（རྭ་རྒྱ）མགར་རྩེ་བཀྲ་ཤིས་བཟང་བོ།
གཤམ་དུ་བཀོད་པའི་༼ རང་བྱུང་ཁོར་ཡིག་དང་ང་ཚོའི་བར་ཐག་གླེང་བ ༽ ཞེས་པའི་བོད་འབྱོར་རྩོམ་ཡིག་འདི་ནི། ད་ལོའི་སྤྱི་ཟླ་གསུམ་པའི་ནང་མགོ་ལོག་རྭ་རྒྱ་དགོན་པར་དོན་རྐྱེན་བྱུང་སྐབས། རྒྱ་གཞུང་གི་གཉའ་གནོན་དང་བརྙས་བཅོས་འཁུར་མ་འདོད་པར་རྨ་ཆུར་མཆོངས་ཏེ། རང་ཤི་བརྒྱབས་ཟིན་པའི་སྐུ་གཤེགས་དམ་པ་དགེ་འདུན་པ་བཀྲ་ཤིས་བཟང་པོ་ལགས་ཀྱིས་སྤྱི་ལོ་ ༢༠༠༨ ལོའི་ཟླ་ ༦ ཚེས་ ༥ ཉིན་གྱི་འཛམ་གླིང་ཁོར་ཡུག་ཉིན་མོ་དང་བསྟུན་ཏེ་བརྩམས་པ་ཞིག་ཡིན་འདུག་ལ། དེ་རིང་སྔ་དྲོ་རྭ་རྒྱ་བློ་དབང་ལགས་ཀྱིས་གསར་རྙེད་བྱུང་བའི་འདས་པོ་བཀྲ་ཤིས་བཟང་པོའི་སྐུ་པར་ཞིག་དང་ལྷན་དུ་འདི་ག་གསར་ཁང་ལ་མཁོ་སྤྲོད་བྱས།
མདོ་དབུས་མཐོ་སྒང་ནི་འཛམ་གླིང་རང་བྱུང་ཁོར་ཡུག་གི་གཙུག་རྒྱན་དམ་པ་དང་གླང་ཆེན་ཨེ་ཤ་ཡའི་ལྷོ་རྒྱུད་ན་མངོན་པར་མཛེས་པའི་གཞིས་ཁྱིམ་ཡིན། གནས་དེའི་དགེ་མཚན་ནི་རྣམ་པར་བཀྲ་ཞིང་རྨད་དུ་བྱུང་ལ་ {བཀའ་གདམས་གླེགས་བམ} ལས། ཤར་རྡོ་རྗེ་གདན་གྱི་ལྷོ་ཕྱོགས་ན། གནས་པུར་རྒྱལ་བོད་ཀྱི་རྒྱལ་ཁམས་ཡོད། རི་མཐོན་པོ་གནམ་གྱི་ཀ་བ་ཡོད། མཚོ་དམའ་མོ་གཡུ་ཡི་མན་དྲལ་ཡོད། གངས་དཀར་པོ་ཤེལ་གྱི་མཆོད་རྟེན་ཡོད། སྤང་སེར་བོ་གསེར་གྱི་ལྷུན་པོ་ཡོད། དྲི་ཞིམ་པོ་སྨན་གྱི་བདུག་སྤོས་ཡོད། སྟོན་བཀྲ་བ་གསེར་གྱི་མེ་ཏོག་ཡོད། དབྱར་བཀྲ་བ་གཡུ་ཡི་མེ་ཏོག་ཡོད། ཅེས་དང༌། { ཏུན་ཧུང་གཏེར་ཡིག} ལསཀྱང༌། གནམ་ཀྱི་དབུས། སའི་ནི་དཀྱིལ། གླིང་ནི་སྙིང་བོ། གངས་ཀྱི་ནི་ར་བ། ཆུ་བོ་ཀུན་གྱི་མགོ་བོ། རི་མཐོ། ས་གཙང༌། ཡུལ་བཟང༌། མི་མཛངས་ཤིང་དཔའ་རུ་སྐྱེས། ཆོས་བཟང་དུ་བྱེད། རྟ་མགྱོགས་སུ་འཕེལ་བའི་གནས། ཞེས་བསྔགས་ཡུལ་དུ་གྱུར་བའི་གནས་མཆོག་འདི་ནི་འཇིག་རྟེན་གྱི་དག་ཞིང་གཅིག་པུར་གྱུར་ཡོད། གནས་དེར་འཚར་ལོང་བྱུང་བའི་བོད་པ་དག་ནི་ཡ་རབས་ཚུལ་མཐུན་དང་ལོ་རྒྱུས་གྱི་ཆུ་རྒྱུན་རིང་བའི་གནའ་བོའི་མི་རིགས་ཤིག་ཡིན་ལ༌། ཟུངས་ཁྲག་གི་བཞུར་རྒྱུན་གངས་ཁྲོད་ནས་ཡལ་མ་མྱོང་ཞིང་རིག་གནས་ཀྱི་མ་ལག་ཆ་ཚང་བའི་རྒྱལ་ཁམས་ཤིག་ཀྱང་ཡིན།
དེའི་ཕྱིར་མི་རྣམས་རང་བཞིན་གྱིས་རང་བྱུང་ཁོར་ཡུག་གི་མཛེས་ལྗོངས་ལ་དགའ་ཞེན་ནམ་མོས་པ་བྱེད་པའི་གོམས་གཤིས་དེ་མིའི་སེམས་ཁམས་ལ་རྒྱུན་འབྱམས་སུ་སོང་བའི་བག་ཆགས་ཟབ་མོ་ཞིག་ཀྱང་ཡོད་དེ། ཅིའི་ཕྱིར་ཞེ་ན། （པད་མ་བཀའ་ཐང）ལས། ང་ནི་གླུ་ཡི་རྒྱལ་བོ་ཕྲེང་འཛིན་གྱི། གཅུང་བོ་ཀླུ་རྒྱལ་གཙུག་ན་རིན་ཆེན་ཡིན། བོད་ཀྱི་རི་ཆེན་བཞི་དང་མཚོ་ཆེན་བཞི། གནམ་སའི་བདག་པོ་ང་ཡིན་གཞན་དུ་མིན། ཞེས་དང་ནམ་མཁའ་ལ་བྱ་རྒྱ། ཆུ་བོ་ལ་ཉ་རྒྱ། བར་སྣང་ལ་རླུང་རྒྱ། ས་གཞི་སྔོགས་རྒྱ། རི་ལུང་དུ་རྔོན་རྒྱ། ནགས་ཚལ་དུ་ཤིང་རྒྱ་སོགས་ནི་བོད་མི་ཡོངས་ཀྱི་གཟི་བརྗིད་དུ་ངོམ་ནས་གནས་རི་དང་བླ་རི་སོགས་གང་བྱུང་དུ་རི་དྭགས་མི་རྔོན་པ། རྩི་ཤིང་གཅོད་འབྲེག་དང་ས་རྐོ་རྡོ་སློག་མི་བྱེད་ལ། རང་བྱུང་ཆུ་མིག་དང་དྭངས་གཙང་ཆུ་བོ་གང་ཡིན་ལ་རྫས་ངན་མི་འདོར་བ་དང་། དམར་ཟས་དང་སློག་ཧྲིལ་སོགས་སྦགས་བཙོག་ཏུ་བྱས་ཚེ། ལྷ་ཀླུའི་གནོད་པ་འབྱུང་ཞིང་རྨ་སྐྲང་ཞ་འཁུམ་གྱི་ནད་རིགས་དང༌། བཀྲ་མི་ཤིས་པའི་རྟགས་མཚན་སྣ་ཚོགས་འབྱུང་བར་གོ་ནས་འཛེམ་དོགས་བྱས་ཏེ། སྐྱེ་དངོས་དོ་མཉམ་པར་བརྩོན་ལེན་བྱེད་ལ། དེ་ནི་བདག་རྐྱེན་གཞན་སྨོན་གྱི་མཐུན་སྦྱོར་དུ་བགྲངས་ནས་ཕྱི་ནང་གི་བདེ་སྐྱིད་མ་ལུས་པ་རང་བྱུང་ཁམས་ཆེན་པོའི་འབྱུང་ཁམས་དོ་སྙོམས་ལ་འབྲེལ་བ་དམ་ཟབ་ཡོད་ལ། ང་ཚོ་དང་འབྲལ་ཐབས་ཡེ་ནས་མེད་པ་ཞིག་ཡིན་པར་མང་དུ་བཤད་ཅིང༌། བོད་ཀྱི་གསོ་རིག་བྱེད་པོ་གཡུ་ཐོག་ཡོན་ཏན་མགོན་པོའི་（མན་ངག་རྒྱུད་）ལས། འགྲོ་བའི་ལུས་འདི་འབྱུང་བ་བཞི་ལས་གྲུབ། གསོ་བྱའི་ནད་ཀྱང་འབྱུང་བ་བཞི་ལས་བསྐྱེད། གཉེན་པོའི་སྨན་ཡང་འབྱུང་བཞིའི་ངོ་བོ་ཉིད། ལུས་ཅན་གཉེན་པོ་བདག་ཉིད་གཅིག་པུར་འབྲེལ། ཞེས་དང༌། ཡང་འགོས་ནད་གདུག་པ་ཅན་ཕལ་ཆེར་ནི་འབྱུང་ཁམས་གཏོར་སྐྱོན་དང་སྦགས་བཙོག་ལས་བྱུང་བ་ཡིན་ཏེ། དེ་ཉིད་ལས། ས་གཉན་སློག་ནས་སྤང་ཐང་ཞང་དུ་འདྲུད། ཆུ་གཉན་དཀྲུགས་ནས་ནེའུ་གསེང་རྫིང་དུ་བསྐྱིལ། ཤིང་གཉན་གཅོད་ཅིང་རྡོ་གཉན་རྩ་བ་འདེགས། མི་གཙང་འཐབ་གཞོབ་ཤན་་དམར་འཇོག་ཉོག་སྤྱོད། བསྐལ་བའི་ཆ་ཉམས་འབྱུང་བའི་བཅུད་ཤོར་བའི། མི་རྣམས་ཟ་ཐིང་བྲི་ནས་དབུལ་བོར་འགྱུར་ཞེས་ཁོར་ཡུག་དང་ང་ཚོའི་བར་ཐག་ནི་ཆེས་ཆེར་ཉེ་ཞིང་དེ་ལ་བདག་ལས་གཞན་གཅེས་དང༌། ལྟ་སྤྱོད་གཙང་མའི་འཚེ་མེད་ཞི་བདེར་གནས་དགོས་པའི་གོམས་གཤིས་དེ་ང་ཚོ་ཕྱི་རབས་པའི་སེམས་ཀྱི་བདེ་སྐྱིད་དུ་བསྐྲུན་ཡང༌། ད་ཆར་མིའི་རིགས་དག་གིས་ཁོར་ཡུག་འདིའི་དགེ་མཚན་དང་རིང་རུ་གྱེས་དེ་མི་རབས་གཅིག་གི་ལོངས་སྤྱོད་ཁོ་ནར་སྤྱད་ནས་རང་རང་གི་ཁེ་ཕོག་རྐྱང་རྐྱང་ལ་མགོ་འཐོམ་པ་འདི་རང་བྱུང་ཁོར་ཡུག་དང་ང་ཚོའི་བར་ཐག་ལ་ཇི་འདྲའི་སྐྱི་གཡའ་ཞིང་འཇིགས་ཡེར་བ་ཞིག་བསྐྱེད་དང་སྐྱེལ་བཞིན་པས་བློ་ལྡན་སུ་ཞིག་ཐུགས་མི་སྐྱོ་ཨང༌། དེ་ལས་ཀྱང་བརྡ་འཕྲིན་ཚན་རྩལ་གྱིས་ཁོར་ཡུག་སྦགས་པའི་དུས་རབས་གཉིས་ཀྱི་དཀྱོགས་མཚམས་སུ་ཡུལ་གྲུ་ཀུན་ནའགྲན་རྩོད་དང་ཆགས་སྲེད་ཀྱིས་རབ་ཏུ་མྱོས་ཏེ་རི་བོའི་ཁུངས་བྲུས། གཙང་གསུམ་མགོ་སློག བརྟན་ཅིང་བརླིང་བའི་རི་བྲག་རྨང་ནས་བཤིགས། རི་སྐྱེས་སྲོག་ཆགས་ཤུལ་མེད་བཏང་བ་དག་གི་དབང་གིས་རང་བྱུང་ཁོར་ཡུག་གིས་གྱེས་བརྡ་བཏང་སྟེ་ཆར་ཆུ་དུས་སུ་མི་འབབས་པ། ལོ་ཕྱུག་རྟག་ཏུ་མི་ལེགས་པ། སྤང་ལྗོངས་བྱེ་ཐང་དུ་གྱུར། ཆུ་བོ་གྲམ་ཐང་དུ་གྱུར། རྨ་རྒྱལ་གངས་ཀྱི་རི་བོ་གངས་ཉིལ་བྱུང་བ། རྨ་ཆུའི་སྟོད་རྒྱུད་ནས་ཉིན་བཅུ་དྲུག་ལ་ཆུ་རྒྱུན་ཆད་པ་སོགས་དུས་བཞི་གོ་ལྡོག་པའི་རྟགས་མཚན་འདིས་མཚོན།
འུ་ཅག་ལ་ལྟས་ངན་གྱི་སྣ་འདྲེན་བསྟུད་མར་འོང་བཞིན་པ་སྨད་དུ་རྒྱ་མཚོ་འཕྱུར་ཚད་དང་འབྱུང་ཁམས་འཁྲུགས་པའི་འཇིགས་སྐུལ་བཏང་ཚུལ་བློ་ཡུལ་ལས་འདས་མོད། ༢༠༠༧ ལོའི་ལོ་མཇུག་དང ་༢༠༠༨ལོའི་ལོ་མགོར་ཀྲུང་གོའི་ཞིང་ལྗོངས་ཁ་ཤས་ཏེ་དབྱར་དགུན་དོ་སྙོམས་ཀྱི་ས་ཆར་ཁ་བ་བསྟུད་མར་བབས་རྐྱེན་མི་རྒྱུ་གཉིས་ཀར་འཇིགས་སྣང་དང་གྱོང་གུད་ཆེན་པོ་བྱུང་བ་གསར་འགྱུར་དང་བརྡ་འཕྲིན་གང་དུའང་གསལ་བསྒྲགས་བྱས་པ་འདི་བརྒྱུད་དེ། མཐར་འུ་ཅག་ལ་ཡང་ངེས་ཟིན་ཅུང་ཙམ་རེ་ཐེབས་ཨེ་ཡོད་སྙམ་ལ། གནས་ཚུལ་འདི་དག་གི་འོག་བདག་ལའང་སུན་འབྱིན་གྱི་རྣམ་པ་གློ་བར་བ་ཞིག་སྐྱེ་པ་ནི་གཙང་གསུམ་མགོ་ཁུངས་གཙོ་བྱས་པའི་མཐོ་སྒང་གི་ཡུལ་གྲུ་ཀུན་ན་འཕྱུར་བའི་འཇིགས་རུང་གི་རྣམ་པ་དེ་མིག་ལམ་དུ་བསྟར་ཡོང་ལ། དེ་ནི་གཏེར་ཁ་སྔོག་འདོན་དང་ནུབ་ཕྱོགས་གསར་བརྗེ་དེ་རེད། ཛ་དྲག་ཆེ་བའི་འཕོ་འགྱུར་འདིས་བོད་པ་ཚོ་གནས་སྐབས་ཀྱི་ཁེ་ཕོགས་ཙམ་ལ་འཁོར་ན་ཚེ་སྲོག་གི་རིན་ཐང་མ་ལུས་པ་རྩིས་མེད་དུ་བཏང་བའི་མཇུག་འབྲས་ཚ་ཡེར་བ་དེ་འབྱུང་བར་ཐེ་ཚོམ་མེད་དོ།།
ཀྱེ་ཀྱེ་རིགས་མཐུན་ཚོ། ངས་འདི་ལྟར་ཆོ་ངེ་དང་སྨྲེ་ངག་འདོན་དོན་ནི། བོད་གངས་ཅན་གྱི་ཁྱད་ནོར་སྟེ། ལོ་ངོ་ཁྲི་ཕྲག་མང་བོའི་བཞུད་ལམ་རིང་བའི་བོད་པ་ཚང་གི་ཕ་མེས་ཡང་མེས་ནས་ང་ཚོ་ལ་བརྒྱུད་སྤྲོད་བྱས་པའི་འཚོ་གནས་ཆེན་པོ་སྟེ། རི་མཐོ་ས་གཙང་གི་ཕ་ས་འུ་ཅག་གི་དུས་འདིར་ནོར་བུའི་ནོར་ངོ་མ་ཟིན་པར་ཁོང་སྟོང་དུ་གྱུར་ན་འུ་ཚོའི་བུ་རབས་ཚ་རྒྱུད་ཀྱི་འཚོ་སྡོད་ཙམ་གང་ནས་བྱེད། འདི་ལྟར་ལྷ་སྒྲུང་དུ་གྱུར་ནའང་ཕངས་སེམས་དང་འགྱོད་གདུང་མེད་པའི་སྐྱེས་བོ་དག ང་ཚོའི་རང་སྣང་གང་ཤར་གྱི་བྱ་སྤྱོད་འདི་དག་གི་ཉམས་ཉེས་ལ་ཞུགས་ཚེ། རྗེས་རབས་པ་ཚོར་ཇི་ལྟར་འཚོ་གནས་ཀྱི་ཁྱིམ་གཞི་ཞིག་རྩིས་སྤྲོད་བྱ། ཀྱེ་མ་ཀྱེ་ཧུད། སྐྱི་གཡའ་བའི་མཇུག་འབྲས་དེ་ཇི་འདྲའི་ལྕི་ཞིང་སྙིང་དུ་མི་གཟན་ནམ། བོད་པའི་གཏམ་དཔེར་ཡང༌། ཡ་ཐོད་ན་མིག་དང་ཡ་ཆུང་ན་སེམས་ཤིག་ཡོད་ན། འུ་ཅག་གི་བྱས་ཉེས་ལ་བསམ་གཞིགས་ཤིག་གཏོང་རོགས་དང༌། ང་ཚོ་འཚོ་སྡོད་བྱེད་སའི་ས་སྒང་རིལ་མོ་འདིའི་ཁོར་ཡུག་ལ་འདི་ལྟར་རྨ་ཁ་གཏོས་ཆེ་བ་ཞིག་བཟོས་རྐྱེན། ཡ་ང་ཞིང་འཇིགས་རུང་གི་མྱ་ངན་ཐང་ཞིག་ཏུ་འགྱུར་བར་ཐག་མི་རིང་བ་ངས་མགྲིན་པ་གཟེངས་སུ་བཏེགས་ཏེ་བརྗོད་ཐུབ་ལ། རང་བྱས་ངན་པའི་རྣམ་སྨིན་རང་གཞན་ཀུན་གྱིས་མྱོང་བ་ནི་བཤོལ་དུ་མེད་པ་ཞིག་ཡིན། བོད་ཀྱི་གཏམ་དཔེ་ལྟར། ལྷོ་འཛམ་བུ་གླིང་གི་ས་ཆ་ན། ལས་སྔ་དྲོ་བྱས་ན་ཕྱི་དྲོ་སྨིན་ཞེས་དང༌། ཡང་བསམ་སྦྱོར་གཞན་ལ་རྩུབ་པས་ན།། རྣམ་སྨིན་རང་ལ་འཁོར་ནས་ཡོང་།། ཞེས་ཀྱང་གདམས་ངག་མང་དུ་གནང་བ་འདི་ལ་ཅི་འདྲའི་དོན་སྙིང་ཡོད་པ་ལ་འང༌། འོན་ཏེ་སློབ་སྟོན་འདི་དག་ལས་འུ་ཚོར་དངོས་གནས་བློ་སྒོ་ཞིག་ཕྱེས་ཡོད་དེ། རྒྱུན་དུ་མིའི་རིགས་ཀྱིས་ཤེས་ཚོར་མེད་པར་རང་བྱུང་ཁམས་ཀྱི་སྐྱེ་དངོས་དོ་སྙོམས་ལ་གཏོར་བཤིགས་བཏང་བས། བསམ་ཡུལ་ལས་འདས་བའི་མཇུག་འབྲས་ཐོབ་པར་ངེས་ཞེས་ཐ་ཚིག་བསྒྲགས་ཡོད་ལ། ང་ཚོའི་འཚོ་གནས་ཀྱི་འཁོར་ཡུག་འདིའི་ནང་ཁོར་ཡུག་ནི་མི་རིགས་ཀྱི་འཚོ་གནས་དང་འཕེལ་རྒྱས་ལ་ཤུགས་རྐྱེན་བཟོ་བའི་རང་བྱུང་རྣམ་གྲངས་དང༌། མིས་བཟོས་བསྒྱུར་བཅོས་བྱས་རྗེས་ཀྱི་རང་བྱུང་རྒྱུ་རྐྱེན་སྤྱི་ཁོག་ཅིག་ཡིན་ཞིང༌། དེའི་ནང་རླུང་ཁམས་ཆེན་པོ་དང་ཆུ། རྒྱ་མཚོ༌། ས་ཞིང༌། གཏེར་ཁུངས། ནགས་ཚལ། རྩྭ་ཐང༌། གདོད་མའི་སྐྱེ་དངོས། རང་བྱུང་རྗེས་ཤུལ། སྤྱི་ཚོགས་རྗེས་ཤུལ། རང་བྱུང་སྲུང་སྐྱོབ་ཁུལ། (གྲགས་ཅན་ཡུལ་ལྗོངས་ཁུལ་ལ་ཟེར) ཞེས་དོན་མཐུན་གྱི་གནས་ལུགས་ཤིག་ང་ཚོའི་རྒྱབ་རྩར་དཔྱངས་ཡོད་ལ། ང་ཚོས་ཀྱང་ཐེག་ཐེག་ཀླད་པའི་གཙུག་དང་མི་ཐེག་ཕྲག་པའི་ཁེས་སུ་ཐེག་དགོས་ཏེ། མཚོ་སྔོན་ཞིང་ཆེན་མི་དམངས་སྲིད་གཞུང་གི་ཞིང་ཆེན་ཡོངས་ནས་གསེར་ཕྱེ་སོགས་སྔོག་འདོན་བྱེད་མི་ཆོག་པའི་སྐོར་གྱི་བརྡ་ཐོ་དོན་ཚན་བདུན་གྱི་ནང་ཚན་དུ་བཀག་རྒྱ་དམ་པོ་བཞག་ཡོད་པ་ནི་འུ་ཅག་ཀུན་གྱི་འཚོ་བའི་མེ་ལོང་དུ་བསྐྲུན་ཡོད་ལ། རང་བྱུང་ཁོར་ཡུག་གི་སྐྱེ་དངོས་དོ་སྙོམས་ལ་གཏོར་སྐྱོན་བཏང་རྗེས་བསྐྱར་དུ་སླར་གསོ་བྱ་རྒྱུ་ཧ་ཅང་དཀའ་ཞེས་ཚན་རིག་པའི་ཀྱང་། ཞིབ་འཇུག་མཐའ་འཁྱོལ་བ་བྱས་པའི་འབྲས་རྟགས་སོ། གནད་དོན་འདི་དག་ལ་ཚ་འདྲི་ཞིག་བྱས་ཚེ་མིག་ཅན་བརྒྱ་ཡིས་བལྟ་མི་ཕོད་ཅིང༌། ཡུལ་ཅན་བརྒྱ་ཡིས་བསམ་ཕོད་མེད་པ། ལྕེ་ཅན་བརྒྱ་ཡིས་གླེང་ཕོད་མེད་པའི་ཉེན་ཁར་བཅར་བའི་གནས་སུ་གྱུར་ཡོད་པ་རེད། དེ་བས་རང་སེམས་ལ་སྐོར་བ་ཞིག་དང་རང་ལུས་ལ་མདུད་པ་ཞིག་རྒྱོབ་དང་འདི་ནི་ང་ཚོ་ཐུན་མོང་གིས་ངེས་པར་སྲུང་དགོས་པའི་གནད་དམ་པ་ཞིག་ཏུ་འཁུམས་སོ།
མཇུག་མཐར་བྱང་ཕྱོགས་གངས་རིའི་ཞིང་ཁམས་ཀྱི་ཕྱི་སྣོད་ཀྱི་འཇིག་རྟེན་དང་ནང་བཅུད་ཀྱི་སེམས་ཅན་མ་ལུས་པར་འཚེ་མེད་ལམ་གྱི་འོད་སྣང་འཕྲོས་ཏེ། སླར་ཡང་འཇིག་རྟེན་གྱི་དཔྱིད་དཔལ་གཙང་མ་བསུ་ཐུབ་པར་རེ་སྨོན་ཁྲི་ཕྲག་ཀློང་ཡངས་ནས་བོད་ས་བྱི་ལོའི་འཛམ་གླིང་རང་བྱུང་ཁོར་ཡུག་སྲུང་སྐྱོབ་ཀྱི་ཉིན་མོ་སྟེ། ཟླ ༦ པའི་ཚེས ༥ གཞིས་འཛོམས་ཉིན་མའི་གླིང་དུ་རིགས་མཐུན་ཁྱུ་ཚོགས་ལ་མོས་པའི་གླེང་བརྗོད་འདི་འབྲི་ཁུལ་བྱས་སོ།།
འཇིག་རྟེན་བདེ་ཞིང་ལོ་ལེགས་དང༌།། འབྲུ་རྣམས་འཕེལ་ཞིང་ཆོས་འཕེལ་དང༌།།
བདེ་ལེགས་ཕུན་སུམ་ཚོགས་པ་དང༌།། ཡིད་ལ་འདོད་པ་ཀུན་འགྲུབ་ཤོག།
མཐོ་སྒང་ན་འགུལ་གྱིན་པའི་ལོ་རྒྱུས་གསོན་པོ་འདིས་ཁྱེད་དང་ཁྱེད་ཅག་གཏན་ནས་བརྗེད་མི་སྲིད།
ཨོྃ་མ་ཎི་པདྨེ་ཧཱུཾ།
འདི་ནི་ངས་ཁྱེད་དང་ཁྱེད་ཅག་ལ་ཕུལ་བའི་སྨོན་ལམ་ཡིན།
རྒྱ་གྲོ་བ་ལགས། ཁོང་ནི་བོད་མི་རིགས་ཀྱི་ཆེད་དུ་གཤེགས་ཟིན་པའི་དབའ་བོ་ཞིག་ཡིན་པ་ཉིད་ཀྱིས་མ་ཤེས་པ་འདྲ།
དཔའ་བོ་བཀྲིས་བཟང་པོ་ལགས་ཀྱི་དུང་སེམས་འདི་ལྟར་མངོན་པར་དངོས་གནས་སེམས་སུ་འཆུད་མ་ཐུབ་པའི་ཕངས་སེམས་ཤིག་སྐྱེས། ཁྱེད་ནི་དངོས་གནས་བོད་མི་རིགས་རིག་གཞུང་ཙམ་མ་ཟད་ད་དུང་ཡང་བོད་ཀྱི་ཡུལ་ལྗོངས་ཀྱི་ཁོར་ཡུག་ལ་ཐུགས་འཁུར་ཆེ་ཞེས་གནང་མཁན་ཞིག་ཡིན་པར་གུས་ནས་དེ་རིང་ཧ་གོ་བར་ཁྱེད་ལ་དེ་བས་ཀྱང་སེམས་གཏིང་ནས་ཆེ་བསྟོད་ཞུ། ཁྱེད་གང་དུ་གནས་ཀྱང་མུ་མཐུད་དུངས་སེམས་ཆེ་ཆེར་ངང་གནས་པར་གནང་རོགས།་
བཀྲ་བའི་སེམས་གཤིས་དྭངས་མོའི་སྟོབས་ཤུགས་དེས།།
ཤིས་ཚིག་བོད་དུ་བསྟར་ནས་ཕེབས་རྗེས་སུ།།
བཟང་ངན་དབྱེ་ཐག་ཀུན་ལ་བསྒྲགས་པ་ནི།།
པོ་ཏི་ཁྲི་སྟོང་བརྩམས་ལས་གཟི་བརྗིད་ཆེ།།
འདི་ལྟར་ཁོང་དང་ཁོང་གི་བརྩམས་ཆོས་དག་རིག་ན་ཡ་ཆུང་ཁོག་ལ་ཟུག་གཟེར་ཞིག་གིས་གཅུན་གིན་འདུག འདས་པོ་ཁོང་ལ་ང་ཚོའི་སེམས་གཏིང་ནས་རྗེས་དྲན་བྱེད་དགོས།