གསུང་ཆོས་མགོ་བཙུགས་པ།

ཀོ་རི་ཡའི་ཆོས་གྲོགས་ཚོ་དང་ང་ཚོ་བཅོམ་ལྡན་འདས་ཀྱི་རྗེས་འབྲངས་པ་དང་དགེ་ཕྲུག་ཡིན་པ་གཅིག་མཚུངས་ཡིན་ལ། དཔལ་ནཱ་ལེཎྜའི་ཆོས་རྒྱུད་འཛིན་མཁན་ཡང་གཅིག་པ་ཆགས་ཡོད། ཅེས་༧གོང་ས་མཆོག་གིས་ཕྱི་ཚེས་ ༡༥ ཉིན་གསུངས་སོང་།

ཀོ་རི་ཡའི་དད་ལྡན་མང་ཚོགས་ཀྱིས་ཇི་ལྟར་གསོལ་འདེབས་ཞུས་པ་བཞིན། དེ་རིང་ཞོགས་པའི་ཆུ་ཚོད་ ༩ དང་ཕྱེད་ཀའི་སྟེང་༧གོང་ས་མཆོག་བཞུགས་སྒར་ཕོ་བྲང་ནས་ཐེག་ཆེན་ཆོས་གླིང་གཙུག་ལག་ཁང་དུ་ཆིབས་བསྒྱུར་གནང་སྟེ། ཀོ་རི་ཡའི་དད་ལྡན་མང་ཚོགས་གཙོས། ཨ་རི་དང་དབྱིན་ཡུལ། སི་པན། ཉི་ཧོང་བཅས་ཕྱི་གླིང་བའི་དད་ལྡན་པ་དང་། ངྷ་སར་གནས་སྡོད་བོད་མི་སོགས་དད་ལྡན་མང་ཚོགས་སྟོང་ཕྲག་ལྔ་ལྷག་ལ་ནང་ཆོས་ཀྱི་རྒྱུན་ཤེས་སྐོར་གྱི་གསུང་ཆོས་གནང་ཡོད། སྐབས་དེར། ༧གོང་ས་མཆོག་གིས་གསུངས་དོན། དེ་རིང་ཀོ་རི་ཡའི་ཆོས་གྲོགས་ཚོ་དང་ང་ཚོ་ཚང་མ་འདིར་འཛོམས་པ་དང་ང་ཚོ་ཚང་མ་བཅོམ་ལྡན་འདས་ཀྱི་རྗེས་འབྲངས་པ་དང་དགེ་ཕྲུག་ཡིན་པ་གཅིག་མཚུངས་ཆགས་ཡོད་ལ། དཔལ་ནཱ་ལེཎྜའི་ཆོས་རྒྱུད་འཛིན་མཁན་ཡང་གཅིག་པ་ཆགས་ཡོད། ཁྱེད་རང་ཚོ་ཀོ་རི་ཡའི་ནང་རྒྱ་ནག་བརྒྱུད་དེ་ནང་ཆོས་དར་བ་ཞིག་རེད། དེ་འདྲ་ཞིག་ཡིན་སྟབས། རྒྱ་ནག་གི་ནང་ཆོས་མཁས་པ་དེ་དག་བཅོམ་ལྡན་འདས་ཀྱི་དགེ་ཕྲུག་རྒན་པ་ལྟ་བུ་ཆགས་ཡོད་པ་དང་། ང་ཚོ་བོད་པ་ཚོ་དགེ་ཕྲུག་གཞོན་པ་ཆགས་ཡོད་སྟབས། ང་ཚོའི་ངོས་ནས་ཁྱེད་ཚོར་གུས་འདུད་ཡོད། ཅེས་གསུངས་སོང་།

ཡང་། ༧གོང་ས་མཆོག་གིས་ཀོ་རི་ཡའི་ཐེངས་འདིའི་གསུངས་ཆོས་ཁྲོད་སྔོན་མ་ཡོང་མྱོང་མཁན་དང་ད་ལྟ་གསར་དུ་ཞུགས་མཁན་ཡོངས་ལ་ཚང་རྩིས་ཤིག་བྱས་རྗེས། ཁོང་གིས་ནང་ཆོས་སྐོར་ལ་གསུངས་དོན། ཤེར་ཕྱིན་གྱི་གཞུང་དུ་ཆོས་ཐམས་ཅད་ངོ་བོ་ཉིད་གྲུབ་པའི་སྟོང་བ་རེད། ཅེས་གསུངས་ཡོད་པ་ལྟར། ཕྱིའི་གནས་ཚུལ་ཡིན་ནའང་ངོ་བོ་ཉིད་ཀྱིས་གྲུབ་པའི་སྟོང་བ་དང་། ནང་གི་རྣམ་བཞག་དེའང་ཕ་རོལ་དུ་ཕྱིན་པ་དྲུག་ལ་སོགས་པ་ངོ་བོ་ཉིད་ཀྱིས་གྲུབ་པའི་སྟོང་བ་ཡིན་ཚུལ་དང་། འབྲས་བུ་རྣམ་བཞག་དེ་ཚོའི་གྲས་ཀྱང་ངོ་བོ་ཉིད་ཀྱིས་གྲུབ་པའི་སྟོང་བ་རེད། ཅེས་གསུངས་ཡོད་པ་རེད། ཅེས་དང་། དེ་བཞིན་སངས་རྒྱས་བཅོམ་ལྡན་འདས་ཀྱིས་མངོན་པར་རྫོགས་པའི་སངས་རྒྱས་ནས་གཞུང་དོན་མ་ནོར་བར་བདེན་པ་བཞིའི་སྐོར་སོགས་གསུངས་ཡོད་པ་དང་། དེ་གཞི་ལ་བཞག་པ་དང་དེ་ཉིད་ནང་པ་སངས་རྒྱས་པའི་སྒྲུང་ནང་བཞིན་ཆགས་ཡོད་ཚུལ། དེ་བཞིན་ནང་ཆོས་ཀྱི་སྤྱིར་བཏང་གི་རྣམ་བཞག་སྐོར་ནས་དད་ལྡན་མང་ཚོགས་ལ་ཉིན་གྲངས་གསུམ་རིང་ངོ་སྤྲོད་གནང་རྒྱུ་ཡིན་པ་རེད།

འདི་གའི་གསར་འགོད་པས་ཐེངས་འདིའི་ཀོ་རི་ཡའི་དད་ལྡན་པ་ཚོས་གསོལ་འདེབས་ཞུས་བའི་གསུངས་ཆོས་ཀྱི་བརྗོད་གཞི་ཅི་ཞིག་ཡིན་མིན་དང་། མི་གྲངས་ག་ཚོད་ཅིག་འདུས་ཡོད་མེད་བོད་གཞུང་བདེ་སྲུང་མི་སྣ་ཀུན་དགའ་ལགས་སུ་བཀའ་འདྲི་ཞུས་པར། ཁོང་གིས། ཐེངས་འདིར་༧གོང་ས་མཆོག་གིས་ཀོ་རི་ཡའི་དད་ལྡན་མང་ཚོགས་ལ་སྤྱིར་བཏང་གི་ནང་ཆོས་ཀྱི་སྐོར་ནས་གསུང་ཆོས་གནང་གི་ཡོད་པ་རེད། ཐེངས་འདིའི་གསུང་ཆོས་ཁྲོད་ཀོ་རི་ཡ་གཙོས་ཕྱི་གླིང་བའི་མི་ ༡༣༠༠ ལྷག་དང་། བོད་པའི་དགེ་འདུན་པ་དང་བཙུན་མ་ ༡༤༠༠ ལྷག་འདུས་ཡོད་འདུག ང་ཚོས་ཐོ་འགོད་བྱས་ཟིན་པའི་མི་ ༤༠༠༠ ལྷག་དེ་རིང་འདུ་འཛོམས་བྱུང་ཡོད་ལ། ད་དུང་ཐོ་འགོད་བྱས་མེད་པའི་མི་ ༡༠༠༠ ལྷག་འདུ་འཛོམས་བྱུང་ཡོད་སྟབས། ཐེངས་འདིར་བསྡོམས་མི་ ༥༠༠༠ ལྷག་འདུ་འཛོམས་བྱུང་ཡོད་འདུག ཅེས་བརྗོད་བྱུང།