རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་ཀྱི་རྐང་སྤོལ་འགྲན་བསྡུར་ཐེངས་ ༣༡ པ་དབུ་འཛུགས། 

འདི་ལོའི་རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་རྟགས་མའི་རྐང་སྤོལ་འགྲན་བསྡུར་ཐེངས་ ༣༡ པའི་སྟེང་རྐང་སྤོལ་རུ་ཁག་བཅུ་གཉིས་མ་གཏོགས་མཉམ་ཞུགས་བྱས་མི་འདུག

ཟླ་འདིའི་ཕྱི་ཚེས་ ༥ ཉིན་ནས་ ༡༦ བར་ཉིན་གྲངས་ ༡༢ ཉིན་བོད་རྒྱལ་ཡོངས་རྩེད་རིགས་ཚོགས་པའི་གོ་སྒྲིག་འོག རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་ཀྱི་རྐང་སྤོལ་འགྲན་བསྡུར་ཐེངས་ ༣༡ པ་དེ། ཀོ་ལི་གྷལ་དོན་ལྡན་གླིང་དུ་རྩེད་འགྲན་བྱེད་མགོ་བཙུགས་ཡོད་ཅིང་། འདི་ལོའི་རྒྱལ་ཡུམ་ཆེན་མོའི་རྩེད་འགྲན་ནང་རུ་ཁག་བཅུ་གཉིས་ཀྱི་རྩེད་འགྲན་པ་དང་ལས་བྱེད་སོགས་ཁྱོན་སྡོམ་མི་གྲངས་ ༢༡༦ ལྷག་གིས་མཉམ་ཞུགས་གནང་འདུག་ལ། རྩེད་འགྲན་གྱི་ཨང་དང་པོར་ཧིན་སྒོར་འབུམ་གཉིས་དང་། ཨང་གཉིས་པར་ཧིན་སྒོར་འབུམ་གཅིག་དང་ཕྱེད་ཀའི་བྱ་དགའ་ཡོད་འདུག

དེའི་ཐད་བོད་རྒྱལ་ཡོངས་རྩེད་རིགས་ཚོགས་པའི་ཚོགས་གཙོ་བྱང་ཆུབ་རྒྱལ་མཚན་ལགས་ཀྱིས། འདི་ལོའི་རྒྱལ་ཡུམ་ཆེན་མོའི་རྐང་སྤོལ་འགྲན་ཚོགས་ནང་རུ་ཁག་བཅུ་གཉིས་ཀྱིས་མཉམ་ཞུགས་བྱས་ཡོད་ལ། རུ་ཁག་རེ་ལ་རྩེད་འགྲན་པ་དང་ལས་བྱེད་བཅོ་བརྒྱད་རེ་ཡོད། ཤན་འབྱེད་པ་རྣམས་ནམ་རྒྱུན་རྒྱ་གར་རྒྱལ་ཡོངས་རྐང་སྤོལ་མཐུན་ཚོགས་ནས་སྐད་གཏོང་གི་ཡོད་ཀྱང་། ད་ལོ་རྒྱ་གར་བྱང་ཕྱོགས་ཁུལ་གྱི་ཤན་འབྱེད་པ་རྣམས་སྐད་བཏང་ཡོད། དེ་ཡང་འདས་ལོར་རྒྱ་གར་བྱང་ཤར་ཁུལ་དུ་བོད་རྒྱལ་ཡོངས་སྐྱེས་པའི་རྐང་སྤོལ་མཐུན་ཚོགས་ཀྱིས་རྩེད་འགྲན་བྱེད་སྐབས། རྒྱ་གར་བྱང་ཤར་ཁུལ་གྱི་རྩེད་འགྲན་པ་རྣམས་ཡག་པོ་མཐོང་སོང་བས། ད་ལོ་ཤན་འབྱེད་པ་རྣམས་ཆེད་དུ་གདན་ཞུ་བྱས་ཡོད། ཅེས་བརྗོད་བྱུང་།

ཡང་ཁོང་གིས། ད་བར་དམིགས་བསལ་དཀའ་ངལ་རིགས་འཕྲད་མ་སོང་ནའང་། ཀོ་ལི་གྷལ་ས་གནས་དེ་དམིགས་བསལ་ལམ་ཐག་རིང་པོ་ཆགས་ཀྱི་ཡོད་སྟབས། ད་ལོ་འཛུལ་ཞུགས་བྱེད་མཁན་གྱི་རུ་ཁག་ཉུང་བ་ཡོད་རེད། ནམ་རྒྱུན་རུ་ཁག་བཅུ་དྲུག་དང་ཡང་ན་དེ་ལས་མང་བ་ཡོང་གི་ཡོད་ཀྱང་། ད་ལོ་རུ་ཁག་བཅུ་གཉིས་ཀྱིས་མ་གཏོགས་འཛུལ་ཞུགས་བྱས་ཐུབ་ཡོད་མ་རེད། ནམ་རྒྱུན་ནས་རྒྱལ་ཡུམ་ཆེན་མོ་རྗེས་དྲན་གྱི་རྐང་སྤོལ་གང་དུ་འཚོགས་ཀྱང་། ས་གནས་ཁག་གིས་རྩེད་རིགས་ཚོགས་པ་དང་། རྩེད་འགྲན་པ་རྣམས་ལ་བཞུགས་ས་དང་ཞལ་ལག དེ་བཞིན་རྩེད་ཐང་གི་ལས་ཀ་ཆ་ཚང་གི་འགན་འཁུར་གྱི་ཡོད་པ་བཞིན་ད་ལོ་ཡང་ས་གནས་རང་གིས་འཁུར་གྱི་ཡོད་ཅིང་། བོད་རྒྱལ་ཡོངས་རྩེད་རིགས་ཚོགས་པས་དེ་དག་ལ་མཐུན་འགྱུར་དང་རོགས་འདེགས་ཞུ་ཡི་ཡོད། ཅེས་བརྗོད་བྱུང་།

འདིའི་ལོའི་རྒྱལ་ཡུམ་ཆེན་མོའི་རྩེད་འགྲན་ཁྲོད་ཨང་རིམ་དང་པོ་འཐོབ་མཁན་ལ་ཧིན་སྒོར་འབུམ་གཉིས་དང་། ཨང་གཉིས་པར་འབུམ་གཅིག་དང་ཕྱེད་ཀ དེ་བཞིན་རུ་ཁག་ཡག་ཤོས་ལ་ཧིན་སྒོར་ཁྲི་གཉིས་དང་ལྔ་སྟོང་། རྩེད་འགྲན་རེ་རེའི་ཁྲོད་ཀྱི་ཕུལ་བྱུང་རྩེད་འགྲན་པ་ལ་ཧིན་སྒོར་ཆིག་སྟོང་བཅས་ཡོད་འདུག དེ་བཞིན་རྩེད་འགྲན་པ་ལོ་ཆུང་ཤོས་དང་། རྒྱལ་ཡུམ་ཆེན་མོའི་རྩེད་འགྲན་ཐེངས་ ༣༡ པའི་རྩེད་འགྲན་སྤྱི་ཡོངས་ཀྱི་ཕུལ་བྱུང་རྩེད་འགྲན་པ། སྤོ་ལོ་མང་ཤོས་ལྡུག་མཁན་བཅས་སུ་གཟེངས་རྟགས་འབུལ་གྱི་ཡོད་འདུག

བོད་རྒྱལ་ཡོངས་རྩེད་རིགས་ཚོགས་པས་གོ་སྒྲིག་གནང་བཞིན་པའི་རྒྱལ་ཡུམ་ཆེན་མོའི་དྲན་རྟེན་གསེར་གྱི་བུམ་པའི་རྐང་སྤོལ་འགྲན་བསྡུར་ནི། ཕྱི་ལོ་ ༡༩༨༡ ལོར་བོད་ཕྲུག་ཁྱིམ་སྡེའི་རྩིས་དཔོན་ཟུར་པ་ཇོ་བོ་ཚེ་རིང་ལགས་ཀྱིས་གསར་འཛུགས་གནང་སྟེ། རྩེད་འགྲན་འདི་ལོ་ལྟར་ཚོགས་ཀྱི་ཡོད་པ་རེད། འོན་ཀྱང་། ཕྱི་ལོ་ ༢༠༢༠ ལོར་ཏོག་དབྱིབས་གཉན་རིམས་ཀྱི་རྐྱེན་གྱིས་འཚོགས་ཐུབ་མེད་པ་རེད། རྒྱལ་ཡུམ་ཆེན་མོའི་རྗེས་དྲན་གསེར་གྱི་བུམ་པའི་རྩེད་འགྲན་དེ་ཕྱི་ལོ་ ༢༠༡༢ ལོར་དྷ་རམ་ས་ལ་དང་། ༢༠༡༣ ལོར་ཧོན་སུར་རབ་རྒྱས་གླིང་། ༢༠༡༤ ལོར་དོན་གྲུབ་གླིང་(Clementown)། ༢༠༡༥ ལོར་དྷ་རམ་ས་ལ། ༢༠༡༦ ལོར་མོན་གྷོ། ༢༠༡༧ ལོར་ཀོ་ལི་གྷལ་དོན་ལྡན་གླིང་། ༢༠༡༨ ལོར་སྦེལ་ཀོབ་བདེ་སླར་གཞིས་ཆགས། ༢༠༡༩ ལོར་དྷ་རམ་ས་ལ། ༢༠༢༡ ལོར་དོན་གྲུབ་གླིང་དང་། ༢༠༢༢ ལོར་སྤོན་ཊ་ཆོལ་གསུམ་གཞིས་ཆགས།  ༢༠༢༣ ལོར་དྷ་རམ་ས་ལ། ༢༠༢༤ ལོར་ཧོན་སུར་རབ་རྒྱས་གླིང་།འདས་ལོའི་རྒྱལ་ཡུམ་ཆེན་མོའི་རྗེས་དྲན་གསེར་གྱི་བུམ་པའི་རྩེད་འགྲན་དེ་རྒྱ་གར་ལྷོ་ཕྱོགས་ཧོན་སུར་རབ་རྒྱས་གླིང་དུ་འཚོགས་ཡོད་པ་རེད།

བོད་རྒྱལ་ཡོངས་རྩེད་རིགས་ཚོགས་པའི་དྲ་རྒྱར་གཞིགས་ན། ད་བར་རྒྱལ་ཡུམ་ཆེན་མོའི་རྩེད་འགྲན་ཐེངས་ ༣༠  རྩེད་འགྲན་བྱས་པའི་ཁྲོད། ཕྱི་ལོ་ ༢༠༡༥ ལོར་མོན་གྷོ་འདོད་རྒུ་གླིང་རུ་ཁག་དང་། ༢༠༡༦ ལོར་ཊི་ཌི་ཨེལ་སྦེལ་ཀོབ་རུ་ཁག ༢༠༡༧ ལོར་བཀྲིས་གླིང་ཧི་མ་ལ་ཡ་རུ་ཁག ༢༠༡༨ དང་ ༢༠༡༩ ལོར་མོན་གྷོ་འདོད་རྒུ་གླིང་རུ་ཁག ༢༠༢༡ ལོར་སིམ་ལ་རུ་ཁག ༢༠༢༢ ལོར་དོན་གྲུབ་གླིང་རུ་ཁག ༢༠༢༣ ལོར་དྷ་ས་གཅིག་སྒྲིལ་རུ་ཁག ༢༠༢༤ དང་ ༢༠༢༥ ལོར་མོན་གྷོ་རུ་ཁག་བཅས་ལ་རྒྱལ་ཁ་ཐོབ་ཡོད་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།