སློབ་མར་བོད་དོན་ངོ་སྤྲོད།

སྦེལ་ཀོབ་ས་གནས་སུ་རྒྱལ་སྤྱིའི་སློབ་གྲྭ་ཞིག་གི་དགེ་སློབ་ཁག་ཅིག་ཡུལ་སྐོར་སྤྲོ་འཆམ་དུ་ཡོང་བའི་གོ་སྐབས་དང་བསྟུན། ས་གནས་བོད་ཀྱི་བུད་མེད་ཀྱིས་ཁོང་ཚོར་བོད་ཀྱི་གནས་སྟངས་ངོ་སྤྲོད་བྱས་ཡོད་འདུག

ཕྱི་ཚེས་ ༢༤ ཉིན་འདི་ག་བོད་ཀྱི་དུས་བབ་ཡན་ལག་ལས་ཁུངས་སུ་སྦེལ་ཀོབ་ས་གནས་བུད་མེད་ཚོགས་པའི་རྒྱུན་ལས་བསྟན་འཛིན་དབང་མོ་ལགས་ཀྱིས་གནས་ཚུལ་མཁོ་སྤྲོད་བྱས་པ་ལྟར་ན། ཉིན་འདི་འགར་རྒྱལ་སྤྱིའི་སློབ་གྲྭ་ཀོ་ཌེ་ཀ་ནར་ཞེས་པའི་སློབ་གྲྭ་ཞིག་གི་དགེ་སློབ་ཁྱོམ་སྡོམ་ ༥༧ ཙམ་ཞིག་སྦེལ་ཀོབ་གཞིས་ཆགས་སུ་ཡུལ་སྐོར་སྤྲོ་འཆམ་དུ་སླེབས་ཏེ། སེར་བྱེས་ཡུལ་དགའ་ཆོས་གླིང་དུ་བསྡད་ཡོད་ལ། ས་གནས་བུད་མེད་ཚོགས་པའི་གོ་སྐབས་དེ་དང་བསྟུན་ནས་ཕྱི་ཚེས་ ༢༡ ཉིན་སེར་བྱེས་ཡིད་དགའ་ཆོས་གླིང་ཚོགས་ཁང་དུ་དབུས་གཞོན་ནུ་ཚོགས་པའི་ཚོགས་གཙོ་ཟུར་བ་བློ་བཟང་ཡེ་ཤེས་ལགས་གདན་ཞུས་ཀྱིས། སྔོན་ཆད་བོད་དེ་རང་བཙན་གཙང་མའི་རྒྱལ་ཁབ་ཅིག་ཡིན་པ་དང་། དེའི་རྗེས་རྒྱ་ལག་ཏུ་ཇི་ལྟར་ཤོར་བ། ད་ལྟ་བོད་ནང་མུ་མཐུད་དཀའ་ངལ་གང་དང་གང་འཕྲད་ཀྱིན་ཡོད་པ་སོགས་བོད་ཀྱི་འདས་པ་དང་ད་ལྟ། མ་འོངས་པ་བཅས་ཀྱི་གནས་བབ་ངོ་སྤྲོད་གནང་ཡོད་འདུག
དེ་བཞིན་ཕྱི་ཚེས་ ༢༣ ཉིན་ས་གནས་བུད་མེད་ཚོགས་གཙོ་སྒྲོལ་མ་ལགས་ཀྱིས་ཕྱི་ལོ་ ༡༩༥༩ ལོར་བོད་མི་རྣམས་སྐྱབས་བཅོལ་དུ་ཇི་ལྟར་ཡོང་དགོས་བྱུང་བ་དང་། སྐྱབས་བཅོལ་དུ་སླེབས་རྗེས་དཀའ་ངལ་གང་དག་འཕྲད་པ། དེ་བཞིན་འདིར་སླེབས་རྗེས་གཞིས་ཆགས་ཁག་ཐོག་མར་འཛུགས་སྐྲུན་ཇི་ལྟར་བྱས་པ་སོགས་མི་ལོ་ལྔ་བཅུའི་རིང་གི་བཙན་བྱོལ་བོད་མི་རྣམས་ཀྱི་དཀའ་སྡུག་གི་གནས་སྟངས་ཁག་འགྲེལ་བརྗོད་གནང་བ་མ་ཟད། བུད་མེད་ཚོགས་པ་ཇི་ལྟར་བྱུང་བ་དང་དེའི་རྗེས་རྒྱ་སྐྱེད་པ་སོགས་ཀྱི་ཐད་དུའང་ངོ་སྤྲོད་གནང་ཡོད་འདུག
མཇུག་མཐར་སློབ་ཕྲུག་ཚོའི་དྲི་བར་ལན་འདེབས་ཀྱང་གནང་ཡོད་འདུག