༧སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་མཆོག་གིས་དུས་རབས་ཉེར་གཅིག་པའི་ནང་པ་ཞེས་པ་དབང་རྟུལ་དད་པའི་རྗེས་སུ་མ་ཡིན་པར་དབང་རྣོན་རིག་པའི་རྗེས་སུ་འབྲང་དགོས་ཅེས་གསུངས།
ཟླ་འདིའི་ཕྱི་ཚེས་ ༥ ནས་ ༩ བར་ཉིན་གྲངས་ལྔའི་རིང་དཔལ་གཤེན་བསྟན་སྨན་རིའི་གླིང་དུ། བོད་མིའི་སྒྲིག་འཛུགས་ཆོས་རིག་ལས་ཁུངས་དང་དཔལ་གཤེན་བསྟན་སྨན་རིའི་གླིང་གཉིས་ཀྱི་གོ་སྒྲིག་འོག གཞུང་ཆེན་རིས་མེད་བགྲོ་གླེང་ཚོགས་འདུ་ཐེངས་དགུ་པ་འཚོག་བཞིན་ཡོད་ཅིང་། ཐེངས་འདིའི་དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་ ༧སྐྱབས་རྗེ་སྨན་རིའི་ཁྲི་འཛིན་ལུང་རྟོགས་ཟླ་བ་དར་རྒྱས་རིན་པོ་ཆེ་མཆོག་དབུ་བཞུགས་ཐོག དམིགས་བསལ་སྐུ་མགྲོན་ཆོས་རིག་ལས་ཁུངས་ཀྱི་དྲུང་ཆེ་བདུད་འདུལ་རྡོ་རྗེ་ལགས། དབུས་གཡུང་དྲུང་བོན་འཛིན་སྐྱོང་ལྷན་ཚོགས་ཀྱི་ཟུང་དྲུང་དགེ་བཤེས་དགེ་ལེགས་ཉི་མ་ལགས། ཆོས་བརྒྱུད་ཁག་ནས་བགྲོ་གླེང་གནང་མཁན་དགེ་འདུན་པ་དང་བཙུན་མ་གྲངས་ ༢༢ དང་། ཕྱོགས་མཐའ་ཁག་གི་དགོན་སྡེ་གྲངས་ ༤༥ ནས་ཚོགས་བཅར་བ་གྲངས་ ༨༥། དེ་བཞིན་དཔལ་གཤེན་བསྟན་སྨན་རིའི་གླིང་གི་གྲྭ་མང་འདུས་སྡེ་བཅས་གདན་འཛོམས་བྱུང་ཡོད་འདུག བགྲོ་གླེང་གི་ཉིན་དང་པོར་སྨན་རིའི་ཁྲི་འཛིན་མཆོག་གིས་༧གོང་ས་རྒྱལ་བ་རིན་པོ་ཆེ་མཆོག་ནས་རིས་མེད་ཆོས་ཚོགས་ཐེངས་དང་པོ་ནས་བཅོ་ལྔའི་བར་གྱི་སྟེང་དུ་བསྩལ་གནང་བའི་བཀའ་སློབ་ཕྱོགས་སྒྲིག་དབུ་འབྱེད་གནང་འདུག
གཞུང་ཆེན་རིས་མེད་བགྲོ་གླེང་གི་དགོས་དམིགས་ཀྱི་སྐོར་ལ་ཆོས་རིག་ལས་ཁུངས་ཀྱི་དྲུང་ཆེ་བདུད་འདུལ་རྡོ་རྗེ་ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་བསྐྱེད་དམ་བཅའ་གཉིས་པ་ཆོས་ལུགས་མཐུན་སྒྲིལ་གྱི་དགོངས་དོན་ལྟར།བོད་གངས་ཅན་གྱི་རིས་སུ་མ་ཆེད་པའི་ཆོས་བརྒྱུད་ཁག་དང་གཡུང་དྲུང་བོན་བཅས་ཀྱི་སློབ་རྒྱུད་ནང་ཕན་ཚུན་བསྟན་འཛིན་མཐུན་པ་ཞེས་གསུངས་པ་བཞིན། དགེ་འདུན་པ་ཐུགས་མཐུན་རྡོག་རྩ་གཅིག་སྒྲིལ་ཡོང་རྒྱུར་དམིགས་པ་ཞིག་ཡིན། དེ་བཞིན་གཞུང་ཆེན་རིས་མེད་བགྲོ་གླེང་སྐབས་སོ་སོར་བརྗོད་གཞིའི་ཐོག་མཁས་པའི་གསུང་བཤད་དང་བགྲོ་གླེང་ལྷུག་པོ་གནང་ནས་བཤད་སྒྲུབ་ཀྱི་བསྟན་པར་ཞབས་འདེགས་བསྒྲུབ་རྒྱུར་དམིགས་ཡོད། ཅེས་བརྗོད་སོང་།
ཡང་ཁོང་གིས། བོད་ཀྱི་སྐད་ཡིག་དང་ཆོས་ནི་འཛམ་གླིང་ནང་གི་རིག་གཞུང་རྙིང་པ་ཞིག་ཡིན་པ་ཙམ་མ་ཟད། ད་ལྟའི་ཉིན་རེའི་འཚོ་བའི་ཁྲོད་ཕན་ཐོགས་ངེས་ཅན་ཡོད་པ་ཞིག་ཆགས་ཡོད། ཆེ་ས་ནས་ཉོན་མོངས་དུག་གསུམ་གྱིས་རྒྱལ་ཁབ་དང་རྒྱལ་ཁབ་བར་དུ་དམག་འཁྲུག་དང་། འཇིགས་སྐུལ་རིང་ལུགས། ལྐོག་ཟ་རུལ་སུངས། རྒྱུ་ནོར་རྔམ་སེམས་ཀྱིས་གཏེར་ཁ་སྔོག་འདོན་དང་། ཤིང་ནགས་གཅོད་འབྲེག་སོགས་ཀྱིས་ཁོར་ཡུག་ཉམས་རྒུད་བཏང་བ། ཉམ་ཆུང་དང་ཉམས་ཐག་ལ་ཐུབ་ཚོད་བཏང་བ་སོགས་འཛམ་གླིང་འདིར་མིས་བཟོས་པའི་དཀའ་ངལ་དང་སྡུག་བསྔལ་མང་པོ་ཡོད། ཆུང་ས་ནས་མི་སྒེར་ལ་མཚོན་ན་སེམས་འཁྲུག་པ་དང་སེམས་ངལ་བྱུང་བའི་སྐབས་ཕན་ཐོགས་ངེས་ཅན་ཞིག་ཡོད་པའི་འཛམ་གླིང་གི་ཁྱད་ནོར་ཞིག་ཆགས་ཡོད། ནོར་བུ་རང་ལག་ཏུ་ཡོད་དུས་ནོར་ཉམས་ཆོད་པའི་ཐོག་ནས་བདག་བཟུང་གིས་མི་རབས་གཞོན་པར་བརྩིས་རྒྱག་དགོས་པ་གནད་འགག་ཞིག་མཐོང་གི་འདུག ཅེས་བརྗོད་སོང་།
༧སྐྱབས་རྗེ་སྨན་རིའི་ཁྲི་འཛིན་ལུང་རྟོགས་ཟླ་བ་དར་རྒྱས་རིན་པོ་ཆེ་མཆོག་གིས། ནམ་རྒྱུན་༧གོང་ས་རྒྱལ་བ་རིན་པོ་ཆེ་མཆོག་ནས་དུས་རབས་ཉེར་གཅིག་པའི་ནང་པ་ཞིག་བྱེད་དགོས་གསུངས་པ་བཞིན། དུས་རབས་ཉེར་གཅིག་པའི་ནང་པ་ཞེས་པ་དབང་རྟུལ་དད་པའི་རྗེས་སུ་མ་ཡིན་པར་དབང་རྣོན་རིག་པའི་རྗེས་སུ་འབྲང་དགོས། ཅེས་དང་། གྲུབ་མཐའི་རྣམ་བཞག་བཤད་དུས་སོ་སོའི་ལྟ་བ་ལ་ཆགས་ཏེ། རང་རྒྱལ་གཞན་ཕམ་གྱི་བསམ་བློ་བཏང་ན་མ་རྟོག་དང་ལོག་རྟོག་སོགས་སྐྱེ་བའི་ཉེན་ཁ་ཞིག་ཆགས་ཡོད་པས། དེ་འདྲ་མ་ཡིན་པའི་ཐོག་ནས་དོགས་པ་གང་ཡོད་ཀྱང་ཕན་ཚུན་བགྲོ་གླེང་བྱས་ཚེ་དག་སྣང་ཡོང་ཐུབ་པ་ཞིག་རེད། ཅེས་གསུངས་སོང་།
ཡང་རིན་པོ་ཆེ་མཆོག་གིས། ང་ཚོའི་རྒྱལ་ཁབ་ཤོར་ནས་བཙན་བྱོལ་ཡོང་དགོས་འཁེལ་ཡང་། རྐྱེན་ངན་གྲོགས་ཤར་གྱིས་ཆོས་བརྒྱུད་ཚང་མ་མཉམ་དུ་འཛོམས་ཏེ་བགྲོ་གླེང་བྱེད་པའང་སྐལ་བ་བཟང་པོ་ཞིག་རེད། གཙོ་བོ་༧གོང་ས་རྒྱལ་བ་རིན་པོ་ཆེ་མཆོག་གི་རླབས་ཆེན་གྱི་དགོངས་གཞི་ཐུགས་བསྐྱེད་དམ་བཅའ་བཞི་ལས། འགྲོ་བ་མིའི་གཅིག་མཚུངས་ཀྱི་འདུ་ཤེས་འཛིན་པ་དང་། འཛམ་གླིང་གི་ཆོས་ལུགས་ཚང་མས་མཐུན་སྒྲིལ་ཐོག་འགྲོ་བ་མིའི་དགོས་མཁོ་བསྒྲུབ་པ། དེ་བཞིན་ཆོས་ལུགས་ལ་མ་བརྟེན་པའི་བཟང་སྤྱོད་སོགས་ཀྱི་དགོངས་གཞིའི་མཛད་པ་ལ་བརྟེན་ནས། ༧གོང་ས་མཆོག་ལ་འཛམ་གླིང་ཞི་བདེའི་དེད་དཔོན་གྱི་མཚན་སྙན་ཞིག་ཐོབ་ཡོད་ལ། ད་ལྟ་ང་ཚོ་བོད་ཀྱི་སྤྱི་ཚོགས་ལ་མཚོན་ནའང་ཆོས་ལུགས་ཀྱི་ཐོག་ཞེན་ཁོག་དང་ཆགས་སྡང་བྱེད་མཁན་ཉུང་ཉུང་རེད། དེ་དག་ཚང་མ་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་ཉག་གཅིག་ལ་བརྟེན་ནས་བྱུང་བ་ཞིག་རེད། ཅེས་གསུངས་སོང་།
ཐེངས་འདིའི་བགྲོ་གླེང་ཐོག་ཁམས་བརྒྱད་ཀྱི་བསྟན་དོན་ལ་རགས་ཙམ་དཔྱད་པ་དང་། རིག་པའི་ཁམས་ལ་དཔྱད་པ། སྲིད་པའི་ཁམས་དང་རྒྱུན་ཁམས་གཉིས་ཀྱི་སྐོར་ལ་རོབ་ཙམ་དཔྱད་པ། ཁམས་ཆེན་པོ་བརྒྱད་ལས་སོ་སོར་གསལ་བའི་ཁམས་དང་རང་རིག་པའི་ཁམས་བཤད་པ། མངོན་རྟོགས་རྒྱན་ལས་སེམས་བསྐྱེད་ཀྱི་སྐོར། མངོན་རྟོགས་རྒྱན་ལས་ངེས་འབྱེད་ཡན་ལག་སྐོར། མངོན་རྟོགས་རྒྱན་ལས་གདམས་ངག་གི་སྐོར་སོགས་ཀྱི་བརྗོད་གཞིའི་ཐོག་བགྲོ་གླེང་དང་དྲི་བ་དྲིས་ལན་གནང་བཞིན་ཡོད་འདུག
གཞུང་ཆེན་རིས་མེད་བགྲོ་གླེང་ཚོགས་འདུ་ནི་ཕྱི་ལོ་ ༢༠༡༡ ལོར་བཙན་བྱོལ་བོད་མིའི་ཆོས་ཚོགས་ཐེངས་ ༡༡ པའི་ཐོག་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་བཞིན། ཕྱི་ལོ་ ༢༠༡༣ ལོའི་བཤད་སྒྲུབ་བསྟན་པ་གོང་སྤེལ་ལྷན་ཚོགས་སྐབས་གྲོས་ཆོད་དུ་བཞག་འདུག ཕྱི་ལོ་ ༢༠༡༥ ལོར་དཔལ་ལྡན་རྒྱུད་སྟོད་གྲྭ་ཚང་དུ་གཞུང་ཆེན་རིས་མེད་བགྲོ་གླེང་ཐེངས་དང་པོ་འཚོགས་ཡོད་ཅིང་། ཕྱི་ལོ་ ༢༠༡༦ ལོར་བཀའ་བརྒྱུད་ཀྱི་གདན་ས་དཔལ་སྤུངས་ཤེས་རབ་གླིང་དུ་ཚོགས་ཐེངས་གཉིས་པ་འཚོགས་ཡོད་པ་དང་། ཕྱི་ལོ་ ༢༠༡༨ ལོར་དཔལ་ལྡན་ས་སྐྱའི་མཐོ་སློབ་ཏུ་ཚོགས་ཐེངས་གསུམ་པ་འཚོགས། ཕྱི་ལོ་ ༢༠༡༩ ལོར་གཡུང་དྲུང་བོན་གྱི་གདན་ས་དཔལ་གཤེན་བསྟན་སྨན་རིའི་གླིང་དུ་ཚོགས་ཐེངས་བཞི་བ་འཚོགས། ཕྱི་ལོ་ ༢༠༢༠ ལོར་སྔ་འགྱུར་རྙིང་མའི་གདན་ས་ཐེག་ཆེན་རྣམ་གྲོལ་བཤད་སྒྲུབ་དར་རྒྱས་གླིང་དུ་ཚོགས་ཐེངས་ལྔ་བ་འཚོགས། ཕྱི་ལོ་ ༢༠༢༣ ལོར་གདན་ས་ཆེན་པོ་དགའ་ལྡན་རྣམ་པར་རྒྱལ་བའི་གླིང་དུ་ཚོགས་ཐེངས་དྲུག་པ་འཚོགས། ཕྱི་ལོ་ ༢༠༢༤ ལོར་བཀྲ་ཤིས་ལྗོངས་ཁམས་སྒར་འབྲུག་མཐོ་སློབ་དྷརྨ་ཀཱ་རའི་གཙུག་ལག་སློབ་གཉེར་ཁང་དུ་ཚོགས་ཐེངས་བདུན་པ་འཚོགས། ཕྱི་ལོ་ ༢༠༢༥ ལོར་རྫོང་སར་བཤད་གྲྭ་ཆོས་ཀྱི་བློ་གྲོས་སུ་ཚོགས་ཐེངས་བརྒྱད་པ་བཅས་འཚོགས་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
