ཕྱི་ཚེས་ ༡༨ ཉིན་རྒྱལ་སྤྱིའི་བོད་དོན་ལས་འགུལ་ཁང་གིས་འཛམ་གླིང་རྩོམ་རིག་བྱ་གཞག་དོན་གཉེར་བྱེད་ཡུལ་ཆེ་ཤོས་འཇར་མན་གྱི་ཧྥུ་རན་ཁི་ཧྥོར་ཌི་རྒྱལ་སྤྱིའི་དཔེ་དེབ་འདོན་གནས་སུ། བཙོན་འོག་གི་རྩོམ་པ་པོ་རྣམས་དང་། རྒྱ་གཞུང་གིས་བཀག་ཟིན་པའི་བོད་འབྲེལ་དཔེ་དེབ་ཁག དེ་མིན་བོད་ནང་གི་རྩོམ་པ་པོ་རྣམས་ཀྱིས་བྲིས་པའི་རྩོམ་ཡིག་རྣམས་ཕྱོགས་བསྒྲིགས་འགྲེམས་སྤེལ་བྱས་ཡོད་པ་རེད།
དཔེ་དེབ་གསར་པ་༼མེ་ལ་མི་འཇིགས་པའི་གསེར་ལྟ་བུ། བོད་ནས་གསར་དུ་བྲིས་པ་༽ ཞེས་པ་ནི་བོད་ནང་བཙོན་འཇུག་བྱས་པ་དང་འདྲི་གཅོད། འདས་གྲོངས་དང་བོར་བརླག དེ་བཞིན་བོད་མིའི་ངོ་བོ་དང་མདུན་ལམ་སོགས་ཀྱི་ཐད་གསར་དུ་བྲིས་པའི་རྩོམ་ཡིག་རྣམས་ཕྱོགས་སྒྲིག་བྱས་པ་ཞིག་ཡིན་པ་དང་། དེའི་ནང་དུ་རྩོམ་ལུས་ཀྱི་ཆ་ནས་སྒྲུང་རྩོམ་དང་སྙན་རྩོམ། ལྷུག་རྩོམ་སོགས་ཡོད་ཅིང་། གཙོ་བོ་ ༢༠༠༨ ལོའི་བོད་ས་ཡོངས་ཀྱི་ཞི་རྒོལ་ཆེན་མོ་བྱུང་བའི་བརྒྱུད་རིམ་ཁྲོད་ཀྱི་ཉམས་མྱོང་ལ་ཁ་གཏད་ནས་སྒྲིག་ཡོད་ལ། རྩོམ་ཡིག་འདི་དག་འབྲི་མཁན་བོད་ནང་གི་རྩོམ་པ་པོ་དང་སྒྱུ་རྩལ་བ་བརྒྱ་ཕྲག་འགས་རང་རང་གི་མངོན་འདོད་བཤད་པར་བརྟེན་མནར་གཅོད་མྱངས་པ་དང་བཙོན་དུ་ཚུད་པ་སོགས་བྱུང་ཡོད།
རྒྱལ་སྤྱིའི་བོད་དོན་ལས་འགུལ་ཁང་གི་གསལ་བསྒྲགས་ལྟར་ན། དེབ་འདིའི་ནང་གི་རྩོམ་པ་པོ་ཕལ་ཆེ་བ་ནི་བོད་ནང་དང་རྒྱ་ནག་གི་ས་ཆར་གནས་ཡོད་ལ། ཁོང་ཚོས་རྒྱ་ནག་དམར་ཤོག་ཚོགས་པའི་འཁྱོག་བརྗོད་དང་སྲིད་བྱུས་ལག་བསྟར་བྱ་ཕྱོགས་ལ་སྔར་ལས་ལྷག་པའི་གདོང་གཏད་གཅོག་གིན་ཡོད།
མེ་ལ་མི་འཇིགས་པ་གསར་ལྟ་བུ་ཞེས་པའི་དེབ་འདིའི་མགོ་དེར་བུད་མེད་རྩོམ་པ་པོ་ཚེ་རིང་འོད་ཟེར་ལགས་ཀྱི་རྩོམ་ཡིག་ཅིག་བཀོད་ཡོད་འདུག
ཕྱི་ཚེས་ ༡༨ ཉིན་གྱི་ཧྥུ་རན་ཁི་ཧྥོར་ཌིའི་རྒྱལ་སྤྱིའི་དཔེ་དེབ་ཚོང་འགྲེམ་གྱི་བྱ་འགུལ་ཆེ་ཤོས་དེའི་གུས་བརྩིའི་མགྲོན་པོ་ལ་རྒྱ་ནག་བཞག་ཡོད་པ་དང་། རྒྱ་ནག་གི་གཞུང་འབྲེལ་སྐུ་མགྲོན་རྣམས་བསླེབས་ཡོད་ཀྱང་། འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་། དམངས་གཙོའི་གནད་དོན་སོགས་ཀྱི་དབང་གིས་རྒྱ་ནག་གི་སྐུ་ཚབ་དག་ལ་རྒྱུན་ལྡན་གྱི་དཀའ་ངལ་དག་འཕྲད་ཡོད་འདུག
གོ་སྒྲིག་པས་ཐེངས་འདིའི་མཛད་སྒོ་སྟེང་ལ་རྒྱ་ནག་སྐམ་ས་ཆེན་མོའི་རྩོམ་པ་པོ་དང་རོལ་མོ་བ་གྲགས་ཅན་ལོའོ་ཡེ་ཝུ་ཞུ་བ་གདན་འབོད་ཞུས་ཡོད་ཀྱང་རྒྱ་ནག་གཞུང་གིས་ཁོང་ལ་ཕྱིར་བསྐྱོད་ཀྱི་ཆོག་མཆན་སྤྲད་མི་འདུག དེ་བཞིན་རྒྱ་ནག་གཞུང་གི་ངོ་རྒོལ་ལྟར་འཇར་མན་གྱི་གོ་སྒྲིག་པ་དག་གིས་རྒྱ་རིགས་རྩོམ་པ་པོ་ ཏེ་ཆེན་དང་པེ་ལིང་ཞུ་བ་གཉིས་ལ་མགྲོན་ཤོག་མི་གཏོང་རྒྱུའི་ཐག་གཅོད་བྱས་ཡོད་ཀྱང་། མཐའ་མར་གསར་འགོད་པ་དང་སྲིད་དོན་པ་དག་གིས་སྐྱོན་བརྗོད་བྱས་པར་བརྟེན་མཐའ་མར་མགྲོན་ཤོག་ཕུལ་ཏེ་ཐེངས་འདིའི་མཛད་སྒོའི་སྟེང་ཞུགས་ཡོད་འདུག
གོང་གསལ་རྩོམ་པ་པོ་གཉིས་ཀྱིས་གཏམ་བཤད་མགོ་བཙུགས་མ་ཐག་རྒྱ་ནག་གི་གཞུང་འབྲེལ་སྐུ་ཚབ་རྣམས་མཛད་སྒོ་ནས་ཕྱིར་ཐོན་ཡོད་པ་དང་། མཐའ་མར་གོ་སྒྲིག་པའི་ཚོགས་གཙོ་ནས་དགོངས་སེལ་ཞུས་རྗེས་ཕྱིར་མཛད་སྒོར་ཡོང་ཡོད་འདུག འདིའི་ཐད་རྒྱ་ནག་གི་འཇར་མན་གཞུང་ཚབ་པ་ཟུར་པ་ མའེ་ཀྲོང་རོང་ཟེར་བས། ང་ཚོ་འདིར་དམངས་གཙོའི་འགྲོ་སྟངས་སློབ་གིན་ཡོང་བ་མིན། ཅེས་བཤད་ཡོད་འདུག
རྒྱ་ནག་གིས་རྒྱ་ནག་སྐམ་ས་ཆེན་མོ་ཡི་དཔེ་དེབ་རིགས་འགྲེམ་སྟོན་སྟངས་ནས་འགོག་ཐུབ་ཡོད་ལ། དེ་བཞིན་དུ་རྒྱ་ནག་གཅིག་གི་ལྟ་ཚུལ་འོག་ནས་ཐའེ་ཝན་གྱི་དཔེ་དེབ་རིགས་ལའང་སྟངས་འཛིན་བྱས་ཡོད་འདུག ཡིན་ཡང་། གཞན་པ་དག་གིས་འགྲེམ་སྟོན་བྱས་པའི་དཔེ་དེབ་ ༢༥༠༠ བཀག་འགོག་བྱས་ཐུབ་མེད་ལ། དེའི་ནང་དུ་བོད་མིའི་ཕྱོགས་ནས་གོ་སྒྲིག་བྱས་པའི་དཔེ་དེབ། མེ་ལ་མི་འཇིགས་པའི་གསེར་ལྟ་བུ་ཞེས་པ་དེའང་ཡོད། རྒྱ་ནག་གཞུང་གིས་ཐེངས་འདིར་ཡངའཇར་མན་གཞུང་དང་གོ་སྒྲིག་པ་ཚོར་གནོན་ཤུགས་སྤྲོད་གང་ཐུབ་དང་རྩོད་པ་མང་དུ་བརྒྱབས་ཡོད་ཀྱང་། མཐའ་མ་དེར་རྒྱ་ནག་གཞུང་དང་སྲིད་དོན་ལྟ་བ་མི་མཐུན་མཁན་དང་རྒྱ་ནག་གཞུང་ལ་སྐྱོན་བརྗོད་བྱེད་མཁན་རྣམས་མཛད་སྒོ་འདིར་ཞུགས་རྒྱུ་འགོག་ཐུབ་མེད་ལ། ༧གོང་ས་མཆོག་གི་སྐུ་ཚབ་མི་སྣ་དག་ཀྱང་འགོག་ཐུབ་མེད་ཅེས་ནིའུ་ཡོག་དུས་བབ་ཀྱིས་གནས་ཚུལ་སྤེལ་ཡོད།
མཛད་སྒོ་འདི་ནི་འཇར་མན་གྱི་རྩིགས་གྱང་ལོག་ནས་མི་ལོ་ ༢༠ འཁོར་བ་དང་། པེ་ཅིན་གྱི་གནམ་བདེ་སྒོ་མོ་ཆེའི་ཐང་ཆེན་གྱི་དྲུག་བཞིའི་ལས་འགུལ་ལ་དྲག་གནོན་བྱས་ཏེ་ལོ་ ༢༠ འཁོར་བའི་དུས་སྐབས་སུ་འཁེལ་ཡོད་འདུག
ནོར་བཅོས་ དགོངས་དག ལོ་རྒྱུས་ཀྱི་རྡོ་རིང་ངོས་ནས་ནམ་ཡང་ཡལ་ཐབས་མེད་རང་རེད།
གཏམ་བཟང་རེད། བོད་ནང་གི་རྒྱལ་གཅེས་རྩོམ་པོ་ཚོར་སྙིང་ཐག་པ་ནས་ཐུགས་རྗེ་ཞུ། ཁོ་ཚོ་རྩོམ་པ་པོ་གཅིག་པོ་མིན་པར་རྒྱལ་གཅེས་དཔའ་བོ་དཔའ་མོ་ཡང་ཡིན་པས་ལོ་རྒྱུས་ཀྱི་རྡོ་རིང་ངོས་སུ་ནས་ཡལ་ཐབས་མེད་པ་རང་རེད།
བོད་ནང་གི་རྩོམ་པོ་ཚོས་རང་སྲོག་བློས་བཏང་བྱས་ནས་མི་རིགས་ཀྱི་ཆེད་དུ་རྩོམ་ཡིག་འབྲི་གིན་ཡོད་པ་རེད། དཔེར་ན་ཉིས་སྟོང་བརྒྱད་ཀྱི་ལོའི་ཤར་དུང་རི་ལྟ་བུ་རེད། ཁོང་ཚོའི་བློ་སྟོབས་དེ་དངོས་གནས་ཧ་ལས་པ་ཞིག་རེད། འུ་ཚང་གི་བཙན་བྱོལ་བ་ཚོའི་ནང་ན་དེ་འདྲ་འབྲི་མཁན་ཕར་ཞོག ཀློག་མཁན་ཀྱང་ག་ཚད་ཡོད་དམ། མ་མཐའ་ཡང་དེབ་དེ་རིགས་ང་ཚོས་ཀློག་ནས་གདུང་སེམས་མཉམ་བསྐྱེད་བྱེད་ཀྱི་གལ་ཆེ་བར་སྙམ།
བདེན་པའི་ར་སྤྲོད་མཁན་གྱི་རྩོམ་པ་པ་དེ་འདྲ་རླབས་ཆེན་རྣམས་ལ་སྙིང་ནས་གུས་རྩི་ཡོད།
བོད་ཀྱི་ལོ་རྒྱུས་དང་བོད་མི་རིགས་ཀྱི་མྱོང་ཚོར་དེ་དག་ནི་མི་རིགས་ཞིག་གི་དངོས་སུ་མྱོང་བའི་བདེན་པ་དང་། འདི་ཚོ་ནི་ང་ཚོས་དངོས་སུ་མྱོང་བཞིན་པའི་དག་ཕུད་འོས་པ་བདེན་པ་ཡོད་ཁོ་ན་ཡིན།
གཡོར་སྦྱོར་དང་ངན་ཇུས་རིགས་ལ་ནམ་ཡང་ངོ་བརྒོལ་ཡོད།