མའོ་ཡི་འདྲ་པར་ལ་ངོ་རྒོལ།

ཕྱི་ཟླ་ ༡༠ ཚེས་ ༡ ཉིན་གྱི་རྒྱ་ནག་དམར་པོའི་གཞུང་གི་རྒྱལ་བཙུགས་དུས་སྟོན་གྱི་ཉིན་མོ་དེར། རྒྱ་ནག་རྒྱལ་ཡོངས་ལག་སྤོལ་རུ་ཁག་གི་རུ་མི་ཁྲིན་ཁའེ་གཙོས་དམངས་གཙོ་བ་སྐོར་ཅིག་ཨ་རིའི་སྲིད་འཛིན་ཟུར་པ་ ཉེ་ཁུ་སུན་གྱི་རྗེས་དྲན་དཔེ་མཛོད་ཁང་གི་སྒོ་འགྲམ་དུ་འདུ་འཛོམས་ཀྱིས། ཟླ་ ༡༠ ཚེས་ ༡ ནི་མའོ་མཐར་སྤྲོད་གཏོང་བའི་རྒྱལ་སྤྱིའི་ཉིན་མོ་ཞེས་པའི་འཕྲེད་དར་ཕྱར་ཏེ་འདས་པའི་ལོ་ངོ་དྲུག་ཅུའི་རིང་ཆབ་སྲིད་ཀྱི་གནོད་འཚེ་འོག་འདས་གྲོངས་སུ་གྱུར་བའི་རྒྱ་ནག་གི་མི་དམངས་ཁྲི་ཚོ་སྟོང་ཕྲག་བརྒྱད་ལ་མྱ་ངན་དང་།  རྒྱ་ནག་དམར་པོའི་གཞུང་ལ་ངོ་རྒོལ་བྱེད་པའི་ལས་འགུལ་སྤེལ་ཡོད་པར་མ་ཟད། ཁོ་ཚོས་མའོ་ཙེ་ཏུང་གི་འདྲ་པར་དང་རྒྱ་ནག་སྐར་ལྔ་ཅན་གྱི་རྒྱལ་དར་དམར་པོ་གཙབ་རལ་བཟོས་ཏེ་གད་སྙུགས་བླུགས་སྣོད་དུ་གཡུགས་ཡོད་པ་རེད། དེ་མིན་ཁོ་ཚོས་བསྡུ་རུབ་བྱས་པའི་མཚན་རྟགས་རྣམས་སྲིད་འཛིན་རྗེས་དྲན་དཔེ་མཛོད་ཁང་གི་འགན་འཛིན་ལ་ཕུལ་ཏེ་སྲིད་འཛིན་རྗེས་དྲན་དཔེ་མཛོད་ཁང་གི་ནང་དུ་ཡོད་པའི་མའོ་ཙེ་ཏུང་གི་འདྲ་པར་གཙབ་རུལ་ཏུ་གཏོང་དགོས་པའི་རེ་བ་བཏོན་ཡོད་པ་རེད།

རྒྱ་ནག་རྒྱལ་ཡོངས་ལག་སྤོལ་རུ་ཁག་གི་རུ་མི་ཁྲིན་ཁའེ་ཡིས་བརྗོད་དོན། མའོ་ཚེ་ཏུང་གིས་རྒྱ་ནག་མི་དམངས་ཁྲི་ཚོ་སྟོང་ཕྲག་བརྒྱད་ཀྱི་ཚེ་སྲོག་བླངས་པར་མ་ཟད། ཨེ་ཤ་ཡ་དང་འཛམ་གླིང་སྤྱི་ཡོངས་ཀྱི་མི་མང་པོའི་ཚེ་སྲོག་ལ་གནོད་སྐྱོན་བཏང་ཡོད་པ་རེད། དཔེར་ན་ཕོལ་ཕའོ་ཁྲུ་(Pol Pot)དང་། ཀོ་རི་ཡའི་དམག་འཐབ།( Korean War)  ཝེ་ཐུ་ནམ་དམག་འཐབ (Vietnam War)བཅས་འཛམ་གླིང་སྟེང་གསུབ་ཐབས་བྲལ་བའི་ནག་ཉེས་ཆེན་པོ་བསགས་ཡོད།  ཨ་རིའི་དམག་མིའི་ཟུངས་ཁྲག་དང་རྒྱ་ནག་མི་དམངས་ཀྱི་ཁྲག་དྲོན་འཛར་བཞིན་པའི་ལག་དམར་ཞིག   དེང་སྐབས་ཨ་རི་རྒྱལ་ཁབ་ཀྱི་མཚན་མཐོང་རིན་ཐང་མཚོན་པའི་སྲིད་འཛིན་ནེ་ཁུ་སུན་རྗེས་དྲན་དཔེ་མཛོད་ཁང་དུ་སྐུ་འདྲར་བཞེངས་ཏེ་རྗེས་དྲན་གྱི་ཚུལ་ཏུ་བཞག་ཡོད་པ་དེ་ནི། ངས་བལྟས་ན་གཟི་བརྗིད་ཅིག་མ་ཡིན་པར་ཀུན་སྤྱོད་ཐད་ཀྱི་འཁྱོག་བརྗོད་ཀྱི་རྣམ་པ་ཞིག་རེད་ཞེས་བརྗོད་ཡོད་འདུག

སྲིད་འཛིན་ནེ་ཁི་སུན་རྗེས་དྲན་དཔེ་མཛོད་ཁང་ནི་ཕྱི་ལོ་ ༡༩༨༩ ལོར་སྒེར་གྱི་ཐེབས་རྩ་ཁང་གིས་གསར་དུ་བཙུགས་ཤིང་། ༢༠༠༧ ལོར་ཨ་རིའི་རྒྱལ་ཚོགས་སྲིད་གཞུང་གི་ཡིག་ཚགས་ཁང་དུ་བསྒྱུར་བ་ཞིག་ཡིན་འདུག ད་ལྟའི་འགན་འཛིན་ནཱ་ཧྥུ་ཁྲ་ལེ་ཡིས་བརྗོད་དོན། ཁྲིན་ཁའེ་སོགས་ཀྱི་བསམ་ཚུལ་ལ་ངས་ཡི་རང་བྱེད་ཀྱིན་ཡོད། ཡིན་ནའང་། ཕྱོགས་གཞན་ཞིག་ནས་ངས་སྲིད་འཛིན་ནེ་ཁི་སུན་གྱི་རྒྱབ་སྐྱོར་བ་རྣམས་ལ་བརྩི་བཀུར་ཞུ་གིན་ཡོད། ཁོ་ཚོས་དཔེ་མཛོད་ཁང་གི་ནང་འགྱུར་ལྡོག་གང་ཡང་མི་གཏོང་བའི་རེ་བ་འདོན་གྱིན་འདུག  དེར་བརྟེན། ང་ཚོའི་ངོས་ནས་དེ་ནི་ཨ་རིའི་གཞུང་གིས་དཔེ་མཛོད་ཁང་དེ་ཉིད་ཀྱི་འགན་ལེན་མ་བཞེས་པའི་སྔོན་གྱི་གནས་ཚུལ་ཡིན་པའི་གསལ་བཤད་ཅིག་བཞག་ཡོད། ད་ལྟ་ང་ཚོས་དཔེ་མཛོད་ཁང་ཕྱོགས་ཡོངས་ནས་ལེགས་བཅོས་བྱེད་བཞིན། མ་འོངས་པར་འཛམ་གླིང་དབུ་ཁྲིད་རྣམས་ཀྱི་སྐུ་པར་བཤམས་སྟོན་བྱེད་སའི་ཁག་དེར་ལེགས་བཅོས་བྱེད་སྐབས་ཇི་ལྟར་བཟོ་བཅོས་བྱེད་མིན་ད་ལྟ་གསལ་བོ་བརྗོད་ཁག་པོ་རེད་ཅེས་ཨ་རིའི་རླུང་འཕྲིན་ཁང་ལ་འགྲེལ་བརྗོད་གནང་ཡོད་འདུག

གསར་དུ་བཞག་པའི་གསལ་བཤད་དེའི་ནང་མའོ་ཙེ་ཏུང་གི་མཚམས་སྦྱོར་གྱི་ཐད། ལོ་རྒྱུས་སྨྲ་བ་རྣམས་ཀྱིས་མའོ་ཙེ་ཏུང་གིས་མཆོངས་བསྐྱོད་ཆེན་མོ་དང་རིག་གནས་གསར་བརྗེ་སོགས་ཆབ་སྲིད་ཀྱི་ལས་འགུལ་སྤེལ་ཏེ་རྒྱ་ནག་མི་དམངས་ཁྲི་ཚོ་སྟོང་ཕྲག་འགའ་རྐྱེན་འདས་སུ་བཏང་ཡོད་པའི་ལྟ་ཚུལ་གཅིག་གྱུར་ཏུ་ཡོད་པའི་སྐོར་བསྐྱར་ཏུ་གསལ་བརྗོད་བྱས་ཡོད་འདུག