་རེ་ཞིག་ཟིན་རུང་ཆོས་དང་མི་མཐུན་པར་གཟིགས་ནས་དོར་བ་དེས་ཆོས་པ་ཆབ་སྲིད་ཀྱིས་གོས་ན་ཤིང་སྡོང་ཁོང་རུལ་དང་མཚུངས་པར་བསྟན། སྲོང་བཙན་སྒམ་པོའི་གདུང་བརྒྱུད་ཀྱིས་ཆབ་སྲིད་མ་ཟིན་ཤོར་བ་འདིས། ཆབ་སྲིད་པ་ཆོས་ཀྱིས་ཀྱིས་རླན་ན། ཤིང་རློན་ཕྲ་མོས་ཀ་བ་དང་གདུང་མ་བྱས་པ་དང་འདྲ་བ་བསྟན་ནོ། ལོ་རྒྱུས་ཀྱི་རྒྱབ་རྒྱང་ལ་བལྟས་ན་ཁྱེད་མིའུ་ཕྲུག་གཅིག་མི་འདྲ། མིའུ་ཆེན་པོ་ཞིག་འདྲ། ཐུགས་རྗེ་ཆེ།
སངས་རྒྱས་ཆོས་འཕེལ་ལགས། ཆོས་པ་ཆབ་སྲིད་ཀྱིས་གོས་ན་ཤིང་གདོང་ཁོང་རུལ་དང་འདྲ་ཞེས་ཤིང་ལ་ངོ་གདོང་ཡོད་པ་ཞིག་རུལ་སོང་བ་འདིའི་དཔེ་མཚོན་ཇི་ཡིན་གསལ་ཁ་མ་ངེས་ཀྱང་གང་ལྟར་ཁྱེད་ཀྱིས་བཤད་འདོད་པ་ནི་ཆོས་པས་ཆབ་སྲིད་ཀྱི་ལས་འགན་ཁུར་མི་ཆོག་པའམ་དེ་ཉིད་མི་འཇོན་པ་ཞིག་དགོས་པར་བཤད་ཀྱིན་ཡོད་པ་འདྲ། དེ་ནི་ཁྱེད་ཀྱིས་ཆབ་སྲིད་ཀྱི་གོ་བ་མ་ལེན་པའམ་དེའི་དོན་མི་ཤེས་པ་ཉིད་དུ་ངེས། དེས་ན་ངས་དཔེར་བརྗོད་ཐུང་ངུས་གསལ་བཤད་གོ་བདེ་ཞིག་བྱེད་ཆོག ཡུལ་དུས་གནས་བབ་དང་བསྟུན་ནས།། ཆོས་པ་ཆབ་སྲིད་ལ་མཁས་ན།། རང་གཞན་དོན་གཉིས་དེ་འགྲུབ་པར།། འགྲོ་མགོན་ཆོས་འཕགས་ལ་གཟིགས་དང་།། གནས་སྐབས་་མཐར་ཐུག་གི་ཆེད་དུ།། ཆབ་སྲིད་པ་ཆོས་ཀྱིས་གོས་ན།། འགྲོ་མང་ལེགས་ལམ་ལ་བསྒྱུར་བ།། སྲོང་བཙན་སྒམ་པོ་ལ་སོམས་ཤིགས།། བུ་སངས་རྒྱས་ཆོས་འཕེལ་ལ་བསྔོའོ།།
ཆོས་པ་ཆབ་སྲིད་ཀྱིས་གོས་ན། ཤིང་གདོང་ཁོང་རུལ་བ་དང་འདྲ། ཆབ་སྲིད་པ་ཆོས་ཀྱིས་རླན་ན། ཤིང་རློན་ཕྲ་མོ་གདུང་མ་བྱས་པ་དང་འདྲ། གཉིས་ཀ་ཐོན་པའི་མི་ནི་༧གོང་ས་སྐྱབ་མགོན་ཆེན་པོ་ཁོ་ནར་ངེས།
༧ས་སྐྱ་གོང་མ་རེན་པོ་མཆོག་གི་བཀའ་སློག་ནི་དངོས་གནས་གལ་ཆེ་པོ་གསུངས་འདུག་
སངས་རྒྱས་ཆོས་འཕེལ་ཟེར་བ་འདིས་བཤད་པ་ལྟར་༧་ས་སྐྱ་གོང་མ་མཆོག་ཆབ་སྲིད་ཀྱི་དྲི་མས་མ་གོས་པ་ཞིག་ཡིན་ཚེ་ང་ཚོ་བོད་པ་ཚང་ལ་ཕན་པ་མེད་ཀི། ད་ལྟའི་དུས་སུ་ང་ཚོརཆེས་དཀའ་ངལ་འཕྲད་པ་ནི་ཆབ་སྲིད་ཀྱི་གནད་དོན་རེད། དེ་ཡང་ཆོས་དང་རིག་གཞུང་དང་འབྲེལ་བའི་ཆབ་སྲིད་ཀྱི་ལངས་ཕྱོགས་ཡིན་སྟབས་བླ་ཆེན་དག་ལ་དམིགས་བསལ་གྱི་འགན་བབ་ལྡན་སྙམ། ངའི་སེམས་ནང་གི་༧ས་སྐྱ་གོང་མ་ནི་བོད་མི་རིགས་འདིའི་བསྟན་པ་ཆོས་སྲིད་ཟུང་གི་གནས་བབ་འགྱེལ་དུ་མི་བཅུག་པའི་ཀ་ཆེན་ཞིག་རེད་དྲན་གྱིན་ཡོད། དེས་ན་བུ་སངས་རྒྱས་ཆོས་འཕེལ། བསྟོད་པ་ཕལ་ཆེར་སྨད་པའི་རྒྱུ་རུ་འགྲོ།། ཞེས་པའི་ལེགས་བཤད་འདི་ཉིད་དྲན་པ་གྱིས་ཤིགས
སྐྱབས་སུ་འགྲོ། དངོས་གནས་ཡག་པོ་འདུག ༸གོང་ས་སྐྱབས་མགོན་རྒྱལ་བའི་དབང་པོ་གཅིག་པུ་ཙམ་མ་ཡིན་པར་བླ་ཆེན་མི་ཆེན་ཚང་མས་ཆར་བ་གྲུབ་འདེགས་བྱེད་རྒྱུ་ཤིན་ཏུ་གལ་ཆེ་སྙམ།
སྐུ་ཚེ་ཡུན་དུ་གནས་པའི་སྨོན་འདུན་ཞུ།
བསྐལ་བ་བཟང་བོའི་དུས་ཀྱི་སློབ་བུ་ཟེར་ན་འདྲ། སྔོན་བསགས་ལས་སྔོན་གྱི་འཐུ་ཟེར་ན་ཆོག ས་སྐྱ་བདག་ཁྲི་ཚང་གི་བཀའ་ཆོས་དེ་དག་སེམས་རྒྱུད་དུ་བཞག་ནས་རང་རེ་གངས་ཅན་བོད་པ་ཚང་གི་སྐྱེ་ཆེན་དམ་པ་འདི་དག་གི་བཀའ་དྲིན་ལ་བསམ་ཤེས་རེ་བྱེད་ཐུབ་པ་ཡིན་ན་དངོས་ནས་བོད་མི་རིགས་ཀྱི་བུ་རབས་ཚ་བརྒྱུད་དག་ཡར་ཐོན་ཁྱད་པར་བ་ཞིག་ཡོང་ངེས་ཡིན།
༧སྐྱབས་མགོན་གོང་མ་རིན་པོ་ཆེ་ནི། དངོས་ནས་ཆབ་སྲིད་ཀྱི་དྲི་མས་མ་གོས། དམ་ཚིག་པད་མོའི་སྦུག་ལྟར་གཙང་ཞིང་། བོད་དུ་དར་བའི་སྒྲུབ་བརྒྱུད་ཤིང་རྟ་ཆེ་བརྒྱད་ཀྱི་གདམས་ཟབ་མ་ལུས་པའི་མཛོད་གཅིག་པུར་གྱུར་ཞིང་། འཇིག་རྟེན་ཆོས་བརྒྱད་ཀྱི་བྱ་བ་གཞི་མདོའི་རྩ་བཞིན་དོར། མདོ་སྔགས་གཉིས་ནས་དགེ་བའི་བཤེས་གཉེན་དང་། རྡོ་རྗེ་སློབ་དཔོན་གྱི་མཚན་ཉིད་གསུངས་པ་མ་ལུས་པ་མངའ་བའི་སྐྱེས་ཆེན་དམ་པ་ཞིག་ཏུ་མངོན་པས། ཆོས་འབྲེལ་ཐོབ་བ་རྣམས་མ་ཟད་ཞལ་མཇལ་གསུང་ཐོས་ཙམ་གྱིས་མི་ལུས་དོན་ལྡན་དུ་འགྱུར་བ་གདོན་མི་ཟ། དེས་ན་སློབ་ཕྲུག་འདི་རྣམས་དང་། ལྷོ་ཕྱོགས་དུ་མཆིས་པའི་སྐྱ་སེར་རྣམས་ལ་ད་ལེན་སྐལ་བ་ལྡན་ནོ་ཞེས་ངག་ནས་རང་དབང་མེད་པར་ཤོར་སོང་།
དཔལ་ས་སྐྱ་གོང་མ་རིན་པོ་ཆེ་མཆོག་ནས་གསུངས་པ་ལྟར་ང་ཚོའི་གཞོན་སྐྱེས་ཚོས་ངེས་པར་དུ་ནང་ཆོས་ཀྱིས་གཙོས་པའི་གནའ་བོའི་ཤེས་རིགས་དག་ལ་སློབ་སྦྱོང་མང་ཙམ་བྱེད་ཐུབ་ན་དངོས་གནས་ཕན་ཐོགས་ཆེན་པོ་ཞིག་འབྱུང་བར་གདོན་མི་ཟ།
དེ་ཙམ་མ་ཟད་དེང་རབས་ཚན་རིག་གི་ཤེས་བྱར་ངེས་པར་དུའང་སློབ་གཉེར་དཔྱིས་ཕྱིན་པ་ཞིག་བྱེད་དགོས་པའི་དུས་ཚོད་གཅིག་རེད་འདུག
ཟླ་བ་གཉིས་རེའི་མཚམས་ཉིན་གཅིག་གམ་གཉིས་ཙམ་རིང་གཅིག་པུར་ཞུ་གི་ཡོད།
ང་ཚོའི་བླ་ཆེན་རྣམ་པ་ཚོས་མཛད་པ་འདི་ལྟར་སྐྱོང་གནང་ན་དངོས་གནས་དག་ེམཚན་འདུག རང་རིགས་ན་གཞོན་རྣམས་ལ་ནང་ཆོས་ངོ་སྤྲོད་བྱ་རྒྱུ་འདི་ད་ལྟ་དང་མ་འོངས་གང་དུ་བསམ་ཀྱང་ཧ་ཅང་གལ་ཆེན་པོ་འདུག དེ་མིན་ང་ཚོའི་རིག་གཞུང་ཡོད་ཚད་ཕྱི་མིར་བསླབ་པ་དང་སྤེལ་བ་ལས་ནང་ཁོངས་སུ་སྣང་ཆུང་དུ་སོང་ཚེ་ང་ཚོའི་མི་རབས་རྗེས་མ་ཚོ་ཕྱི་མིའི་ལག་འོག་ནས་རང་གི་རིག་གཞུང་སློབ་སྦྱོང་བྱ་དགོས་པའི་དུས་ལ་བབས་ཉེན་འདུག བླ་མ་སྐྱེས་ཆེན་ཁོང་ལྟ་བུར་༸གོང་ས་མཆོག་གི་གཡས་གཞོགས་གཡོན་འདེགས་གནང་སྟེ་གདན་ས་ཁག་གི་དགེ་བཤེས་ཁག་དང་བཅས་ཚང་མས་ང་ཚོའི་མ་འོངས་པའི་ན་གཞོན་ཚོར་འདི་ལྟར་སློབ་འཁྲིད་གནང་ཐུབ་ན་ཡག་པོ་འདུག་ལ། ད་དུང་རང་ཉིད་ཀྱི་བསམ་ཚུལ་དུ་སྦེང་ལོར་དང་། ལྡི་ལི། ཅན་རྡི་སྒར་སོགས་བོད་རིགས་མཐོ་སློབ་ཀྱི་སློབ་ཕྲུག་གནས་སྡོད་བྱ་ཡུལ་ཁག་ཏུ་ཉིན་གྲངས་གཉིས་ཙམ་ལས་མ་བྱུང་ཡང་ཟླ་བ་གཉིས་རེའི་མཚམས་འབྲེལ་ཡོད་ཁག་ཅིག་ནས་ཐུགས་འགན་བཞེས་ཏེ་ནང་ ཆོས་སློབ་འཁྲིད་ཀྱི་ལས་གཞི་ཞིག་སྤེལ་ཚེ་ཏན་ཏན་སློབ་གཉེར་བརྒྱབ་རིང་ཙམ་མ་ཡིན་པར་འཕྲལ་ཕུགས་གཉིས་ཀར་དགེ་ཕན་ཆེན་པོ་ཡོང་རྒྱུར་གདོན་མི་ཟ།