མཇལ་རྒྱུ་མིན་ཟེར།

ངས་འདི་ལྟར་མགོ་སེར་མི་ཉུང་བ་ཞིག་ལ་བཤད་མྱོང་ཡོད། ཁོང་ཚོས་རྒྱ་ནག་རྒྱལ་ཁབ་ནི་ཐོན་བསྐྱེད་བྱེད་ས་ཡག་ཤོས་དང་ཚོང་ཁེ་ལེན་ས་ཡག་ཤོས་དེ་ཆགས་ཡོད་སྟབས། གཞུང་སྒེར་མི་ཉུང་བ་ཞིག་གིས་རྒྱ་ནག་སྲིད་གཞུང་ལ་སྔ་གཞུག་བར་གསུམ་དུ་བསྟུན་ཤེས་བྱེད་པ་དང་ཚོང་འགྲེལ། རང་གི་རྒྱལ་ཁབ་དུ་བཟོ་གྲྭ་འཛུགས་པ་ལས་རྒྱ་ནག་ནས་བཟོ་གྲུ་བཙུགས་དེ་ཁེ་ཕོག་ཁོ་ན་ཟ་རྒྱུར་རྔམ་བཞིན་ཡོད་པ་འདི་ནི་རང་གི་རྒྱལ་ཁབ་ཀྱི་དར་རྒུད་དང་རང་གི་མི་རིགས་ལ་འགན་མ་བླངས་པ་ཞིག་རེད་ཅེས་བཤད་པ་ཡིན། དེ་དུས་ཁོང་ཚོ་ཁ་ཤས་ཤིག་ཧ་ལས་ལས་ངང་ཁྱེད་རང་རྒྱ་ནག་ལ་མི་དགའ་བ་ངེད་ཅག་གིས་ཤེས་ཀྱི་ཡོད་ཟེར་མཁན་འདུག དེ་དུས་ངས་ཁོང་ཚོ་ལ་ང་རང་རྒྱ་ནག་མི་མང་ལ་དངོས་ནས་དགའ་བོ་ཡོད་ལ། རང་ཉིད་སྒེར་ལ་རྒྱ་མི་གྲོགས་པོ་རེ་ཟུང་ཡོད་མྱོང་བ་ཞིག་ཡིན། ངས་བསམ་པ་དེ་ནི་ཁྱེད་ཅག་གིས་ཤེས་འདོད་ཡོད་ན། རང་རང་གི་རྒྱལ་ཁབ་ཁག་དུ་ལས་ཤོར་ཇེ་མང་དུ་འགྲོ་བ་དང་། དཀའ་ངལ་ཆེ་ཆེར་འགྲོ་བ་དེ་དག་ནི་རང་གི་རྒྱལ་ཁབ་ཀྱི་ཕྱུག་བདག་དག་གིས་ཁེ་ས་ནས་བཟོས་དེ་ཕྱིར་རང་གི་རྒྱལ་ཁབ་ནང་དུ་འགྲེམ་བཞིན་ཡོད་སྟབས། ལས་མི་དེ་དག་ལ་ལས་སྐྱུར་གྱི་དཀའ་ངལ་བྱུང་གི་ཡོད་པ་རེད་ལ། རྒྱལ་ཁབ་ཀྱི་དངོས་ནས་ཀྱང་རང་གི་རྒྱལ་ཁབ་ཀྱི་མི་སྣ་ཆེད་ལས་པ་དག་བེད་སྤྱད་དེ་ཁང་བ་སོགས་འཛུགས་བསྐྲུན་ཤུགས་ཆེན་བྱེད་པ་ལས་ལྡོག་ནས་རྒྱ་ནག་གི་གོང་ཚད་དམའ་པའི་ལག་ཤེས་དག་གདན་འདྲེན་བྱེད་པ་སོགས་ལ་བརྟེན་ནས། མུ་མཐུད་དུ་རང་གི་རྒྱལ་ཁབ་ཀྱི་ནང་གི་རང་གི་མི་རིགས་ལས་མེད་དུ་ཆགས་བཞིན་ཡོད་པ་རེད། ནམ་ཞིག་རང་གི་རྒྱལ་ཁབ་ཀྱི་ཟ་བསྡོད་འགྲོ་གསུམ་ཚང་མ་གཞན་མི་ཁོ་ནའི་བཟོ་དགོས་པ་ཆགས་དུས། ད་གཟོད་གཞན་མི་དེ་དག་གི་གདོང་གི་དཀར་ནག་འཚོ་དགོས་པ་ལས་མེད་པ་རེད་ཅེས་བཤད་པ་ཡིན།

དེ་ལྟར་དུ་དེང་སང་རྒྱལ་ཁབ་ཀྱི་དབུ་ཁྲིད་དང་ཕྱུག་བདག་མི་ཉུང་བ་ཞིག་གིས་རང་རང་གི་སྲིད་སྟེགས་ཀྱི་སྐབས་ཀྱི་ཁེ་བཟང་ལ་ལྟ་བ་ལས་མི་རིགས་ཤིག་གི་ཆགས་འཇིག་ལ་འགན་ལེན་མ་ཐེགས་པའི་སྟབས་ཀྱི་གནས་ཚུལ་འདི་དག་བྱུང་གི་ཡོད་པ་རེད་ལ། མ་འོངས་པར་འདི་ལྟར་སོང་དུས་རྒྱ་ནག་རྒྱལ་ཁབ་ནི་དོན་དངོས་ཐོག་དབལ་འབྱོར་གྱི་ཡང་རྩེ་ཆགས་ནས་ཨ་རི་སོགས་སྟོབས་ཆེན་རྒྱལ་ཁབ་ཅིས་ཀྱང་མངོན་གསལ་དོད་པོས་འབྲེལ་བ་མི་བྱེད་ཐབས་མེད་པ་ཞིག་ཆགས་སྲིད་ལ། དེ་དུས་རྒྱ་ནག་སྲིད་གཞུང་གིས་གང་བཤད་ལ་མི་ཉན་རང་ཉན་ཆགས་སྲིད་པ་ཞིག་རེད། དེ་དུས་འཛམ་གླིང་འདི་ལ་རེ་བ་ཡོད་པ་དེ་ནས་རེ་བ་མེད་པར་ཆགས་པ་རེད་ཅེས་བཤད་ན་འགྲིག་གི་ཡོད།

ད་ནི་ཨོ་བྷ་མ་ཡིས་མཚོན་པའི་རྒྱལ་ཁབ་ཀྱི་སྲིད་འཛིན་དག་གིས་༧གོང་ས་མཆོག་ལ་མཇལ་འཕྲད་མི་བྱེད་པའི་སྐད་ཆ་བཤད་རྒྱུའི་མགོ་བཙུགས་པ་དེ་ནི་བོད་མི་རིགས་ལ་བསམ་བློ་གཏོང་ཁོམས་མི་འདུག་ཟེར་ནས་བརྡ་སྟོན་བཞིན་ཡོད་པ་རེད་ཟེར་ན་འགྲིག ད་ནི་བོད་པ་དག་གིས་བསམ་བློ་ཞིབ་མོ་གཏོང་བ་ལས་མི་འགྲིག་པར། བསམ་འཕོད་པ་ནས་བཤད་འཕོད་པ། བཤད་འཕོད་པ་ནས་སྒྲུབ་འཕོད་པ་དེ་ལག་ལེན་དངོས་ན་འཇུག་རན་ཡིན་པས་བརྡ་ཞིག་སྤྲོད་ཀྱི་འདུག

ཉོན་མོངས་གདོན་གྱིས་སྨྱོས་པའི་རླངས་སྤྱོད་ཀྱིས།།
རང་གཞན་གཉིས་ཕུང་བགྱིད་པའི་སྙིང་རྗེའི་ཡུལ།།
མི་བསྲུན་སྐྱེ་བོའི་ཚོགས་རྣམས་བླང་དོར་མིག།
ཡོངས་ཐོབ་བྱམས་བརྩེ་མཛའ་བའི་དཔལ་ལ་སྦྱོེར།།

༼ང་ལ་སྲིད་བློན་ ཀེ་ཝན་ རུ་ཌི་ ལགས་༧གོང་ས་ཏཱ་ལའི་བླ་མར་མཇལ་དགོས་ཡོད།༽