སྔ་ལོར་བོད་ནང་གི་ས་བྱི་ཞི་རྒོལ་ཆེན་མོའི་རྗེས་འཛམ་གླིང་གི་རྒྱ་རིགས་ཤེས་ལྡན་པ་མང་པོ་ཞིག་གིས་བོད་དོན་སྐོར་ལ་བྲིས་པའི་རྩོམ་ཡིག་ཁག བོད་གཞུང་བདེ་སྲུང་བོད་གནས་ཉམས་ཞིབ་ཀྱི་ཟུང་དྲུང་འཕགས་པ་ཚེ་རིང་ལགས་དང་ཚེ་རིང་ལྷ་མོ་རྣམ་གཉིས་ཀྱིས་ཕྱོགས་སྒྲིག་དང་བདམས་གསེས་བྱས་ཏེ། ཉེ་ཆར་ཕྱི་ཟླ་ ༧ ནང་གློག་རྡུལ་དཔར་གཞིའི་འོད་སྡེར་མཉམ་སྦྱར་གྱི་ཤོག་ངོས་ ༡༣༦༡ ཅན་གྱི་དཔེ་དེབ་སྟོད་སྨད་གཉིས་དཔར་སྐྲུན་བྱས་ཡོད། དཔེ་དེབ་དེའི་ནང་རྒྱ་ནག་སྐམ་ས་ཆེན་མོ་གཙོས་པའི་རྒྱལ་ཁབ་ ༢༠ ཡི་རྒྱ་རིགས་རྩོམ་པ་པོ་ ༣༠༠ ལྷག་གི་རྩོམ་ཡིག་ ༥༠༠ བདམས་བཀོད་བྱས་ཡོད།
ཕྱི་ཚེས་ ༡༡ ཉིན་འདི་གའི་གསར་འགོད་པས་༼ ཕྱི་ནང་གི་རྒྱ་རིགས་ཤེས་ཡོན་པས་བོད་དོན་གླེང་བ་ ༽ ཞེས་པའི་དཔེ་དེབ་ཀྱི་རྩོམ་སྒྲིག་པ་བདེ་སྲུང་བོད་གནས་ཉམས་ཞིབ་ཀྱི་ཟུང་དྲུང་འཕགས་པ་ཚེ་རིང་ལགས་དང་ཚེ་རིང་ལྷ་མོ་ལགས་རྣམ་གཉིས་ལ་རྩོམ་ཡིག་བསྡུ་སྒྲིག་གི་ལས་རིམ་དང་རྩོམ་ཡིག་ཁག་གི་ནང་དོན་སྐོར་ལ་བཅར་འདྲི་ཞུས་སྐབས། ཐོག་མར་ཟུང་དྲུང་འཕགས་པ་ཚེ་རིང་ལགས་ཀྱིས་དཔེ་དེབ་འདིའི་བྱུང་རིམ་ངོ་སྤྲོད་གནང་དོན། རྒྱ་ནག་གཞུང་གིས་འདས་པའི་ལོ་ངོ་དྲུག་ཅུར་ཉེ་བའི་རིང་། བོད་ཐོག་ལ་ནོར་འཁྲུལ་ཅན་གྱི་སྲིད་ཇུས་བཟུང་སྟེ། བོད་མིའི་ཆོས་དང་རིག་གཞུང་། ཡུལ་གོམས་གཤིས་ལུགས། མི་སྒེར་གྱི་བསམ་སྤྱོད་ཚུན་ལ་ཐལ་དྲགས་པའི་སྟངས་འཛིན་བྱས་པར་བརྟེན། སྔར་ལོའི་གསུམ་བཅུའི་དུས་དྲན་རྗེས་བོད་ས་སྟོད་སྨད་བར་གསུམ་དུ་མ་གྲོས་བསམ་པ་གཅིག་མཐུན་གྱིས་ལོ་རྒྱུས་ཐོག་བྱུང་མ་མྱོང་བའི་ཞི་རྒོལ་ཆེན་མོ་ཞིག་བྱུང་བ་རེད། སྐབས་དེར་རྒྱ་ནག་གཞུང་ཕྱོགས་ནས་བོད་མིའི་ཞི་རྒོལ་དྲག་པོའི་ངོ་བོར་བསྒྱུར་ཐབས་དང་། ཕྱི་ཕྱོགས་སུ་བོད་མིའི་ཞི་རྒོལ་༧རྒྱལ་བ་རིན་པོ་ཆེ་དང་བཙན་བྱོལ་བོད་གཞུང་གིས་བརྒྱུད་སྐུལ་བྱས་པའི་འཁྱོག་བཤད་ཚད་ལས་བརྒལ་བ་བྱས་ཡོད་སྟབས། དེ་ལ་རྒྱ་རིགས་ཤེས་ཡོན་པ་མང་པོ་ཞིག་གིས་ཡོ་བསྲང་དང་བདེན་པ་ར་སྤྲོད་བྱས་ཡོད།
ཕྱི་ལོ་ ༢༠༠༨ ཟླ་ ༣ ནས་ ༢༠༠༩ ཟླ་ ༧ བར་རྒྱ་ནག་སྐམ་ས་ཆེན་མོ་གཙོ་བྱས་པའི་ཐའེ་ཝན་དང་ཨ་རི། ཉི་ཧོང་། འཇར་མན། ཧྥ་རན་སི། ཨོ་སི་ཊོ་ལེ་ཡ། ཁེ་ན་ཌ་སོགས་རྒྱལ་ཁབ་ ༢༠ ཙམ་ནས་རྒྱ་རིགས་རྩོམ་པ་པོ་ ༣༠༠ ཙམ་གྱིས་བོད་ཀྱི་གནད་དོན་ཐད། དྲང་བདེན་དང་དངོས་ཡོད། ཕྱོགས་སུ་མ་ལྷུང་བའི་རྩོམ་ཡིག་མང་པོ་ཞིག་བྲིས་ཡོད་པ་ལས་ངེད་གཉིས་ཀྱི་ལག་ཏུ་རྩོམ་ཡིག་ ༨༠༠ ལྷག་རག་པ་ལས་བདམས་གསེས་ཀྱིས་རྩོམ་ཡིག་ ༥༠༠ བསྡུ་སྒྲིག་བྱས་ཏེ་ཐེངས་འདིར་དཔར་སྐྲུན་བྱས་པ་ཡིན། རྩོམ་ཡིག་བདམས་གསེས་བྱེད་ཕྱོགས་ཐད། རྩོམ་ཡིག་རིང་དྲགས་པ་དང་མི་གཅིག་ལ་མང་པོ་ཡོད་པ། རྩོམ་པ་པོའི་མིང་དང་གནས་ཡུལ་ཁ་གསལ་མ་རག་པའི་རིགས་བཅས་འགོད་ཐུབ་མ་སོང་ལ། སྤྱི་ཟླ་ ༧ ཚུན་ལ་རྩོམ་ཡིག་མང་པོ་ཞིག་སླེབས་ཡོད་པ་དག་ཀྱང་འགོད་ཐུབ་ཡོད་པ་མ་རེད། དུས་ཡུན་ཐུང་ཐུང་ནང་བསྡུ་སྒྲིག་བྱས་ཏེ། ཉེ་ཆར་སུད་སིར་རྒྱལ་སྤྱིའི་བོད་རྒྱ་ལྷན་ཚོགས་སྟེང་དེབ་ ༥༠ ཙམ་འཁྱེར་དགོས་བྱུང་བ་རེད། འོན་ཀྱང་། ད་དུང་ང་ཚོས་མུ་མཐུད་དེ་རྩོམ་ཡིག་འཚོལ་བསྡུ་དང་ཕྱོགས་སྒྲིག་བྱ་འཆར་ཡོད། ཅེས་གསུངས་བྱུང་།
དེའི་རྗེས་ཟུང་དྲུང་ཚེ་རིང་ལྷ་མོ་ལགས་ཀྱིས་དཔེ་དེབ་ཀྱི་ནང་དོན་ངོ་སྤྲོད་གནང་དོན། ཐེངས་འདིར་བོད་གཞུང་བདེ་སྲུང་ཉམས་ཞིབ་ཀྱིས་འདི་ལྟ་བུའི་དེབ་ཅིག་དཔར་སྐྲུན་བྱེད་དགོས་པའི་རྒྱུ་མཚན་གང་ཡིན་ཟེར་ན། རྒྱ་རིགས་ཚོས་བོད་དོན་སྐོར་ལ་བྲིས་པའི་རིན་ཐང་ཅན་གྱི་དཔྱད་གཞིའི་ཡིག་ཆ་ཕྱོགས་སྒྲིག་དང་། སྔར་ལོ་བོད་ནང་དོན་རྐྱེན་བྱུང་རྗེས་རྒྱ་རིགས་ཤེས་ཡོན་པ་མང་དག་ཅིག་གིས་བོད་དོན་ཐོག་དྲང་བདེན་གྱི་རྩོམ་ཡིག་སྤེལ་ཡོད་པ་དེ། བོད་པ་ཞིག་གིས་རྩོམ་ཡིག་བརྒྱ་བྲིས་པ་ལས་རྒྱ་རིགས་ཤིག་གིས་རྩོམ་ཡིག་གཅིག་བྲིས་པ་དེ་ལ་རྒྱ་རིགས་མི་དམངས་ཚོས་ཡིད་ཆེས་བྱེད་ཀྱིན་ཡོད་སྟབས། མགོ་སྐོར་འོག་ཚུད་ཡོད་པའི་རྒྱ་རིགས་མི་དམངས་ཚོར་བདེན་པ་ར་སྤྲོད་བྱ་ཆེད་དང་། ༧གོང་ས་མཆོག་དང་བཙན་བྱོལ་བོད་གཞུང་གིས་རྒྱ་རིགས་ཤེས་ལྡན་པ་མང་པོ་ཞིག་གིས་བོད་དོན་ལ་དྲང་བདེན་གྱི་སྐད་ཆ་བཤད་ཡོད། ཅེས་གསུང་གིན་ཡོད་པ་དེའི་དཔང་རྟགས་ལྟ་བུ་རེད། དཔེ་དེབ་འདིའི་ནང་རྒྱ་རིགས་རྩོམ་པ་པོ་སུམ་བརྒྱ་ཙམ་ཡོད་པ་ལས་ ༣༠ ཙམ་རྒྱ་ནག་སྐམ་ས་ཆེན་མོ་ནས་རེད། ཁོང་ཚོ་རྒྱ་ནག་ཆིན་ཧྭ་སློབ་ཆེན་དང་པེ་ཅིན་སློབ་ཆེན། ཧྲན་ཏུང་སློབ་ཆེན་བཅས་ཀྱི་དགེ་རྒན་ཆེན་མོ་དང་། ཁྲིམས་རྩོད་པ། སློབ་ཆེན་གྱི་སློབ་མ། དེ་བཞིན། ཕྱི་རྒྱལ་ཁག་གི་རྒྱ་རིགས་དམངས་གཙོ་དོན་གཉེར་བ་དང་། རང་དབང་གི་སྲིད་དོན་ཉམས་ཞིབ་པ། གསར་འགོད་པ་དང་རྩོམ་སྒྲིག་པ་བཅས་ཀྱང་འདུག ཅེས་དང་།
རྩོམ་ཡིག་ཁག་གི་བརྗོད་བྱ་གཙོ་བོ་བོད་དོན་ཡིན་ནའང་བརྗོད་སྟངས་མི་འདྲ་བ་སྣ་ཚོགས་རེད། ལ་ལས་དབུ་མའི་ལམ་ལ་རྒྱབ་སྐྱོར་བྱེད་ཀྱིན་འདུག་ལ། འགའ་རེ་ཡིས་རང་བཙན་གཙང་མར་རྒྱབ་སྐྱོར་བྱེད་ཀྱིན་འདུག ཁོང་ཚོར་ཐུན་མོང་གི་འདོད་ཚུལ་ཞིག་ཡོད་པ་ནི། རྒྱ་ནག་གཞུང་གིས་གྲངས་ཉུང་མི་རིགས་རྣམས་ལ་འཛིན་པའི་སྲིད་བྱུས་ལ་ནོར་འཁྲུལ་ཆེན་པོ་ཡོད་པ་དང་། ལྷག་པར་དུ་འདས་པའི་ལོ་ངོ་ ༥༠ ལྷག་རིང་གཞུང་གིས་བོད་ཐོག་གཡོན་ཐལ་ཆེ་བའི་སྲིད་བྱུས་ལག་བསྟར་བྱས་པ། གསུམ་གཅིག་བཞིའི་དོན་རྐྱེན་ཐད་གཞུང་གིས་དངོས་བདེན་མིན་པའི་གནས་ཚུལ་དྲིལ་བསྒྲགས་བྱས་ཏེ་རྒྱལ་སྤྱིར་མགོ་སྐོར་བཏང་བ་དང་། ནང་ཁུལ་དུ་བོད་རྒྱ་མི་རིགས་གཉིས་བར་དཀྲུག་ཤིང་བརྒྱབས་པ་སོགས་བརྗོད་འདུག རྩོམ་པ་པོ་མང་ཆེ་བས་༧རྒྱལ་བ་རིན་པོ་ཆེ་ནི་བོད་རྒྱའི་གནད་དོན་སེལ་བྱེད་ཀྱི་ལྡེ་མིག་ལྟ་བུར་ངོས་འཛིན་བྱེད་ཀྱིན་འདུག ཡང་ལོ་རྒྱུས་ཐོག་བོད་དེ་རང་བཙན་གཙང་མ་ཡིན་པ་དང་། བོད་མིར་རང་ཐག་རང་གཅོད་ཀྱི་ཐོབ་ཐང་ཡོད་པ། ཐ་ན་རྒྱ་ནག་གཞུང་མགོ་རྟིང་སློག་དགོས་པའི་བསམ་ཚུལ་འཛིན་མཁན་ཡང་མི་ཉུང་བ་ཞིག་འདུག ཅེས་གསུངས་སོང་།
དྲ་གྲོགས་མགྲིན་པ་ཟབ་མོ་ལགས། དཔེ་དེབ་རྩོམ་སྒྲིག་པ་གཉིས་ཀྱིས་གསུངས་པ་ལྟར་ན། ཁོང་ཚོའི་དམིགས་ཡུལ་གཙོ་བོ། རྒྱ་རིགས་ཚོས་བྲིས་པའི་རིན་ཐང་ཅན་གྱི་རྩོམ་ཡིག་ཁག་དཔྱད་གཞིའི་ཡིག་ཆ་ལྟ་བུར་ཕྱོགས་སྒྲིག་བྱ་རྒྱུ་དེ་ཡིན་ཟེར་ཞིང་། སུད་སིའི་རྒྱལ་སྤྱིའི་བོད་རྒྱ་ལྷན་ཚོགས་སྟེང་དེབ་ ༥༠ ཙམ་བཀྲམས་ཟིན་ཞིང་། ད་དུང་བརྒྱུད་ལམ་འདྲ་མིན་ནས་བོད་ནང་དང་རྒྱ་ནག དེ་བཞིན་འཛམ་གླིང་གི་རྒྱ་རིགས་ཚོ་ལ་གང་ཐུབ་ཀྱིས་འགྲེམ་འཆར་ཡོད་ཟེར། ཨོ་་་་སྐུ་ཉིད་ཀྱིས་གཟིགས་འདོད་ན། དྲ་ཚིགས་ནང་སྔར་ནས་བཞག་ཡོད་པ་རེད། ( http://www.xizang-zhiye.org/b5/arch/books/lxz/book%20master%20page%201361.pdf )
ལས་ཀ་བྱས་ཚར་དུས་སྐྱོན་བརྒྱབས་ན་ཆོ་ཡོད་པ་མ་རེད། དེ་ལས་འདི་བེད་སྤྱོད་ཡག་པོ་ཞིག་གཏོང་ཕྱོགས་ལ་བསམ་བློ་གཏོང་དགོས་པ་རེད།
ཡིན་ཡང་། བསམ་ཚུལ་གཅིག་ཞུ་ན་འདོད་བྱུང་། གངས་སྐྱིད་ནས་ག་དུས་ཡིན་ཡང་ལས་ཀ་ཆོ་མེད་པ་དེ་འདྲ་རྐྱང་བྱེད་གི་རེད། དཔེར་ན། ད་རེབ་ཀྱི་དེབ་འདི་བཏོན་ནས་གང་ལ་འགྲེམ་རྩིས་རེད། བོད་པ་ཚོར་དམིགས་ཡོད་ན་བོད་ཡིག་ནང་དུ་སྒྱུར་དགོས་པ་རེད། ཆབ་སྲིད་ཀྱི་ལྟ་སྟངས་ཐད་ནས་བོད་པ་ཚོར་མིག་གསལ་བོ་ཞིག་དགོས་པ་དངོས་ཡོད་རེད། ཐ་ན་རྒྱ་མི་ཚོས་བོད་ལ་ལྟ་སྟངས་གང་ཡོད་དེའང་བོད་མི་ཚོས་ཤེས་གི་ཡོད་པ་མ་རེད། དེར་བརྟེན་བོད་ཡིག་ནང་བསྒྱུར་བཞག་ན་ཕན་ཐོགས་ཡོད་པ་རེད།
གཉིས་པ་དེར། རྩོམ་དེ་དག་དེབ་གཟུགས་སུ་འགོད་པ་ལས་དྲ་ཚིགས་ཤིག་བཟོས་ཤིང་། དེའི་ནང་དུ་རྒྱ་རིགས་ཤེས་ཡོན་པ་དག་གིས་བོད་ཐོག་བྲིས་པའི་རྩོམ་རྣམས་བཀོད་བཞག་ན་ཕན་ཐོགས་ཆེ་གི་རེད། རྩོམ་འདི་དག་ཙམ་མིན་པར་རྗེས་ཕྱོགས་ཀྱང་རྩོམ་དེ་དག་མུ་མཐུད་ནས་བཀོད་ན་འགྲིག་གི་རེད། འདི་དག་ལ་བསམ་བློ་མི་གཏོང་བར་རྩོམ་ཡིག་ ༧༠༠ ནང་ནས་ ༥༠༠ ཞིག་ཟུར་དུ་དེབ་གཟུགས་ལ་བཀོད་ནས་ཅིག་ལ་འགྲེམ་རྩིས་བྱས་པ་ནི་སླར་ཡང་གངས་སྐྱིད་ཀྱི་ནོར་འཁྲུལ་རེད་འདོད།
རྣམ་པ་གཉིས་ཀྱི་གྲུབ་འབྲས་དང་ཤེས་ནུས་ལ་གུས་བརྩི་ཡོད་ལ། རྗེས་ཕྱོགས་ཀྱང་བོད་རྒྱའི་མི་མང་གི་གོ་རྟོགས་དང་མཐུན་སྒྲིལ་ཡོང་ཐབས་སུ་འདི་ལྟ་བུའི་ལས་གཞི་དུས་ནས་དུས་སུ་དང་ཡང་ནས་ཡང་དུ་ལྷག་བསམ་དང་འགན་ལེན་གྱིས་འབད་སྤུངས་བྱེད་རྒྱུར་རེ་འདུན་ཡང་ཞུ་བ་ལགས།
དཔེ་དེབ་དེ་རྩོམ་སྒྲིག་གནང་མཁན་འཕགས་པ་ཚེ་རིང་དང་། ཚེ་རིང་ལྷ་མོ་གཉིས་ལ་བཀའ་དྲིན་ཞུ། འཐན་པའི་དུས་ཀྱི་ཆར་ཆུ་དང་སྐོམ་པའི་མི་ལ་བདུད་རྩི་བཞིན་རེ་བའི་ང་ཚོ་བོད་ནང་གི་བོད་མི་ཚོས་དཔེ་དེབ་དེ་ཀློག་རྒྱུའི་སྐལ་བ་ལྡན་ནམ། དཔེ་དེབ་རྩོམ་སྒྲིག་པ་ཚེ་རིང་ལྷ་མོས་༼བོད་པ་ཞིག་གིས་རྩོམ་ཡིག་བརྒྱ་བྲིས་པ་ལས་རྒྱ་རིགས་ཤིག་གིས་རྩོམ་ཡིག་གཅིག་བྲིས་པ་དེ་ལ་རྒྱ་རིགས་མི་དམངས་ཚོས་ཡིད་ཆེས་བྱེད་ཀྱིན་ཡོད།༽ཅེས་བརྗོད་པ་ལྟར། དགོས་མཁོ་དང་ཕན་ཡོན་གྱི་ཆ་ནས་ཀྱང་དཔེ་དེབ་འདི་ཀྲུང་གོའི་ནག་ལོགས་ས་ཁུལ་དང་། བོད་ཡུལ་མདོ་དབུས་ཁམས་གསུམ་ལ་ཤིན་ཏུ་གལ་འགེངས་ཆེ། གློག་རྡུལ་དཔར་གཞིའི་འོད་སྡེར་ཡོད་ན། བརྡ་འཕྲིན་དང་ཆ་འཕྲིན་གང་རུང་གི་ལམ་ནས་བོད་ནང་གི་མི་རེ་ཟུང་ལ་སྤྲོད་ཐབས་བྱོས་དང། བོད་ནང་ནས་ཁྱབ་གདལ་དུ་གཏོང་རྒྱུ་ང་ཚོའི་འོས་འགན་ཡིན། གུས་མོའི་ཡིག་སྒམ་ ( dolmatsering@yahoo.com )
གནད་དོན་འདི་འདྲ་ཞིག་གི་ཐོག་ནས་༸ གོང་ས་སྐྱབས་མགོན་ཆེན་པོ་དང་། བཙན་བྱོལ་བོད་གཞུང་གི་མིང་དོན་མཚུངས་པའི་རང་སྲིད་རང་སྐྱོང་གི་གནས་བབ་སྐོར་གླེང་བཞིན་ཡོད་པ་འདི་ཡང་དག་པའི་སྲིད་བྱུས་དང་ཐབས་ལམ་ཞིག་ཡིན།
བོད་ཀྱི་གཏམ་དཔེ་གཅིག་ལ། ཐག་རིང་གི་གཉེན་ལས་གྲོང་པའི་དགྲ་དགའ། ཟེར་བ་ལྟར་ལེ་བ་ཁྲི་སྟོང་གི་སར་ཡོད་པའི་གཉེན་གཅིག་ལས་རང་གི་ཉེ་སར་ཡོད་པའི་དགྲ་བོ་གཅིག་དེ་དངོས་ཡོད་དཀའ་ངལ་འཕྲད་དུས་ཁེ་ཕན་ཆེ་བ་ཡོད
དེར་བརྟེན་བར་ཐག་ཤིན་ཏུ་རིང་བའི་ཕྱི་རྒྱལ་སྟོབས་ཆེན་གྱི་རྒྱལ་ཁབ་ཁག་དང་། ཕྱི་སྡོད་རྒྱ་རིགས་ཀྱི་བློ་མཐུན་ཚོ་ཅན་ཚོས་ང་ཚོར་ག་ཚད་ཀྱི་བློ་ཉེ་ཡོད་ཀྱང་དོན་དངོས་ཐོག་ཁེ་ཕན་མེད།
རྒྱ་ནག་གམ་ཀྲུང་གོ་སྲིད་གཞུང་ག་ཚོད་ཀྱི་དགྲ་བོ་ལྟ་བུར་སྡུག་ཀྱང་ང་ཚོའི་ཁྱིམ་མཚེས་ཀྱི་རྒྱལ་ཁབ་གཅིག་ཡིན་པའི་ཆ་ནས་ང་ཚོའི་དཀའ་ངལ་དེ་སེལ་བར་རྒྱ་ནག་སྲིད་གཞུང་ལས་ལྷག་པ་གཅིག་ཀྱང་མེད་སྟབས། ང་ཚོས་པེ་ཅིང་སྲིད་གཞུང་ལ་བློ་ཐག་ཉེ་བའི་གྲོགས་པོ་དང་། མཐུན་སྒྲིལ། བསྟུན་མཁས་ཀྱི་འབྲེལ་ལམ་གཙོ་བོར་བཟུང་དགོས་པ་དེ་གནད་ཀྱི་དམ་པ་ཞིག་ཡིན།
ཕྱི་སྡོད་རྒྱ་རིགས་ཀྱི་ཤེས་ཡོན་པས་བོད་དོན་ཐོག་ཇི་ཙམ་གླེང་ནའང་ང་ཚོར་དོན་དངོས་ཐོག་ཁེ་ཕན་གང་ཡང་མེད། དེས་བས་ང་ཚོས་བཞུགས་སྒར་རྡ་ས་ནས་ཡིད་གཟབ་བྱས་ཏེ་ནང་སྡོད་རྒྱ་ནག་པི་ཅིང་གི་གཞུང་ལ་དོ་ཕོག་མེད་པའི་འབྲེལ་ལམ་དང་། གང་ཐུབ་ཀྱི་བསྟུན་མཁས་བྱེད་ཐུབ་ན་ཁེ་ཕན་ཆེ།
ང་ཚོས་རྒྱ་ནག་གི་ས་ཁོངས་ནས་ལེ་བ་ཁྲི་འབུམ་གྱི་བར་ཐག་ཆོད་པའི་བློ་ཉེ་བའི་ཕྱི་རྒྱལ་གྱི་རྒྱལ་ཁབ་ཁག་དང་། ཕྱི་སྡོད་རྒྱ་རིགས་ཤེས་ཡོན་ཅན་གྱི་གྲོགས་པོ་ཚོར་ང་ཚོས་རེ་བ་གཏན་ནས་བཅང་མི་རུང་།
དེ་ལས་བཞུགས་སྒར་རྡ་ས་ནས་ཡོད་གཟབ་བྱས་ཏེ་བར་ཐག་ཉེ་བའི་ནད་སྡོད་རྒྱ་ནག་གི་དབུས་སྲིད་གཞུང་དང་། རྒྱལ་ནང་མི་དམངས་ལ་འབྲེལ་ལམ་གྱི་དམིགས་ཚད་ངེ་ཅན་ཞིག་བཟུང་ཐུབ་ན་ང་ཚོར་གཐར་ཐུག་གི་རེ་འབྲས་ལ་མངོན་གྱུར་གྱི་ཁེ་ཕན་ཡོད།
རྣམ་པ་གཉིས་ཀྱི་མཛད་རྗེས་ལ་ཡི་རང་ཡོད་པ་མ་ཟད་བལ་ཡུལ་ནང་རྒྱ་རིགས་གནས་སྡོད་འགྲོ་འོང་བྱ་མཁན་མང་པོ་ཡོད་པས་གུས་པ་སྐར་མ་ཁྲི་བཙན་དགོས་པ་རེ་འབྱུང་ན་རང་ནུས་གང་ཡོད་ཀྱི་རམ་འདེགས་བྱེད་ངེས། རྒྱ་རིགས་དེ་ཚོར་སྐད་རིགས་ཀྱི་བརྡ་མི་འཕྲོད་པའི་སེམས་ཁྲལ་མེད། དྲ་ཐོག་ནས་གུས་པར་འབྲེལ་བ་བྱེད་ན་འགྲིག་གི་རེད།
ཁྱེད་རང་གཉིས་གཙོ་མཛད་པའི་ཤེས་ཡོན་པ་དག་ལ་རྗེས་སུ་ཡི་རང་ཡོད།
རྒྱ་རིགས་མཁས་པ་དེ་ཚོའི་ཁྲོད་ནས་བོད་ལ་དངོས་སུ་འགྲོ་མྱོང་མཁན་དང་། ༸གོང་ས་མཆོག་དངོས་སུ་མཇལ་ཏེ་གསུང་ཐོས་མྱོང་མཁན་ཚོའི་རྩོམ་ཡིག་ལ་བདེན་པའི་རིན་ཐང་ལྷག་པར་ཆེ་རྒྱུ་རེད། དེ་མིན་ཡིག་ཆ་དང་ཡིག་ཆ་ཀློག་པ་ཁོ་ནའི་ཐོག་ནས་བྲིས་པའི་རྩོམ་ཡིག་རིགས་ལ་དེ་འདྲ་ཅུང་དཀའ་ཚོད་རེད། སྤྱིར་རྒྱ་བོད་གཉིས་མི་གཤིས་མ་འདྲ་བའི་དབང་གིས་ཕན་ཚུན་གཅིག་གིས་གཅིག་གི་གནས་སྟངས་ཇི་བཞིན་ཤེས་དཀའ།
ཁོང་ཚོའི་ལྟ་ཚུལ་མི་མཐུན་པའི་ཁྲོད་ནས་ཚབ་མཚོན་རང་བཞིན་གྱི་རྩོམ་ཡིག་རེ་བོད་བསྒྱུར་གྱིས་གསར་ཤོག་དང་དྲ་ངོས་སུ་བཀོད་ན་བོད་ཡིག་ཀློག་པ་པོ་རྣམས་ལ་ཕན་སྙམ།
བཀླགས་ཟིན་
ཨ་རོགས། ཁོ་ཚོས་བཤད་པ་དེ་རྒྱ་ཡིག་གི་རྩོམ་ཡིག་ཕྱོགས་སྡེབ་ཅིག་རེད། དེ་བས་ང་ཚོས་བོད་ཡིག་གི་ནང་དུ་ཀློག་ཐུབ་གི་མ་རེད། གལ་སྲིད་མ་བཀླག་ཐབས་མེད་ལྟ་བུ་ཡིན་ན་དབྱིན་ཡིག་གི་ནང་དུ་ཀློག་རོགས། ངས་རྒྱ་ཡིག་དང་དབྱིན་ཡིག་གཉིས་ཀ་ནས་བཀླགས་མྱོང་ཡོད། Google Translate འདིའི་ནང་ལ་འགྲོ་རོགས། གལ་སྲིད་རང་ཉིད་སྐད་ཡིག་ཅིག་ལ་དཀའ་ངལ་མེད་ན་བསྒྱུར་དང་ཁྱོད་ལ་དཀའ་ངལ་ཡོད་པ་མ་རེད། རྗེས་མ་མུ་མཐུད་དཀའ་ངལ་འཕྲད་ན་ང་ལ་བཤད་རོགས།
དཔེ་དེབ་འདི་རྒྱ་ཡིག་ཡིན་ནམ་བོད་ཡིག་ཡིན་བོད་ཡིན་ན་ཆ་ཚང་ཞིག་ཀློག་དགོས།
དེ་རིང་གི་ཉམས་ཞིབ་པ་དེར་ངས་ནི་ནམ་རྒྱུན་འཕགས་པ་རྒྱལ་བོ་ཞེས་འབོད་གིན་ཡོད། དེ་རིང་འཕགས་པ་ཚེ་རིང་ཞེས་བྲིས་ཡོད། སང་ཉིན་ནོར་ཡོད་ན་དག་བཅོས་དང་བཅས་འགོད་གི་ཡིན། དགོངས་དག
བོད་དོན་དུ་སེམས་འཁུར་གནང་མཁན་གྱི་རྒྱ་རིགས་ཤེས་ཡོན་པ་དེ་དག་ལ་བཀའ་དྲིན་ཁྱེད་ཞུ་རྒྱུ་ཡིན་ལ། ལྷག་པར་དུ་ཁྱེད་གཉིས་ཀྱི་ཐུགས་འཁུར་བླ་མེད་གནང་དེ་དཔེ་དེབ་འདི་དཔར་བསྐྲུན་བྱས་པ་དེར་སྙིང་ནས་བཀའ་དྲིན་ཆེ་ཞུ།
རྣམ་པ་གཉིས་ཀྱིས་སྐུ་ངལ་མཛད་མེད་ཀྱི་རིན་ཐང་ཅན་གྱི་དཔེ་དེབ་འདི་དག་འགྲེམས་སྤེལ་བྱེད་པ་ཡི་རངས་དང་བསྔགས་བརྗོད་བྱེད། ཡིན་ན་ཡང་།འགྲེམ་སྤེལ་བྱས་བ་ཙམ་གྱིས་ཕན་ཐོགས་དང་གྲུབ་འབྲས་མངོན་གྱུར་བྱེད་རྒྱུ་ཁག་པོ་རེད། གཙོ་བོ་སྤྱི་ཚོགས་ནང་དུ་བཀྲམ་རྒྱུ་དང་ལྷག་པར་ཏུ་རྒྱ་ནག་གི་ཤེས་ལྡན་མི་སྣ་དང་དེའི་སྤྱི་ཚོགས་ནང་དུ་བཀྲམ་རྒྱུ་གལ་འགངས་ཆེན་པོ་རེད།