བོད་ཀྱི་རིག་གཞུང་འགྲེམས་སྟོན།

ཟླ་འདིའི་ཚེས་ ༢༦ ཉིན་བོད་ཀྱི་རིག་གཞུང་དྲྭ་རྒྱ་ནས་གནས་ཚུལ་སྤེལ་བ་ལྟར་ན། ཚེས་ ༡༧ ནས་ ༡༨ བཅས་ཉིན་གཉིས་ཀྱི་རིང་། བོད་གཞུང་འགྲེམས་སྟོན་ཁང་གིས་ ”ལོ་ངོ་ ༥༠ རིང་གི་བཙན་བྱོལ་”དང་། ”རྒྱ་གར་ལ་ཐུགས་རྗེ་ལེགས་གསོལ་”གྱི་དུས་དྲན་ཞིག་སྲུང་གཙི་ཞུས་པ་དང་འབྲེལ། ཤི་རི་ན་གྷར་གྱི་བོད་པའི་ཁ་ཆེའི་གཞིས་ཆགས་ཧ་ཝལ་ཞེས་པའི་ཉེ་འགྲམ་གྱི་ཁ་ཆེའི་བོད་སློབ་ཞིག་ཏུ། བོད་ཀྱི་ཕ་མེས་ནས་བརྒྱུད་པའི་རིག་གཞུང་དང། བཙན་བྱོལ་བོད་གཞུང་དབུ་བརྙེས་ནས་ད་བར་གྱི་ཡར་ཐོན་རྣམ་པ་སོགས་འདྲ་དཔར་དང།  གློག་བརྙན་གྱི་ལམ་ནས་གཟིགས་འབུལ་ཞུས་པ་དང་ལྷན། སྙན་གྲགས་ཆེ་བའི་གློག་བརྙན་”སྐུ་མདུན་”ཞེས་པ་དང། ༸གོང་ས་མཆོག་གིས་བཀའ་སློབ་གནང་བའི་”བྱམས་སེམས་”ཞེས་པའི་འཁོར་ཐག དེ་བཞིན་རྒྱ་གར་གཞུང་མང་ལ་བཀའ་དྲིན་རྗེས་དྲན་མཚོན་ཆེད་དུ་གཞས་སྣའི་འཁོར་ཐག་ཅིག་ཀྱང་སློབ་གྲྭའི་ལས་བྱེད་དང། མང་ཚོགས། སློབ་ཕྲུག་བཅས་ལ་གཟིགས་འབུལ་ཞུས་ཡོད་འདུག ཁ་ཆེའི་བོད་སློབ་དེ་ནི་ཕྱི་ལོ་ ༢༠༠༤ ལོར་བཙན་བྱོལ་བོད་གཞུང་གི་ཤེས་རིག་བཀའ་བློན་ཐུབ་བསྟན་ལུང་རིགས་མཆོག་གིས་དབུ་འབྱེད་གནང་ཡོད་ཅིང་། སློབ་གྲྭའི་དབུ་འཛིན་ཨ་མན་མ་ལིག་མཆོག་གིས་ཐེངས་འདིའི་ཉིན་གཉིས་ཀྱི་འགྲེམས་སྟོན་དང་འབྲེལ་གསུང་བཤད་གནང་དོན། ༧གོང་ས་མཆོག་དང་བཙན་བྱོལ་བོད་གཞུང་གཉིས་ནི་ངེད་ཚོ་ཁ་ཆེའི་རུ་སྡེ་ཚོར་ཞེ་དྲག་གི་བཀའ་དྲིན་ཆེན་པོ་ཡིན་ཞིང། སྔར་བོད་རང་བཙན་མ་ཤོར་བའི་སྐབས་སུ་བོད་དུ་གནས་སྡོད་ཁ་ཆེ་བ་ཚོར་ཆོས་ལུགས་ལག་བསྟར་གྱི་རང་དབང་འདྲ་མཉམ་ལྡན་ཞིང། གཞུང་ཕྱོགས་ནས་ཀྱང་གཟིགས་སྐྱོང་ལེགས་ཤིང་། ཐེ་བྱུས་མེད་པ་ཞིག་རེད་ཅེས་དང། ཉེ་ཆར་ཁོང་ཉིད་༧གོང་ས་མཆོག་ལ་མཇལ་ཁ་གནང་རྒྱུའི་གོ་སྐལ་ཐོབ་ཅིང། དེའི་རིང་༸གོང་ས་མཆོག་ནས་ཁོང་ལ་བཙན་བྱོལ་བོད་གཞུང་གི་ལངས་ཕྱོགས་སོགས་ཀྱི་སྐོར་ལ་བཀའ་སློབ་གནང་ཡོད་སྐོར་བཤད་དུག