ངས་རང་གི་ཕ་ཡུལ་གྱི་མི་རབས་རྗེས་མ་དག་གི་མདུན་ལམ་དང་རང་ཉིད་ཀྱི་ཡིག་རྨོངས་སེལ་བའི་སློབ་གྲྭ་དེ་ཉིད་བོད་མི་རིགས་ལ་ཕན་པའི་སློབ་སྦྱོང་གི་བསྟི་གནས་ཤིག་ཏུ་འགྱུར་ཆེད་འདིར་ཡོང་བ་ཡིན་ཟེར།
ཕྱི་ཚེས་ ༧ ཉིན་འདི་གའི་གསར་འགོད་པས་བོད་གཞུང་དབུས་སྣེ་ལེན་ཁང་དུ་བོད་ནས་གསར་དུ་འབྱོར་བའི་ཕ་ཡུལ་གསེར་རྟ་རྫོང་སྙི་ཆུ་ཞང་གནུབས་ཟུར་དགོན་པ་ནས་ཡིན་ཞིང་། ད་ལྟ་རང་ལོ་ ༢༢ ཡིན་པའི་ཆོས་གྲགས་ལགས་སུ། དེང་སྐབས་གསེར་རྟ་ས་ཁུལ་གྱི་་གནས་སྟངས་གང་འདྲ་ཡིན་མིན་ཐད་བཀའ་འདྲི་ཞུས་པར་ཁོས། ང་ཚོའི་དགོན་པ་ནི་གསེར་རྟ་རྫོང་ནས་ལེ་དབར་ཉི་ཤུ་ལྷག་གི་མཚམས་སུ་ཡོད། ལོ་སྔོན་མའི་ཕྱི་ཟླ་ ༦ པའི་ནང་ང་ཚོའི་དགོན་པའི་དགེ་འདུན་པ་གསུམ་གྱིས་བོད་རང་བཙན་གྱི་སྐད་འབོད་བྱས་པ་དང་། དེ་ནས་བཟུང་རྒྱ་གཞུང་གིས། ཁོང་ཚོ་འཛིན་བཟུང་བྱས་ཏེ་ཁྲིན་ཏུའུ་མེན་ཡཱང་བཙོན་ཁང་དུ་བཙོན་འཇུག་བྱས་སོང་ལ། རྗེས་སུ་རྒྱ་གཞུང་གི་དམག་མི་འབོར་ཆེན་སླེབས་ཏེ་ང་ཚོའི་དགོན་པའི་མདུན་རིའི་སྟེང་དུ་དམག་སྒར་ཆུང་ཆུང་ཞིག་བརྒྱབས་ཏེ་ཉིན་མཚན་དབྱེར་མེད་དུ་དྲག་ཆས་རྣམས་དགོན་པར་གཏད་དེ་འདི་ལོའི་ཕྱི་ཟླ་ ༣ པ་བར་དུ་བསྡད་སོང་། དེ་བཞིན། དགོན་པའི་ནང་རྒྱ་གཞུང་གི་ལས་བྱེད་ཡོང་སྟེ། དགེ་འདུན་པ་ཚོར་༧གོང་ས་མཆོག་ལ་མཚན་སྨོད་དང་ངོ་རྒོལ་བྱ་དགོས་པ་དང་། མི་རིགས་ཁ་བྲལ་གྱི་ལས་འགུལ་སྤེལ་མི་ཆོག་པ་སོགས་རྒྱལ་གཅེས་ཆོས་གཅེས་ཀྱི་ལས་འགུལ་སྤེལ་བ་མ་ཟད། དགོན་པའི་ནམ་རྒྱུན་གྱི་ཆོས་ཕྱོགས་ཀྱི་བྱེད་སྒོ་མང་པོ་ཞིག་ལ་བཀག་སྡོམ་ནན་མོ་བྱས་ཏེ་དགོན་པའི་སྤྲུལ་སྐུ་གཙོས་པའི་གྲྭ་བ་ཚོར་གནོན་ཤུགས་གང་མང་སྤྲད་མཐར། གྲྭ་བ་ཚོ་འདུག་མ་ཐུབ་པར་ཕྱི་ཕྱོགས་སུ་འཁྱམས་ཏེ་གར་སོང་གི་གནས་ཚུལ་མི་ཤེས་པ་སོགས་ད་ལྟ་དགོན་པའི་ནང་གྲྭ་བ་ཉུང་ནས་ཉུང་དུ་འགྲོ་བཞིན་པ་དང་། རྫོང་དང་ལེ་དབར་ ༩༠ མཚམས་སུ་ས་གནས་གསུམ་དུ་བསྔོག་བཤེར་གྱི་ས་ཚིགས་གསུམ་བརྒྱབས་ཡོད་པ་དང་། གྲྭ་པ་ཚོ་འགྲོ་དགོས་ཚེ་ངེས་པར་དུ་ཉིན་དེའི་ལས་དོན་གྱི་མགོ་མཇུག་བར་གསུམ་སྙན་སེང་ཞུ་དགོས་པ་མ་ཟད། མི་སེར་གྱི་ཐོབ་ཐང་ལག་འཁྱེར་དང་གྲྭ་པའི་འཛིན་ཡིག་སོགས་སྟོན་དགོས་པ་རེད། གལ་སྲིད་ཡིག་ཆ་དེ་དག་མ་ཚང་བ་ཡིན་ན་དགོན་པ་ནས་རྫོང་ཐོག་ལ་འགྲོ་ཐབས་མེད་པའི་གནས་སྟངས་དེ་འདྲ་ཞིག་ཆགས་ཡོད་པ་རེད། ཅེས་བརྗོད་བྱུང་།
དེ་བཞིན་ཁོང་གིས་ས་ཁུལ་དེའི་སློབ་གྲྭ་ཞིག་གི་སྐོར་བརྗོད་དོན། སྔོན་ཆད་ང་ཚོའི་ས་ཁུལ་དེར་སློབ་གྲྭ་ཞིག་གསར་འཛུགས་བྱས་ཡོད། ཡིན་ནའང། བུ་ཕྲུག་དེ་དག་སློབ་ཆུང་ལོ་རིམ་དྲུག་པ་མཐར་ཕྱིན་ཡང་གསལ་བྱེད་སུམ་ཅུའི་ཀློག་འདོན་ཁོ་ན་ལས་ཐ་ན་རང་གི་མིང་ཡང་འབྲི་དཀའ་ལ། རྒྱ་ཡིག་གི་ལམ་ནས་མིང་འབྲི་མི་ཤེས་པ་ནི་བཤད་མ་དགོས་པ་ཞིག་རེད། རྒྱུ་མཚན་ནི། རྒྱ་གཞུང་གིས་མངགས་གཏོང་བྱས་པའི་དགེ་རྒན་དེ་དག་གིས་ནམ་རྒྱུན་ཟླ་གཅིག་གཉིས་རིང་སློབ་མ་ཚོར་གུང་གསེང་སྤྲད་དེ་ཁྲིན་ཏུའུ་སོགས་གྲོང་ཁྱེར་དུ་འཁྱམས་བསྡད་སྡོད་པ་དང་། སློབ་གྲྭའི་ནང་འཛིན་རིམ་ཆེ་ཆུང་དབྱེར་མེད་ཀྱི་སློབ་མ་ཚང་མ་སློབ་ཁང་གཅིག་ཏུ་བཅུག་རྗེས་ཕྱུགས་ཟོག་ནང་བཞིན་ཕྱི་ནས་བལྟས་བསྡད་ཡོད་ལ། མཚམས་རེར་མི་གཞན་ལ་དངུལ་སྤྲད་དེ་སློབ་གྲྭ་གཞན་ལ་བཅོལ་རྗེས་གང་སར་འཁྱམས་ཏེ་ཉི་མ་འཁྱོལ་ཐབས་བྱེད་ཀྱིན་པ་ལས་བྱིས་པ་དེ་དག་གི་མདུན་ལམ་ལ་བསམ་བློ་ཅི་ཡང་གཏོང་གི་མི་འདུག་ལ། སློབ་ཆུང་ནས་མཐར་ཕྱིན་ཏེ་དམའ་འབྲིང་དུ་ཆས་བའི་སློབ་མ་དེ་དག་ལའང་དམིགས་བསལ་གྱི་སློབ་སྦྱོང་ཞིག་རག་གིན་མེད་པར། ཐ་མ་འཐེན་པ་དང་འཁྱམ་ཉུལ་བྱེད་པ་སོགས་ཀྱི་གོམས་གཤིས་ཤིག་འཇགས་ཡོད། ཕ་མ་ཚོས་ཀྱང་བུ་ཕྲུག་ཚོར་སློབ་སྦྱོང་རག་གིན་མེད་པའི་གནས་ཚུལ་ཤེས་ཏེ་བྱིས་པ་སློབ་གྲྭར་མི་གཏོང་བར་ཚང་མ་ཕྱུགས་རྫི་ལ་མངགས་ཀྱིན་འདུག གནས་ཚུལ་དེ་དག་སེམས་ཀྱིས་མ་གཟོད་པར་ང་རང་རྒྱ་གར་དུ་ཡོང་བ་ཡིན་ལ། ངས་མ་འོངས་པར་ཕ་ཡུལ་གྱི་མི་རབས་རྗེས་མའི་མདུན་ལམ་དང་རང་ཉིད་ཀྱི་སློབ་གྲྭ་ཆུང་ཆུང་དེ་སེམས་ལ་བཅངས་ཏེ་འདིར་ཡོང་བ་ཡིན། ཉེ་བའི་ལོ་འགའི་སྔོན་ཕྱི་གླིང་བ་ཞིག་གི་རོགས་སྐྱོར་འོག་ང་དང་གྲྭ་བ་གསུམ་ལྷག་མཉམ་རུབ་ཀྱི་ཕ་ཡུལ་དུ་ཡིག་རྨོངས་སེལ་བའི་སློབ་གྲྭ་ཞེས་པའི་ཁང་པ་ཆུང་ཆུང་ཞིག་བརྒྱབས་ཡོད་ལ། ང་ཚོའི་སློབ་གྲྭ་དེ་ནི་ཆེ་བ་རང་ལོ་ ༥༠ ནས་ཆུང་བ་ལོ་དྲུག་གི་སློབ་མ་ཡོངས་ལ་ཡིག་རྨོངས་སེལ་ཆེད་གསར་འཛུགས་གནང་བ་ཡིན་ལ། ད་ལྟའི་ཆར་སློབ་གྲྭ་ཆུང་ཆུང་དེ་རུ་བྱིས་པ་ ༢༠ དང་དགེ་རྒན་གཉིས་ཡོད། སློབ་གྲྭའི་ནང་བོད་ཡིག་གི་ཡིག་རྨོངས་སེལ་བ་དང་ཆབས་ཅིག་སུམ་རྟགས་དག་གསུམ་སོགས་འཁྲིད་ཀྱིན་ཡོད་པ་ལས་རྒྱ་ཡིག་དང་དབྱིན་ཡིག་སོགས་ཅི་ཡང་མེད། རྒྱུ་མཚན་ནི། སྤྱིར་ང་ཚོ་འབྲོག་ཁུལ་ཡིན་པ་དང་ཁོར་ཡུག་གི་ཆ་རྐྱེན་སོགས་གནས་ཚུལ་གང་མང་ཞིག་གིས་དགེ་རྒན་རག་ཁག་པོ་ཆགས་ཡོད་ལ། དེ་བཞིན་རྒྱ་གཞུང་གི་སློབ་གྲྭར་ཆོག་མཆན་མེད་པ་སོགས་གནོན་ཤུགས་འོག་མཐུན་རྐྱེན་མ་འཛོམས་པ་སོགས་ཀྱི་རྐྱེན་ཡིན་འདུག ཅེས་བརྗོད་བྱུང་།
དམ་བཅའ་གཏན་པོ་ཡོང་བའི་རེ་བ་དང་། ཁ་མིག་ཡར་ལྟ་བྱེད་དགོས་པའི་སྐུལ་མ་ཞུ།
རིང་ན་ལོ་གཅིག ཐུང་ན་ཟླ་དྲུག གང་ལྟར་ཁྱེད་ཀྱི་སེམས་ཤུགས་དེ་བཙན་བྱོལ་བ་ཚོས་གཅོག་སེམས་ཐག་ཡིན། སྙིང་རྗེ། དང་པོ་བོད་ནས་ཡོང་སྐབས་སེམས་ཤུགས་ཆེན་པོ་ཁུར། རེ་བ་ཆེན་པོ་ཞིག་བརྒྱབས་ནས་ཡོང་བ་རེད། འོན་ཀྱང་། བཙན་བྱོལ་བོད་གཞུང་གི་ལས་བྱེད་པ་ཚོས་རང་དོན་ཁོག་བཅུག་གི་ལས་ཀ་བྱེད་སྟངས་དང་། གཞིས་ཆགས་རྙིང་པ་ཚོས་གསར་འབྱོར་བ་ཞེས་འཕྱའ་དམོད་རེ་རེ་མཐོང་དུས། ཁྱོད་ཀྱིས་ཁུར་བའི་སེམས་ཤུགས་སྐད་ཅིག་ཙམ་མེད་ཐག་གེར་འགྱུར་འགྲོ། ཡིན་ན་ཡང་། ༧གོང་ས་མཆོག་གི་བཀའ་སློབ་ལམ་སྟོན་དག་གིས་ཁྱོད་ལ་གསོན་ཤུགས་ཤིག་སྤྲད་ནོ་སེམས་ཐག་ཡིན། སྐྱབས་སུ་མཆི། ཁོང་གཅིག་བུའི་བཀའ་དྲིན་མིན་རྒྱུ་ན།
བཟང་གི། སཻམས་ཤུགས་ཆེན་པོ་ཁུར་ནས་ཡོང་འདུག རྗེས་སུའང་དེས་རྒྱུན་སྐྱོང་རྒྱུ་མ་བརྗེད་ན་ཡག་པོ་འདུག
སེམས་ཤུགས་ལ་རྗེས་སུ་ཡི་རེང་ཡོད།ད་སྐབས་ཀྱི་སེམས་ཤུགས་དེ་མུ་མཐུན་དུ་གནས་ཐུབ་པ་ཞིག་དང་དེ་ལས་དཔག་པའི་ནུས་བ་ཞིག་ཡོང་ཐུབ་པའི་སྨོན་འདུན་ཞུ།
དངོས་གནས་ཡག་པོ་རེད་མི་རིགས་ལ་ཤ་ཞེན་ཡོད་པའི་སྐད་ཆ་རེད་ཐུགས་རྗེ་ཆེ།
སེམས་ཤུགས་རི་བོ་འདྲ་ཞིག་འཁུར་ནས་ཡོང་མཁན་གྱི་གཞིས་ལུས་པ་སུ་ཞིག་ཡིན་ཡང་རང་གིས་རང་ལ་ནམ་ཡང་སྐུལ་ལྕགས་བྱས་དེ་བསྐྱོད་རྒྱུར་རེ་སྐུལ་དང་བཅས་ཁོང་ཉིད་ལྟ་བུའི་བོད་ཞེན་གཙང་མ་གཉེར་མཁན་མི་ཉུང་བ་ཞིག་བྱེས་སུ་ཡང་འཚར་ལོངས་བྱུང་ཐུབ་པར་ཤོག
ཧཧཧ བལ་ཡུལ་སྣེ་ལེན་ཁང་ནས་ངས་ཁོ་ཤས་ཀྱི་ཡོད། བཀྲ་ཤིས་བདེ་ལེགས་ཡོད་ད
ཧ་ཧ།
ལོ་ཤས་རྗེས་མག་པར་ཕེབས་ཀྱང་མཆོག་གི་རེད་འོན་ཀྱང་སེམས་ཤུགས་དེ་ཾརང་ཚུགས་ཟིན་པ་ཞིག་བྱུང་ན་དེ་བས་འགྲིགས་པ་རེད།་་་་
ངོ་མ་དམིགས་ཡུལ་ཡག་པོ་རེད་ཧ་ཅང་བཟང་གི། འོན་ཀྱང་ལོ་ཤས་རྗེས་ནས་མག་པ་མ་སོང་ན།