ཡིག་ནོར་ ༨༣ ཅན་ཞིག ཨ་རིག་འགྱུར་མེད།

ཡིག་ནོར་ ༨༣ ཅན་གྱི་བོད་ཡིག་གི་དྲི་ཤོག
ཨ་རིག་འགྱུར་མེད།

༸གོང་ས་མཆོག་གིས་དུས་རྒྱུན་འབྱུང་འགྱུར་བོད་ཀྱི་མི་རབས་གསར་བ་རྣམས་ལ་ཐུགས་རེ་ཆེན་པོ་གནང་གི་ཡོད་ལ། མགོ་བཀའ་ཤག་ནས་མཇུག་མང་ཚོགས་དཀྱུས་མ་བར་དུའང་ད་ལྟ་སློབ་གྲྭར་འགྲིམ་བཞིན་པའི་ན་གཞོན་སློབ་ཕྲུག་རྣམས་ནི་འབྱུང་འགྱུར་བོད་ཀྱི་བདག་པོ་ངོ་མ་དེ་ཡིན་པར་འགྲེལ་གྱིན་ཡོད། ཡིན་ནའང་། ང་ཚོས་ངོས་ནས་འབྱུང་འགྱུར་བོད་ཀྱི་སོན་རྩར་གྱུར་བའི་ད་ལྟའི་ན་གཞོན་སློབ་ཕྲུག་དག་ལ་བདག་སྐྱོང་དང་ཤེས་རིག་གི་འོ་ཞོ་ཚད་ལྡན་ཞིག་ལྡུད་ཐུབ་ཀྱི་ཡོད་དམ།

ད་ལྟ་ངའི་ལག་ཏུ་སྦེལ་ཀོབ་ལུགས་ཟུང་བསམ་འགྲུབ་གླིང་ཉིན་སློབ་ཀྱི་བོད་ཡིག་གི་དྲི་ཤོག་ཅིག་ཡོད་ལ། དྲི་ཤོག་དེ་ནི་ཟླ་སྔོན་མའི་ཟླ་མཇུག་ཏུ་ལོ་ཕྱེད་ཡིག་རྒྱུགས་གཏོང་སྐབས་ཀྱི་འཛིན་རིམ་བཅུ་བའི་དྲི་ཤོག་ཅིག་ཡིན།

དྲི་ཤོག་འདིའི་མགོ་རུ་ Central School For Tibetan Bylakuppe Half Yearly Class X Subject Tibetan.ཞེས་བྲིས་ཐོག དེའི་ཟུར་དུ་ M.M. 100 ཞེས་དབྱིན་ཡིག་སྟེང་ཨང་ཐོབ་བྲིས་ཡོད། བོད་ཡིག་གི་དྲི་ཤོག་ཅིག་ཡིན་སྟབས་གོང་གི་མགོ་བརྗོད་དང་ཨང་ཐོབ་ཀྱི་དབྱིན་ཡིག་དེ་གཉིས་ཀྱང་མིག་ལ་བདེ་བོ་མི་འདུག

དྲི་བ་སྡེ་ཚན་ཀ་བའི་མགོར། Grammar སུམ་ཅུ་པ་ལས་རང་མོས་དྲི་བ་བརྒྱད་ལ་ལན་དྲིས་ ༼ བྲིས། ༽ ཞེས་དགོས་མེད་ཀྱི་དབྱིན་ཚིག་ཅིག་གིས་མགོ་བརྩམས་ཏེ། ནང་གསེས་སྡེ་ཚན་དང་པོར། རྣམ་དབྱེ་བར་ ༼ སྐབས་འདིར་བར་ཞེས་པ་དགོས་མེད་ཡིན། ༽ བརྒྱད་ངོས་འཛིན་ ༼ བཟུང་ ༽ ནས་དཔེར་བརྫོད་ ༼ བརྗོད་ ༽ རེ་བྲིས་ ༼ བྲིས། ༽ ཞེས་པ་དང་དྲི་བ་གཉིས་པར། དགག་སྒྲའི་ཚིག་ཕྲད་མ་མི་མིན་མེད་བཞི་བ་དཔེར་བརྫོད་ ༼ བརྗོད་ ༽ བྲིས་ ༼ བྲིས། ༽ དྲི་བ་ལྔ་བར། ལ་དོན་གྱི་ཕྲད་རྣམས་འཇུག་ལྔ་ ༼ འཇུག་ཡུལ་ལྔ་ ༽ གང་དང་གང་རེད་ ༼ རེད། ༽ དྲི་བ་དྲུག་པར་། སྔོན་འཇུག་ ༼ གའི་མཇུག་གི་ཚེག་མི་དགོས། ༽ ཡང་འཇུག་སོ་སོའོ་ ༼ སོའི་ ༽ ཞེས་པ་དང་དྲི་བ་བཅུ་བར། འབྱེད་སྡུད་ཀྱི་ཚིག་ཕྲད་ངོས་འཛིན་ ༼ བཟུང་ ༽ ཏེ་དཔེར་བརྗོད་རེ་བྲིས་ ༼ བྲིས། ༽ སོགས་སྡེ་ཚན་ཀ་བའི་ནང་དུ་དྲི་བ་བཅུ་ཡོད་པ་ལས་སུམ་ཅུ་བའི་འགྲོ་སྟངས་ལྟར་ཤད་འཇོག་དགོས་སར་ཤད་མེད་པ་དང་། ཚེག་མི་དགོས་སར་ཚེག་བཞག་པ་སོགས་ཡིག་ནོར་ ༢༠ ཡོད་པ་དང་། བོད་ཡིག་གི་དྲི་ཤོག་ཅིག་ཏུ་ Grammar ལྟ་བུ་དབྱིན་ཡིག་གིས་བྲིས་པ་དེས། བོད་ཡིག་གི་དྲི་ཤོག་དང་སློབ་ཕྲུག་ཚོ། དེ་བཞིན་བོད་ཡིག་དགེ་རྒན་ཞིག་གི་ངོས་ནས་རང་ཉིད་ཀྱི་ལས་གནས་བཅས་ལ་མཐོང་ཆུང་བྱས་པ་ཞིག་ཀྱང་རེད།
སྡེ་ཚན་ཁ་བའི་མགོར། Prose བཤེས་སྤྲེང་ ༼ སྤྲིངས་ ༽ ལས་རང་མོས་དྲི་བ་དྲུག་ ༼ ལ་ ༽ ལན་བྲིས་ ༼ བྲིས། ༽ ཞེས་པ་ནས་དྲི་བ་རེ་རེའི་མཇུག་ཏུ་ཤད་ཀྱི་ཚབ་ཏུ་ཚེག་རེ་བཞག་པ་གོང་མཚུངས་ལྟར་ཡིན་ལ། དྲི་བ་གསུམ་པར། འཇམ་དཔལ་གཞོན་ནུར་ ༼ གྱུར་ ༽ པ་ལ་ཕྱག་འཚལ་ལོ་ཞེས་པའི་དོན་བྲིས་ ༼ བྲིས། ༽ ཞེས་པ་དང་དྲི་བ་བཞི་བར། འགྲོ་བ་རིག་ ༼ རིགས་ ༽ དྲུག་གངདང་ ༼ ཚེག་ཆད་ ༽ གང་ཡིན་ནམ་ ༼ ནམ། ༽ དྲི་བ་དྲུག་པར། རྒྱན་དྲུག་མཚོག་ ༼ མཆོག་ ༽ དང་བཤེས་སྤྲེང་ ༼ སྤྲིངས་ ༽ ཅེས་ ༼ ཞེས་ ༽ སོགས་ཁྱོན་ཡིག་ནོར་ ༡༦ ཡོད།

སྡེ་ཚན་ག་བའི་མགོར། Letter Writing གང་རུང་གཅིག་ལ་ལན་བྲིས་ ༼ བྲིས། ༽ དང་དྲི་བ་གཉིས་པར། མངགས་ཉོས་ ༼ མངགས་ཉོ། ༽ ལས་ཀའི་ཚེད་ ༼ ཆེད་ ༽ སོགས་ཡིག་ནོར་ ༦ ཡོད།

སྡེ་ཚན་ང་བའི་མགོར། Rapid Reading མརྫད་ ༼ མཛད་ ༽ རྣམས་ ༼ རྣམ་ ༽ ལས་རང་མོས་དྲི་བ་ལྔ་བ་ ༼ ལ་ ༽ ༼ ལན་ ༽ བྲིས་ ༼ བྲིས། ༽ ཞེས་གོ་རྒྱུ་ཅི་ཡང་མེད་པའི་དྲི་བ་ཞིག་སྔོན་ཏུ་བཏངས་ཏེ། ནང་གསེས་དྲི་བ་དང་པོར། ཚོས་ ༼ ཆོས་ ༽ དང་དྲི་བ་གཉིས་པར། ཕོ་བྲང་པོ་ལ་ ༼ པོ་ཏ་ལ་ ༽ དྲི་བ་གསུམ་པར་རིག་གནས་ཚེ་བ་ ༼ ཆེ་བ་ ༽ དང་ཆུང་རྣམས་ ༼ ཆུང་བ་རྣམས་ ༽ ཞེས་དང་དྲི་བ་བཞི་བར། སྐྱེ་བ་སྔ་ཕྱི་ ༼ ལ་ ༽ ཡིད་ཆེས་ཡོད་ན་ཕན་ཐོགས་གང་ཡོད་དམ་ ༼ དམ། ༽ དྲི་བ་ལྔ་བར། ནོར་བུ་གླིང་ཁ་ ༼ གླིང་ཀ ༽ དྲི་བ་དྲུག་པར། བོད་ནང་སློབ་སྦྱོང་བྱེད་སྟང་ ༼ སྟངས་ ༽ སོགས་ཡིག་ནོར་ ༡༩ ཡོད་ལ། གོང་གི་སྡེ་ཚན་འདིའི་ནང་རེ་ཟུང་གཏགས་ནོར་ཤོར་བ་ལས་ཡིག་ནོར་མ་རེད་བསམ་བསམ་འདུག་ཀྱང་། དེ་ཡང་གཟབ་ནན་མ་བྱས་པའི་སྐྱོན་ཡིན། དེ་བཞིན་སྡེ་ཚན་ཀ་བའི་ནང་གི་བརྫོད་ཅེས་པ་དང་། སྐབས་འདིར་མརྫོད་ཅེས་པ་ལྟ་བུ་ནི་སློབ་དཔོན་ཐོན་མའི་སྐབས་ནས་དུས་ད་ལྟ་ལ་ཐུག་གི་བར་གྱི་བོད་ཀྱི་བརྡ་དག་ཁྲོད་བཙལ་ཡང་མི་རྙེད་པའི་རིགས་ཡིན་སྟབས། འདི་ཡིག་ནོར་ཡང་མིན་པར་གསར་དུ་བསྣན་པའི་གྲས་ཡིན་དགོས་ལ། དེ་ལྟར་ཚིག་གསར་སྣོན་གྱི་དགོས་དམིགས་ནི་དགེ་རྒན་ཁོང་རང་གིས་ཤེས་ན་མ་གཏོགས་སུ་གཅིག་གིས་ཀྱང་འགྲེལ་དཀའ་བའི་ཚོད་དུ་འདུག་གོ

སྡེ་ཚན་ང་ ༼ དངོས་གནས་བྱས་ན་སྡེ་ཚན་ཅ་བར་སླེབས་འདུག་ཀྱང་བསྐྱར་དུ་ང་བྲིས་འདུག་པས། འདིས་སློབ་ཕྲུག་ཚོའི་དྲི་ཤོག་ལ་རིན་ཐང་ཅི་ཡང་འཇོག་གི་མེད་པ་མ་ཟད། ཁོང་ཚོའི་མདུན་ལམ་དང་ཡིག་རྒྱུགས་ཀྱི་གལ་ཆེའི་རང་བཞིན་ཀྱང་རྟོགས་མི་འདུག ༽ ༼ ཅ་ ༽ བའི་མགོར། Poetry ས་སྐྱ་ལེགས་ ༼ བཤད་ ༽ ལས་ཞེས་བཀོད་དེ། ནང་གསེས་དྲི་བ་གཉིས་པར། ཡ་རབས་རྟགས་ ༼ བརྟག་ ༽ རབ་བྱིད་ ༼ བྱེད་ ༽ དང་དྲི་བ་གསུམ་པར། རས་ ༼ རང་ ༽ བཞིན་བཟང་བོ་ག་ལ་དོར་ ༼ འདོར། ༽ ས་ལ་ ༼ ལེ་ ༽ སྦྲམ། ཚིག་འགྲིལ་ ༼ འགྲེལ་ ༽ སོགས་ཡིག་ནོར་ ༡༤ ཡོད།

སྡེ་ཚན་ཇ་ ༼ ཆ ༽ Easy Writing གང་རུང་ཞིག་ལ་ཙོམ་ ༼ རྩོམ་ ༽ གཅིག་བྲིས་ ༼ བྲིས། ༽ ཞེས་པ་ནས་ནང་གསེས་དྲི་བ་དང་པོར། དུས་ཚེན་ ༼ ཆེན་ ༽ དང་དྲི་བ་གཉིས་པར། འགྲིམ་འགྲུལ་སྐབས་ཞིག་ ༼ ཤིག་ ༽ མཐོང་ཐོས་ ༼ ཐོས། ༽ ཞེས་པར། དངོས་གནས་བྱས་ན་འགྲིམ་འགྲུལ་སྐབས་ཤིག་གི་མཐོང་ཐོས་ཞེས་འབྲི་དགོས་སར་འབྲེལ་སྒྲ་ཆད་པ་སོགས་ཡིག་ནོར་ ༨ ཡོད།

དེའི་གཤམ་དུ་ Translate this unseen passage into Tibetan. ཞེས་དབྱིན་རྩོམ་ཐུང་ངུ་ཞིག་ཚུར་བོད་ཡིག་ཏུ་བསྒྱུར་རྒྱུར་བཞག་ཡོད།

གང་ལྟར་ཡང་། གོང་གི་དྲི་ཤོག་དེར་ཤོག་ངོས་གསུམ་མ་གཏོགས་མེད་མོད། དྲི་བ་དེ་དག་ཏུ་ཁྱོན་སྡོམ་ཡིག་ནོར་ ༨༣ ཡོད་ལ། དེའི་ནང་དུ་བརྗོད་མི་བདེའི་རིགས་ནི་དཔེར་ན། བོད་ནང་སློབ་སྦྱོང་བྱེད་སྟང་ ༼ སྟངས་ ༽ མི་འདྲ་བ་གསུམ་ཡོད་གསུངས་གང་ཡིན་ནམ་ ༼ ནམ། ༽ ཞེས་པ་དང་། རྣམ་དབྱེ་བར་བརྒྱད་ངོས་འཛིན་ ༼ བཟུང་ ༽ ནས་དཔེར་བརྫོད་ ༼ བརྗོད་ ༽ རེ་བྲིས་ ༼ བྲིས། ༽ ལྟ་བུ་དང་། གོ་དཀའ་བའི་རིགས་ནི། མརྫད་ ༼ མཛད་ ༽ རྣམས་ ༼ རྣམ་ ༽ ལས་རང་མོས་དྲི་བ་ལྔ་བ་བྲིས་ ༼ བྲིས། ༽ དང་འགྲིམ་འགྲུལ་སྐབས་ཞིག་ ༼ ཤིག་ ༽ མཐོང་ཐོས་ ༼ ཐོས། ༽ཞེས་པ་ལྟ་བུ། གཅོད་མཚམས་དགོས་སར་བཅད་མེད་པའི་རིགས་ནི། ཅི་ཞིག་ལ་ཕྲད་རང་དབང་ཅན་ཟེར་རང་དབང་ག་ཚོད་ཡོད་ ༼ ཡོད། ༽ ཅེས་དང་། སུམ་ཅུ་བའི་བསྟན་བཅོས་འདི་སུས་མཛད་དུས་རབས་ནམ་བྱུང་ ༼ བྱུང་། ༽ ཕོ་བྲང་པོ་ལ་ ༼ པོ་ཏ་ལ་ ༽ སུས་བཞེངས་སམ་རྒྱ་བསྐྱེད་སུས་མཛད་དམ་ ༼ དམ་ ༽ ཞེས་པ་ལྟ་བུ་ཞིབ་ཏུ་བསམ་ན་ཡིད་སྐྱོ་ཞིང་སེམས་ངལ་བའི་རྒྱུ་དང་། ཐུན་མོང་བོད་ཀྱི་སྐད་ཡིག་གི་མིག་བྲུས་ཤིང་རྣ་བ་བཀོག ཡན་ལག་གཏུབས། མགོ་བོ་བཅད་པ་སོགས་བྱས་ཡོད་དེ། འདི་ལྟ་བུའི་བོད་སྐད་ཡིག་གི་སུམ་རྟགས་དག་གསུམ་ལ་རྨང་གཞི་ཏིལ་འབྲུ་ཙམ་ཡང་མེད་པའི་བོད་དགེའི་རིགས་ནི་འབྱུང་འགྱུར་བོད་ཀྱི་མི་རིགས་འདི་འཆི་ལམ་དུ་འདེད་མཁན་དང་། བོད་མི་རིགས་ཀྱི་བུ་རབས་ཚ་རྒྱུད་རྣམས་ལ་བོད་དྲི་མི་བྲོ་ཞིང་། བོད་སྐད་ཡིག་གི་སྲོག་ཤིང་མི་ལྡན་པའི་མི་རབས་གསར་པ་ཁྱུ་ཞིག་ཏུ་སྒྱུར་མཁན་ཤ་སྟག་རེད།  གལ་སྲིད་བོད་མི་རིགས་ཀྱི་མི་རབས་གསར་བ་རྣམས་ལ་ཐུགས་རེ་ཆེན་པོ་གནང་བཞིན་པའི་ང་ཚོའི་དཔྲལ་བའི་མིག་དང་ཁོག་གི་སྙིང་ལྟ་བུའི་༸གོང་ས་མཆོག་གིས་འདི་གསན་པ་ཡིན་ན། ཁོང་ལ་བཟོད་དུ་མེད་པའི་ཐུགས་ཕམ་ག་ཚོད་ཅིག་ཡོང་གི་མ་རེད་དམ། ཁོང་གི་ཞོ་ལྟར་ཆགས་པའི་རླབས་ཆེན་དཀྱེལ་ཡངས་ཀྱི་ཐུགས་དགོངས་ཟབ་མོ་དེ་ཡང་། འདི་དང་འདི་ལྟ་བུའི་སྐྱི་ཡ་བའི་དོན་དག་གིས་ཡང་ནས་ཡང་དུ་དཀྲུགས་ཀྱིན་ཡོད་ལ། ༸ཁོང་གིས་ཉིན་མཚན་གཉིས་ཀར་ཆོས་སྲིད་ཀྱི་མཛད་པ་འཕྲིན་ལས་མཐའ་ཡས་པ་སྐྱོང་དགོས་ཐོག འདི་ལྟ་བུས་ད་གཟོད་ཁོང་གིས་ཐུགས་ལྷོད་དུ་བབ་ནས་སྐུ་ངལ་ཅུང་གསོ་བའི་སྐལ་བ་དེ་ཡང་འཕྲོག་གིན་ཡོད།

ད་དུང་དེའི་ག་ལ་ཚད། ད་ལྟ་ངས་ལག་ཏུ་དྲི་ཤོག་གཅིག་མ་གཏོགས་རེག་མེད། འདི་ལྟ་བུའི་དྲི་ཤོག་དང་དེ་འབྲི་མཁན་གྱི་བོད་དགེ་གཅིག་མ་གཏོགས་མེད་པ་ག་ལ་ཡིན། བཙན་བྱོལ་བའི་སྤྱི་ཚོགས་ཁྲོད་ན་སྔོན་ནས་ཤེས་ཡོན་མི་གཙོ་བར་ལག་འཁྱེར་གཙོ་བ་དང་། སྤུས་ཀ་མི་གཙོ་བར་ཁ་ངོ་གཙོ་བའི་རིགས་མང་དུ་མཐོང་རྒྱུ་ཡོད་པས་ཀྱང་བོད་ཡིག་གི་སྲོག་ཤིང་ཉམས་ཤིང་རྒུད་པའི་རྒྱུ་སྔ་མོ་ནས་བསྐྲུན་ཟིན་ཡོད་པ་དང་གཅིག དེ་བཞིན་སློབ་ཚན་ལ་གཞི་བཞག་ནས་དྲི་བ་མི་བཟོ་བར་སློབ་ཕྲུག་ལ་གཞི་བཟུང་ནས་དྲི་བ་བཟོ་བ་དེས་ཀྱང་སློབ་ཕྲུག་ཚོ་ཡར་སྐྱོར་གྱིན་མེད་པར་མར་འཐེན་གྱིན་ཡོད།

སྐབས་འདིར་ངས་འདི་ལོའི་བོད་ཀྱི་རྩོམ་པ་བོའི་མཐུན་ཚོགས་ཀྱི་ཚོགས་ཆེན་སྟེང་བོད་གཞུང་ཤེས་རིག་ལས་ཁུངས་ཀྱི་ལས་བྱེད་ཅིག་གིས་གསུངས་པའི་བཀའ་མོལ་ཐུང་ངུ་ཞིག་དྲན་ཡོང་། ཁོང་གིས་འདི་ལྟར་གསུངས། ད་ལྟ་ཉིན་སློབ་ཁག་གི་སློབ་ཕྲུག་ཚོའི་བོད་ཡིག་གི་ཤེས་ཡོན་གནས་ཚད་སྐྱོ་བ་དེ་དོན་དངོས་རེད་མོད། ཁོང་ཚོར་ཁག་ཡོད་པ་མ་རེད། ཁོང་ཚོར་ཉིར་རེར་བོད་ཡིག་གི་འཛིན་གྲྭ་གཅིག་རེ་མ་གཏོགས་རེག་གི་མེད་ཅེས་གསུངས། འོན་ཀྱང་གོང་གི་དྲི་ཤོག་དེས་སློབ་ཚན་གཅིག་གི་སྐྱོན་མི་པར་དགེ་རྒན་གྱི་སྐྱོན་ནོ་ཞེས་འགྲེལ་གྱིན་མི་འདུག་གམ། འཛིན་རིམ་བཅུ་བར་སླེབས་ཀྱང་རང་གི་མིང་འབྲི་མི་ཤེས་པའི་སློབ་མ་མང་བོ་ཡོད་པའང་ ༼ བོད་ཀྱི་དུས་བབ་སྤྱིའི་འཐོན་ཐེངས་ ༤༥༠ སྟེང་གི་ཡིག་རྒྱུགས་ཐུན་གཅིག་གི་སྔ་གཞུག་ཅེས་པའི་གསར་འགྱུར་ནང་གསལ། ༽ ང་ཚོར་ལྐོག་ཏུ་མ་གྱུར་བ་དེའོ།

མཇུག་མཐར་ངའི་སེམས་ངོགས་སུ་དྲི་རྟགས་ཤིག་རང་བཞིན་གྱིས་ཡོང་བ་ནི། འདི་ལྟ་བུའི་ཡིག་ནོར་མང་བའི་དྲི་ཤོག་ཅིག་མིག་མདུན་དུ་སླེབས་པའི་སློབ་ཕྲུག་ཚོའི་ཁྲོད་ན་ཡིག་ནོར་ལ་མཛུབ་མོ་བཙུགས་ཏེ། དགེ་རྒན་ལ་འདི་དང་གན་ནོར་འདུག་ཟེར་མཁན་ག་ཚོད་བྱུང་ཡོད་དམ་ཟེར་བ་དེ་རེད།