ངས་ལས་གཞི་མགོ་བཙུགས་ནས་ད་བར་ལོ་གཉིས་ལྷག་འགྲོ་བཞིན་ཡོད་ནའང་གཞུང་ངོས་ནས་ང་ལ་རོགས་རམ་གང་ཡང་མ་གནང་བ་མ་ཟད། སེམས་ཤུགས་སྤར་མཁན་ཞིག་ཀྱང་མི་འདུག འོན་ཀྱང་ལས་གཞི་འདི་བརྩམས་པར་བརྟེན་ནས་བོད་རིགས་ལས་མེད་ཁག་ཅིག་ལ་ལས་ཀ་སྤྲོད་ཐུབ་པ་དེ་ངའི་ཁེ་བཟང་ཡིན་ལ་དམིགས་འདུན་ཡང་ཡིན་ཟེར།
འདི་ལོའི་མཉམ་འབྲེལ་ལོ་འཁོར་ཚོགས་ཆེན་དེ་ཟླ་འདིའི་ཕྱི་ཚེས་ ༡ ནས་ ༣ བར་ཧོང་སུར་རབ་རྒྱས་གླིང་དུ་འཚོགས་སོང་ལ། ཉིན་དེར་ང་ཡང་གསར་འགྱུར་བསྡུ་ལེན་ཆེད་བསྐྱོད་པ་མ་ཟད། ཞོར་དུ་ཧོང་སུར་རབ་རྒྱས་གླིང་ནས་བཟོ་སྐྲུན་བྱེད་བཞིན་པའི་གངས་ལྗོངས་ཨིམ་ལི་ཞེས་པའི་བཟོ་གྲྭའི་གནས་སྟངས་ལ་རྒྱུས་ལོན་བྱེད་པར་བསྐྱོད་པ་ཡིན། གངས་ལྗོངས་ཨིམ་ལི་ཞེས་པ་ནི་ང་རང་སྦེལ་ཀོབ་གཞིས་ཆགས་སུ་འབྱོར་བ་ནས་ཤེས་རྟོགས་བྱུང་ལ། ལྷོ་ཕྱོགས་འདིའི་ཉེ་འཁོར་གྱི་གཞིས་ཆགས་ཁག་ནས་བོད་མི་རང་གིས་བཟོ་སྐྲུན་བྱེད་བཞིན་པའི་ཐོན་རྫས་གཟིམ་སྤོས་དང་ཐུག་པ། ཁ་ཚ་སོགས་རིགས་འགའ་ཤས་ཡོད་ལ། གངས་ལྗོངས་ཨིམ་ལི་ཀྱང་དེ་དག་གི་ཁྲོད་ཀྱི་གཅིག་ཡིན་པ་མ་ཟད། བུད་མེད་དང་བྱིས་པས་འདི་ལ་དམིགས་བསལ་གྱིས་དགའ་བོ་བྱེད་ཀྱིན་ཡོད།
ཉིན་དེར་ང་གངས་ལྗོངས་ཨིམ་ལི་བཟོ་གྲྭར་འབྱོར། བསམ་ཡུལ་ལས་འདས་པ་ཞིག་ལ་ངས་སེམས་ངོར་རྟོག་བཟོ་བྱས་པའི་གངས་ལྗོངས་ཨིམ་ལི་བཟོ་གྲྭ་དང་། དངོས་སུ་མིག་གིས་མཐོང་བའི་བཟོ་གྲྭ་འདི་གཉིས་བརྗིད་ཉམས་ཆེ་ཆུང་གི་ཆ་ནས་གནམ་ས་ལྟ་བུའི་ཁྱད་པར་ཤོར་འདུག དེ་ནི་གངས་ལྗོངས་ཨིམ་ལི་བཟོ་གྲྭ་ནས་ཐོན་པའི་ཨིམ་ལི་རིགས་ནི་ལྷོ་ཕྱོགས་སུ་ཅུང་ཙམ་རྒྱུགས་ཆེ་བའི་ཐོན་རྫས་རིགས་ཤིག་ཡིན་སྟབས། ངས་བསམ་པར་ཐོན་རྫས་འདི་བཟོ་སྐྲུན་བྱེད་སའི་བཟོ་གྲྭ་ཡང་དེའི་ཚོད་ཀྱིས་རྒྱ་ཆེ་བ་དང་ལས་མི་མང་བོ་འཛོམས་ས་ཞིག་ཡིན་ངེས་སྙམ་ཡོད་ཀྱང་། དོན་དངོས་ཐོག་འདི་ནས་བཟོ་བཞིན་པའི་ཐོན་རྫས་བཟང་བ་ལས་བཟོ་གྲྭའི་ཁང་བ་ནི་མཉམ་འབྲེལ་གྱིས་གཡར་བའི་ཁང་བ་ཅུང་རྙིང་ཞིང་སྟེང་ཐོག་ཏུ་རྫ་མ་དམར་བོ་བཀབ་པ་ཞིག་རེད་ལ། གངས་ལྗོངས་ཞེས་པའི་སྒོ་བྱང་ཆེན་པོ་དེའི་ཕན་ནས་ཕྱི་ལོག་ནས་བལྟས་ན་བཟོ་གྲྭ་ཞིག་གི་ཉམས་གང་ཡང་མི་འདུག འོན་ཀྱང་ནང་དུ་ཕྱིན་སྐབས་བུད་མེད་དང་བྱིས་པའི་དགའ་མོས་བྱེད་བཞིན་པའི་གངས་ལྗོངས་ཨིམ་ལིའི་རིགས་བཟོ་བཞིན་འདུག་ལ། སྣང་ཚུལ་དེ་མཐོང་སྐབས་ཐོན་རྫས་ཀྱི་ཆེ་ཆུང་ལ་མ་ལྟོས་པར་བོད་མི་རང་གིས་བཟོ་བཞིན་པ་དེས་བདག་ལ་འགོག་མེད་ཀྱི་སྤོབས་པ་ཞིག་ཀྱང་བསྩལ་བྱུང་།གངས་ལྗོངས་བཟོ་གྲྭ་ནི་སྤྱིར་བཏང་བའི་འབངས་མི་དཀྱུས་མི་ཞིག་གིས་རང་གི་རྣམ་དཔྱོད་དང་འབད་བརྩོན་ཁོ་ནར་བརྟེན་ནས་བཙུགས་པ་ཞིག་རེད་ལ། ཁོང་གི་མཚན་ལ་འཇིགས་མེད་རྣམ་རྒྱལ་ཟེར། ཁོང་སྐྱེས་ས་སྦེལ་ཀོབ་གཞིས་ཆགས་ནས་ཡིན་ཞིང་དེ་གའི་དབུས་ཉིན་སློབ་ཏུ་འཛིན་རིམ་བརྒྱད་པ་བར་སློབ་སྦྱོང་བྱས་ཡོད་འདུག
ཁོང་གིས་བཟོ་གྲྭ་འདི་ངོ་སྤྲོད་གནང་དོན། ཧོང་སུར་རབ་རྒྱས་གླིང་དུ་ཨིམ་ལི་སམ་སྐྱུར་མོའི་རིགས་འདིའི་ཐོན་ཁུངས་ཡག་པོ་ཡོད་སྟབས། ངས་དེ་བེད་སྤྱད་དེ་བྱིས་པ་ཚོས་དགའ་མོས་བྱེད་པའི་རྔན་པའི་རིགས་ཤིག་བཟོ་ཐུབ་ན་ཡག་པོ་ཡོང་ས་རེད་དྲན་སོང་ལ། བོད་པའི་སྤྱི་ཚོགས་ནང་ཕྲུ་གུ་ཚོས་སྐྱུར་མོའི་རིགས་ལ་དགའ་བོ་བྱེད་པ་ངས་ཤེས་ཀྱིན་ཡོད་སྟབས། དང་ཐོག་ང་དང་སྐྱེས་དམན་གཉིས་ཀྱིས་ནང་དུ་ཨིམ་ལི་བཅུ་བཅོ་ལྔ་རེ་བཟོས་ཏེ་བཙོང་གི་ཡོད་ལ། དེ་ལ་ཚོང་ཡག་པོ་ཡོད་སྟབས། ལོ་གཉིས་ཙམ་གྱི་གོང་ནས་མཉམ་འབྲེལ་ལ་ཞུས་ཏེ་ཁང་པ་ཆུང་ཆུང་ཞིག་གཡར་བྱུང་ལ། འདིར་ང་ཚོའི་གྲོང་སྡེའི་ནང་བོད་རིགས་ལས་མེད་དེ་འདྲ་གཅིག་གཉིས་ཤིག་ལས་ཀར་ཉར་བ་ཡིན། དེ་ནས་མགོ་བརྩམས་ཏེ་གངས་ལྗོངས་ཨིམ་ལི་དང་གངས་ལྗོངས་དམིགས་བསལ་ཨིམ་ལི། གངས་ལྗོངས་ཁ་ཚ་ཆེ་ཆུང་གཉིས་དང་གངས་ལྗོངས་ཐུར་མ་ཨིམ་ལི། གངས་ལྗོངས་ཨིམ་ལི་རིལ་རིལ་སོགས་རིགས་མི་འདྲ་བ་བཅུ་ཙམ་ཞིག་བཟོ་བསྐྲུན་བྱེད་ཀྱིན་ཡོད་ལ། ཉེ་འཁོར་གྱི་གཞིས་ཆགས་ཁག་གི་ནང་བོད་མི་རང་གིས་བཟོས་པ་རྣམས་ཡག་པོ་འདུག་ལབ་ནས་འདི་ནས་སྡེབ་ཉོ་བྱེད་ཀྱིན་འདུག གང་ལྟར་ཡང་འདི་ནི་ང་རང་ཉིད་ཡིན་ནའང་ཁེ་བཟང་ཕྲན་བུ་ཡོད་པ་དང་བོད་རིགས་ལས་མེད་དག་ལའང་ལས་ཀ་ཡོད་པ་ལྟ་བུ་ཞིག་རེད་ཅེས་རང་ཉིད་ཀྱིས་གཉེར་བཞིན་པའི་ལས་ཀའི་སྐོར་ལ་སྤོབས་སེམས་ཀྱིས་འགྲེལ་བརྗོད་གནང་སོང་།
ཡིན་ནའང་། ཁོང་གིས་ང་ལ་ཅུང་བློ་ཕམ་གྱིས་གསུངས་དོན། ངས་ལས་གཞི་འདི་ལྟ་བུ་ཞིག་མགོ་བརྩམས་ཏེ་ད་བར་ལོ་གཉིས་ཕྱིན་རིང་བོད་གཞུང་གི་ངོས་ནས་རྒྱབ་སྐྱོར་བྱེད་པ་དང་། དེང་སྐབས་གང་འདྲ་ཆགས་འདུག་ཅེས་སྐད་ཆ་འདྲི་མཁན་ཞིག་ཀྱང་མི་འདུག དངོས་གནས་བྱས་ན་བོད་མིའི་སྤྱི་ཚོགས་ནང་ལག་ཤེས་དང་རྔན་པ་བཟོ་གྲྭ་ཆུང་ཆུང་ལྟ་བུ་བཙུགས་ན་ཡག་པོ་ཡོད་པ་རེད་བསམ་གྱིན་འདུག་ལ། ༧གོང་ས་མཆོག་གིས་ཀྱང་བོད་ཀྱི་གཞིས་ཆགས་ཁག་ཏུ་ཐོན་ཁུངས་ཡོད་བསྡད་པ་དེ་ཚོ་བེད་སྤྱོད་གཏོང་དགོས་ཀྱི་འདུག་ཅེས་གསུངས་ཡོད་པ་རེད། ཡིན་ནའང་། དེ་ལྟར་བྱེད་པར་གཞུང་གི་ངོས་ནས་རོགས་རམ་ཅུང་ཙམ་དགོས་ཀྱི་རེད་བསམ་གྱི་འདུག
དཔེར་ན་རྒྱ་གར་གཞུང་ལྟ་བུར་མཚོན་ན་བཟོ་གྲྭ་ཆུང་ཆུང་རེ་བཙུགས་ཏེ་ཡུལ་མི་ཚོར་ལས་ཀ་སྤྲོད་པ་ལྟ་བུ་བྱས་ན། གཞུང་ངོས་ནས་དེ་ལ་རོགས་རམ་གང་ཐུབ་བྱེད་ཀྱིན་ཡོད་པ་རེད། སྤྱིར་རྒྱ་གར་རང་བཙན་གཞུང་དང་ང་ཚོའི་བཙན་བྱོལ་གཞུང་གཉིས་བསྡུར་ཐབས་མེད་ཀྱང་། དཔེ་ལེན་རྒྱུ་ནི་གལ་ཆེན་པོ་རེད་ཟེར།
ཡང་ཁོང་ལ་འདི་ལྟར་གངས་ལྗོངས་ཨིམ་ལི་བཟོ་སྐྲུན་བྱས་ཏེ་ལོ་རེར་དེའི་སྟེང་ནས་ཁེ་བཟང་གང་འདྲ་ཞིག་ལོན་གྱིན་འདུག་ཅེས་སྐད་ཆ་དྲིས་སྐབས་ཁོང་གིས། དངུལ་གྱི་ཐད་ནས་ལོ་རེར་ཧིན་སྒོར་ཁྲི་ལྔ་དྲུག་ཅིག་ལས་ཡོང་གི་ཡོད་པ་མ་རེད། ཡིན་ནའང་། ངས་ཁེ་བཟང་དངོས་གནས་དེ་བོད་རིགས་ལས་མེད་བཅུ་བཞི་ཙམ་ལ་འདིར་ལས་ཀ་རག་པ་དེ་ཡིན་བསམ་གྱི་འདུག དེ་ནི་ང་ཚོ་ཐུན་མོང་གི་ཁེ་བཟང་དེ་རེད། གལ་སྲིད་ངས་དེ་ཁེ་བཟང་ལ་མ་བརྩིས་པར་དངུལ་རྐྱང་པར་མགོ་འཐོམ་པ་ཡིན་ན། བྷེའི་ཧར་མངའ་སྡེའི་ནང་སོང་ནས་རྒྱ་གར་ཡུལ་མི་མང་བོ་ལས་གཡོག་ཏུ་ཁྲིད་ཡོང་ཆོག་གི་རེད་ལ། ཁོང་ཚོར་ཉིན་མཚན་གཉིས་ཀར་ལས་ཀར་བཀོལ་ཆོག་པ་མ་ཟད། གླ་ཆ་ཡང་དེ་ཙམ་མཐོན་པོ་སྤྲོད་དགོས་ཀྱི་མ་རེད། དེར་བརྟེན་ངས་བོད་རིགས་ལས་མེད་དེ་འདྲར་ལས་ཀ་སྤྲོད་རྒྱུ་དེ་གལ་ཆེན་པོར་ཚོར་གྱི་འདུག་ཅེས་གསུངས་སོང་། ལས་ཀ་བྱེད་མཁན་དེ་དག་ལ་ཞོགས་པའི་ཆུ་ཚོད་ ༩ ནས་ཕྱི་དྲོའི་ཆུ་ཚོད་ ༤ དང་སྐར་མ་ ༣༠ བར་ཉིན་རེར་ཧིན་སྒོར་ ༥༠ རེ་དང་ཁ་ཚ་བཟོ་མཁན་དག་ལ་ཉིན་ཕྱེད་ལ་ཧིན་སྒོར་ ༦༥ ། ཡང་ལས་ཀ་མང་བ་བྱེད་མཁན་ལ་ཧིན་སྒོར་ ༧༠ བཅས་སྤྲོད་ཀྱི་ཡོད་འདུག
མཇུག་མཐར་ཁོང་གིས་འབྱུང་འགྱུར་གྱི་ལས་འཆར་སྐོར་ལ་གསུངས་དོན། ད་ལྟ་སྦེལ་ཀོབ་གཞིས་ཆགས་གསར་རྙིང་གཉིས་དང་ཧོང་སུར་མ་གཏོགས། མོན་གྷོ་འདོད་རྒུ་གླིང་དང་ཀོ་ལི་གྷལ་གཉིས་སུ་གངས་ལྗོངས་ཨིམ་ལི་དེ་ཙམ་གྱིས་མང་བོ་གཏོང་ཐུབ་ཀྱི་ཡོད་པ་མ་རེད། གལ་སྲིད་ང་ལ་གཞུང་གིས་རོགས་རམ་ཅུང་ཙམ་ཐོབ་ཏེ་འདི་ལས་ལྷག་པའི་ལས་གཞི་རྒྱ་ཆེ་རུ་གཏོང་ཐུབ་པ་དང་ལས་མི་མང་བོ་བསྡུ་ཐུབ་པ་ཡིན་ན། ལྷོ་གཞིས་ལྔའི་ནང་དགྲམ་ཐུབ་རྒྱུ་མ་ཟད། བོད་རིགས་ལས་མེད་མང་བོ་ཞིག་ལ་ཕན་ཐོགས་ཡོང་གི་རེད་བསམ་གྱི་འདུག་ཅེས་གསུངས་སོང་།
ཡིན་ནའང་། ཁོང་གིས་ད་བར་བཟོ་གྲྭ་འདིའི་དོན་དུ་བཙན་བྱོལ་བོད་གཞུང་ལ་རོགས་རམ་གང་ཡང་ཞུ་མྱོང་མི་འདུག་ལ། དེའི་རྒྱུ་མཚན་ནི་སྔོན་མ་ཁོང་གིས་གཞུང་ལ་དེ་མིན་གྱི་ལས་རིགས་གཞན་པའི་ཐོག་ཐེངས་འགར་སྙན་ཞུ་འབུལ་མྱོང་ཡང་། ཕན་འབྲས་ཐོན་མི་འདུག་པས་ཡིན་ཚུལ་བཤད་བྱུང་།
གཞུང་ལ་རེ་བཅོལ་བྱེད་རྒྱུ་ནི་འབངས་ཀྱི་འོས་བབས་ཡིན། སྐུ་ཞབས་ཉིད་ཀྱི་གཞུང་ལ་སེམས་པ་ཤོར་བ་ཡང་ཁག་མེད། འོན་ཀྱང་ཐོག་མ་ནས་རང་གི་འཆར་གཞི་དང་ཕུགས་བསམ་གང་དུ་གཏུག་ཡོད་དེ་ལ་བསམ་བློ་ངེས་པར་གཏོང་དགོས།
ལྷག་པ་ཚེ་རིང་གིས་བདེན་པའི་གནས་ལུགས་ཞིག་སྤེལ་འདུག་ཐུགས་རྗེ་ཆེ་ཞུ་རྒྱུ་དང་དེ་ལ་སེམས་ཁམས་གཙང་མ་ཞིག་གི་རྒྱབ་སྐྱོར་ཡང་ཡོད་ལགས།
དེང་གི་སྤྱི་ཚོགས་ནི་གཡོ་སྦྱོར་ལ་འཇུག་པ་མང་བའི་ལྷག་བསམ་ངོ་མ་བག་ལ་གཞའ་བའི་གནས་ཚུལ་ཡང་མང་པོ་རེད།་
ཐུགས་རྗེ་ཆེ།
གོང་དུ་སྐར་ཁྲི་བཙན་དང་བློ་གྲོས་རྒྱལ་པོ་ལགས་རྣམ་གཉིས་ཀྱིས་གསུངས་པ་དེ་དག་བདེན་པ་རེད། ང་ཚོ་ཕྲུ་གུའི་ཕ་མ་ཚོའི་དཀའ་ངལ་ཆེ་ཤོས་དེ་ཡང་ཚད་དང་མི་མཐུན་པའི་ཟས་རིགས་ཕྲུ་གུར་བཀག་འགོག་བྱེད་རྒྱུ་དེ་རེད་འདུག ལྷག་དོན་ང་ཚོ་བོད་པ་ཚོས་དུས་རྟག་ཏུ་སེམས་ལ་ངེས་དགོས་པ་ཞིག་ནི་ཟ་ཁང་དང་ཚོང་ཁང་ལ་སོགས་པའི་ཚོང་གཉེར་གནང་སྐབས་རང་ཉིད་ཀྱི་ཁེ་ཕན་ཁོ་ན་ལ་མི་ལྟ་བར་མི་གཞན་གྱི་བདེ་ཐང་ལ་བསམ་གཞིགས་བྱེད་རྒྱུ་ནི་ཤིན་ཏུ་ནས་གལ་ཆེན་པོ་འདུག དེ་བཞིན་ང་ཚོས་ཟས་རིགས་གང་ཞིག་ཉོས་པའི་སྐབས་ངེས་པར་དུ་དུས་ཚོད་ཡོལ་ཡོད་མིན་བརྟག་དཔྱད་བྱེད་པའི་གོམས་གཤིས་མི་འདུག་པས། དེ་ནི་ཤིན་ཏུ་ཉེན་ཁའི་གནས་ཞིག་ཡིན།
སྤྱིར་ཁྱེད་ཀྱི་ཐོག་མའི་ཀུན་སློང་ནོར་འདུག་སྙམ། ཁྱེད་ཀྱི་ཐོག་མའི་ཀུན་སློང་ནང་དུ་ངས་ལས་ཀ་ཞིག་མགོ་བཙུག་ན་གཞུང་གིས་རོགས་སྐྱོར་འཐོབ་ངེས་བསམ་པའི་གཞན་བརྟེན་གྱི་བསམ་བློ་ཤུགས་ཆེན་ཞིག་ཡོད་སྟབས་ད་ལྟ་འདོད་པ་མ་ཁེངས་པའི་གནས་ཚུལ་འདི་བྱུང་བ་རེད། ང་ཚོའི་གཞུང་ནི་ཐོན་ཁུངས་ཕར་ཞོག་ས་ལག་མཐིལ་ཙམ་ཡང་མེད་པའི་སྐྱབས་བཅོལ་བའི་གཞུང་ཞིག་ཡིན་པ་དང་། ས་གནས་འགའ་ཞིག་ཏུ་ཟ་ཁང་དང་མགྲོན་ཁང་ཉུང་ཤས་ཤིག་ཡོད་པའང་ལྐོག་ཟ་བའི་ལག་ཏུ་ཤོར་ནས་གྱོང་རྐྱང་རེག་བཞིན་ཡོད། ལས་ཁུངས་ཁག་འཛིན་སྐྱོངས་དང་ད་དུང་གཞུང་ཞབས་པ་མང་པོར་གསོལ་ཕོག་སྤྲོད་ཐུབ་པ་ནི་ངོ་མ་རླབས་ཆེན་རེད། ཁྱེད་ལ་མཚོན་ན་རང་ཉིད་ཀྱི་རྐང་པའི་སྟེང་ལངས་བཞིན་པའི་བུ་རྒོད་ཞིག་ཡིན་པས་མ་འོངས་པར་ཡར་རྒྱས་སོང་ན་གཞུང་ལ་རོགས་སྐྱོར་ཞལ་འདེབས་རེ་གནང་ཐུབ་ན་དགེ་མཚན་ཤིན་ཏུ་ཆེའོ།
སྐར་ཁྲི་བཚན་གྱི་གསུངས་པ་དེ་བདེན་པ་རེད། དེང་སྐབས་རྒྱལ་སྤྱིའི་འཕྲོད་བསྟེན་སྒྲིག་འཛུགས་HWOནས་ཞོར་ཟས་རིགས་བྱིས་པ་འཚར་ལོངས་ལ་གནོད་སྐྱོན་ཡོན་མིན་དང་། དེའི་ནང་གི་འདུས་ཚད་རིགས་ལ་བརྟག་དཔྱད་གཟབ་ནན་བྱེད་པ་དང་། གནས་ཡུལ་གཞུང་ལ་མཚོན་ནའང་རྒྱལ་སྤྱིའི་འཕྲོད་བསྟེན་སྒྲིག་འཛུགས་HWOནས་གཏན་འཁེལ་གནང་བའི་ཚད་གཞི་དང་མཐུན་མིན་ལ་བརྟག་དཔྱད་དང་སྦྲགས་ཚད་ལྡན་རིགས་ལ་དེབ་སྐྱེལ་ལག་འཁྱེར་སྤྲོད་བཞིན་པ་རེད། དེ་ཙམ་དུ་མ་ཟད་བཟོ་གྲ་དེབ་སྐྱེལ་དང་འབབ་ཁྲལ། འཚོང་ཁྲལ་སོགས་རྒྱ་གར་དབུས་གཞུང་དང་མངའ་སྡེ་གཞུང་གི་ཁྲིམས་ལུགས་གཞིར་བཟུང་འགྲོ་ཐུབ་པ་བྱས་ན་ཁྲིམས་མཐུན་གྱི་སྲུང་སྐྱོབ་ཐུབ་ངེས་ཡིན་ལ། དེ་མིན་ཁྲིམས་འགལ་ནག་འཚོང་གི་ཁོངས་སུ་གཏོགས་པས་རང་གཞུང་དང་ས་གནས་མཉམ་འབྲེལ་གང་ནས་ཀྱང་རྒྱབ་སྐྱོར་རེག་ཁག་པོ་ཡིན།
སྤྱིར་ང་ཚོའི་བཙན་བྱོལ་གཞུང་སྒེར་གང་ཡིན་ཡང་ཕྱིའི་རོགས་དངུལ་གཅིག་པོར་རེ་སྒུག་ཙམ་མ་ཡིན་པར་རང་ངོས་ནས་བཟོ་གྲྭ་སྣ་ཚོགས་གསར་འཛུགས་ཀྱི་ལས་རིགས་ལ་དོ་སྣང་དགོས་པ་དེ་ཤིན་དུ་གལ་ཆེ་བར་མཐོང་། ཡིན་འང་དེང་སྐབས་འཛམ་གླིང་སྟེང་ཁྱབ་ཆེ་ཤོས་དེ་བྱིས་པའི་ཞོར་ཟས་སྣ་ཚོགས་ཡིན་པས། དེ་ལག་རྩལ་དང་སྤས་ཚད་གང་གི་ཐད་ནས་ཚད་མ་ལོན་པ་ཞིག་ཡིན་ཚེ། དེང་སྐབས་ས་ཆ་གང་སར་སྒེར་གྱི་ཁེ་ཕན་ཁོ་ནར་དམིགས་མཁན་མི་ཉུང་བ་ཞིག་གིས་བྱིས་པའི་འཚར་ལོངས་ལ་གནོད་སྐྱོན་བཟོ་ཡི་ཡོད་པ་མིག་མཐོང་ལག་ཟིན་རེད། ཁྱད་པར་དུ་རྒྱ་གར་ནག་གཉིས་ཀྱི་ནང་ན། འདིའི་རིགས་ཀྱི་རྒྱབ་ཉེར་རོགས་དངུལ་གཅིག་པོ་མིན་པར་གཙོ་ཆེ་བ་རྒྱ་གར་རྒྱལ་ཡོངས་འཕྲོད་རྟེན་ལས་ཁུངས་ལ་སོགས་འབྲེལ་ཡོད་ཚན་པ་ཁག་ལ་འབྲེལ་བ་བྱས་ནས་རང་གི་ལས་རིགས་ཀྱི་སྤས་ཚད་འགན་ལེན་དགོས་པ་ཤིན་དུ་གལ་ཆེ་བར་མཐོང་། ཁོ་ཚོ་ལ་རྒྱ་གར་རྒྱལ་ཡོངས་ཀྱི་ཆོག་མཆན་ཡོད་ན་གནས་ཚུལ་ལོག་ཁ་རེད་མ་གཏོགས་གྲུ་ཁུག་ཆུང་ས་ཞིག་ཏུ་ཁྲིམས་འགལ་གྱིས་ཟ་རིགས་འཆའ་རིགས་ཀྱི་བཟོ་གྲྭ་ཞིག་ཡོད་པ་ཙམ་དང་དེའི་ལས་མེད་རེ་ཟུང་གི་དཀའ་ངལ་སེལ་བཞིན་ཡོད་ན་ཡང་། མི་རིགས་ཀྱི་ས་བོན་ཆུང་ཆུང་མང་པོ་ཞིག་གི་བདེ་ཐང་ལ་གནོད་པ་བཟོ་ཡི་ཡོད་མེད་ཞིབ་འཇུག་ནན་པོ་ཞིག་བྱེད་པར་གལ་ཆེ་བར་འདོད། ཡང་གཅིག་བཤད་ན་ཞིམ་པོ་ཡོད་པ་ཙམ་གྱི་རྫུན་མ་མིན་པའི་བདེན་དཔང་མི་འོས། གལ་སྲིད་ཚད་ལྡན་གྱི་བཟོ་གྲྭ་ཞིག་ཡིན་ན་གཞུང་སྒེར་གང་ཡིན་ཡང་རྒྱབ་སྐྱོར་བྱེད་དགོས་ངེས་རེད།