ལོ་འདིའི་ཕྱི་ཟླ་ ༡༠ ཚེས་ ༡༧ ནས་ ༢༠ བར་ཨེ་ཤ་ཡའི་རྒྱལ་ཁབ་ཀྱི་སྐྱེ་སྒོ་དང་ཕོ་མོའི་འཕྲོད་བསྟེན་གྱི་ཚོགས་འདུ་ཐེངས་ལྔ་པར། ང་ཚོ་བོད་ཀྱི་བུད་མེད་ལྷན་ཚོགས་ལ་མགྲོན་འབོད་གནང་བ་ལྟར། ང་ཚོས་གོ་སྐབས་འདི་ཉིད་རྩ་ཆེར་བཟུང་སྟེ། གཞིས་ལུས་བུད་མེད་རྣམས་ལ་འཕྲད་པའི་མནར་གཅོད་རྣམས་གསལ་སྟོན་བྱ་རྒྱུ་མ་ཟད། དེ་འབྲེལ་རྒྱ་ནག་ནང་ཡོད་པའི་བུད་མེད་ཚོགས་སྡེ་ཁག་དང། འབྲེལ་ལམ་གསར་འཛུགས་ཀྱིས་ཐུན་མོང་ཐོག་བོད་ནང་གི་བོད་པའི་བུད་མེད་ལ་འཛིན་པའི་དཀའ་ཁག་གི་སྲིད་བྱུས་དག སེལ་ཐབས་བྱ་རྒྱུའི་འབད་བརྩོན་བྱ་རྒྱུ་ཡིན།
ཟླ་འདིའི་ཚེས་ ༡༠ ཉིན་བོད་ཀྱི་བུད་མེད་ལྷན་ཚོགས་དབུ་བརྙེས་ནས་ལོ་ངོ་ ༢༥ འཁོར་བའི་དུས་དྲན་སྲུང་གཙི་ཞིག་བོད་གཞུང་ཟློས་གར་ཚོགས་པའི་ཚོགས་ཁང་དུ་ཚོགས་ཡོད་པ་དང། ཚོགས་མགོན་དུ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་རྒྱ་རི་སྒྲོལ་མ་མཆོག་དང། ཚོགས་གཙོ་ཟུར་པ་བཀའ་ཟུར་རིན་ཆེན་མཁའ་འགྲོ་གཉིས་ཆེད་ཕེབས་གནང་ཡོད་པ་རེད། ཚོགས་འདུའི་སྐབས་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་སྒྲོལ་དཀར་ལྷ་མོ་ལགས་ཀྱིས་ཚོགས་པའི་དངོས་སྤྲོད་དང་འབྲེལ་གསུངས་དོན། བོད་ཀྱི་བུད་མེད་ལྷན་ཚོགས་ནི་ཐོག་མར་ ༡༩༥༩ ལོའི་ཟླ་ ༣ ཚེས་ ༡༢ ཉིན་ཕོ་བྲང་པོ་ཏ་ལའི་མདུན་གྱི་འབྲས་བུ་གཡུལ་ཁའི་ཐང་ཆེན་སྟེང། རྒྱ་ནག་གི་ཁྲིམས་མཐུན་མིན་པའི་བཙན་བཟུང་ལ་རྒྱལ་གཅེས་བུད་མེད་ཚོས་ངོ་རྒོལ་མཐའ་གཅིག་ཏུ་བྱས་ནས་དབུ་བརྙེས་པ་ཞིག་ཡིན། ༡༩༦༠ དང། ༧༠ དེ་བཞིན་ ༨༠ བཅས་སོ་སོར་དྷ་རམ་ས་ལས་གཙོས་པའི་རྒྱ་གར་རྒྱལ་ཡོངས་ནས། བོད་ཀྱི་བུད་མེད་རྣམས་ཀྱི་ལས་འགུལ་ཁག་རིམ་བཞིན་ཁྱབ་སྤེལ་འགྲོ་མགོ་བརྩམས་ཏེ། ཕྱི་ལོ་ ༡༩༨༤ ཟླ་ ༩ ཚེས་ ༡༠ ཉིན་བོད་ཀྱི་བུད་མེད་ལྷན་ཚོགས་ཀྱི་རླབས་ཆེན་གྱི་སྒྲིག་འཛུགས་དེ་ཉིད་བཞུགས་སྒར་དྷ་རམ་ས་ལར་སླར་གསོ་གནང་ཐུབ་པ་བྱུང་བ་དང། དེ་རིང་བོད་ཀྱི་བུད་མེད་ལྷན་ཚོགས་སླར་གསོ་བྱུང་སྟེ་ལོ་ངོ་ ༢༥ འཁོར་བའི་ཉིན་མོར་བོད་ཀྱི་བུད་མེད་ཚོས། རང་དབང་གི་འཐབ་རྩོད་ནང་མཉམ་ཞུགས་བྱས་པའི་དམིགས་འདུན་བསྐྱར་གསོ་བྱ་རྒྱུ་དང། རང་གི་རྒྱལ་ཁབ་ལ་བཅངས་པའི་ལ་རྒྱ་གོང་མཐོར་གཏང་རྒྱུ་ཡིན། ད་ཆ་བོད་ཀྱི་བུད་མེད་ལྷན་ཚོགས་ཀྱི་ཡན་ལག་དེ་ཨེ་ཤ་ཡ་དང། ཡུ་རོབ། ཨ་རི། ཨོ་སི་ཊོ་ལི་ཡ་བཅས་ཀྱི་གླིང་ཕྲན་ནང་ཁྱོན་ས་གནས་ཡན་ལག་ ༤༩ ལྷག་དང་ཚོགས་མི་ ༡༥༠༠༠ ལྷག་ཡོད་པ་རེད། བཙན་བྱོལ་ནང་སྒྲིག་འཛུགས་དེ་དག་སླར་གསོ་བྱུང་བ་ནས་བཟུང། ད་བར་ཆབ་སྲིད་ལས་འགུལ་དང། སྤྱི་ཚོགས་ཞབས་ཞུ། ཆོས་ཕྱོགས་བྱེད་སྒོ། ཤེས་ཡོན་དང་འབྲེལ་བའི་ནུས་སྟོབས་གོང་སྤེལ་སོགས་ཀྱི་ཐད་ལས་རིགས་སྣ་མང་སྤེལ་ཡོད་ལ། ལྷག་དོན་ཆབ་སྲིད་ཀྱི་ལས་འགུལ་ལ་དམིགས་བཀར་གྱི་ཐུགས་འགན་ཆེས་ཆེར་བཞེས་ཡོད་པ་རེད། ད་སྐབས་བོད་ཀྱི་བུད་མེད་ལྷན་ཚོགས་ལ་རྒྱལ་སྤྱིའི་ངོས་འཛིན་ཚད་མཐོར་ཐོབ་ཡོད་པ་དང། འདི་ལོའི་བུད་མེད་སྒེར་ལངས་ཀྱི་ཉིན་མོ་དེ་རྒྱལ་སྤྱིའི་བོད་ཀྱི་བུད་མེད་ཀྱི་ལོར་སྲུང་གཙི་ཞུ་རྒྱུའི་དྲིལ་བསྒྲགས་གནང་ཡོད་པ་རེད། ཉེ་བའི་ཆར་འཛམ་གླིང་བུད་མེད་ཀྱི་སྐྱེ་སྒོའི་ཐོབ་ཐང་འབྲེལ་མཐུད་ལས་ཁང་གིས། པེ་ཅིང་དུ་ལོ་འདིའི་ཕྱི་ཟླ་ ༡༠ ཚེས་ ༡༧ ནས་ ༢༠ བར་ཨེ་ཤ་ཡའི་རྒྱལ་ཁབ་ཀྱི་སྐྱེ་སྒོ་དང་ཕོ་མོའི་འཕྲོད་བསྟེན་གྱི་ཚོགས་འདུ་ཐེངས་ལྔ་པར། ང་ཚོ་བོད་ཀྱི་བུད་མེད་ལྷན་ཚོགས་ལ་མགྲོན་འབོད་གནང་བ་ལྟར། ང་ཚོས་གོ་སྐབས་འདི་ཉིད་རྩ་ཆེར་བཟུང་སྟེ། གཞིས་ལུས་བུད་མེད་རྣམས་ལ་འཕྲད་པའི་མནར་གཅོད་རྣམས་གསལ་སྟོན་བྱ་རྒྱུ་མ་ཟད། དེ་འབྲེལ་རྒྱ་ནག་ནང་ཡོད་པའི་བུད་མེད་ཚོགས་སྡེ་ཁག་དང། འབྲེལ་ལམ་གསར་འཛུགས་ཀྱིས་ཐུན་མོང་ཐོག་བོད་ནང་གི་བོད་པའི་བུད་མེད་ལ་འཛིན་པའི་དཀའ་ཁག་གི་སྲིད་བྱུས་དག སེལ་ཐབས་བྱ་རྒྱུའི་འབད་བརྩོན་བྱ་རྒྱུ་ཡིན། མཐའ་དོན་རྒྱ་གཞུང་གི་ངོས་ནས་བོད་རྒྱའི་དཀའ་རྙོག་སེལ་ཐབས་སུ་དྲང་བདེན་ནམ། དངོས་ཡོད་ཐོག་༸གོང་ས་མཆོག་དང་ཕན་ཚུན་ཞི་མོལ་གནང་སྟེ། བོད་རྒྱ་གཉིས་སྨན་གྱི་ལམ་བུར་གོམ་ཁ་མདུན་སྤོས་ཡོང་རྒྱུར། བོད་ཀྱི་བུད་མེད་ལྷན་ཚོགས་ཀྱིས་འབོད་སྐུལ་ཞུ་རྒྱུ་ཡིན་ལ། ༸གོང་ས་མཆོག་གི་བླ་ན་མེད་པའི་དགོངས་གཞིའི་འོག གནམ་འོག་དྲང་བདེན་གྱི་སྐྱེ་བོ་ཀུན་གྱིས་བོད་དོན་བདེན་མཐའ་མྱུར་དུ་སེལ་ཕྱིར་བདེན་པའི་རྒྱབ་སྐྱོར་གནང་རྒྱུར་བོད་ཀྱི་བུད་མེད་ལྷན་ཚོགས་ཀྱིས་འབོད་སྐུལ་བརྒྱ་འགྱུར་ཞུ་བཞིན་ཡོད་ཅེས་གསུངས།
སྤྱི་འཐུས་ཚོགས་གཞོན་རྒྱ་རི་སྒྲོལ་མ་ལགས་ཀྱིས་གསུངས་དོན། དེ་རིང་བོད་ཀྱི་བུད་མེད་ལྷན་ཚོགས་དབུ་བརྙེས་ནས་ལོ་ངོ་ ༢༥ འཁོར་བ་རེད། དེའི་རིང་ཚོགས་པ་འདི་ནས་བོད་ཀྱི་རང་དབང་བསྐྱར་གསོ་དང་འབྲེལ་ཏེ། ༸གོང་ས་མཆོག་གི་རླབས་ཆེན་གྱི་དགོངས་བཞེད་གཞི་ལ་བཞག་པའི་ཐོག་ནས་ཕྱག་ལས་གནང་ཡོད་པ་རེད། བོད་ཀྱི་བུད་མེད་ལྷན་ཚོགས་དབུ་བརྙེས་པ་ནས་བཟུང་། ཚོགས་གཙོ་ལས་འཁུར་ཞུ་མཁན་ལྷ་ལྕམ་རིན་ཆེན་མཁའ་འགྲོ་ལགས་ཀྱིས་གཙོས་པའི། སྤྱི་ཟུར་ཨ་འབྲུག་ཚང་ཆོས་སྐྱིད་ལགས་དང། འབྲེལ་ཡོད་ཚང་མར་ངས་བོད་ཀྱི་བུད་མེད་ཚང་མའི་ངོ་ཚབ་ཞུས་ཏེ་ཐུགས་རྗེ་ཆེ་ཞུ་རྒྱུ་ཡིན། དེ་རིང་ངས་ཚོགས་འདུ་འདིའི་ཐོག་ཏུ་དོན་ཚན་གསུམ་ཞུ་འདོད་བྱུང། དོན་ཚན་དང་པོ། ང་ཚོའི་རྒྱལ་ཁབ་དེ་གཞན་གྱི་དབང་བསྒྱུར་དུ་ཡོད་པས། ང་ཚོས་ཚོགས་པ་གང་འདྲ་ཞིག་གི་ནང་དུ་ལས་ཀ་བྱེད་ཀྱང་རང་གི་གནས་བབ་དེ་ནམ་ཡང་བརྗེད་རྒྱུ་ཡོད་པ་མ་རེད། གཉིས་པ་ནི། ༸གོང་ས་སྐྱབས་མགོན་ཆེན་པོ་མཆོག་དགུང་གྲངས་ ༡༦ ནས་ད་བར་བོད་ཀྱི་ཆབ་སྲིད་ཀྱི་ཐུགས་འགན་བཞེས་ཀྱིན་ཡོད་ཅིང། ང་ཚོ་དུས་རྒྱུན་དུ་གང་ཉིད་ཀྱི་སྐུ་དྲིན་འོག་ཏུ་འཚོ་བསྡད་ཀྱི་ཡོད་པ་ཡིན་དུས། བོད་ཀྱི་རང་དབང་བསྐྱར་གསོ་དེ་ཁོང་གཅིག་པུའི་ཕྱག་ལས་མིན་པར། བོད་མི་མི་རེ་ངོ་རེའི་འོས་འགན་ཡིན་པ་ནམ་ཡང་བརྗེད་རྒྱུ་ཡོད་པ་མ་རེད། གསུམ་པ་ནི། བོད་ཀྱི་བུད་མེད་ལྷན་ཚོགས་ནི་སྐྱབས་བཅོལ་གྱི་བུད་མེད་ཙམ་མིན་པར་གཞིས་སྡོད་བུད་མེད་ཡོངས་ཀྱི་ངོ་ཚབ་མཚོན་ཐུབ་པ་ཞིག་དང། དེ་དག་གི་ཆེད་དུ་དུས་ནམ་ཡིན་ཡང་ཕྱག་ལས་གནང་དགོས་པ་གལ་ཆེན་རེད། གལ་སྲིད་དོན་ཚན་གསུམ་པོ་དེ་སྙིང་ལ་བཅངས་པའི་ཐོག་ནས་ཕྱག་ལས་གནང་ཚེ། ཏན་ཏན་བོད་ལ་སྐྱིད་པའི་ཉིན་མ་ཤར་རྒྱུ་དང། ང་ཚོ་སླར་བོད་ལ་ལོག་ཐུབ་པའི་རེ་བ་ཆེན་པོ་ཡོད་པ་རེད། དེ་འདྲ་ཡིན་དུས་ཚང་མས་ནམ་ཡང་སྙིང་སྟོབས་དང། ལ་རྒྱ་མ་ཉམས་པར་གོང་འཕེལ་ཡོང་བར་རེ་སྐུལ་ཞུ་རྒྱུ་ཡིན་ཞེས་གསུང་གནང་སོང།
བཀའ་ཟུར་རིན་ཆེན་མཁའ་འགྲོ་ལགས་ནས་གསུངས་དོན། ང་ཚོ་འདིར་ཡོད་བོད་རིགས་ཚོས་འདས་ཟིན་པའི་བོད་ཀྱི་འཐབ་རྩོད་ཀྱི་ལས་འགུལ་ཆེ་ཆུང་གང་འདྲ་ཞིག་ཡོད་ཀྱང། དེ་དག་རྒྱུན་པར་ཡིད་ལ་བཅངས་དགོས་པའི་ཐོག་ནས། མ་འོངས་པའི་ལས་དོན་ལ་མདུན་བསྐྱོད་བྱ་དགོས་རྒྱུ་གལ་ཆེན་པོ་དང། ལྷག་པར་བོད་ཀྱི་བུད་མེད་ལྷན་ཚོགས་ཀྱི་ཚོགས་མི་ལོ་ལྟར་བཞིན་འཕོ་འགྱུར་འགྲོ་མུས་ཡིན་པས། ཚོགས་མི་ཚོས་གཞི་རྩའི་ཚོགས་པ་འདིའི་ལངས་ཕྱོགས་དང། དམིགས་ཡུལ་མ་ཡལ་བ་བྱེད་རྒྱུ་དེ་གལ་ཆེན་པོར་མཐོང་གི་འདུག འདས་པའི་ནང་བཙན་བྱོལ་སྤྱི་ཚོགས་ཀྱི་ཁྲོད་དུ་རང་རེའི་དཔའ་བོ་དང་དཔའ་མོ་ཚོས་རང་གི་འཚོ་བའི་དཀའ་ངལ་ལ་བསམ་བློ་མ་བཏང་བར། ནང་ཁུལ་མཉམ་ལས་བྱས་ཏེ་རྡོ་རྗེ་གླིང་དང་། རཱ་ཇ་པུར་གྱིས་གཙོས་པའི་ས་གནས་འགའ་ཞིག་ཏུ་ཚོགས་པ་གསར་འཛུགས་གྱིས། བོད་དོན་གྱི་མེ་རོ་མ་ཡལ་བར་བྱས་པའི་རླབས་ཆེའི་བྱས་རྗེས་ཆེན་པོ་བཞག་ཡོད་པ་དང། ལྷག་པར་ཕྱི་ལོ་ ༡༩༥༩ ལོའི་གྱེན་ལངས་ཀྱི་ནང་དུ་བོད་ཀྱི་བུད་མེད་མང་པོ་ཞིག་གིས་མཉམ་ཞུགས་གནང་བས། རྒྱ་མིའི་ལག་འོག་ནས་མནར་གཅོད་ཚད་ལས་བརྒལ་བ་མྱངས་དགོས་བྱུང་བ་རེད། དེ་འདྲ་ཡིན་དུས་ང་ཚོས་དངོས་གནས་ཁོང་ཚོའི་དཔའ་ངར་གྱི་མཛད་རྗེས་དེ་དག་ནམ་ཡང་རྗེས་དྲན་བྱེད་དགོས་རྒྱུ་དེ་ཞེ་དྲག་གི་གལ་ཆེར་མཐོང་གི་འདུག་ཅེས་གསུང་བཤད་གནང་བྱུང།
ཚོགས་འདུའི་སྐབས་སུ་བོད་ཀྱི་བུད་མེད་ལྷན་ཚོགས་ཀྱིས་དཔར་བསྐྲུན་གནང་བའི་ཕྱག་དེབ་བོད་ཡིག་དང། སེ་ཤེ་ནིཤ་སྐད་ཡིག་ཐོག་ཡོད་ཅིང། ནང་དོན་གཙོ་བོ་གཞིས་ལུས་བུད་མེད་སྟེང་འཛིན་པའི་སྐྱེ་སྒོའི་སྲིད་བྱུས་ཐོག་གི་སྙན་ཐོ་སྐྱོ་གདུང་གི་མིག་ཆུ་དང། དེ་བཞིན་བྱིས་པའི་བློ་སྒོ་འབྱེད་པའི་ལྡེ་མིག་ཞེས་པ་གཉིས་དང། དེ་བཞིན་གློག་བརྙན་ལྷ་མོ་མཚོ་ཞེས་པ་ཉེ་ཆར་རྒྱ་ནག་གཞུང་གིས་འཛིན་བཟུང་བྱས་པའི་དཔའ་བོ་དོན་གྲུབ་དབང་ཆེན་ལགས་དང་འབྲེལ་ཏེ། ཁོང་གི་ནང་མི་བུ་ཕྲུག་ཚོའི་དཀའ་ངལ་དང། ཚོར་བ། དེ་བཞིན་མི་མང་གི་རྒྱབ་སྐྱོར་མངོན་འདོན་བྱས་པ་ཞིག་བཅས་དབུ་འབྱེད་གནང་ཡོད་ཅིང་། ཚོགས་བཅར་བར་ལོ་ངོ་ལྔ་བཅུའི་རིང་བོད་ཀྱི་བུད་མེད་ཚོས་རང་དབང་འཐབ་རྩོད་ནང་འབུངས་བ་ཞེས་པའི་གློག་བརྙན་ཞིག་ཀྱང་གཟིགས་འབུལ་ཞུས་གནང་སོང།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
མཆན་བུ་འདེབས་མཁན་རྣམས་ཀྱི་མཆན་བུ་ཆ་ཚང་བཀླགས་པ་ཡིན།
རྣམ་རྟོག་གི་རུ་འཛིང་བའི་བཙན་བྱོལ་གྱི་སྤྱི་ཚོགས་འདིའི་ནང་།
གསར་འགྱུར་འགོད་སྤེལ་བྱེད་མཁན་སུ་ཡིན་རུང་།
རྒྱབ་མདུན་གཉིས་ཀ་མཐོང་དགོས་ལ། ཕྱི་ནང་གཉིས་ཀ་ཡང་མཐོང་དགོས།
བོད་ཀྱི་དུས་བབ་ནི་ལུང་ཚན་བྱེ་བྲག་པའི་གསར་འགྱུར་གཙོ་བོ་བསྒྲགས་ས་མ་རེད་ལ། བོད་ཀྱི་གསར་འགྱུར་གཅིག་པུ་འགོད་ས་ཡང་མ་རེད།
དུས་བབ་ནི་འཛམ་གླིང་ཕྱི་ནང་གཉིས་ཀའི་གསར་འགྱུར་འགོད་ས་ཞིག་རེད།
མཐོ་ཡ་གིའི་རྒྱལ་པོ་ནས་དམའ་མ་གིའི་སྤྲང་པོའི་བར་གྱི་གནས་སྟངས་སོགས་བརྒྱུད་སྤྲོད་བྱེད་མཁན་གྱི་བརྒྱུད་ལམ་ཞིག་ཡིན་སྟབས། དེ་ལྟར་ཡོང་བའི་འགན་ཁུར་དགོས་པ་དེ་ཡང་རྩོམ་སྒྲིག་པ་དང་གསར་འགོད་པ་ཐུན་མོང་གི་ཐུགས་ལ་ངེས་མུས་ཡིན་ལ་་ངེས་དགོས་པ་ཞིག་ཀྱང་རེད།།
སྤྱི་འཐུས་ཚོགས་གཞོན་རྒྱ་རི་སྒྲོལ་མ་གཙོས་པའི་བུད་མེད་སྤྱི་འཐུས་དེ་ཚོ་སྤྱི་འཐུས་ཀྱི་ཚོགས་འདུ་ལ་མ་བཅར་ནས་བུད་མེད་ཚོགས་པའི་དུས་དྲན་ལ་ཕྱིན་སོང་བ་རེད་དམ། བུད་མེད་ཀྱི་དུས་དྲན་དང་སྤྱི་འཐུས་ཀྱི་ཚོགས་འདུ་གཉིས་སུ་རྩ་ཆེ་བ་རེད།
མི་ནག་ཚང་ལ་ཞུ་རྒྱུར།
དུས་དྲན་སྲུང་གཙི་ཞེས་པའི་ནང་དོན་ག་རེ་རེད་དམ། སྤྱིར་ཡིག་ནོར་ལ་ཁག་མི་འདུག ཡིན་ནའང་ཁ་བྱང་དེ་མིག་ལ་བདེ་བོ་མི་འདུག་སྙམ།
རྩོམ་སྒྲིག་པ་ལུང་རིགས་ལགས། ཐུགས་རྗེ་ཆེ། ངས་ཀྱང་གསར་འགྱུར་གྱི་ཕྱོགས་ནས་གསར་འགྱུར་ལ་དོ་སྣང་བྱ་མཁན་ཞིག་ཡིན་པའི་ཆ་ནས་ཤ་ཚ་ཡོད་པའི་ཐོག་ནས་སྐྱོན་ཆ་དེ་ཚོར་ཉན་མཁན་ཡོད་མེད་ལ་མི་ལྟོས་པར་ཞུས་པ་ཡིན། གསར་འགྱུར་ཆད་ལྷག་གི་ནོར་འཁྲུལ་ལ་ངོས་ལེན་གནང་བར་དགའ་བསུ་ཡོད། ཁྱེད་རང་ང་གཅིག་པུ་ཡིན་ཟེར་མཁན་རྩོམ་སྒྲིག་པ་ཞིག་རེད་མི་འདུག ངས་ཀྱང་མར་ཙམ་བབ་ནས་ཁྱེད་ལ་ཚིག་རྩུབ་ཤོར་ཡོད་ཚེ་དགོངས་འགལ་མེད་པ་ཞུ་རྒྱུ་ཡིན། ཐུགས་རྗེ་ཆེ།
སྐར་ཁྲི་བཙན་ལ། ཁྱེད་ལའང་ཐུགས་རྗེ་ཆེ་ཞུ་རྒྱུ་ཡིན། སྤྱན་ཡ་གཅིག་བཀབ་སྟེ་གཟིགས་ན་ཕྱོགས་རྐྱང་པ་མ་གཏོགས་གཟིགས་མ་ཐུབ་པས། སུས་ག་རེ་བྱ་གི་ཡོད་མེད་དང་ག་རེ་བཤད་མེད་ཁྲ་ལྷམ་མེར་གསལ་ཡོད་པས་ཐུགས་སྣང་བྱས་ཚེ་མཁྱེན་ངེས་རེད།་ རྩོད་གཞི་མང་དྲག་ན་མི་ལེགས། ད་ང་མཚམས་བཞག་གི་ཡིན་དོ༎
དྲ་གྲོགས་བདེ་བ་ཅན་ལགས། ཁྱེད་ལ་གནས་ལུགས་ངོ་མ་ཡོད་ན་གསུངས་ན་དགའ་བསུ་ཡོད། དེ་མིན་ཆོལ་ཁའིཕྱོགས་ཞེན་གྱི་སྐད་ཆ་སུས་བཤད་བཞིན་ཡོད་ཧ་གོ་གི་མི་འདུག ཁྱེད་ཀྱི་སྐད་ཆ་དེ་ལ་སྙན་ཆ་མི་འདུག་ལགས། བོད་མི་རིགས་ཀྱི་བྱུང་བ་ཡོད་ཚད་དངོས་ཡོདལོ་རྒྱུས་ཀྱི་བདེན་དཔང་བྱེད་ངེས་པས་བྱས་རྗེས་ཆེ་ཆུང་བཤད་དགོས་དོན་ཡོད་ནི་མ་རེད་འདོད་ཀྱི་ལགས།
ངས་བཤད་པ་ནི། གཙོ་བོ་གསར་འགྱུར་གྱི་ཕྱོགས་ཡིན། གསར་འགྱུར་སྟེང་དུ་ཆད་ལྷག་ནོར་འཁྲུལ་ཤོར་ཡོད་ཚེ་དེ་ནི་ང་རང་གི་སྐྱོན་རེད། རྗེས་སུ་གཟབ་ངེས་ཡིན།
ལུང་རིགས་ལགས།་ ཁྱེད་རང་གི་འཕྲལ་དུ་གོ་རྟོགས་བྱུང་བར་ཧ་ཅང་དགའ་པོ་བྱུང་སོང་། བྱས་ན་ངས་ཁྱེད་རང་ལ་ཕ་ཡུལ་གྱི་ཞེན་ཁོག་མི་འདུག་ཀྱང་ཁམས་དང་དབུས་ཀྱི་གནས་ཚུལ་ཁ་གསལ་བཀོད་འདོད་ མི་བྱེད་པ་དང་དོ་སྣང་མི་བྱེད་པའི་ཞན་ཆ་དང་འཐུས་ཤོར་འདུག ཉེ་ཆར་བོད་ཀྱི་བང་ཆེན་གསར་ཤོག་སྟེང་ལྷ་ས་ཁུལ་གྱི་ཚེ་བཙོན་གྱི་ཉེས་པ་ཕོག་པའི་དེ་སྔའི་ཆབ་སྲིད་བཙོན་ཟུར་གསུམ་གྱི་འདྲ་དཔར་དང་བཅས་པ་ལོ་རྒྱུས་ཁ་གསལ་བཏོན་འདུག ཡིན་ནའང་ཁྱོད་ཚང་གི་དུས་བབ་ཚགས་པར་སྟེང་ལོ་རྒྱུས་ཐུང་ངུ་ཞིག་བཏོན་ཏེ་དེ་ཡང་རྦད་དེ་ནོར་ཏེ་བཀོད་འདུག དུས་བབས་ཚགས་ཤོག་གི་མདུན་ངོས་དེར་གཅིག་གཟིགས་དང་། དེ་སུ་ལ་ཟུར་ཟ་དང་སུ་ལ་སྣང་ཆུང་བྱ་གི་ཡོད་རེད། དེ་བས་ཀྱང་ཁྱོད་རང་ནས་ན་ནིང་དབུས་གཙང་ཁུལ་ངར་ཤུགས་མི་འདུག་ཅེས་བཤད་ཚེ་བོད་ཀྱི་གནད་དོན་སྤེལ་མཁན་ཞིག་གི་འགན་འཁྲི་རེད་དམ། དབུས་གཙང་ཁུལ་དུ་་ 1959་ ལོ་ནས་བོད་ཀྱི་ས་ཁུལ་ཁག་གི་ལས་འགུལ་གྱི་སྣེ་ཁྲིད་བྱས་ཏེ་ 2008 ལོ་བར་ཐོག་མའི་སྣེ་ཁྲིད་བྱས་ཏེ་དཀའ་ངལ་ག་ཚོད་ཞིག་མྱངས་ཡོད་པ་དང༌། ད་ཆའང་གནས་སྟངས་དེ་ཚོའི་དམ་དྲག་ ཆེན་པོ་འདི་ལྟ་བུའི་ལས་འགུལ་རབ་དང་རིམ་པ་སྤེལ་དང་སྤེལ་བཞིན་ཡོད་སྟབས་ད་ལྟའང་དམ་དྲག་བྱ་མུས་རེད། དབུས་གཙང་ཁུལ་དུ་ངར་ཤུགས་མི་འདུག་ཅེས་བརྗོད་པ་འདི་ནི་རྦད་དེ་ཐལ་དྲག་པ་ཞིག་རེད་བསམ་གྱི་འདུག ང་ཚོ་ ཚང་མས་སྤྱི་པའི་ལས་དོན་བྱ་སྐབས་ཧུར་ཐག་བྱ་དགོས་ཀྱི་ཡོད་ཀྱང་། རྒྱ་གར་ནང་མི་ཁག་ཅིག་གིས་ཞེན་ཁོག་ཡོད་ཁུལ་གྱིས་ད་ལྟ་བོད་ནང་གི་དཀའ་ལས་དངོས་སུ་རྒྱག་མཁན་ཚོའི་བྱས་རྗེས་དེ་ཚོའང་ལུང་ཚན་སོ་སོར་བགོ་བཤའ་བྱས་ཏེ་བོད་མི་ནང་ཁུལ་དུ་རྡུང་རྡེག་གཏོང་རྒྱུའི་ལག་ཆར་བེད་སྤྱོད་བྱེད་པ་དེ་ ཚོ་ནི་དེ་འདྲའི་ཐབས་སྐྱོ་བ་ཞིག་མ་རེད་དམ། ཁྱེད་རང་ནས་ཀྱང་དངོས་ཡོད་ཀྱི་ནོར་འཁྲུལ་དེ་ཚོ་ཤེས་བཞིན་དུ་མུ་མཐུད་འཐུས་ཤོར་བཏང་སྟེ་ད་དུང་དབུས་གཙང་ ཁུལ་དུ་ངར་ཤུགས་མེད་པའི་དཀྲོག་གཏམ་སྤེལ་ཚེ་དེ་ནི་ཁྲེལ་གཞུང་མེད་པའི་སྐད་ཆ་ཞིག་རེད། ཡིན་ནའང་དབུས་གཙང་ཁུལ་དུ་ལས་འགུལ་སྤེལ་བ་མཐའ་དག་རང་དོན་རང་གཅེས་ཀྱིས་སྤེལ་བཞིན་ཡོད་པ་ལས་བཙན་བྱོལ་ནང་ངོ་གསོ་འཁུར་རྒྱུའི་དཔང་རྟགས་བཟོ་རྒྱུ་དེ་དང་པོར་བཞག་གི་མེད་པ་འདི་ཁྱེད་ལྟ་བུས་ཤེས་རྟོགས་མེད་རྐྱེན་དབུས་གཙང་ངར་ཤུགས་མེད་པའི་གཏམ་འཆལ་སྤེལ་བ་ནི་ངོ་མ་བོད་མི་གསར་འགོད་པ་ཞིག་གི་སྐད་ཆ་ཡིན་པར་ངོས་འཛིན་བྱ་སྐབས་བློ་ཕམ་བྱ་དགོས་པ་ཞིག་འདུག ཡིན་ནའང་བོད་ཀྱི་དུས་བབས་ཀྱི་འགྲོ་གྲོན་དང་ལས་ཀ་བྱ་མཁན་ཚང་མ་ཁྱོད་ཚོ་ཕ་ཡུལ་གཅིག་པ་ཤ་སྟག་ཡིན་སྟབས་ག་རེ་བྱས་ཀྱང་ཁྱོད་ཚོའི་རང་དབང་རེད། ཡིན་ནའང་ཁྱོད་རང་ནས་ངེད་གཉིས་བོད་སྐད་རྒྱག་མཁན་གཅིག་པ་ཡིན་པའི་ངོ་ལ་བལྟས་ཏེ་ལམ་སེང་བརྡ་ལན་བྱས་པ་ནི་དེ་འདྲའི་རྣམ་འགྱུར་ལེགས་པོ་ཞིག་མ་རེད་དམ༎
བུད་མེད་ཚོགས་པའི་ངོས་ནས་ཆབ་སྲིད་ཀྱི་ཐོབ་ཐང་རྩོད་ལེན་འཐབ་རྩོདབྱས་དང་བྱ་བཞིན་པ་དེ་ངོ་མ་དགའ་འོས་པ་ཞིག་རེད། ཡིན་ན་ཨ་མ་དེ་དག་གིས་རང་བུ་ཕྲུག་གི་བོད་སྐད་གཙང་མ་ཞིག་མི་ཤོད་པར་སེམས་འཁྲལ་གནང་དགོས་པ་དེ་དེ་བས་ཀྱང་གལ་ཆེ་བར་འདོད། གལ་སྲིད་ནམ་ཞིག་ང་ཚོའི་རང་གི་སྐད་དང་ཡི་གེའི་རྩ་བ་ཆད་པ་ཡིན་ན་བོད་ཀྱི་བུད་མེད་ཅིག་གི་ལུས་བླངས་བ་དེ་དོན་མེད་རེད་འདོད་བྱུང་།
བདེ་བ་ཅན་ལགས། ངས་གོ་སོང་། ཡིན་ཡང་། ཕ་ཡུལ་གྱི་ཞེན་ཁོག་འདུག་ལབ་ན་ངོས་ལེན་བྱ་ཐུབ་པ་མི་འདུག ལས་ཀའི་འཐུས་ཤོར་རེད་ལབ་ན་བདེན་པ་ཡིན་སྲིད། གང་ལྟར་རྣམ་པ་ཚོར་བསམ་ཚུལ་དེ་འདྲ་ཞིག་ཡོད་དུས་ལས་ཀའི་ཕྱོགས་ན་མ་འདང་ས་དང་འཐུས་ཤོར་གྱི་ཆ་ཞིག་ཡོད་སྲིད། ད་བར་གྱི་གནས་ཚུལ་ལ་ལྟོས་ཞིབ་མོར་ལྟོས་དང་ཕྱོགས་རིས་ཀྱིས་བཟི་ཡོད་མེད་ཤེས་གི་རེད་འདོད། ཡིན་ཡང་། ན་ནིང་དོ་ཚིགས་ཨ་མདོའི་ཕྱོགས་ན་ཚ་ཚ་འུར་འུར་གྱི་ལས་འགུལ་སྣ་ཚོགས་ཤིག་སྤེལ་གྱིན་འདུག་ལ། ཁམས་ཕྱོགས་ནའང་དེ་ལྟར་རེད། འོན་ཀྱང་། དབུས་གཙང་ཕྱོགས་ན་དེ་ཙམ་གྱི་ངར་ཤུགས་ཤིག་མི་འདུག འདི་བདེན་པ་ཡིན།
མདོ་དོན་ང་ཚོས་ཉིད་ཀྱི་སེམས་ཁུར་དེར་དང་ལེན་དང་བཅས་ལས་ཀར་ཧུར་ཐག་བྱ་ངེས་ཡིན།
དུས་བབས་རྩོམ་སྒྲིག་པ་ལུང་རིགས་རྒྱལ་ལགས། ཁྱེད་རང་དངོས་གནས་གསར་འགོད་པ་ཚད་ལྡན་ཞིག་ཡོང་རྒྱུར་ངས་རེ་བ་ཆེན་པོ་བྱ་གི་ཡོད། འོན་ཏེ་ཁྱེད་རང་ཡང་ད་ལྟ་རྦད་དེ་ཕ་ཡུལ་གྱི་ཞེན་ཁོག་གིས་བཟི་ནས་བསྡད་འདུག ཨ་མདོ་ཁུལ་གྱི་མི་སྣ་རེ་ཟུང་བོད་ནང་གནས་ཚུལ་ཆུང་རྩག་ཞིག་བྱུང་ནའང་ལམ་སེང་དྲ་གནས་ཐོག་བཏོན་པ་དང་། གླེང་སློང་སྤེལ་ཐབས་བྱེད་པ་ལས་ཁམས་དང་དབུས་གཙང་ཁུལ་གྱི་མི་སྣ་དེ་ཚོ་སྲོག་ཤོར་བ་དང་སྲོག་ཉེན་ལ་ཐུག་པའི་ཁྲིམས་ཆད་བཏང་བའི་གནས་ཚུལ་རླུང་འཕྲིན་ཁག་གི་ནང་དུ་ཐོན་བཞིན་འདུག་ཀྱང་། ཁྱོད་ཀྱིས་དེར་བཀོད་ཐབས་མ་བྱེད་པ་འདི་བོད་ཀྱི་དུས་བབ་དེ་ཨ་མདོའི་དུས་བབས་ཞིག་ཏུ་གྱུར་ཐབས་བྱ་རྒྱུའི་དམིགས་ཡུལ་ཡིན་ནམ། ང་ཚོས་བལྟས་ན་དེར་རྒྱུ་མཚན་རྩ་བ་ནས་མི་འདུག བོད་ནང་གི་བོད་མི་དེ་ཚོས་འདི་གར་དེ་ལྟ་བུའི་ཞེན་ཁོག་དང་འཐེན་འཁྱེར་གྱི་ལག་པ་ཡོད་པ་ཤེས་ཀྱི་མེད་པས། ལས་འགུལ་སྤེལ་བ་ཐམས་ཅད་བོད་མི་སྤྱི་ཡོངས་སུ་ཕན་པར་བྱ་གི་ཡོད། འོན་ཏེ་ཁྱོད་ལྟ་བུའི་དེ་ལྟའི་ཕྱོགས་ཞེན་བྱེད་དགོས་དོན་གང་ཡིན་ནམ། དངོས་གནས་ཁྱོད་རང་ཡི་གེ་ཤེས་པའི་ཤེས་ཡོན་ཅན་ ཞིག་ཡིན་པར་ང་ཐེ་ཚོམ་སྐྱེས་བྱུང་། ཚང་མར་གདུང་སེམས་མཉམ་སྐྱེད་མཚོན་ཆེད་གནས་ཚུལ་སྤེལ་ན་གང་འདྲ་མི་འདུག་གམ། གཙོ་བོ་འགྲོ་གྲོན་ཁྱོད་ཚོས་འཚལ་ནས་དཀའ་ལས་ཁྱོད་ཚོས་རྒྱག་གི་ཡོད་ཙང་ཁྱོད་རང་སྣང་བ་གང་སྐྱིད་པ་དེ་འགྲིག་ན་འགྲིག་གི་ཡོད་ཀྱང༌། ཁྱོད་ཚོས་དྲ་གནས་དེ་ཚོ་བོད་ནང་བལྟ་ཐུབ་ཀྱི་ཡོད་མདོག་མདོག་བྱ་གི་ཡོད་ཙང་སྤྱི་ལ་ཕན་པ་ཞིག་བྱས་ན་གང་འདྲ་འདུག
བུད་མེད་ཚོ་ལ་ང་ཚོ་ལས་ཐོབ་ཐང་དང་འོས་འགན་ལྷག་མ་གཅིག་ཡོད་རེད་ད། ཨ་མ་བཟང་བོ་ཞིག་བྱེད་རྒྱུ་དེ་རེད། ཁྱིམ་ཚང་ནང་ཁུལ་གྱི་གནས་ཚུལ། ང་ལ་ཉམས་མྱོང་ཆེན་པོ་ཡོད་རེད། ནང་གཅིག་ནས་ཕར་ལྟ་ན་ཕོ་ཚོའི་དབང་ཤུགས་ཆེ་བ་འདྲ་བོ་མཐོང་གི་འདུག་མ་གཏོགས་དོན་ངོ་མ་དབང་ཆ་ཡོད་ཚད་མོ་ལ་ཤོར་འགྲོ་ཡ། བུ་ཕྲུག་ཚོར་རྔན་པ་ག་རེ་ཉོས་དགོས་དང་གྱོན་ཆས་ག་རེ་ཉོ་དགོས་སོགས་མང་ནི་རེད་ཡ །
གལ་སྲིད་ང་རང་བོད་ཀྱི་བུད་མེད་ཅིག་ཡིན་པའི་དབང་དུ་བཏང་ན། ཐོབ་ཐང་རྩོད་རྒྱུ་ལས་ལེན་ཕྱོགས་ལ་འབད་པ་བྱེད་ངེས་ཡིན། ཁ་བཤད་ལས་ལག་ལེན་གྱི་ཐོག་ནས་རྩོད་ལེན་བྱེད་ངེས་ཡིན། ཕྱི་རྣམ་ལས་ནང་གི་སྟོབས་ཤུགས་རྒྱས་ཐབས་སུ་བརྩོན་ངེས་ཡིན། གཞན་དབང་ལས་རང་དབང་གི་མཁའ་དབྱིངས་སུ་འཕུར་ཨེ་ཐུབ་ལྟ་ངེས་ཡིན། རང་རྟོན་གྱི་གདེང་སྤོབས་རང་གིས་འཚོལ་ཐབས་བྱ་ངེས་ཡིན། ཚོར་ཤེས་ལས་དཔྱོད་ཤེས་ཀྱི་འདུ་ཤེས་རྒྱུན་སྐྱོང་བྱ་ངེས་ཡིན། འདི་ནི་ངས་ཐོག་མར་བོད་ཀྱི་བུད་མེད་སྤྱི་ལ་བཏོན་པའི་ལྷད་མེད་ཀྱི་རེ་འདུན་ཡིན། བོད་ཀྱི་བུད་མེད་ལྷན་ཚོགས་ཀྱི་ལས་དོན་མངོན་གྱུར་ཡོང་བར་ཤོག བོད་ཀྱི་བུད་མེད་རྣམས་རྒྱལ་རྒྱུར་ཅིག བོད་ཀྱི་བོད་མེད་ཀྱི་ནུས་པ་གཟེངས་སུ་ཐོན་པར་ཤོག བོད་ཀྱི་བུད་མེད་རྣམས་ལ་ཐོབ་ཐང་ཡོངས་ཁྱབ་ཡོང་བར་ཤོག བོད་ཀྱི་བུད་མེད་ཀྱི་བྱས་རྗེས་རྡོ་རིང་ངོས་སུ་འཇོག་པར་ཤོག