ཡང་བསྐྱར། ལེགས་སྐྱེས་གྱ་ནོམ་པ་ཞིག་ཕུལ་འདུག
མུ་ཏོ་བ། ཝཱ་ཎ་མཐོ་སློབ།
ངས་རེ་བ་དང་ཡིད་ཆེས་ཀྱི་ཀློང་ནས་རྨི་ལམ་གཞན་ཞིག་གི་མངར་ཁ་ལྡག་བཞིན་ཐེངས་འདིའི་བོད་མི་མང་སྤྱི་འཐུས་ཀྱི་གྲོས་ཚོགས་ལས་གྲུབ་འབྲས་ཅི་ཞིག་འབྱུང་བར་ཧ་ཅང་ཤེས་འདོད་ཆེན་པོ་བྱུང་། དེ་བས། ཉིན་རེ་བཞིན་གསར་འགྱུར་བརྒྱུད་ལམ་ཁག་ལ་རྣ་ཅོག་ཀྲོང་ངེར་ཉན་ཞིང་། དྲ་རྒྱ་དང་ཚགས་པར་གྱི་ནང་དུ་ཅི་ཞིག་འཚོལ་བའི་མིག་ཟུང་རིག་རིག་གིས་བལྟས་པ་ཐེངས་གཅིག་ག་ལ་ཡིན། རྒྱུ་མཚན། གཅིག་ནས་ངས་བོད་མི་རིགས་ཀྱི་མི་སེར་དཀྱུས་མ་ཞིག་གི་མིང་བྱང་ཁུར་ཡོད་ལ། བོད་མི་རིགས་འདི་ཆགས་འཇིག་གནས་གསུམ་འདི་ངའི་འཚོ་གནས་དང་ཐད་ཀར་འབྲེལ་བ་ཡོད་པས་སོ།
གཉིས་ནས་ང་རང་གཏོགས་པའི་བོད་མི་མང་གིས་ཡིད་ཆེས་དང་བློ་གཏད་གཙང་མའི་སྒོ་ནས་བདམས་ཟིན་པའི་སྤྱི་འཐུས་འདི་དག་གིས་མི་མང་གི་བདེ་སྡུག་དང་སྲིད་གཞུང་གིི་འཛིན་སྐྱོང་ལ་ཕྱག་ལས་གནང་བཞིན་པར་བརྩི་མཐོང་དང་རྗེས་སུ་ཡི་རང་ཞུ་བཞིན་ཡོད།
གསུམ་ནས་ད་ལོ་འུ་ཚང་ལ་མཚོན་ན། རང་ཡུལ་ཤོར་ནས་མི་ཡུལ་དུ་གྱར་ཏེ་མི་ལོ་ལྔ་བཅུའམ་དུས་རབས་ཅིག་གི་ཕྱེད་ཀ་ཏག་ཏག་ཟིན་པའི་སྐྱོ་ངལ་དང་མྱ་ངན་གྱི་ལོ་ངོ་གཅིག་ཡིན་ལ། རྒྱ་དམར་ལ་མཚོན་ན། དམར་པོའི་སྲིད་དབང་བཙུགས་ནས་ལོ་ངོ་དྲུག་ཅུ་འཁོར་བའི་རྒྱས་སྤྲོས་ཆེ་བའི་སྤྲོ་སྐྱིད་ཀྱི་དུས་སྟོན་ཁྱད་པར་ཅན་ཞིག་ཏུ་ངོས་འཛིན་གྱིན་ཡོད། གང་ལྟར། མྱ་ངན་གྱི་ཉིན་མོ་བསུ་བཞིན་སྤྲོ་སྐྱིད་ཀྱི་དུས་སྟོན་ལ་རེ་སྒུག་བྱེད་བཞིན་པའི་དུས་ཚོད་འདི་གཉིས་ཀྱི་བར་མཚམས་སུ། བོད་མི་མང་གི་སྤྱི་འཐུས་ཀྱི་གྲོས་ཚོགས་འཚོགས་པ་འདིས་ངའི་སེམས་སུ་ད་ནི་སྔར་ལས་ལྷག་པའི་སྒོ་ནས་ནུས་ཤུགས་གཅིག་ཏུ་སྤུངས་ཏེ། འཆར་འགོད་དང་གྲུབ་འབྲས་ཀྱི་འོད་སྟོང་འཕྲོ་པའི་ཁ་ཕྱོགས་སུ་བསྐྱོད་ཐུབ་པར་རེ་བས་ཁེངས་ཡོད།
འོན་ཀྱང། སྟབས་མ་ལེགས་པ་ཞིག་ལ། ངའི་རེ་བའི་ཞིང་སར་གྲུབ་འབྲས་ཀྱི་ལོ་ལེགས་སྨིན་རྒྱུ་ཕར་ཞོག དེ་ལས་ལྡོག་སྟེ་ཆེས་སྐྱུག་བྲོ་ཞིང་ཡི་མུག་པའི་གྲོས་ཆོད་དྲང་བདེན་ཡིན་མིན་དང་རྒྱབ་སྐྱོར་ཡོད་མེད་ཀྱི་ནང་ཁུལ་རྩོད་གླེང་དེས། གྲོས་ཚོགས་ཀྱི་ལྷིང་འཇགས་རྨང་ནས་དཀྲོགས་ཟིན་ལ་མི་མང་གི་སེམས་ཁམས་ལ་སོས་ཐབས་བྲལ་བའི་ན་ཟུག་བཞག་སོང་བས། དོན་ངོ་མར་བཤད་ན། ཐེངས་འདིའི་རྩོད་གླེང་གི་རིན་ཐང་ཆུང་ཡང་དེའི་བཞག་པའི་ཤུགས་རྐྱེན་ནི་ཧ་ཅང་བློ་ཡིད་ལས་འདས་པ་ཞིག་རེད། ང་ལ་མཚོན་ནས་བཤད་ན། ཐེངས་འདིའི་སྤྱི་འཐུས་རེ་ཟུང་གི་འགན་འཁྲི་མེད་པའི་སྐད་ཆ་དང་རྩོད་གླེང་གིས་བཞག་པའི་བག་ཆགས་ངན་པ་སེམས་ནས་མ་བཟོད་པར་ངས་ཁོང་ཚོ་བྱ་སྤྱོད་གནས་ལུགས་ཀྱི་སྡོམ་ཚིག་ལྟ་བུ་འདི་མི་འགོད་ཀ་མེད་བྱུང་སོང་།
གཅིག ནམ་རྒྱུན་རྒྱལ་བའི་བཀའ་དགོངས་སྒྲུབ་དགོས་ཟེར་བའི་གཏམ་བཤད་རྫིག་པོ་བྱེད་མཁན་གྱི་སྤྱི་འཐུས་འདི་དག་གིས། ཁ་ཚ་དགོས་གཏུགས་ཀྱི་ལག་ལེན་ཐོག་སླེབ་དུས། དགུང་ལོ་དོན་ལྔར་ཕེབས་ཟིན་པའི་༧ཁོང་གིས་བོད་མི་རིགས་ཆེད་དུ་ཉིན་མཚན་དུས་དྲུག་ཏུ་སྐུ་ངལ་འཛད་མེད་བསྐྱོན་དང་སྐྱོན་བཞིན་པར་བཀའ་དྲིན་བསམ་ཤེས་ཅི་ཡང་མེད་པར་འདི་ལྟར་ཐ་ཤལ་གྱི་བྱ་སྤྱོད་བརྩམས་འདུག
གཉིས། བོད་མི་མང་གིས་བདམས་པའི་བཀའ་ཁྲི་དང་གྲོས་ཚོགས་ཚོགས་མིས་བདམས་་པའི་སྤྱི་འཐུས་ཚོགས་གཙོ། དེ་བཞིན་བོད་མི་ས་ཡ་དྲུག་གི་ཚབ་མཚོན་རང་བཞིན་གྱི་གྲོས་ཚོགས་འདི་ལ་བརྩི་མཐོང་དང་རིན་ཐང་། གདེང་འཇོག་ཅི་ཡང་མེད་པར་རང་སྣང་གང་དྲན་གྱི་སྒོ་ནས་གྲོས་ཚོགས་ནས་ཕྱི་ལ་ཐོན་པའི་བཅའ་ཁྲིམས་རྡོག་རོལ་གྱི་ནག་ཉེས་བསགས་ཡོད།
གསུམ། བོད་ཕྱི་ནང་གང་སར་འཚོ་ཞིང་བཞུགས་པའི་བོད་མི་ཡོངས་ཀྱི་སེམས་ཁམས་དྲོན་མོ་འཁྱགས་ལ་སྦྱར་བའི་ཁྲེལ་མེད་ངོ་ཚའི་བྱ་སྤྱོད་འདི་འཇིག་རྟེན་མི་ཆོས་དང་འགལ་འདུག
བཞི། འཛམ་གླིང་མི་མང་གིས་རེ་སྙེག་དང་འཐབ་རྩོད་བྱེད་བཞིན་པའི་མང་གཙོའི་ལམ་ལུགས་ལ་སྣང་མེད་བཏང་སྟེ་མང་མོས་འོས་བསྡུ་ལ་མཆིལ་ཞགས་འཕེན་པའི་བསམ་བློ་སྒེར་གཅོད་མཁན་དུ་ངོས་འཛིན་ཞུ་བཞིན་ཡོད།
འདི་ལྟར། ང་ཚོས་ཕྱོགས་གཞན་ཞིག་ནས། གནད་དོན་འདིའི་ཐོག་མཐའ་བར་གསུམ་གྱི་བྱུང་རིམ་ལ་དབྱེ་ཞིབ་ཅུང་བྱས་ན། བློ་ཕམ་རང་བཞིན་གྱི་གནད་དོན་འདི་གློ་བུར་དུ་བྱུང་བ་ཞིག་མིན་པ་གསལ་བོ་རྟོགས་ངེས་ཤིང་། གནད་དོན་འདིའི་རྩ་བ་གྲོས་ཚོགས་ཀྱི་སྤྱི་འཐུས་ནང་ཁུལ་དུ་ཆོལ་ཁ་དང་ཆོས་བརྒྱུད་གཙོས་ཕྱོགས་ཞེན་དང་ལྟ་ཚུལ་ངན་པ་ནད་རྙིང་བཞིན་མི་མངོན་པའི་ཚུལ་དུ་ཡོད་པ་ཚོད་དཔག་ཐུབ་ངེས།་མདོར་ན། ཆོལ་ཁ་ཆོས་ལུགས་ཀྱི་འཐེན་འཁྱེར་གྱི་དུག་རླངས་འཐིབ་པའི་མཁའ་དབུགས་རྫོབ་པོའི་ཁོར་ཡུག་ཏུ། ཐེངས་འདིའི་གྲོས་ཆོད་ལ་མོས་མཐུན་ཡོད་མེད་ཀྱི་རྩོད་གླེང་གི་རླུང་བུ་ཁོང་ཚོའི་ཤ་རུས་ཀྱི་བར་གསེང་དུ་ལྡང་བས། མཐར་གྲོས་འཚོགས་ཀྱི་འཚོགས་འདུ་འཚོགས་མ་ཐུབ་པའི་དྲི་ངན་བྲོ་བའི་གནས་སྟངས་འདི་ཚང་མས་དངོས་སུ་ཚོར་བ་རེད།
ཉེ་བའི་ཆར་རྒྱ་དམར་སྲིང་གཞུང་བཙུགས་ནས་ལོ་འཁོར་༦༠་ལོན་པར་ཉེ་སྐབས་སུ་ཉི་ཧོང་སོགས་སུ་ཞི་བའི་ངོ་རྒོལ་གྱི་ལས་འགུལ་འདྲ་མིན་སྤེལ་གྱིན་ཡོད་ལའང། རྡ་རམས་སའི་ཁོར་ཡུག་འདི་སྔར་བཞིན་གོ་མེད་ཚོར་མེད་ངང་ཏིང་འཛིན་ཀློང་ན་རེ་ཞིག་མལ་དུ་གཟིམས་ཟིན་པའི་སྣང་བ་སྟེར་ལ། དེ་དང་ཆབས་ཅིག་བོད་མི་མང་གི་སྤྱི་འཐུས་རྣམས་ཀྱི་བྱས་རྗེས་ལ་མང་པོ་ཞིག་དང་ག་འགགས་ཏེ་རེ་ཞིག་ཅི་ཡང་མི་སྨྲ་བའི་བརྟུལ་ཞུགས་བཟུང་ཡོད། འདི་ལྟར་གྲོས་ཚོགས་ཀྱི་གནད་དོན་འདིའི་བརྒྱུད་རིམ་ལ་ཐག་གཅོད་ཅི་འདྲ་འབྱུང་མིན་གྱི་སེམས་འཚབ་འཕར་མའི་ཁྲོད། སྤྱི་ཟླ་བཅུ་བའི་ཚེས་གཅིག་ཕལ་ཆེར་འདི་ལྟར་ནང་གྱོད་ཀྱི་ཁ་ཕྱེས་ཏེ་བསྐྱལ་ཚར་བ་རེད།
བར་སྐབས་འདིར་ངས་ཡང་བསྐྱར་འདས་ཟིན་པའི་གླེང་མི་འདོད་ཅིང་སྐྱུག་བྲོ་བའི་འུ་ཚང་གི་གཏམ་རྒྱུད་ཅིག་གླེང་ན་འདོོད། དེ་ནི་འདི་ནས་ཡར་ལ་བརྩིས་པའི་ལོ་ངོ་དྲུག་ཅུའི་སྔ་གཞུག་གི་གཏམ་རྒྱུད་ཞིག་ཡིན་ལ། བློ་གནད་དུ་ཕབ་སྟེ་གཏམ་རྒྱུད་དེ་ལ་ཕྱིར་འདང་རེ་བརྒྱབ་ན། འུ་ཚང་གི་སྡེ་བ་གཞུང་གི་སྐུ་དྲག་དང་བླ་ཆེན་དཔོན་ཆེན་དག་གིས་སྲིད་དབང་འཐབ་རྩོད་ཀྱི་གཡུལ་འགྱེད་ཁྲོད་ནས། ཁྱོད་ཤི་ང་གསོན་གྱི་སྐྱི་གཡའ་བའི་འཐབ་འཛིང་བྱས་ཏེ། མོའོ་ཡིས་ཐོག་མར་རྒྱ་དམར་སྲིད་གཞུང་བཙུགས་ཏེ་ཕལ་ཆེེར་ལོ་ངོ་གསུམ་ཟིན་ལ་ཉེ་དུས་ཀྱི་མུན་ནག་གི་ཉིན་མོ་ཞིག་ལ། རང་ཡུལ་ལུང་བ་ནས་བོད་རྒྱལ་ཁབ་ཀྱི་བདག་དབང་ཆ་ཚང་བ་ལེགས་སྐྱེས་སུ་ཕུལ་བའི་གཏམ་རྒྱུད་དེ་སེམས་ཁམས་བདེ་ཐང་ཅན་ཞིག་ཡིན་ན་ལྷང་ལྷང་དྲན་འོང་ངེས་ལ། དེ་ནི་འུ་ཚང་གི་མི་བུ་རེ་རེའི་སེམས་ངོས་ནས་ཅི་འདྲའི་བརྗེད་མི་སྲིད་པ་ཞིག་རེད་ཨང་།
དེ་ནས་མར་ལ་བརྩིས་ཏེ་ལོ་ངོ་དྲུག་ཅུ་འཁོར་བའི་དེ་རིང་ཡང་། སྐྱབས་བཅོལ་བའི་མིང་བྱང་ཁུར་བའི་གཞན་ཡུལ་འདི་ནས། བོད་མི་མང་གི་སྤྱི་འཐུས་ཕལ་མོ་ཆེའི་སེམས་ཁམས་ཆོལ་ཁ་དང་ཆོས་བརྒྱུད་ཀྱི་འཐེན་འཁྱེར་ཆེ་བའི་ནད་རྙིང་དེས་ཡོངས་སུ་བཟུང་འདུག་ལ། ད་དུང་སྤྱི་དོན་ཁ་ལ་ཁྱེར་ནས་རང་དོན་ལ་གཞོལ་བའི་ངོ་གདོང་དམར་རྗེན་དུ་མཐོང་སོང་། དེ་ལས་ཀྱང་བོད་བསྟན་པ་ཆབ་སྲིད་ཀྱི་ཆགས་འཇིག་གི་གནས་སྟངས་དང་རང་དབང་འཐབ་རྩོད་ཀྱི་སླད་དུ་གཅེས་པའི་ཚེ་སྲོག་ཕངས་མེད་དུ་ཕུལ་དང་འབུལ་བཞིན་པའི་རྒྱལ་ཞེན་པ་ཚོའི་རྣམ་ཤེས་ལ་རྡོག་རོལ་བཏང་འདུག་པ་ཅི་འདྲའི་ཕངས་སེམས་སྐྱེ་འོས་པ་ཞིག་རེད། མདོར་ན་ནང་བཀྲ་མི་ཤིས་ཤིང་དགྲ་དགའ་གཉེན་སྡུག་གི་གནས་ཚུལ་འདི་ལྟ་བུ་རྒྱ་དམར་སྲིད་གཞུང་ལ་མཚོན་ན། རྣ་བར་སྙན་ཞིང་འཇེབས་ལ་ཡིད་དབང་འགུགས་པའི་གནས་ཚུལ་ཞིག་ཅི་ལ་མ་ཡིན། དེ་བས།ད་ལྟ་ཧུའུ་ཡིས་འཛིན་སྐྱོང་བྱེད་བཞིན་པའི་རྒྱ་དམར་སྲིད་གཞུང་བཙུགས་ནས་ལོ་འཁོར་༦༠་ལོན་པའི་རྒྱས་སྤྲོས་ཀྱི་དུས་སྟོན་འདི་ལ་བོད་མི་མང་སྤྱི་འཐུས་རྣམས་ཀྱིས་གངས་ཅན་སྐྱིད་གཤོངས་ནས་ཡང་བསྐྱར་གྱ་ནོམ་པའི་ལེགས་སྐྱེས་ཤིག་ཕུལ་མི་འདུག་གམ།
ཕྱོགས་གཞན་ཞིག་ནས་བཤད་ན། ལེགས་སྐྱེས་འདི་གཉིས་ཕན་ཚུན་བསྡུར་ན་འབུལ་སའི་ས་གནས། དུས་ཚོད། འབུལ་མཁན་སོགས་ཀྱི་རྣམ་པ་ཅུང་མི་འདྲ་བ་ཙམ་ལས། རྩ་བའི་ཆ་ནས་ཏན་ཏན་རྒྱ་དམར་ལ་ཆེས་མཁོ་བའི་ལེགས་སྐྱེས་རིགས་ཤིག་ཡིན་པ་བསྙོན་མེད་རེད། མཐར་ང་ཚོས་ངོས་ནས་ལེགས་སྐྱེས་འབུལ་མཁན་ཚོའི་བྱས་རྗེས་ལ་རྗེས་སུ་ཡི་རང་ཞུས་ཏེ་ཉམས་མྱོང་གི་བསླབ་བྱ་ལེན་དགོས་སམ། ཡང་ན། ད་ནས་བཟུང་རང་ལ་ལྐོག་ཏུ་མ་གྱུར་བའི་རང་སེམས་ལ་ཕྱི་གཙང་ནང་གཙང་གིས་ཕྱི་དོར་བྱས་ཏེ། ཕྱོགས་ཞེན་གྱི་མཁའ་དབུགས་འདི་རྨང་ནས་གཙང་སེལ་ཡོང་བར་’’རང་ངོ་རང་ཤེས་’’དང་’’རང་འགན་རང་འཁུར་’’བྱེད་དགོས་སམ།
རེད་ཡ། སྔོན་ནས་ད་བར་ང་བདེན་པ་དང་དྲང་པོ་ཡིན་ཟེར་མཁན་མང་པོ་ཞིག མི་འདི་མི་བདེན་པ་དང་མི་དྲང་གི་ཟེར་ཞོར་དེ་རྣམས་ཀྱི་ལག་ཏུ་དབང་ཆ་བཞག་ནས་རང་ཕྱིར་དོན་འགྲོ་གི་འདུག བསམ་བློ་ཡག་པོ་ཞིག་བཏང་ན་དེ་ནི་རང་གིས་རང་བརླག་པ་རང་རེད།
ང་ཚོར་ཕ་ཤི་བའི་སྟེང་ལ་མ་ཤི་ཞེས་པའི་དཔེ་བཞིན་ཕྱོགས་མང་བོ་ཞིག་ནས་ལྟས་ངན་སྟོན་གྱིན་འདུག་པས།ད་ནི་བགེགས་གཏོར་ཞིག་བྱས་ནས་འདྲེ་ཚོགས་དེ་ཕྱིར་ཕུད་རན་རེད།
མུ་ཏོ་བ་ལགས། ཁྱེད་ཀྱིས་སྔ་ཕྱིར་སྤེལ་བའི་བཀའ་ཁྲི་དང་སྤྱི་འཐུས་སྐོར་གྱི་རྩོམ་ཡིག་འདི་གཉིས་ཀས། ངའི་སེམས་ལ་བག་ཆགས་ཟབ་མོ་ཞིག་བཞག་སོང་ལ། རང་རེའི་མཐོ་སློབ་ཁག་ན་འདི་ལྟ་བུའི་གཞོན་སྐྱེས་རེ་འདུག་བསམ་ནས་དགའ་སྣང་ཆེན་པོ་ཞིག་གིས་ཕྲན་བཟི་རུ་བཅུག་སོང་། མུ་མཐུད་དུ་སྙུག་གུ་ལག་ཏུ་འཆང་ནས་སྤྱི་ཚོགས་ལ་ཁ་ཕྱོགས་གསར་བ་རེ་འབྲི་རོགས། དོན་ངོ་མ་བཤད་ན་ཁྱེད་ཀྱི་དངོས་མིང་ཤེས་ན་བསམ་པ་ཞིག་དྲན་བྱུང་། ཚིག་གི་དག་ཆ་དང་གནད་ལ་ཁེལ་བའི་བརྗོད་བྱ་རིག་ན་ཧེབ་ལངས་ནི་ཞིག་རེད།
༸ གོང་ས་སྐྱབས་མགོན་པོའི་བཀའ་དགོངས་དང་། བཙན་བྱོལ་དོབ་གཞུང་གི་མཛད་ཇུས། བོད་མི་རིགས་ཀྱི་མངོན་འདོད་བཅས་ལ་སྲི་ཞུ་དང་ལེགས་སྐྱེས་ཡག་པོ་འབུལ་མ་ཐུབ་པ་དང་། འབུལ་འདོད་མེད་ཚེ་ད་ནས་བཟུང་རང་ངོས་ནས་རྩ་དགོངས་ཞུས་ན་ཡག་ཤོས་ཤིག་ཡིན།
རྒྱ་ཆེའི་མི་དམངས་ཚོས་ངེས་པར་དུ་དོ་སྣང་དང་། ཡིད་གཟབ་བྱས་ཏེ་བོད་བསྟན་སྲིད་ལ་ཕན་མ་ཐོགས་མཁན་མདོ་སྟོད་དང་། མདོ་སྨད། དབུས་གཙང་བཅས་བོད་ཆོལ་ཁ་གསུམ་གྱི་འཐུས་མི་དག་ལ་དབྱེ་ཞིབ་ཡག་པོ་བྱས་ཏེ་ངེས་པར་དུ་གཙང་སེལ་ཐུབ་པ་དགོས་ལ་བྱེད་དགོས་པའི་དུས་ལ་བབ་ཡོད།
ཕན་མ་ཐོགས་ན་ཁ་ནང་གི་སོ་ཡིན་ཀྱང་འབུད་དགོས། མི་ངན་གཅིག་གིས་ལུང་པའི་ཕུ་མདའ་དཀྲུགས། ཟས་ངན་གཅིག་གིས་ཁོག་པའི་སྟོད་སྨད་དཀྲུགས། ཟེར་བ་ལྟོ་སྣོད་ནང་ཟས་དྲི་ངན་ཅན་ལྷག་ཚེ་ཟས་གསར་པ་རྣམས་ཀྱང་དྲི་མ་ཅན་དུ་འགྱུར་འགྲོ་བས་ཆོལ་ཁ་གསུམ་གྱི་རྒྱ་ཆེའི་མི་དམངས་ཀྱིས་ངེས་པར་དུ་ད་རེས་གཙང་སེལ་བྱེད་དགོས།
འདི་ནི་ང་ཚོའི་སྤྱི་འཐུས་ཚོས་བཀའ་ཤག་གི་སྐྱོན་དང་ནོར་འཁྲུལ་ལ་མཛུབ་མོ་འཛུགས་ཐུབ་ཀྱང་རང་གི་སྐྱོན་དང་ནོར་འཁྲུལ་མི་མཐོང་བའི་མཚང་བརྟོལ་བ་རེད། གཅིག་བྱས་ན། ང་ཚོ་བཙན་བྱོལ་དུ་འབྱོར་ནས་མི་ལོ་ལྔ་བཅུ་འཁོར་བའི་དུས་དྲན་སྲུང་བརྩི་བྱེད་ཀྱི་ཡོད་པའི་སྐབས་འདིར་འདི་ནི་སྤྱི་འཐུས་གྲོས་ཚོགས་ཀྱི་དུས་དྲན་གྱི་ཆ་ཤས་ཤིག་མིན་འགྲོ། ཡང་མིན་ན། རྒྱ་ནག་ལ་”ལོ་འཁོར་དྲུག་ཅུ་འཁོར་བའི་རྒྱལ་སྟོན་དུས་ཆེན་ལ་སྤྲོ་སེམས་འཁོལ་བ་དང་གྲ་རྒྱས་པོ་བྱས་ནས་རོལ་དང། ང་ཚོ་འདི་ལྟར་འཐོར་ནས་མ་འོངས་པར་ཁྱེད་ཅིག་གི་རྗེས་སུ་ཞུགས་ཆོག་”ཅེས་བརྡ་ལན་སྤྲོད་པ་དང་བཀྲ་ཤིས་སྨོན་ཚིག་ཅིག་བསྒྲགས་པ་མ་ཡིན་ནམ།