དེ་རིང་གི་རྒྱ་གར་གསར་ཤོག་ཐོག་བོད་མི་ཚོར་ཕག་ནད་འགོག་པའི་ཐབས་ལམ་རྙེད་འདུག་ཀྱང་ རྒྱ་གར་ཡུལ་མིར་མཉམ་སྤྱོད་བྱེད་ཀྱི་མི་འདུག་ཟེར།
ཕྱི་ཚེས་ ༢༡ ཉིན་གྱི་རྒྱ་གར་དུས་བབ་གསར་ཤོག་ཐོག་གནས་ཚུལ་སྤེལ་བ་ལྟར་ན་སྦེལ་ཀོབ་གཞིས་ཆགས་ཀྱི་བོད་མི་ཚོས་ H1N1 ཕག་ནད་འགོག་པའི་ཐབས་ལམ་གསར་བ་ཞིག་རྙེད་ཡོད་པ་དང་། དེ་ནི་བོད་མི་ཚོས་རས་ནག་པོའི་ནང་བཏུམས་པའི་སྨན་རིལ་ཞིག་ལ་སྐུད་པ་བཏགས་ཏེ། རང་གི་སྐེར་བཏགས་ཡོད་ཅིང་། སྨན་རིལ་དེར་ཉིན་རེར་ཐེངས་གསུམ་རེར་སྣུམ་ཚེ་ནད་འབུ་འགོག་ཐུབ་པའི་ཡིད་ཆེས་བྱེད་ཀྱིན་ཡོད་འདུག་ལ། རིལ་བུ་དེ་ཆུ་ལ་སྦངས་ཉན་རྒྱུ་མ་རེད་ཟེར། དེ་བཞིན་སྦེལ་ཀོབ་ཀྱི་གཞིས་མགོ་དགྲ་འདུལ་ལགས་ཀྱིས། སྨན་དེ་ནི་གཞིས་གྲོང་དུ་ཡོད་པའི་སྨན་རྩིས་ཁང་དུའང་མང་བོ་བཙོང་རྒྱུ་ཡོད་པ་ལས། གྲྭ་པ་དང་གནས་སྡོད་བོད་མི་རྣམས་ཀྱིས་སྨན་རིལ་བུ་དེ་བཏགས་ན་ཕག་པའི་རིམ་ནད་དེར་ཁོང་ཚོར་འགོས་མི་ཐུབ་པར་ཡིད་ཆེས་བྱེད་ཀྱིན་ཡོད་མོད། སྨན་དེ་མཁོ་འདོན་བྱེད་ཡུལ་ནི་བོད་མི་ཁོ་ན་ཡིན་པ་ལས་རྒྱ་གར་ཡུལ་མི་དང་མཉམ་སྤྱོད་བྱེད་མི་ཉན་པར་བརྗོད་ཡོད་སྐོར་གནས་ཚུལ་སྤེལ་ཡོད། 
