བཀུར་འོས་བོད་མི་མང་སྤྱི་འཐུས་རྣམ་པ་ལགས། འདི་ན་སྙིང་གཏམ་པདྨ་འདབ་བརྒྱད་མ་ཞིག་ཁྱེད་ཅག་གི་མདུན་དུ་ཞུས་ཡོད་ན་དེ་དོན་ཐུགས་ཞིབ་ཡོང་བའི་རེ་བ་ཡོད།
འདབ་མ་དང་པོ་ནི། སྐབས་རེར་དོན་དག་ཅི་གང་མ་བསམ་པའི་སྔོན་དང་། ཁོང་ཁྲོའི་མེ་ལྕེ་དེས་རང་སེམས་མ་བསྲེག་པའི་སྔོན་ལ་ང་རང་ཚོའི་སྙིང་དང་མིག་ལྟ་བུའི་༧གོང་ས་མཆོག་ཡིད་ལ་སྒོམ་རོགས། ཁོང་གི་མཛད་པ་འཕྲིན་ལས་དང་སྐུ་ངལ། སྐུ་ནའི་བབ་བཅས་སེམས་ལ་དྲན་པ་ཙམ་གྱིས་ཁྱེད་ཅག་གི་ཆིག་སྒྲིལ་གྱི་གོང་བུ་དེ་ཇེ་བརྟན་དུ་འགྲོ་གི་རེད། འདབ་མ་གཉིས་པ་ནི། ན་ནིང་དོ་ཚིགས་ཀྱི་བོད་མིའི་ཚེ་སྲོག་གི་འགྲོ་གྲོན་འདི་དག་དང་། བཙོན་འོག་གི་གནས་སྟངས། གཞིས་ལུས་མི་དམངས་ཀྱི་ཆིག་སྒྲིལ་གྱི་སྙིང་སྟོབས་དེ་དག་སེམས་ལ་དྲན་པར་བྱོས་དང་། ཁྱེད་ཅག་རང་རང་གི་སེམས་ན་ཡོད་པའི་རྣམ་རྟོག་གི་འཐེན་འཁྱེར་རྣམས་དངོས་ཡོད་ལ་འཚམ་པ་ཞིག་མིན་པ་ངོ་འཕྲོད་དེ་རང་སར་ཞི་འགྲོ་གི་རེད། འདབ་མ་གསུམ་པ། འཛམ་གླིང་མི་དམངས་ཀྱིས་བོད་མི་རིགས་ཞེས་གལ་ཆེན་དོན་ཆེན་དུ་བཟུང་བ་དང་། དགའ་དགའ་ཉེ་ཉེ་བྱེད་ཀྱིན་པ་འདི་དག་སེམས་ལ་དྲན་རོགས། འདི་དག་དྲན་པ་ཙམ་གྱིས་ཁྱེད་རང་ཚོའི་ལག་ན་མེད་ཀྱང་སེམས་ལ་བཟུང་ཡོད་པའི་གྲི་དང་མདུང་འདི་དག་རང་སར་ས་ལ་འཇོག་དགོས་པ་ཞིག་ཡོང་གི་རེད། འདབ་མ་བཞི་པ། མི་ལོ་ལྔ་བཅུའི་རིང་འདིར་ཤར་ནུབ་ཀྱི་ཡུལ་ལུང་གང་སར་འཐོར་བའི་མི་དམངས་འདི་དག་དྲན་རོགས། ཁྱེད་ཅག་ནི་མི་དམངས་ཉམ་ཐག་འདི་དག་གི་རེ་བ་དང་ཡིད་ཆེས་ཡིན་ལ། འདི་དག་གི་ངོ་ཚབ་རེད། ཁོང་ཚོ་དྲན་པ་ཡིན་ན་མི་ཞིག་གི་མ་མཐའི་བཟང་སྤྱོད་ཅེས་པ་འདི་ཡང་རང་བཞིན་གྱིས་ཁྱེད་ཅག་གི་རྒྱུད་ལ་འཇགས་གི་རེད། འདབ་མ་ལྔ་བ། ལོ་ལྟར་བོད་ནས་བྱིས་པ་བརྒྱ་སྐོར་རེ་བཙན་བྱོལ་དུ་འབྱོར་ཞིང་། འདི་ཕྱོགས་ནས་སྐྱེས་པའི་བྱིས་པ་སྟོང་ཕྲག་མང་པོ་ཞིག་བཙན་བྱོལ་གྱི་སློབ་གྲྭ་ཁག་དང་སྤྱི་ཚོགས་ཀྱི་ཟ་ཟུར་ན་ཡོད་ལ། ཁྱེད་ཅག་གི་གནང་སྟངས་འདི་དག་གིས་གཞོན་སྐྱེས་འདི་དག་གི་སེམས་ལའང་འཐེན་འཁྱེར་གྱི་དུག་རྩྭ་མི་འདེབས་པའི་ངེས་པ་མེད་ལ། སྔོན་ཆད་ཀྱང་དེ་འདྲ་འབྱུང་མྱོང་ཡོད་སྟབས། འདི་དག་དྲན་ན་ཁྱེད་ཅག་གིས་ཀྱང་རང་རང་བོད་མི་མང་སྤྱི་འཐུས་ཤིག་ཡིན་པའི་འགན་ཁུར་ལ་བསམ་བློ་རེ་འཁོར་ཡོང་གི་རེད། འདབ་མ་དྲུག་པ། ང་ཚོ་བཙན་བྱོལ་ནས་མི་ལོ་ ༥༠ འཁོར་བ་རེད། ལོ་ངོ་འདི་དག་གི་དཀའ་སྡུག་ཁྲོད་ནས་མི་གྲངས་ཁྲི་ཕྲག་འགའ་ཞིག་ས་མཐའ་ནས་ཚེ་མཐའ་ཕུད་ཡོད་ལ། ད་དུང་ཡང་ཚེ་མཇུག་གི་རེ་བ་བཟུང་སྟེ་རྩིབ་མ་ས་ལ་འཇོག་བཞིན་པ་གང་མང་ཞིག་ཡོད། ཁྱེད་ཚོ་སྲིད་སྟེགས་འདིར་བསྐོ་མཁན་ཡང་གཙོ་བོ་མི་རབས་རྒན་པ་འདི་དག་ཡིན་སྟབས། འདི་དག་དྲན་ནའང་ཁྱེད་ཚོས་རང་ཉིད་སྤྱི་མི་ཞིག་གི་ངོ་བོར་ཡོང་ཡོད་སྟབས། ཤི་གསོན་འདི་དག་དྲན་ན་ཁྱེད་ཅག་གི་སེམས་ན་ཡོད་པའི་སྒེར་གྱི་ན་ཚ་དང་ཕྱོགས་རིས་ཀྱི་ཁུ་ཚུར་དེ་དག་གློད་ཐུབ་པའི་དགོས་པ་རྒྱུ་མཚན་ཇེ་གསལ་ལ་ཡོང་གི་རེད། འདབ་མ་བདུན་པ། ལོ་ ༥༠ རིང་ཕ་ཡུལ་དེ་ཕུ་དཀྲུག་མདའ་དཀྲུག་བྱེད་མཁན་དང་། ཕ་མ་དང་ཕུ་ནུ་མང་པོ་དམར་གསོད་བྱེད་མཁན་ནི་རྒྱ་ནག་དམར་ཤོག་གཞུང་རེད། ཁ་སང་དེ་རིང་ཡང་ང་ཚོར་ཕྱོགས་སྣ་གོར་མོ་ནས་ཁ་གཏད་གཅོག་མཁན་ཡང་རྒྱ་གཞུང་ཡིན་སྟབས། ཁ་གཏད་འདི་དག་ཀྱང་དྲན་དགོས། འདི་དག་དྲན་ན་གཞི་ནས་ཆིག་སྒྲིལ་གྱི་གོ་བ་དང་དགོས་པ་དེ་ཤེས་གི་རེད་ལ། རྒྱ་གཞུང་གི་སྔུན་ནས་༧གོང་ས་མཆོག་གི་ཞལ་རིས་དྲོན་པོ་འདི་ཆུ་ལ་སྐྱུར་གི་མ་རེད། འདབ་མ་བརྒྱད་པ། དཀའ་ངལ་གང་ཡོད་ཀྱང་སེལ་ས་ཡག་ཤོས་དེ་གྲོས་ཚོགས་ཀྱི་ར་བ་ཡིན་པ་ལས། གྲོས་ཚོགས་ཀྱི་ཕྱི་མིན་སྟབས། རྗེས་ཕྱོགས་གནད་གང་ལ་ཐུག་རུང་གྲོས་ཚོགས་ཀྱི་ར་བ་ནས་བགྲོ་གླེང་གནང་རྒྱུའི་རེ་བ་ཡོད། ང་ཚོ་དམངས་གཙོའི་ལམ་ཆེན་སྟེང་དུ་གོམ་ཞེང་ཆེ་ཙམ་སྤོ་ཐུབ་མིན་ནི་ཁྱེད་ཅག་ལ་ཐུག་ཡོད་སྟབས། གོམ་པ་འཁྱོར་དུ་མ་འཇུག་ཞུ་རྒྱུ་ཡིན།
དེ་ལྟར། སྙིང་གཏམ་པདྨ་འདབ་བརྒྱད་མ་འདི་ནི་ཕྱག་ན་པད་དཀར་འཆིང་བ་གང་དེའི་སྐུའི་མཛད་པ་དག་དྲན་བཞིན་མཐོང་བཞིན་དང་། ཁྱེད་ཅག་གི་གནང་སྟངས་འདི་དག་མཐོང་རྗེས་ཆེད་དུ་ཕུལ་བ་ལགས་ན་ཐུགས་བསམ་རེ་བཞེས་གནང་ཡོང་བ་ཞུ།
ཨ་ཁུ་ལུང་རིགས་ལ་ཐུགས་རྗེ་ཞུ།
སྙིང་གཏམ་པདྨ་འདབ་བརྒྱད་མའི་ངོ་བཤུས་ཤིག་བསྟན་འཛིན་མགོན་པོ་ལ་ཐོངས་ཤིག ངས་ཀྱང་བསྟན་འཛིན་མགོན་པོའི་ལོ་རྒྱུས་དང་ཁོང་གིས་འཁྲབ་མྱོང་བའི་སྤྲེལ་རྒན་སྨྱོན་པའི་འཁྲབ་གཞུང་རྫུན་རྣམས་དྲན་ཐེངས་རེ་རེས་ཀྱིས་ཡིད་ཆེས་ཐིགས་པ་ཙམ་ཡང་མེད། ལྐོག་ལྐོག་སུད་སུད་ཀྱིས་རང་དོན་ཁོ་ན་བསྒྲུབས་ཏེ་དགོས་མེད་ཀྱི་ཆོལ་ཁའི་ཞེན་ཁོག་སྐམ་པོ་དེ་ཁ་ལ་འཁྱེར་ནས་སྤྱི་འཐུས་ཚོའི་བར་ན་དཀྲུགས་དཀྲུགས་གཏོང་མཁན་ཅིག་ཁོང་རེད། ད་དུང་ཁོང་གི་ཚ་བོ་ཡིན་ཞེས་པ་ཞིག་ནོར་བུ་གླིང་ཁར་ཡོད་དུས་དེ་སྔོན་རྒྱ་གར་གཞུང་ནས་འཛིན་བཟུང་གིས་བོད་ལ་ཕྱིར་འབུད་བཏང་ཡོད་པ་དང། བསྟན་འཛིན་མགོན་པོ་ཁོང་ལ་ལམ་འགྲོ་བྱུང་མེད་པ་མ་གཏོགས་བོད་གཞུང་ལ་གྱོད་དང་ཁ་མཆུ་བཙུགས་མྱོང་པ་རེད། དཀོན་མཆོག་གི་མཁྱེན། མི་འདི་ཚོས་སོ་སོ་དཀར་པོ་དཀར་རྐྱང་དང་། མི་གཞན་དག་རྣམས་ནག་པོ་ནག་རྐྱང་བཟོ་འདོད་པ་ཁོ་ན་རེད།
དྲ་གྲོགས་ཨརྱ་དང་། ལྷོ་ཕྲུག་སྣ་བོ་ཆེ། ནད་པ། ཨ་རིག་གླེན་རྒན། བོད་ཤ་ཁྲག་རུས་གསུམ། ནམ་མཁའ་བསྟན་འཛིན་བཅས་ཕེབས་ནས་དགོངས་ཚུལ་གནང་བར་ཐུགས་རྗེ་ཆེ།
ང་ཚོའི་སྤྱི་ཚོགས་ཀྱི་གྲུབ་ཆ་དང་གནས་སྟངས། བོད་མི་རིགས་ཀྱི་ཤེས་ཡོན་དང་ཤ་ཞེན་སོགས་སྣ་ཚོགས་ཤིག་ལ་བལྟས་ཡོང་དུས་སྐབས་རེར་གནས་ཚུལ་འདི་འདྲ་རེ་ཡོང་རྒྱུ་ནི་སྔོན་དཔག་མི་ཐུབ་པ་ཞིག་མ་རེད། དེ་ལྟའི་གནས་ཚུལ་བྱུང་སྐབས་ང་ཚོས་མེ་ལ་ཤིང་བསྣོན་པ་ལྟར་མིན་པར། ང་ཚོའི་ཐུན་མོང་གི་ལས་དབང་དང་ལས་དོན་གང་ཡིན་གྱི་ཕྱོགས་ལ་ལུས་ངག་ཡིད་གསུམ་འཁོར་ཐབས་བྱ་རྒྱུ་ཡང་གལ་ཆེ་བར་འདོད།
ད་རེབ་ཀྱི་ངའི་རྩོམ་སྒྲིག་པའི་གཏམ་འདིའི་ནང་དུ་འཐུས་མི་ཚོར་དགག་རྒྱག་དང་ཕྱོགས་གཅིག་བཟང་རབས་དང་ཕྱོགས་གཞན་ཞིག་ངན་རབས་ཀྱི་ལྟ་ཚུལ་ཡང་བཏོན་མེད།
ཡིན་ཡང་། རྩོམ་སྒྲིག་པ་ཞིག་གི་ངོས་ནས་བཤད་ན། རྩོམ་འདིའི་ཞན་ཆ་ནི་གནད་དོན་འདིའི་རྒྱུ་རྐྱེན་དང་རྒྱབ་ལྗོངས་གསལ་བོར་བཀོད་མེད་པ་དང་། དེ་དག་སེལ་ཐབས་ཀྱི་བསམ་ཚུལ་ཡང་བསྟན་མེད་པ་དེ་ཡིན་པས། ཚང་མར་དགོངས་དག་ཞུ་བར་འདོད།
བཀུར་འོས་རྩོམ་སྒྲིག་པ་ཚོའི་གཏམ་ལ་གནས་ལུགས་འདུག
འོན་ཀྱང་ངས་འདིར་རྩོམ་ཡིག་འདི་ལ་འབྲེལ་བ་མེད་ཀྱང་བསམ་ཚུལ་ཞིག་དྲན་བྱུང་། བཙན་བྱོལ་སྤྱི་ཚོགས་ནང་དུ་རང་བཙན་གཙང་མའི་ལྟ་བ་འཁྱེར་མཁན་མང་བོ་ཞིག་གིས་ང་ཚོའི་སྤྱི་ཚོགས་ནང་དུ་སྲིད་དོན་ཚོགས་སྣ་མང་དགོས་རབ་དང་། གཞུང་གི་ལངས་ཕྱོགས་དང་སྲིད་ཀྱི་བྱ་བ་དེ་ནམ་ཡང་༧གོང་ས་མཆོག་གིས་ཅི་གསུང་བཀའ་ལྟར་བྱེད་རྒྱུ་མེད་པར་སྲིད་དོན་ཚོགས་པ་ཕན་ཚུན་བར་འགྲན་བསྡུར་བྱས་ཏེ་གཞུང་འཛིན་ཚོགས་པ་དང་ཕྱོགས་འགལ་ཚོགས་སྐྱོང་རེ་བྱེད་དགོས་ཟེར་མཁན་མང་བོ་འདུག འོན་ཀྱང་སྐད་ཆ་འདི་ལ་མ་འོང་ལུང་བསྟན་ལྟ་བུའི་ལན་ཞིག་ཉེ་ཆར་ཝང་ལིས་ཞོན་རྡ་སར་སླེབས་སྐབས་བཤད་པ་དྲན་གྱིན་འདུག་གམ། ཁོས་སྤྱིར་ལམ་ལུགས་འདི་རྒྱལ་ཁབ་ཡོད་པའི་དམངས་གཙོའི་ལུང་བ་དག་ལ་གལ་འགང་ཆེས་ཀྱང་། བཙན་བྱོལ་སྤྱི་ཚོགས་ལ་ལན་པོ་མི་འདུག རྒྱུ་མཚན་བཙན་བྱོལ་གཞུང་ལ་ད་ལྟའི་ཆར་ཁྲིམས་ཁང་དང་ཁྲིམས་འཛིན་ལས་ཁུང་མེད་སྟབས། བར་སྐབས་ཞིག་ལ་ཚོགས་པ་ཕན་ཚུན་བར་ལ་རྙོག་འཛིང་རྣོ་ངར་ཅན་ཕྲད་ན་གཞུང་འཐོར་ཤིག་ལ་འགྲོ་རྒྱུའི་ཉེ་ཁ་འདུག་ཅེས་བར་གནས་ལུགས་ཨེ་འདུག
ང་ཚོ་དྲ་གྲོགས་ཚོས་སྤྱི་མཐུས་སྒེར་པའི་གྲོས་འཆར་དང་རྒྱུན་ལས་ཀྱིས་ཐག་གཅོད་ཚོགས་གཙོ་གཞོན་གྱིས་སྟངས་འཛིན་བཅའ་ཁྲིམས་ཀྱི་དགོངས་དོན་སོགས་དག་དག་གཅིག་འགྲིག་ཡོད་མེད་སོགས་གླེང་གཞི་གཙོ་བོ་མ་རེད།
དཀྲུགས་ཤིང་ཆེ་ཐག་ཆོད་གཅིག་རྒྱབ་ནས་ཕྱི་ལ་ཐོན་འགྲོ་བ་འདི་དོན་ངོ་མ་མ་ཤེས་པ་ཡིན་ནམ་བསམ་བཞིན་དུ་བྱས་པ་་ཡིན་འདིའི་སྤྱི་མཐུས་དེ་དག་ཡོངས་ཁུངས་མི་དམངས་ཀྱི་བསམ་འདུན་ངོ་མ་མཚོན་ཐུབ་མིན་དེ་གཙོ་བོ་བྱས་ནས་གླེང་དགོས་པར་འདོད།
ངའི་བལྟས་ན་བོད་མི་དམངས་ཀྱི་བསོད་ནམས་སྟོབས་རྒྱལ་གྱི་ལམ་གྲོན་ཁོ་ནའི་ཆེད་དེ་འདྲིའི་མཁྲེགས་འཛིན་ཆེན་པོ་བྱེད་པར་མི་འདོད
ངས་བོད་མི་རིགས་འདི་ཉིད་གཅིག་ལས་གཉིས་བསམ་པར་ཡོད་མཁན་གྱི་རྩམ་གཟན་བོད་པ་ཞིག་འབྱུང་འགྱུར་གྱི་བོད་མི་རིགས་ཀྱི་མི་ཚེའི་ནང་དུ་མི་འབྱུང་བར་རེ་བ་རྟག་དུ་རྒྱག་བཞིན་ཡོད་ལ། རང་ཉིད་ནི་དུས་རྟག་དུ་བོད་ཟེར་ན་གཅིག་ལས་གཉིས་མེད་པ་ཞིག་དུ་འདོད་མཁན་ཞིག་ཡིན་པས་ཆ་ནས་རྩོམ་སྒྲིག་པ་ཉིད་ཀྱིས་རྩོམ་ཡིག་འདི་ལ་རྒྱབ་སྐྱོར་སེམས་གཏིང་ནས་ཡོད་ལགས།
ཨུ་རྒྱན་ཟེར་བའི་སྤྱི་མཐུས་དེས་སྔ་ཕྱི་བར་གསུམ་གྱི་བྱེད་སྟངས་ལ་བོད་མི་དམངས་ནས་ཞིབ་འཇུག་བྱེད་དགོས་པ་ཞིག་རེད་ལ་ལྷག་པར་མདོ་སྟོད་མི་དམངས་ཀྱིས་ཁུར་ལེན་དགོས་པ་རེད།
བསོད་ནམས་སྟོབས་རྒྱལ་སྙིང་རྗེ་ཁོའི་གླེན་རྟགས་ཆེ་བའི་ཞེན་ཁོག་ལ་འཇུག་འབྲས་ཡག་པོ་ཡོད་མི་སྲིད་ཀྱང་རྒྱ་དམར་གྱི་ལག་ཆ་མི་བྱེད་པ་ཡིད་ཆེས་ཡོད།
མདོར་བསྡུས་ན་སྦྱང་བཤད་གྲོས་ཚོགས་རྭ་བ་ནས་བྱས་ཐག་གཅོད་ཀྱང་གྲོས་ཚོགས་ནང་ནས་བྱེད་དགོས་པ་མ་ཤེས་ནི་ཡིན་རྒྱུ་མ་རེད་ཏན་ཏན་འདི་ལ་དམིགས་ཡུལ་དང་རྒྱབ་ལྗོངས་གཞན་ཞིག་འདུག
བོད་ཀྱི་དུས་བབ་རྩོམ་སྒྲིག་པས་སྙིང་གཏམ་འདབ་མ་བརྒྱད་ཅན་ཞིག་སྤེལ་ཡོད་པ་དེར་རྗེས་སུ་ཡི་རངས་དང་བསྔགས་བརྗོད་ཞུ།
དངོས་འབྲེལ་རེད་སྤྱི་འཐུས་ཚོས་ངེས་པར་དུའང་༸ གོང་ས་མཆོག་སྙིང་གི་དབུས་སུ་སྒོམ་དགོས་ལ་གང་ཉིད་ཀྱི་བོད་བསྟན་སྲིད་ཀྱི་ཆེད་དུ་སྐུ་ངལ་དང་མཛད་འཕྲིན་ཇི་ལྟར་སྐྱོང་བཞིན་ཡོད་པ་འདི་ལ་རྣོ་བསམ་ཞིབ་མོས་དཔྱད་དེ་རྒྱལ་བའི་བཀའ་བཞིན་སྒྲུབ་དགོས།
དེ་རིང་༸གོང་ས་མཆོག་བཞུགས་སྒར་ནས་ཕྱི་ཕྱོགས་སུ་ཆིབས་ཞལ་བསྒྱུར་ཅིང་། ང་ལམ་ཟུར་གྱི་ཕེབས་མཇལ་ཞུ་མིའི་གྲལ་དུ་ཡོད། ཆིབས་འཁོར་གྱི་སྒེ་ཁུང་ནས་དགྱེས་བརྩེའི་ཞལ་རས་དེ་མངོན་སྐབས་ངའི་ངོ་ཐོག་ཏུ་རྒྱུན་ལྡན་མིན་པའི་ཚ་ཁྱུག་ཁྱུག་ཅིག་བྱས་བྱུང་། གངས་སྐྱིད་ཀྱི་ཕེབས་ལམ་གཡས་གཡོན་དུ་ཡོད་པར་ངེས་པའི་མི་སྣ་ཁག་ཅིག་གི་ཞལ་དཀྱིལ་དུའང་འདི་ལྟའི་ཚོར་སྣང་ཞིག་སྐྱེ་དགོས་ངེས་ཡིན། སྤྱིའི་ཆ་ནས་ཐེངས་འདིའི་གྲོས་ཚོགས་ཀྱི་དཀའ་རྙོག་འདི་འཕྲལ་རྐྱེན་དང་ཕུགས་རྐྱེན་གྲངས་འདས་ཞིག་རིམ་གསོགས་གནོན་བཙིར་གྱིས་གས་འཐོར་དུ་སོང་བའི་རྣམ་པ་ཞིག་ལས་སྐབས་ཐོག་དེ་མ་ཐག་པའི་རྐྱེན་ཙམ་མངོན་པར་སད་པའི་སྣང་ཚུལ་ཞིག་མིན། དེ་བས་གནད་དོན་འདིའི་ཐད་གླེང་སློང་རེ་བྱེད་སྐབས་སྐབས་འཕྲལ་གྱི་རྐྱེན་ཙམ་ལ་ཟུར་བཅད་ཀྱིས་མི་བལྟ་བར་འབྲེལ་ཡོད་དུས་གསུམ་ཕྱོགས་བཅུའི་སྒྲོམ་གཞི་སྤྱི་ཡོངས་ལ་མིག་རྒྱང་རིང་པོས་བལྟ་དགོས་པ་གལ་ཆེན་དུ་མཐོང་གིན་ཡོད།
ངས་རང་ཉིད་ཚུད་པའི་བོད་རིགས་སྤྱི་ཡོངས་ཀྱི་བསམ་བློའི་འཁྱེར་སོ་དང་ལས་དོན་བྱེད་ཕྱོགས་སོགས་ཕྱོགས་གང་ནས་བལྟས་ཀྱང་ནམ་ཞིག་འཐོར་ངེས་ཡིན་པའི་མངོན་པར་མི་གསལ་བའི་དཀའ་རྙོག་གི་འགས་རྫས་འདི་རིགས་སྔ་ས་ནས་འཐོར་ན་བསམ་གྱིན་ཡོད་པ་ལྟར་ད་ལན་འགས་རྫས་ཤིག་རྡ་སའི་རི་གྲོང་དུ་འབང་སྒྲ་ཞིག་དང་བཅས་འཐོར་གས་སུ་སོང་བར་བློ་བདེ་པོ་བྱུང་། འདིས་༸གོང་ས་མཆོག་སྐུ་འཚོ་བཞུགས་ཀྱི་གནས་སྐབས་དང་ང་ཚོའི་སྤྱི་ཚོགས་བདེ་དུས་ཐང་དུས་ཀྱི་དུས་བཟང་འདི་འདྲར་ལམ་ངན་བློས་མི་བཟོད་པ་ཞིག་ནས་རྟ་ཁ་ཕྱིར་འཐེན་བྱ་རྒྱུའི་གོ་སྐབས་ཤིག་སྤྲད་པ་རེད། ཐེངས་འདིའི་དཀའ་རྙོག་ཐད་སྤྱི་ཚོགས་སྤྱི་ཡོངས་ནས་དོ་སྣང་ཧ་ཅང་ཆེན་པོ་གནང་ཡོད་ཅིང་ཇ་ཁང་ཆང་ཁང་གང་དུའང་ཟ་ཞོར་འཐུང་ཞོར་དུ་གནད་དོན་འདིའི་ཐད་གླེང་སློང་བྱེད་བཞིན་ཡོད་སྐད་འདུག ཤེས་ལྡན་པའི་ཕྱོགས་ནས་བཤད་ན་དུས་བབ་ཟིན་བྲིས་ཀྱིས་མཚོན་པའི་བརྒྱུད་ལམ་མང་དག་ཅིག་ནང་དཔྱད་གླེང་རྒྱ་ཆེ་གནང་གིན་འདུག འོན་ཀྱང་ད་དུས་སྤྱི་འཐུས་ཕལ་ཆེར་རྡ་སའི་རི་གྲོང་དུ་ཡོད་སྐབས་འདིར་བོད་མི་སུ་གཅིག་གིས་ཀྱང་རྡ་སའི་ཁྲོམ་ལམ་དུ་ཐོན་ནས་ངོ་རྒོལ་སྐད་འབོད་དང་སྤྱི་འཐུས་ཚོ་འབོད་འགུག་གིས་དཀའ་རྙོག་གི་ངར་ཆ་ཚ་ཐོག་ལ་འདྲི་བརྩད་དང་དྭོགས་འདྲི་བྱས་པ་ཞིག་བྱུང་མེད། དངོས་དོན་གྲོས་ཚོགས་ཀྱི་སྒྲོམ་གཞི་སྤྱི་དང་འབྲེལ་ཡོད་སྤྱི་འཐུས་ཀྱི་མི་འགྲོར་འགྱུར་ལྡོག་ཅིག་དགོས་ན་མདུན་དུ་ཐོན་ནས་གདོང་གཏུགས་ཀྱིས་དཀའ་རྙོག་ལ་དག་གཤེར་དང་སྦྱང་བཤད། དེ་བཞིན་མི་སྡུག་པའི་གདོང་ལྤགས་ལྷེབ་བཤུས་དང་།རྫོབ་མཚང་བསྔོག་འབྲུ་བྱེད་དགོས་པ་ལས་ལྐོག་ལྐོག་དང་སུད་སུད་ནས་མི་འགྲིག་མི་འཐུས་པའི་གླེང་གཞི་སྤེལ་གྱིན་བསྡད་པས་མདའ་མོ་འབེན་ལ་ཟུག་རྒྱུ་ཞིག་དཀའ་ཚོད་ཡིན། ང་ཚོའི་ལས་སྟངས་འདིས་སོ་སོས་བདམས་པའི་འཐུས་མི་ཚོ་རྐྱག་ལངས་ལ་གཏོང་གིན་ཡོད་པ་རེད།
ད་ལན་གྱི་གནས་ཚུལ་འདིས་ང་ཚོའི་མི་རབས་གསར་པ་ཚོར་སོ་སོའི་འཐུས་མི་ཇི་འདྲ་ཞིག་གདམ་དགོས་མིན་གྱི་བསླབ་བྱ་ཞིག་གནང་ཡོད་ལ། བོད་རིགས་སྤྱི་ཡོངས་ལ་བསམ་བློའི་གོ་རྟོགས་ཇི་འདྲ་ཞིག་ཡོད་མེད་དང་དཀའ་རྙོག་འདི་འདྲ་ཞིག་མདུན་དུ་ལྷག་ཚེ་ཐབས་ལམ་ཇི་འདྲ་ཞིག་ལ་འཇུག་མིན་ཐད་གནམ་རྒན་མས་ཚོད་བགམ་ལན་གཅིག་བྱས་པར་བརྩི།
ཁོ་བོར་ཆོལ་ཁ་དང་ཆོས་ལུགས་འཐེན་འཁྱེར་སོགས་མང་དག་གིས་སྐྱོན་འཛུགས་དང་གླེང་སློང་གནང་ཟིན་པའི་ཐད་རྒྱུས་མངའ་དེ་ཙམ་མེད། རྒྱུས་མངའ་མེད་པའི་གནས་ཚུལ་ལ་སེམས་ཚོར་གྱིས་བསླད་པའི་དཔྱད་བརྗོད་དང་སྐད་ཆ་བཤད་རྒྱུར་དགའ་མོས་མེད། འོན་ཀྱང་ངའི་ངོས་ནས་ཁོང་ཁྲོ་ཟ་ཤོས་དང་སྐྱུག་མེར་ལངས་ཤོས་ཀྱི་བྱེད་སྟངས་གཅིག་མཐོང་བ་ནི། ཐེངས་འདིའི་དཀའ་རྙོག་དེ་ནང་ཁུལ་གྲོས་མོལ་དང་གུ་ཡངས་སོགས་ཐབས་ལམ་ཆུང་ཆུང་ཁག་ཅིག་གིས་སེལ་ཐུབ་རྒྱུ་ལ་དེ་ལྟར་མ་བྱས་པ་འདི་ཡིན། ང་ཚོ་ཆབ་འབངས་ཚོས་བོད་བསྟན་སྲིད་ཀྱི་དཀའ་ངལ་ཆེ་ས་དང་རང་རེའི་སྒྲིག་འཛུགས་ཀྱི་གནད་དོན་ཆེ་སའི་རིགས་སེལ་རྒྱུའི་ལས་འགན་དང་ནུས་པ་འཇོན་ཐང་བཅས་ཡོད་པར་ཆ་འཇོག་དང་བརྩི་བཀུར་བཅས་བྱེད་པའི་འཐུས་མི་རྣམ་པས་གནད་དོན་དེ་འདྲ་ཞིག་དང་འཕྲད་སྐབས་སེམས་སྐྱོ་དགོས་པའི་རྣམ་འགྱུར་འུ་ཐུག་དེ་འདྲ་ཞིག་བསྟན་པར་ང་རང་བློ་ཕམ་པོ་བྱུང་། བྲེལ་སྟབས་སུ་སྤེལ་སྟབས་ཡི་གེའི་དག་སྡེབ་ལ་ནོར་འཁྲུལ་བྱུང་ན་གཟིགས་པ་པོ་ཡོངས་ལ་དགོངས་སེལ་ཞུ།
སེམས་ཚོར་གྱིས་ཟིན་པའི་སྙིང་གཏམ་ངོ་མ་རེད། ང་ཚོ་སུ་ཡིན་རུང་། རང་རློམ་ཆེ་རུང་ཆུང་རུང་། དབང་ཆ་ཡོད་རུང་མེད་རུང་། སྙིང་གཏམ་འདིའི་འདབ་མ་རེ་རེའི་འཇམ་ཤའམ་སྙིང་བཅུད་དེ་དངོས་ཟིན་དགོས་ངེས་རེད། རྩོམ་སྒྲིག་པ་ལགས། སྙིང་གཏམ་འདི་འདྲ་གང་མང་མུ་མཐུད་དུ་འཆད་རོགས་ཞུ། ང་ཚོ་ནི་མང་གཙོ་ལ་སློབ་སྦྱོང་བྱེད་བཞིན་པའི་གོ་རིམ་ཞིག་ཏུ་འདུག་ཅེས་བརྗོད་ནའང་ཆོག་གི དེའི་ཕྱིར་སློབ་ཁྲིད་བྱེད་མཁན་ཞིག་གམ་དབུ་ཁྲིད་ཚད་ལྡན་ཞིག་ཡོད་པའི་སྐབས་འདིར་གཞུང་མང་སུ་ཡིན་རུང་དཔོན་གཡོག་གང་ཡིནའང་གོ་སྐབས་དམ་འཛིན་དང་རང་མགོ་ཐོན་ཐབས་བྱེད་རྒྱུ་ཁ་ཚ་དགོས་གཏུག་རེད།
ཉི་མ་འཚོ་ལགས། ལུང་རིག་གི་སྙིང་གཏམ་ལ་ནང་དོན་མེད་པ་ག་ལ་ཡིན།
སྤྱི་འཐུས་ནང་ནས་ཡང་འདི་ལྟར་གཅིག་གི་གཅིག་ལ་རྒྱབ་སྐྱོར་བྱས་བའི་རྐྱེན་གྱི་གནད་དོན་འདི་ཡོང་བ་རེད།
སྙིང་གཏམ་འདི་ལ་རྒྱབ་སྐྱོར་བརྒྱ་ཆའི་བརྒྱ་ཡོད།
རྩོམ་སྒྲིག་པ་ཞེས་ལབ་གི་ཡོད།
སྤྱང་ཀི་ ༤༣ ཀྱི་རྣ་བར་ཆོས་གསུང་མཁན་སུ་རེད། རྩོམ་པ་མ་རེད། ཏཱ་ལའི་བླ་མ་རེད།
བཀུར་འོས་སྐུ་ཞབས་ལུང་རིགས་ལགས། དང་པོ་ཁྱེད་ཀྱི་རྩོམ་སྒྲིག་གི་གཏམ་གྱི་ཁ་བྱང་མཐོང་མ་ཐག་ཉོབ་སོང་མོད། རྗེས་སུ་ལྷོད་ལ་བབ་ནས་ཀློག་དུས་དོན་ངོ་མ་ཡག་པོ་བྲིས་འདུག། བཀའ་དྲིན་ཆེ་ཞུ།
བོད་མི་རིགས་ཀྱིས་བཀའ་སློབ་ལ་སྒུག་བསྡད་པ་མ་གཏོགས་རང་རང་ས་ནས་བསླབ་བྱ་ཞིག་སློབ་མདོག་ཁ་བོ་མ་རེད།
ལུང་རིགས་ལགས།
ཁྱོད་ཀྱིས་སྙིང་གཏམ་པདྨ་འདབ་བརྒྱད་དེ་བཀུར་འོས་སྤྱི་འཐུས་ཚོར་གནང་བ་ཞིག་རེད་ལ། བོད་མི་མང་ལ་གནང་བ་ཞིག་ཀྱང་རེད།
ད་རེས་ཀྱི་གྲོས་ཚོགས་ཀྱི་གནས་ཚུལ་ཡོང་རྐྱེན་དེ་ནས་ང་ཚོར་བསླབ་བྱ་ཞིག་རག་པ་ནི། འབྱུང་འགྱུར་སྤྱི་འཐུས་འདེམས་སྟངས་ཐོག་མནོ་བསམ་གཏོང་དགོས་པའི་བརྡ་ཞིག་བརྒྱབས་པ་དེ་རེད།
ཡང་འདི་ལྟར།
ད་ནི་ཆོལ་ཁ་ཟེར་བའི་མིང་བྱང་འོག།
རྣམ་རྟོག་ཁྲི་མ་འབུམ་གྱི་དུག་རྫས་ཀྱིས།།
དམ་ཚིག་འོ་ཆུ་ལྟར་འདྲེས་བོད་འབངས་ཚོའི།།
སྙིང་ཁམས་གས་སུ་བཅུག་ན་ཀྱེ་མ་ཧུད།།
ད་ནི་དྲ་རྒྱའི་དྲ་གྲོགས་དཔྱོད་ལྡན་ཚོས།།
མི་རིགས་བླ་སྲོག་འཇིགས་པའི་ནད་ཡམས་དེར།།
སྙིང་གི་དགྲ་བཞིན་ཐུགས་གཟབ་མ་གནང་ན།།
གདོང་དམར་བོད་པ་རྨེག་མེད་གཞོམ་པའི་ཉེན།།
གོང་གི་ཚིག་དེ་༼ཁྱོད་ཚོའི་འོས་འགན་དང་ཐོབ་ཐང་༽ཞེས་བཅོ་འདོད་ནས་ཤི་ཐལ།
བཀྲ་ཤིས་རྒྱ་མཚོ་ལགས། བསོད་ནམས་སྟོབས་རྒྱལ་ལགས་ཀྱི་སྐོར་གནད་དོན་འདི་གྲོས་ཚོགས་ནང་མ་བྱུང་བའི་སྔོན་ནས་ངེད་གཉིས་ཀྱིས་བཤད་མྱོང་བ་རེད། སྐབས་དེ་དུས་ཁྱོད་ཀྱིས་ཧབ་དགོད་འདྲ་བྱས་སོང་། ད་ནི་གང་འདྲ་ཆགས་ས་རེད། ངའི་རེ་བ་ཡིན་ན་ཁོང་རྗེས་མ་ཨོ་སི་ཊོ་ལི་ཡའི་བོད་རིགས་མི་དམངས་ཀྱི་སྐུ་ཚབ་གནང་ནས་ཕེབས་ན་ཡག་ས་རེད། དེ་རུ་བོད་མིའི་མི་འབོར་གང་འདྲ་ཡིན་མིན་མི་ཤེས། གང་ལྟར་དཔྱ་ཁྲལ་ལག་དེབ་དུས་ཐོག་འབུལ་རྒྱུ་དང་རང་རང་གི་སྐུ་ཚབ་ཅིག་འདེམ་རྒྱུ་ནི་ཁྱོད་ཚོའི་ཐོབ་ཐང་ཐེབས་ཅག་དེ་རེད་འདོད།
རེད་ལགས།
ད་ངོ་མ་ངོ་ཚབ་འདི་ཚོ་ལ་ཡིད་ཐང་ཆད་ནི་ཞིག་རེད། ངོ་མ་བཤད་ན་ཁོང་ཚོ་ནི་མི་དམངས་ཀྱིས་དཔེ་ལྟ་དགོས་ས་བྱེད་དགོས་བ་མ་ཡིན་ནམ།
མ་གཞིར་མི་དམངས་ལ་ཆབ་སྲིད་སྐྱོ་དྲགས་ནས་སྤྱི་འཐུས་ཚོ་འདེམས་ནོར་ཤོར་ཡོད་ཚོད་རེད།
་་་་་་་་་་་་་་ད་དུང་ཁྱི་དང་སྤྲང་བོ་ལམ་ནས་མི་འགྲིག་ཞེས་བ་དེ་འདི་ཚོ་ལ་དྲངས་ན་མི་འོས་མི་འདུག་སྙམ།
ལྷ་ཆབ་ལགས་ཕེབས་ནས་རྒྱབ་སྐྱོར་གནང་བར་ཐུགས་རྗེ་ཆེ་ཞུ། ཁ་སང་ང་གངས་སྐྱིད་ཀྱི་ལས་བྱེད་རྒན་རབས་པ་འགར་ཐུག་སོང་། ཁོང་ཚོས་ད་རེབ་ཀྱི་གྲོས་ཚོགས་འཐུས་མི་ཚོའི་གནང་སྟངས་དེ་མཐོང་ན་གངས་སྐྱིད་ནས་འདུག་འདོད་ཀྱི་ཞེ་ཐག་ཆད་འགྲོ་གི་འདུག་ཟེར། གཞུང་གི་ལས་དོན་ཅིག་ལ་འཐམ་ནས་འདུག་འདོད་མི་འདུག་ཟེར། ང་ཡང་སེམས་ཁྲལ་ཞིག་གི་གཏིང་དུ་ལྷུང་སོང་།
རྩོམ་སྒྲིག་པ་མཆོག་གིས་སྙིང་གཏམ་གྱི་འདབ་མ་རེ་རེ་ཡི་ནང་དུ་མཐུན་སྒྲིལ་དང་ཆིག་སྒྲིལ། ཞི་བདེ་སོགས་ཀྱི་སྲོག་བཅུག་འདུག་པར་རྒྱབ་སྐྱོར་ཡོད། དགའ་བསུ་ཡོད།
བཀྲ་ཤིས་རྒྱ་མཚོ་ལགས། སྤྱི་འཐུས་ལ་སྡིག་དམོད་བྱས་ན་བོད་མི་དམངས་ལ་སྡིག་དམོད་བྱས་པ་རེད། སྤྱི་འཐུས་ཚོར་སྙིང་གཏམ་ཞུས་ན་བོད་མི་དམངས་ལ་སྙིང་གཏམ་ཞུས་པ་རེད། འདི་དག་ཁྱི་རེད་ལབ་ན། དོན་དུ་བོད་མི་རིགས་ཀྱི་ངོ་ཚབ་ཁྱིས་བྱས་པ་རེད། དེར་བརྟེན་སྡིག་སྟངས་འདི་ཚོ་ཚབས་ཆེན་རེད། དོན་དག་གང་ཡིན་ཡང་མཚམས་རེར་འདི་འདྲ་ཞིག་ལས་ཞུ་མི་ཤེས་པའི་གནས་སྐབས་ཀྱང་འདུག
བཀུར་འོས་བའི་རྩོམ་སྒྲིག་པ་ལགས།
ཁྱོད་ཀྱིས་སྤྱང་ཀའི་རྣ་བར་ཆོས་བཤད་ཞེས་བའི་དཔེ་དེ་གོ་ཨེ་མྱོང་། ཚང་མ་མི་ཡིན་པས་མི་སྐད་མི་གོ་མཁན་ཞིག་བོད་མི་མང་སྤྱི་འཐུས་སུ་སླེབས་ཨེ་ཡོད་ན། དུས་ད་ལྟ་བར་དུ་༧གོང་ས་སྐྱབས་མགོན་མཆོག་གིས་སྤང་བླང་གི་བསླབ་བྱ་མ་སྩལ་བ་ཞིག་མེད་པས་ཚང་མས་མཁྱེན་གསལ་རེད། ༧་གོང་ས་མཆོག་གི་བཀའ་ལོག་སྒྲུབ་བྱེད་མཁན་འདི་དག་གིས་རྫིག་ཉམས་ཆེན་པོའི་ངང་ནས་མི་དམངས་ལ་བཀའ་སློབ་གནང་དུ་གཅིག་ལས་གཅིག་མཁས་ཡོད་མོད། ད་ཐེང་གི་གྲོས་འདིའི་སྐབས་སུ་འདི་དག་གི་སེམས་སུ་རྒྱལ་འགོང་ཞུགས་པ་མ་ཡིན་ནམ། ཕར་བལྟས་ཚོད་ཀྱི་ཚང་མ་མཁྱེན་པའི་བདག་པོ་ཡིན་པར་བཤད་མོད། དེར་བརྟེན་ད་ཐེངས་སྤྱི་འཐུས་ཁག་ཅིག་གིས་རྐང་བཙུགས་འདི་ལྟར་བྱས་ཏེ་༧གོང་ས་མཆོག་གི་ཐུགས་དགོངས་དཀྲུག་པ་ཡིན་པར་སེམས།
འདི་འདྲའི་སྤྱི་འཐུས་ཚོ་ལ་པདྨ་འདབ་བརྒྱད་ཅིག་ཕུལ་བ་ལས་ཁྱི་ལ་ལྟོ་སྡུད་བྱེད་ཀྱི་ཁྱི་སྐོ་ཞིག་ཕུལ་ན་བཟང་བར་སེམས།