ཁམས་སྐད་བརྙན་འཕྲིན།

བོད་ལ་སྤྱི་སྐད་ཅིག་ཡོང་བ་དཀའ་མོ་རེད།

བོད་ལ་སྤྱི་སྐད་ཅིག་ཡོང་བ་དཀའ་མོ་རེད་ཟེར་བའི་ཁ་བྱང་འདི་མཐོང་དུས་ཁྱེད་དང་ཁྱེད་ཚོའི་མི་དགའ་བའི་རྣམ་འགྱུར་རེ་སྟོན་ན་ཡང་ཐང་ལ་ལྟས་ངན་སྲིན་བྱའི་སྐད་ཅིག་འདི་ན་ཡང་གྲགས་ཀྱིན་འདུག་ཟེར་ནས་སྡིགས་མོ་རེ་བྱེད་ཀྱང་སྲིད། ཡིན་ཡང་ངས་ནི་དོན་དངོས་ལ་གཞིགས་ནས་སྙིང་གཏམ་རེ་བཤད་པ་ཡིན་པས་དགོངས་འགལ་མེད་པ་ཞུ་ཟེར་བ་ལས་ཐབས་གཞན་ཅི། དེ་ཡང་དེང་སང་བོད་མི་ལ་རྒྱ་ཅན་དང་ཤེས་ཡོན་ཅན་སོགས་གང་མང་ཞིག་གིས་བོད་ལ་སྤྱི་སྐད་ཡོང་བའི་ཐབས་ལམ་སོགས་ཀྱི་དཔྱད་རྩོམ་གྲངས་ལས་འདས་པ་ཞིག་འབྲི་དང་འབྲི་བཞིན་འདུག་ལ། དེའི་སྐོར་གྱི་འཚོགས་འདུ་ཡང་མི་ཉུང་བ་ཞིག་འཚོགས་སོང་། རེད་དེང་སང་བོད་ལ་སྤྱི་སྐད་དགོས་པའི་གཞུང་ལུགས་ཧ་ཅང་མང་པོ་ཞིག་འདུག ཡིན་ཡང་དོན་དངོས་ཀྱི་གནས་ཚུལ་ལ་ང་ཚོས་འདང་ཞིག་རྒྱག་མྱོང་ཡོད་དམ། རང་ཉིད་ནས་མགོ་བརྩམས་ཏེ་སྤྱི་སྐད་ལ་ཕན་པའི་བྱ་བ་ཆུང་ཆུང་རེ་ཡང་བསྒྲུབ་མྱོང་ཡོད་དམ།

བོད་ལ་སྤྱི་སྐད་ཡོང་བ་དཀའ་མོ་རེད། དབུས་སྐད་གཙོ་བྱས་པའི་བོད་ལྗོངས་བརྙན་འཕྲིན་མགོ་བཙུགས་དུས་བོད་ཀྱི་སྤྱི་སྐད་དེ་དབུས་སྐད་གཙོ་བོ་བྱས་ན་ཆ་རྐྱེན་ཡག་པོ་འདུག་སྙམ་པའི་བསམ་ཚུལ་བྱུང་། ཡིན་ཡང་ཨ་མདོ་ནས་མཚོ་སྔོན་མི་ཡིས་དབུས་སྐད་གོ་གྱིན་མི་འདུག དེས་ན་འདི་རུ་ཡང་ཨ་མདོ་སྐད་གཙོ་བྱས་པའི་བོད་སྐད་བརྙན་འཕྲིན་ཞིག་དགོས་ཞེས་ཡར་ཞུ་བྱེད། བོད་པའི་བོད་སྐད་མི་གོ་བ་ཡ་མཚན་རེད་ཡ་མཆོག་མཆན་ཐོབ་པ་ཡིན་ཞེས་བརྗོད། ལོ་ངོ་ཁ་ཤས་ཀྱི་རྗེས་སུ་ཡང་ཁམས་པའི་ང་ཚོས་དབུས་སྐད་དང་ཨ་མདོའི་སྐད་གོ་གིན་མི་འདུག་ང་ཚོས་ཀྱང་ཁམས་པའི་བརྙན་འཕྲིན་ཞིག་བཙུགས་དགོས་ཟེར་དུས། དྲིན་ཅན་གྱི་སྲིད་གཞུང་འདིས་སྔ་འདང་ཕྱི་འདང་རྒྱག་ཤེས་པས། སྒོར་མོ་གྲངས་འདས་ཤིག་སྤྲོད་ནས་ཁམས་སྐད་ཁྱད་ཆོས་ལྡན་པའི་ཁམས་སྐད་བརྙན་འཕྲིན་ཞིག་བཙུགས་ཆོག་ཆོག་ཡིན་ཟེར་ནས་བཀའ་ཕབ། མདོ་དབུས་ཁམས་གསུམ་གྱི་བརྙན་འཕྲིན་འདི་ལྟར་གཅིག་རྗེས་གཉིས་མཐུད་དུ་དབུ་བརྙེས་དུས་བོད་ཀྱི་སྤྱི་སྐད་ཀྱང་ང་ཚོ་དང་རྒྱང་ཐག་ཇེ་རིང་དུ་འགྲོ་བཞིན་ཡོད་པ་ང་དང་ཁྱེད་ཚོས་ཤེས་ཀྱིན་མི་འདུག་གམ། དབུས་སྐད་ཀྱི་ཁྱད་ཆོས་ལྡན་པའི་བོད་ལྗོངས་བརྙན་འཕྲིན། ཨམ་སྐད་ཀྱི་ཁྱད་ཆོས་ལྡན་པའི་མཚོ་སྔོན་བརྙན་འཕྲིན ། ཁམས་སྐད་ཀྱི་ཁྱད་ཆོས་ལྡན་པའི་ཁམས་པའི་བརྙན་འཕྲིན། ཁྱེད་ཚོས་བརྗེད་དུ་མི་ཉན་པ་ནི་ཁྱེད་ཚོའི་རྩ་བ་གཅིག་ཡིན། ཁྱེད་ཚོ་ལ་ཁྱད་ཆོས་གཅིག་དགོས་པ་ནི་ཡིག་སྐད་ཡིན། དེ་ཁོ་ན་ཡིན། ཁྱེད་ཚོས་ཞིབ་འདང་ཞིག་རྒྱོབ་དང་ནང་ཁུལ་གྱི་བརྙན་འཕྲིན་གང་ཞིག་ཏུ་ལུང་སྐད་དང་ཡུལ་སྐད་བཤད་ནས་འདུག ཁྱེད་ལ་ལུང་སྐད་དང་ཡུལ་སྐད་བཤད་དུ་བཅུག་པ་ནི་དམིགས་བསལ་ཀྱི་སྲིད་ཇུས་ཤིག

བོད་ལ་སྤྱི་སྐད་ཡོང་བ་དཀའ་མོ་རེད། དེ་ཡང་དེང་སང་སྐད་བརྡ་རིག་པ་མཁས་ཅན་དག་གིས་གཅིག་རྗེས་གཉིས་མཐུད་དུ་ལྷ་སའི་ཁ་སྐད་དང་ཨ་མདོའི་ཁ་སྐད་ཁམས་པའི་ཁ་སྐད་ཀྱི་དེབ་གྲངས་མང་ཞིག་བྲིས་ནས་རང་ཉིད་མཁས་པ་ཡིན་པའི་ཉམས་ཤིག་སྟོན་གྱིན་འདུགཡིན་ཡང་ངས་ནི་དུས་ནམ་ཡང་དེབ་འདི་ལྟ་བུའི་ལ་དགག་པ་རྩད་ནས་རྒྱག་བཞིན་ཡོད་ལ། ཁྱེད་ཉིན་མཁས་པ་ཡིན་ཡང་སྲིད། ཡིན་ཡང་ངས་བཤད་འདོད་པ་ནི་ཁྱེད་ནི་སྔ་འདང་ཕྱི་འདང་གང་ཡང་རྒྱག་མི་ཤེས་པའི་མཁས་པ་ཞིག་རེད ། ཁྱེད་ནི་བོད་སྤྱི་སྐད་ལ་དགག་པ་རྒྱག་མཁན་གྱི་མཁས་པ་ཞིག་རེད། ཁྱེད་ནི་ཡིག་སྐད་དོར་ནས་ལུང་སྐད་དང་ཕལ་སྐད་སྲོག་ཏུ་འཛིན་པའི་ཕྱོགས་རིས་ཅན་ཞིག་རེད། གལ་ཏེ་འདི་ལྟར་བྱས་ནས་སོང་ན། ཞེ་གི་སྲ་གི༼ཨ་མདོའི་སྐད༽ཡག་མོ་ཀྲ་མོ་འགུ༼ཁམས་སྐད༽ཡག་པོ་ཞེ་དྲག་འདུག༼དབུས་སྐད༽འདི་འདྲའི་ཁྲོད་ནས་ཡིག་སྐད་དེ་རིམ་བཞིན་སྙམ་ངེས་ལ། བོད་ལ་སྤྱི་སྐད་ཞིག་ཡོང་བ་ཡང་ཤིན་ཏུ་ནས་དཀའ་བས། འདི་ཕྱོགས་ཀྱི་མཁས་པ་དག་གིས་བོད་ལ་སྤྱི་སྐད་ཅིག་ཡོང་བ་ལ་ཅི་ནས་ཀྱང་འབད་རོགས། འདི་འདྲའི་དེབ་རེ་ཡང་མ་རྩོམ་རོགས་ཞེས་ནས་རེ་བ་ཞིག་ཞུ་བ་ཡིན།

བོད་ལ་སྤྱི་སྐད་ཡོང་བ་དཀའ་མོ་རེད། སྤྱི་དེང་སང་བོད་ལ་སྤྱི་སྐད་ཅིག་དགོས་ཟེར་ནས་སྐད་རྒྱག་མཁན་གྲངས་ལས་འདས་པ་ཞིག་འདུག ཡིན་ཡང་ཁྱེད་ཀྱིས་རང་ཉིད་ནས་མགོ་བརྩམས་དེ་བྱ་བ་རེ་བསྒྲུབ་ཀྱིན་ཡོད་དམ། ཁྱེད་ཕ་ཡུལ་མི་གཅིག་པའི་བོད་པ་ཞིག་ཐུག་དུས། ཁྱེད་ཀྱི་ཁ་ནས་ཡོང་བ་ནི་རྒྱ་སྐད་རེད་དམ་བོད་སྐད་རེད། ཆེས་ཕངས་པ་ཞིག་ལ་དེང་སང་མདོ་དབུས་ཁམས་གསུམ་གྱི་མི་རྣམས་ཕན་ཚུན་ཁ་བརྡ་བྱེད་དུས་བརྒྱ་ཆ་དགུ་བཅུའི་མི་ཚོས་གསལ་ལ་མ་གསལ་བའི་རྒྱ་སྐད་བེད་སྤྱོད་ཀྱིན་འདུག་ལ། ཐ་ན་ཕ་ཡུལ་གཅིག་པའི་མི་དང་ཁ་བརྡ་བྱེད་དུས་ཀྱང་མི་རིགས་གཞན་པའི་སྐད་བེད་སྤྱོད་བཞིན་འདུག འདི་ནི་བོད་ལ་སྤྱི་སྐད་ཡོང་བའི་སྔ་ལྟས་ཤིག་རེད་དམ། འདིས་དབྱངས་གསལ་སོ་བཞིའི་མ་འོངས་པ་ཞིག་སྟོན་གྱིན་འདུག་གམ། ཁམས་སྐད་ཡག་མོ་ཀྲ་མོ་ཡོད་པ་ངས་མ་ཤེས། ཨམ་སྐད་ཞེ་གི་སྲ་གི་ངས་ཟེར་མི་ཕོད། དབུས་སྐད་ཡག་པོ་ཞེ་དྲག་འདུག་ཀྱང་སུས་ཟེར་ཤེས། ངས་བཤད་ཕོད་པ་ནི་དབྱངས་གསལ་སོ་བཞིའི་རྨང་གཞི་བྱས་པའི་ཡིག་སྐད་དེ་ནི་སྙན་ཤོས་དང་ལེགས་ཤོས་བཟང་ཤོས་ཡིན་པས། ང་ཚོས་མདོ་དབུས་ཁམས་གསུམ་གྱི་སྐད་ལས་ལེགས་ཆ་དག་བསྡུས་ནས་ཡིག་སྐད་རེ་བཤད་དང་། དུས་ནམ་ཞིག་ན་བོད་ཀྱི་སྤྱི་སྐད་ཟེར་བ་ཞིག་ཆགས་ཡོང་ན་ཡང་ཐང་།

མདོར་ན་བོད་ལ་སྤྱི་སྐད་ཡོང་བ་དཀའ་མོ་རེད། སྤྱི་སྐད་ཅིག་གཏན་འབེལ་དགོས་ན་དབང་ཆ་དགོས། དེ་ཁྱེད་རྣམས་པ་ལ་ཨེ་ཡོད། སྤྱི་སྐད་ཅིག་གཏན་འཁེལ་དགོས་ན་ས་ཁུལ་སོ་སོའི་བརྙན་འཕྲིན་ཁག་ནས་སྤྱི་སྐད་དེ་བཤད་དགོས། ཁྱེད་ཚོས་དེ་ལྟར་བྱེད་ཀྱིན་ཡོད་དམ། སྤྱི་སྐད་ཅིག་དགོས་ན་བོད་སྐད་ཡང་དག་ཅིག་བཤད་པ་ནས་མགོ་འཛུགས་དགོས། ཁྱེད་ཀྱིས་བོད་སྐད་དག་མ་ཞིག་བཤད་ཀྱིན་ཡོད་དམ།

དགོངས་དག་དབུས་གཙང་གི་མི་དམངས་དང་དྲང་བདེན་ཡིན་པའི་དབུས་གཙང་སྤྱི་མཐུས་རྣམས་ལ་ཟེར་གྱི་མེད་

གལ་སྲིད་འདི་ལའང་བཤད་ཡ་མང་པོ་ཡོད་ན། ཨེ་ཤི་ཡ་རླུང་འཕྲིན་ཁང་གི་སྐད་གསུམ་ལེ་ཚན་ཇི་ལྟར་བྱེད་དགོས་སམ། ཨ་རླུང་སྐད་གསུམ་ལྷན་སྦྱར་ལེ་ཚན་ཇི་ལྟར་བྱེད་འོས་སམ། ཁ་བཙུམ་ནས་འདུག་ཡ་མ་གཏོགས་ལྷག་མི་འདུག་སྙམ།

ཁོ་རེ་འདི་གསར་འགྱུར་དྲ་མ་ཞིག་གདའ། སྡེ་རོང་གི་བྱས་རྗེས་ལ་མངོན་པར་བསྟོད། ཕུན་སུམ་ཚོགས་པའི་རྒྱུ་རེད།