མགོ་ལོག་སྟོང་སྐྱབས་དགོན་པའི་དགེ་འདུན་པ་རིན་ཆེན་བཟང་པོ་ལགས་ཀྱིས་མགོ་ལོག་ས་ཁུལ་གྱི་བོད་རིགས་བགྲེས་སོང་སྐོར་ཞིག་ལ། སྤྱི་ཚོགས་གསར་རྙིང་གི་ཁྱད་པར་དང་ད་ཆར་བདེ་སྐྱིད་ཡོད་མེད། མ་འོངས་པར་རེ་བ་གང་ཡོད་སོགས་བཅར་འདྲི་བྱས་སྐབས། འབྲོག་དམངས་ཚོས་ངུ་ཞོར་བཤད་ཞོར་དུ་སེམས་གཏིང་གི་སྡུག་བསྔལ་མང་པོ་ཞིག་ཕྱིར་བཏོན་ཏེ། སྐད་ཆ་འདི་དག་༧རྒྱལ་བ་རིན་པོ་ཆེའི་སྙན་ལ་སྒྲོན་དགོས་པ་དང་། འཛམ་གླིང་ལ་ཁྱབ་བསྒྲགས་བྱ་དགོས་པའི་རེ་འདུན་བཏོན་པ་ལྟར། ཆུ་ཚོད་གཅིག་དང་ཕྱེད་ཀ་ཅན་གྱི་གློག་བརྙན་འཁོར་ཐག་ཅིག་བོད་གཞུང་བདེ་སྲུང་ལས་ཁུངས་ལ་ཕུལ་ཡོད་འདུག
ཕྱི་ཚེས་ ༢༡ ཉིན་འདི་གའི་གསར་འགོད་པས་གྲྭ་རིན་ཆེན་བཟང་པོར་ཐུག་འཕྲད་བྱས་ཏེ། ཁོང་གིས་བོད་ནང་གི་བོད་མི་མང་པོ་ཞིག་ལ་བཅར་འདྲི་བྱས་པའི་གློག་བརྙན་སྐོར་ལ་བཅར་འདྲིའི་ཚུལ་གྱིས་གླེང་མོལ་བྱས་ཡོད། སྐབས་དེར་གྲྭ་རིན་ཆེན་བཟང་པོས་ཁོ་རང་ངོ་སྤྲོད་གནང་དོན། ངའི་མིང་ལ་རིན་ཆེན་བཟང་པོ་ཟེར་ཞིང་། མགོ་ལོག་སྟོང་སྐྱབས་དགོན་པའི་གྲྭ་བ་ཡིན། ད་ལོ་རང་ལོ་ ༣༩ ཡིན་ལ་སྔར་ལོ་སྤྱི་ཟླ་ ༡༢ བའི་ནང་རྒྱ་གར་དུ་འབྱོར་ཏེ་ད་ལྟ་ཤེས་རབ་དགའ་ཚལ་སློབ་གླིང་ནང་ལྷ་བྲིས་སྦྱོང་གིན་ཡོད། ང་རང་རྒྱ་གར་ལ་ཡོང་དོན་གང་ཡིན་ཟེར་ན། སྤྱི་ལོ་ ༢༠༠༧ ལོར་ང་རང་རྡོ་རྗེ་འཇིགས་བྱེད་ཀྱི་མཚམས་ལ་བསྡད་པ་ཡིན། མཚམས་གྲོལ་ཏེ་ཕྱིར་ཐོན་སྐབས། ༧རྒྱལ་བ་རིན་པོ་ཆེ་ཡི་སྐུ་ཚབ་ཅིག་པེ་ཅིན་ལ་འབྱོར་ཡོད་མེད་ཀྱི་སྐད་ཆ་གསལ་ལ་མི་གསལ་བ་ཞིག་སྤྱི་ཚོགས་ནང་ཁྱབ་འདུག འོན་ཀྱང་། རྒྱ་ནག་གཞུང་གིས་༧རྒྱལ་བ་རིན་པོ་ཆེའི་སྐུ་ཚབ་ཚོ་ལ་༧རྒྱལ་བ་རིན་པོ་ཆེ་སྒེར་གྱི་དོན་དག་མ་གཏོགས། བོད་ཀྱི་དོན་དག་བཤད་རྒྱུའི་ཐོབ་ཐང་ཡོད་པ་མ་རེད་ཟེར་ནས་དྲིལ་བསྒྲགས་ཤུགས་ཆེན་བྱེད་ཀྱིན་འདུག སྐད་ཆ་དེ་ཐོས་སྐབས་སེམས་གཏིང་ནས་མི་བཟོད་པ་ཞིག་དང་མ་སྐྱིད་པ་ཞིག་སླེབས་སོང་ལ། དེའི་ཐད་མི་དམངས་ཚོ་ལ་བསམ་ཚུལ་གང་འདྲ་ཡོད་ན་སྙམ་སྟེ་ཤེས་འདོད་ཧ་ཅང་ཆེན་པོ་ཞིག་སྐྱེས་སོང་། དེ་ནས་བསམ་བློ་མང་པོ་བཏང་བ་ཡིན། ཐབས་ལམ་འདྲ་མིན་བཙལ་བ་ཡིན། རྒྱལ་སྤྱིའི་ཐོག་ན་དྲང་བདེན་ལ་རྒྱབ་རོགས་བྱེད་མཁན་ཞིག་དང་བོད་མིའི་བདེ་སྡུག་ལ་གཟིགས་སྐྱོང་གནང་མཁན་ཞིག་ཡོད་ན། ཁོང་ཚོར་བོད་རིགས་མང་ཚོགས་ཀྱི་སེམས་གཏིང་གི་སྐད་ཆ་དང་། སྡུག་བསྔལ། རེ་སྒུག་སོགས་བཅར་འདྲི་བྱས་ཤིང་། བརྙན་འཕྲིན་ཐོག་ཕབ་སྟེ་སྟོན་ཐུབ་པ་ཡིན་ན། ཕན་ཐོགས་ཕྲན་བུ་རེ་ཡོང་གི་རེད་སྙམ་སྟེ། ལས་ཀ་དེ་བསྒྲུབ་རྒྱུའི་སེམས་ཐག་གཙང་བཅད་བྱས་པ་ཡིན། ཞེས་བརྗོད་སོང་།
གསར་འགོད་པས་ཁོང་ལ་ཉིད་ཀྱིས་འབྲོག་དམངས་ཚོར་བཅར་འདྲི་བྱས་པའི་གོ་རིམ་ཁྲོད། མང་ཚོགས་ཚོས་བསམ་ཚུལ་དང་རེ་འདུན་གང་འདྲ་བཏོན་སོང་ཞེས་དྲིས་པར་ཁོས་བརྗོད་དོན། གློག་བརྙན་དེའི་ནང་གི་སྐད་ཆ་འདྲི་ཡུལ་མང་ཆེ་བ་ལོ་ན་རྒན་པ་རྐྱང་རྐྱང་ཡིན། གང་ཡིན་ཟེར་ན། སྤྱི་ཚོགས་རྙིང་བ་ཤེས་མཁན་གྱི་མི་རབས་རྒན་པ་དེ་ཚོ་རྫོགས་འགྲོ་བཞིན་ཡོད་པ་རེད། དེར་བརྟེན། ངས་ཆེད་དུ་སྤྱི་ཚོགས་གསར་རྙིང་གཉིས་ཀའི་གནས་སྟངས་ཤེས་མཁན་རིགས་ལ་སྐད་ཆ་དྲིས་པ་ཡིན། ངས་ཁོང་ཚོར་ང་བརྒྱད་ཡར་སྔོན་ལ་རང་དབང་ཅི་འདྲ་ཡོད་མེད་དང་། མི་དམངས་ཀྱི་འཚོ་བའི་བདེ་སྡུག་གང་འདྲ་ཡིན་པ། ད་ལྟའི་སྤྱི་ཚོགས་གསར་བར་བསམ་ཚུལ་གང་འདྲ་ཡོད་པ། ང་བརྒྱད་དང་རིག་གནས་གསར་བརྗེ་སྐབས་མི་ཤི་རྨས་དང་བཀྲེས་ལྟོགས་སོགས་ཀྱི་དཀའ་སྡུག་ཚད་མེད་མྱངས་རབས་བདེན་པ་ཡིན་མིན་སོགས་དྲིས་པ་ཡིན། སྐབས་དེར་ཁོང་ཚོས། སྔོན་ཆད་ཕྱུག་པོར་ཕྱུག་པོའི་ཚོད་ཀྱི་བདེ་སྐྱིད་དང་། མེད་པོར་མེད་པོའི་ཚོད་ཀྱི་རང་དབང་ཡོད། ང་བརྒྱད་ལོར་མི་བསད་གཏུབ་དང་ཤི་རྨས་ཀྱི་གནས་སྟངས་དེ་ད་ལྟ་གཟུགས་སུ་གྲུབ་རྒྱུ་ཡོད་ན། མི་སུས་མཐོང་ཡང་བརྒྱལ་འགྲོ་བ་རེད། བོད་མི་སྟོང་ཕྲག་མང་པོ་བསྡེབས་གསོད་བྱས་ཡོད། བཀྲེས་ལྟོགས་ཀྱིས་མནར་ཏེ་མི་ཡིས་རྩྭ་ཟོས་ནས་ལྕི་བ་གཏོང་བའི་ཚད་དུ་སླེབས་པ་རེད། རྨ་ཆུ་དང་ཏིང་ཆུའི་འདྲེས་མདོ་མི་རོ་ཡིས་ཁེངས་ཏེ་ཆུ་བཀག་པ་རེད། ཕ་ཤི་ན་བུས་ཕའི་རོ་ཐོག་ནས་བྲོ་འཁྲབ་དགོས་པ་དང་། མ་ཤི་ན་བུ་མོས་མའི་རོ་ཐོག་ནས་བྲོ་འཁྲབ་དགོས་པ་བྱུང་ཞིང་། ཤུལ་དུ་ལུས་པ་ཚང་མ་མི་དམངས་ཁྲིམས་ཁང་ནང་དེད་པ་རེད། འོན་ཀྱང་། ང་ཚོ་ད་དུང་ཁོ་ཚོའི་བཙན་འོག་ཏུ་བསྡད་ཡོད། ང་ཚོར་འདི་ལས་ལྷག་པའི་སྡུག་བསྔལ་ཆེན་པོ་ཞིག་མི་འདུག ཅེས་དང་།
ཁོང་གིས་མུ་མཐུད་དུ་བོད་ནང་གི་བོད་མི་ཚོའི་རེ་འདུན་སྐོར་བརྗོད་དོན། ད་ལྟའི་ཆར་ཕྱིའི་རྣམ་པར་ལྷོད་གཡེང་ཙམ་བཏང་ཡོད་ལ། མི་ཁྱིམ་ཚང་མའི་སྒོ་ཁར་ཕྱུགས་ཟོག་རེ་ཟུང་དང་། ནང་དུ་བཅའ་དངོས་ཁྲ་ཁྲ་རིག་རིག་རེ་ཡོད་ཀྱང་། རང་དབང་ཕྲན་བུ་ཙམ་ཡང་ཡོད་པ་མ་རེད། ༧རྒྱལ་དབང་ཐམས་ཅད་མཁྱེན་པ་བོད་ཁ་བ་ཅན་གྱི་ལྷ་སྐལ། འཕགས་པ་ཐུགས་རྗེ་ཆེན་པོའི་རྣམ་སྤྲུལ་རེད། ང་ཚོས་ཁ་ནས་མ་ནི་ཡིག་དྲུག་འདོན་གྱིན་ཡོད། མ་ནི་ཡིག་དྲུག་འཕགས་པ་ཐུགས་རྗེ་ཆེན་པོའི་གཟུངས་སྔགས་རེད། འོན་ཀྱང་། ང་ཚོས་ཁ་ནས་སྔགས་དེ་བགྲང་ཆོག་ཀྱང་། ལྷ་དེའི་ཞལ་མཇལ་ཆོག་གིན་མེད། ལྷག་པར་དུ་ཕྱུགས་རྭ་བསྐོར་བ་དང་རྩྭ་ས་བགོས་པ་སོགས་ཀྱིས་ཕུ་ནུ་ནང་དམེ་དང་། ནང་ཁུལ་ལ་དཀྲུགས་ཤིང་བཟོས་སོང་། ཁ་བྲལ་དང་འཆམ་མཐུན་མེད་པ་ཁོ་ཚོས་བཟོས་སོང་། ང་ཚོའི་ཕོ་བ་འགྲངས་ཙམ་དང་། རྒྱབ་དྲོས་པ་ཙམ་གྱིས་སེམས་སྡུག་དྭངས་ཐབས་མི་འདུག ང་ཚོའི་རེ་བ་ཉག་གཅིག་ནི། བོད་མི་རི་སྒར་གཉིས་ཀ་ཁ་ངོ་ཐུག་ཅིང་། ༧རྒྱལ་དབང་ཐམས་ཅད་མཁྱེན་པར་ཐོད་པ་ཞིག་གཏུགས་ཐུབ་སོང་བ་ཡིན་ན། དེ་རིང་ཤི་ན་སང་ཉིན་ཤི་ན་འགྱོད་པ་གཅིག་ཀྱང་མེད། མི་ཚེའི་རེ་བ་འགྲུབ་སོང་བ་ཡིན། འཛམ་གླིང་མི་དམངས་ཀྱིས་ང་ཚོའི་སྙིང་གཏམ་འདིར་གསན་རོགས། རྒྱ་ནག་སྲིད་གཞུང་གིས་ང་ཚོའི་སྡུག་བསྔལ་འདིར་གཟིགས་རོགས། ང་ཚོས་བཤད་པའི་སྐད་ཆ་འདི་༧རྒྱལ་བ་རིན་པོ་ཆེ་ཡི་སྙན་ལ་སྒྲོན་ཐབས་བྱ་དགོས། ཕན་ཞིག་ཐོགས་ན་འཛམ་གླིང་ལ་ཁྱབ་བསྒྲགས་བྱ་རོགས། ཞེས་དད་གདུང་ཆེན་པོ་དང་ཆོད་སེམས་བརྟན་པོས་བརྗོད་སོང་། ད་ལྟ་ཁོང་ཚོ་ཚང་མས་ངའི་ཕྱོགས་ལ་ཨམ་ཆོག་གིས་ཉན་བསྡད་ཡོད་པ་རེད། མེ་ཐོག་ན་དུ་བ་དང་། ཆུ་ཐོག་ལ་རླངས་པ་ཞིག་ཡོད་མེད་ལ་རེ་བ་བརྒྱབས་བསྡད་ཡོད་པ་རེད། ཅེས་བརྗོད་སོང་།
ཡང་ཁོང་ལ་སྐུ་ཉིད་ཀྱིས་གློག་བརྙན་དེ་འདྲ་ཞིག་བཟོས་ཡོད་པ་ཡིན་ན། གློག་བརྙན་ནང་སྐད་ཆ་བཤད་མཁན་ཚོར་སྐད་ཆ་དེ་རྒྱལ་སྤྱིར་ཁྱབ་བསྒྲགས་བྱ་རྒྱུར་མོས་མཐུན་ཡོད་མེད་དང་། ཁོང་ཚོའི་མ་འོངས་པའི་བདེ་འཇགས་ལ་བསམ་བློ་བཏང་ཡོད་མེད་དྲིས་པར་ཁོང་གིས་བརྗོད་དོན། དེའི་ཐད་བསམ་བློ་དང་གྲ་སྒྲིག་སྔོན་ནས་ཡོད། ང་རང་ཟླ་གཅིག་ལྷག་རིང་གྲོང་ཆོག་པའི་ཟོལ་གྱིས་མགོ་ལོག་དགའ་བདེ་རྫོང་དང་རྨ་ཆེན་རྫོང་བཅས་ཀྱི་འབྲོག་སྟེ་ཁག་ཉུལ་བ་ཡིན། ཁྱིམ་ཚང་རེར་སོང་སྟེ་ཉིན་གཉིས་གསུམ་རེར་བསྡད་ནས་སྐད་ཆ་འདྲ་མིན་གླེང་སློང་བྱེད་བཞིན་སྔོན་ལ་ཁོང་ཚོར་སྐད་ཆ་དེ་འདྲ་བཤད་རྒྱུའི་འདོད་པ་ཡོད་མེད་དང་། གལ་སྲིད་བཤད་ན་མཇུག་འབྲས་ལ་ཞེད་སྣང་བྱེད་ཀྱིན་ཡོད་མེད་སོགས་ལ་ཉན་ཞིབ་བྱས་པ་ཡིན། འོན་ཀྱང་། ང་རང་སོང་ས་དང་ཐུག་ས་ཚང་མ་ང་རང་གི་བློ་ཡུལ་ནས་འདས་པ་རྐྱང་རྐྱང་རེད། ཁྱེད་ཀྱིས་རང་སྲོག་ལ་མ་འཛེམས་པར་འདི་ལྟ་བུའི་ལས་ཀ་ཞིག་བསྒྲུབ་ཐུབ་ན། ང་ཚོས་བཤད་མི་ཕོད་པ་ཅི་ཡང་མེད། རྒྱ་གཞུང་གིས་བསད་ཀྱང་གཏུབ་ཀྱང་སྐྲག་སྣང་སྤུ་ཙམ་ཡང་མེད། ང་ཚོར་ད་བར་མིག་ཆུ་འདོན་ས་དང་སེམས་སྡུག་ཞུ་ས་ཞིག་མ་རག་པར་བསྡད་ཡོད། ཅེས་བཤད་ཞོར་དང་ངུ་ཞོར་གྱིས་སྐད་ཆ་མང་པོ་བཤད་སོང་། གློག་བརྙན་དེའི་ནང་དུ་མི་ ༢༡ ཙམ་ལ་སྐད་ཆ་དྲིས་ཡོད་ཀྱང་། ཡིད་ཕངས་པ་ཞིག་ལ་ང་རང་གིས་བརྙན་ཕབ་འཕྲུལ་ཆས་བེད་སྤྱོད་གཏོང་ཤེས་མིན་གྱི་དབང་གིས་མི་ ༥ ཙམ་གྱི་སྐད་ཆ་གསུབས་ཚར་འདུག ད་ལྟ་ཡོད་པ་མི་ ༡༥ ཙམ་ཀྱི་སྐད་ཆ་དང་ཆུ་ཚོད་གཅིག་དང་ཕྱེད་ཀ་ཙམ་འདུག ཅེས་བརྗོད་སོང་།
ཁོང་ལ་ཐེངས་འདིར་རྒྱ་གར་ནང་ཡོང་སྟངས་གང་འདྲ་ཡིན་པ་དང་། ལམ་བར་ནས་དཀའ་ངལ་འཕྲད་ཡོད་མེད་དྲིས་པར། ང་རང་གིས་ལོ་བཞི་ཙམ་གྱི་གོང་ནས་རྒྱ་གར་ལ་ཐེངས་གཅིག་འགྲོ་དགོས་སྙམ་སྟེ་ཕྱིར་སྐྱོད་ལག་འཁྱེར་བླངས་ཡོད་མོད། དོན་ཕན་ལྡན་པའི་ལས་ཀ་ཞིག་བསྒྲུབ་ཨེ་ཐུབ་སྙམ་སྟེ་ད་བར་ལྷག་སོང་། ང་རང་གི་ཕ་མེས་གཉེན་ཉེ་ཚང་མ་རྒྱ་གཞུང་གིས་དམར་གསོད་དང་མནར་གཅོད་འོག་ཚར་སོང་། ང་ནི་ཆུང་དུས་ནས་སེམས་སྡུག་ཆེན་པོ་ཡོད་མཁན་ཞིག་ཡིན། ང་རང་མཚམས་ལ་སྡོད་སྐབས་ཀྱང་། བོད་རང་བཙན་སྐོར་གྱི་ཡིག་ཆ་ཞིག་དང་། རྒྱ་ནག་གི་མགོ་ཁྲིད་ཏུན་ཞའོ་ཕིན་དང་ཅང་ཙེ་མིན། ཧུའུ་ཅིན་ཐའོ་གསུམ་འདོད་ཆགས་ཞེ་སྡང་གཏི་མིག་གསུམ་གྱི་མཚོན་བྱེད་དུ་བཞག་སྟེ་བྲིས་པའི་རི་མོ་ཞིག་བཅས་གྲངས་ ༤༠༠༠ ཙམ་མགོ་ལོག་ས་ཁུལ་དུ་བཀྲམས་པ་ཡིན། བཅར་འདྲིའི་ལས་ཀ་དེ་འགྲུབ་མ་ཐག་གནས་སྐོར་གྱི་ཞོར་དུ་བལ་ཡུལ་དུ་སྨན་བཅོས་ཤིག་ཏུ་འགྲོ་རྒྱུའི་མིང་ཐོག་ནས་ལམ་ལ་ཆས་པ་ཡིན། ལམ་བར་ནས་འཇིགས་སྐྲག་འགའ་རེ་བྱུང་སོང་། ལྷག་པར་དུ་འགྲམ་འགག་སྒོ་ནས། ༧རྒྱལ་བ་ཡིད་བཞིན་ནོར་བུའི་ཐུགས་རྗེ་དང་། རང་གི་ཆོས་སྐྱོང་སྲུང་མས་སྐྱབས་སོང་། གང་ཡིན་ཟེར་ན། གློག་བརྙན་གྱི་འཁོར་ཐག་དེ་མར་གྱི་གསེང་དུ་སྦས་ཏེ་ཨང་སྒྲིག་ལག་སྒམ་ཞིག་གི་ནང་དུ་བཅུག་ཡོད། འགྲམ་འགག་སྒོའི་དམག་མིས་སྔོག་བཤེར་སྐབས་གསང་གྲངས་སྤྲད་ཀྱང་། ཁོང་ཚོས་སྒམ་ཁ་འབྱེད་ཐུབ་མ་སོང་ལ། སྐབས་དེར་ངས་ཀྱང་འབྱེད་ཐུབ་ཀྱིན་མི་འདུག ད་ནི་ཁོང་ཚོས་དོགས་པ་ཆེ་རུ་འགྲོ་གི་རེད་སྙམ་ནས་སེམས་འཚབ་ཆེན་པོ་ལངས་ཏེ། སོ་སོའི་གྲུ་བཏོན་ཏེ་ལག་སྒམ་གཤག་གྲབས་བྱས་པ་ཡིན། སྐབས་དེར་བོད་རིགས་ཉེན་རྟོག་པ་ལོ་གཞོན་ཞིག་གིས། ད་འགྲིག་སོང་། སྒམ་རལ་མི་དགོས་ཟེར་ནས་ང་འགྲོ་རུ་བཅུག་སོང་། ཞེས་གསུངས་སོང་།
མཇུག་མཐར་ཁོང་ལ། སྐུ་ཉིད་ཀྱིས་དེ་ལྟ་བུའི་གློག་བརྙན་ཞིག་བཟོས་ཡོད་ན། ད་བར་ཕྱི་ལ་ཁྱབ་བསྒྲགས་མི་བྱ་དོན་ཅི་ཡིན་སྐོར་དྲིས་པར་ཁོས་བརྗོད་དོན། དེའི་ཐད་ང་རང་ལའང་བློ་ཕམ་དང་དོགས་པ་ཕྲན་བུ་བྱུང་བསྡད་ཡོད། ང་རང་ངྷ་རམ་ས་ལར་འབྱོར་མ་ཐག་གློག་བརྙན་གྱི་བརྙན་འཁོར་དེ་མི་གཞན་ཞིག་བརྒྱུད་དེ་བདེ་སྲུང་བཀའ་བློན་དངོས་གྲུབ་ཀྱི་ལག་ཏུ་བཞག་པ་ཡིན། སྐབས་དེར་བདེ་སྲུང་ལས་ཁུངས་ནས་གློག་བརྙན་འདི་ཁྱབ་བསྒྲགས་བྱས་ན་འགྲིག་གི་མ་རེད། སྐད་ཆ་བཤད་མཁན་ཚོའི་བདེ་འཇགས་ལ་ཉེན་ཁ་ཡོད་པ་རེད་ཟེར། ངས་ཁོང་ཚོར་སྐད་ཆ་འདྲི་ཡུལ་དག་གིས་ངེས་པར་དུ་ཁྱབ་བསྒྲགས་བྱ་དགོས་པའི་རེ་འདུན་བཏོན་ཡོད་པ་དང་། ང་རང་འདིར་འབྱོར་རྗེས་ཀྱང་བོད་ནས་ཁ་པར་ཡོང་སྟེ། ང་ཚོས་སྐད་ཆ་བཤད་པ་དེར་གྲགས་འགུལ་ཅི་ཡང་མེད་དོན་ཅི་ཡིན་གྱི་དྲི་བ་ཡོང་གིན་ཡོད་སྐོར་བཤད་པ་ཡིན། མཐར་ཁྱོད་ཀྱིས་བོད་ནང་གི་མི་དེ་ཚོས་རྗེས་མ་ང་ཚོར་རྙོག་དྲ་མི་བཤད་རྒྱུའི་འགན་འཁུར་དགོས་ཟེར་ནས་ང་རང་གིས་འགན་ལེན་ཁག་འཁུར་བྱས་པ་ཡིན། ཐོག་མར་གློག་བརྙན་ནང་གི་སྐད་ཆ་ཡོངས་རྫོགས་རྒྱ་ཡིག་དང་བོད་ཡིག དབྱིན་ཡིག་གསུམ་ནང་ཕབ་སྒྱུར་བྱ་རྒྱུ་དང་། གློག་བརྙན་དང་མཉམ་དུ་དེབ་ཅིག་ཀྱང་དཔར་སྐྲུན་བྱ་རྒྱུ་བྱས་ཡོད་ཀྱང་། ང་ཐེངས་བཅུ་གྲངས་ཤིག་ལ་བཅར་ཏེ་བཀའ་འདྲི་ཞུས་ཀྱང་། གློག་བརྙན་ཆ་ཚང་ཞིག་བཟོས་ཚར་གྲབས་ཡོད་སྐོར་དང་། ཁྱབ་བསྒྲགས་བྱ་རྒྱུ་ཡིན་ཚུལ་གསུངས་སོང་མོད། ད་བར་ལོ་གཅིག་ལ་ཉེ་བ་ཕྱིན་སོང་། མི་ཞིག་གིས་འཁྲབ་གཞུང་ཞིག་བརྩམས་ཏེ། འཁྲབ་ཁྲིད་པ་དང་འཁྲབ་སྟོན་པ་ཚོས་གློག་བརྙན་ཆ་ཚང་ཞིག་བཟོས་ཀྱང་། ལོ་གཅིག་ལྷག་ལས་འགོར་སྲོལ་ཡོད་པ་མ་རེད། ད་ནི་ཕལ་ཆེར་ངའི་གློག་བརྙན་དེ་ལ་ཁྱབ་བསྒྲགས་ཀྱི་རིན་ཐང་མེད་སོང་བའམ། ཡང་ན། དེའི་ནང་གི་སྐད་ཆར་གནད་དོན་བྱུང་སོང་བ་མིན་འགྲོ་དྲན་བསྡད་ཡོད། ཅེས་བརྗོད་སོང་།
འདི་དག་རེ་རེ་བཞིན་གོ་ན་སེམས་བདེ་ཐབས་ཤིག་མི་འདུག། ལོ་ན་རྒས་པའི་རྒན་རྒོན་བཅོ་ལྔའི་ཚེ་མཇུག་གི་བདེ་སྐྱིད་རྟ་རྔ་འདྲ་བོ་རྒྱ་ལག་ཏུ་མི་ཤོར་པའི་ངེས་པ་མི་འདུག། བཟུང་ན་ལག་པ་ཚ། བཏང་ན་རྫ་མ་ཆག
བསྟན་དོན་ལགས་ཀྱིས་བཤད་པ་ཕྱོགས་གཞན་ཞིག་རེད། ཉེན་ཁ་ཡོད་མེད་སྐོར་གོང་དུ་ཨ་ཁུ་རིན་དང་གཞིས་བཞུགས་བོད་མི་ཚོས་ཅི་གསུངས་བཀོད་ཡོད་པ་དེ་རེད། དོན་དག་འདི་ལྟ་བུ་འཛམ་བུ་གླིང་ལ་སྒྲོགས་ཤིག་ཅེས་བོད་གཞུང་བདེ་སྲུང་ལ་སྤྲད་པ་ལས་ས་གསང་རྡོ་གསང་བྱེད་རོགས་ཞེས་སྤྲད་པ་མ་རེད་འདོད་ཀི ད་དུང་ལོ་གཅིག་ལྷག་ལ་ཕྱི་བསྒྲགས་བྱེད་མ་ཐུབ་པ་འཐུས་ཤོར་ཞིག་རེད་བསམ་ཡོད། གང་ལྟར་སང་ཉིན་ཧ་གོ་གི་རེད།
གསར་འགོད་པར་བཀའ་དྲིན་ཞུ། ཁྱོད་ཀྱིས་དྲན་གསོ་དང་། ཐེར་འདོན་བྱས་མེད་ན། ད་དུང་གློག་བརྙན་དེ་ཅི་མི་སྙམ་པར་ལྷག་ངེས་རེད་ལ། གཅིག་བྱས་ན་དུས་གཏན་དུ་ཏང་སྙོམས་སུ་འཇོག་ཀྱང་སྲིད། འདི་ནི་གསར་འགོད་པས་མིག་གསུམ་པ་སྤྱད་པའི་ནུས་པ་རེད།
ངས་བལྟས་ན་བདེ་སྲུངས་ལ་ཁག་མི་འདུག་འདོད་ཀི རྒྱ་ནག་མེ་མདའི་འོག་ན་ཡོད་པའི་སྤུན་ཟླ་བཀའ་མོལ་གནང་མཁན་དེ་ཚོའི་བདེ་འཇགས་ལ་ཡང་ཐུགས་བསམ་གནང་དགོས་པ་ཧ་ཅང་གལ་ཆེན་དུ་མཐོང་། འདི་ལྟར་བསམ་ན་ཁོང་ཚོའི་བཀའ་མོལ་ལས་ཚེ་སྲོག་གལ་ཆེ་བ་མ་ཡིན་ནམ།
ལུང་རིགས་ལགས་ཀྱིས་གནས་ཚུལ་མཁོ་སྤྲོད་གནང་བར་དགའ། འོ་ན་ང་ཚོས་སྤྱི་ཚེས་༢༥་བར་དུ་སྒུག་རྒྱུ་བྱེད། དེ་ནས་ཁ་གསལ་མ་ཆགས་དུས་ཁྱོད་ཀྱིས་ངེས་པར་དུ་ཨ་ཁུ་རིན་བཟང་བརྒྱུད་བདེ་སྲུང་གི་ལས་སྣེ་སུ་ཡིན་དེར་དོན་དག་འདི་ཁ་གསལ་ཞིག་བཟོ་རྒྱུ་མཁྱེན། གཞིས་བཞུགས་བོད་མིའི་སེམས་དོན་གོང་གི་གསར་འགྱུར་ལས་གསལ་བས་ན། དོན་དག་འདི་འདྲ་བ་རང་དགར་འཇོག་རྒྱུ་ཞིག་གཏན་ནས་མ་རེད་སྙམ།
དྲིལ་བསྒྲགས་ལས་ཁུངས་ནས་བརྡ་སྦྱོར་སྤེལ་བ་ལྟར་ན། ཕྱི་ཚེས་ ༢༥ ཉིན་ཏེ། རེེས་གཟའ་པ་སངས་ཉིན་གྱི་སྔ་དྲོ་ཆུ་ཚོད་ ༡༡ སྟེང་གྲྭ་རིན་ཆེན་བཟང་པོ་ལགས་ཀྱིས་གངས་སྐྱིད་ཀྱི་ལྷག་པ་ཚེ་རིང་ཚོགས་ཁང་དུ་གསར་འགོད་གསལ་བསྒྲགས་སྤེལ་རྒྱུ་རེད། སྐབས་དེར་གློག་བརྙན་དེ་ཡང་གཟིགས་འབུལ་ཞུ་རྒྱུ་རེད། བོད་གཞུང་ཕྱི་དྲིལ་ལས་ཁུངས་ཀྱིས་ཁོང་ལ་གསར་འགོད་གསལ་བསྒྲགས་འདི་གོ་སྒྲིག་གནང་རོགས་བྱ་རྒྱུ་རེད།
ཡིན་ཡང་། ཉིན་འདིར་སྟོན་འཆར་གྱི་གློག་བརྙན་དེ་བོད་གཞུང་བདེ་སྲུང་ལས་ཁུངས་ཀྱིས་སྒྲིག་སྦྱོར་བྱས་པ་དེ་ཡིན་མིན་གསལ་ཁ་བཏོད་མི་འདུག
གསར་འགོད་པ་ལགས། བོད་ཀྱི་བདེ་སྲུང་ལས་ཁུངས་ཟེར་བ་དེ་ལ་བཅར་འདྲི་ཞིག་གནང་རོགས།
1 དགེ་འདུན་པ་རིན་ཆེན་བཟང་པོས་གློག་བརྙན་དེ་འདྲ་ཞིག་སྤྲད་པ་བདེན་ནམ།
2 བདེན་གློག་བརྙན་དེ་ལ་ཁྱབ་བསྒྲགས་ཀྱི་རིན་ཐང་འདུག་གམ།
3 བཅར་འདྲིའི་གློག་བརྙན་ཞིག་ལོ་གཅིག་རིང་སྒྲིག་བཟོ་བྱ་དགོས་སམ།
ད་ལོའི་ལོ་སྟོད་ཙམ་ལ་ཨ་ཁུ་རིན་ཆེན་བཟང་པོ་གངས་སྐྱིད་བོད་གཞུང་བདེ་སྲུང་ལས་ཁུངས་སུ་བཅར་ཏེ་གློག་བརྙན་འདིའི་སྐོར་བཀའ་འདྲི་ཞུ་དགོས་པ་ཡིན་ཞེས་ང་དང་གླེང་མོལ་བྱུང་། ངས་ཀྱང་ཁོང་ལ་གློག་བརྙན་དེ་འདྲ་ཞིག་ཡིན་ན་མགྱོགས་མྱུར་འདོན་དགོས་པ་དང་། གལ་བདེ་སྲུང་གིས་བཟོ་མི་ཐུབ་ན་གཞན་ལ་འབྲེལ་བ་བྱས་ན་ཆོག་གི་རེད། ངས་ཀྱང་རོགས་ཙམ་བྱེད་ཨེ་ཐུབ་ལྟ་ཡོང་ཞེས་བཤད་པ་ཡིན། རྗེས་སུ་ཁོང་ཡང་བསྐྱར་གངས་སྐྱིད་བོད་གཞུང་བདེ་སྲུང་ལས་ཁུངས་ཀྱི་སྒོ་འགྲམ་དུ་ཡོད་པ་མཐོང་བྱུང་། ཁོང་གིས་གློག་བརྙན་མ་ཕྱི་དེ་ངའི་ལག་པར་མི་འཇོག་པ་བཟང་མོད། ་བོད་གཞུང་བདེ་སྲུང་གིས་འདི་འདྲའི་འགོར་འགྱངས་བྱས་པ་ནི་བསམ་གཟོས་ནས་དངོས་གནས་དོན་ཆེན་ལ་འཐུས་ཤོར་བཏང་བ་རང་རེད་སྙམ།