སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} ཉེར་གཅིག

བློ་བཟང་། ཆང་འཐུང་ཟེར་ནོ་རེད། ལྟོས་དང་འདང་ནུབ་ཁྱེད་རང་གི་གྲུབ་རྟགས་བསྟན་པ་དེ་ལྟར་དུ་བདག་གིས་གཙང་མ་ཡང་མ་བཟོས་པར་ཁྱེད་རང་ལ་བཞག་ཡོད་ཟེར་ནས་སྐྱུག་སྣོད་ནང་གི་སྐྱུག་རོ་དེ་དག་ལ་འཛུབ་མོ་བཙུགས་དེ་བཤད།

བློ་བཟང་དངོས་ནས་ར་བཟི་བ་དེ་ནི་རང་གི་གང་བྱས་པ་དེ་ཡང་དྲན་པ་མེད་པར་ཆགས་པ་གཞི་ནས་ཤེས་ན་ཡང་། འདང་ནུབ་འདྲ་མིན་མི་འདྲ་རེ་བཤད་མེད་ངེས་ཡིན་སྙམ་ཞོར་དུ། སངས་རྡོར། འདང་ནུབ་འུ་གཉིས་ཀྱིས་ཤེལ་དམ་གཅིག་མ་གཏོགས་འཐུང་མེད་ངེས་ཡིན། འདི་འདྲ་ཞིག་བཟི་དོན་གང་རེད་ཅེས་དྲིས་དུས།

སངས་རྡོར་དངོས་ནས་བློ་བཟང་གི་དྲན་གྱི་མེད་པར་ཡིད་ཆེས་ལ་མི་ཆེས་ངང་དུ། ཁྱེད་རང་གིས་དངོས་ནས་འདང་ནུབ་འུ་གཉིས་གང་དུ་སོང་མིན་སོགས་ཀྱང་དྲན་གྱི་མི་འདུག་གམ་ཟེར་ནས་སླར་བློ་བཟང་ལ་དྲིས།

བློ་བཟང་གིས་མགོ་བོ་ཕུར་ཞོར་དུ། དངོས་ནས་དྲན་གྱི་མི་འདུག་ལ། འུ་གཉིས་ཀྱིས་ཨ་རག་ཤེལ་དམ་གཅིག་པོ་རྫོགས་པ་དེ་ལས་གང་ཡང་དྲན་གསོས་ཀྱི་མི་འདུག

དེ་ན་ཁྱེད་རང་གིས་ང་ཨ་རག་ཉོ་རུ་སླར་ཡང་སོང་དེ་ཤེལ་དམ་གཞན་ཞིག་ཉོས་དེ་འོང་ནས་འུ་གཉིས་ཀྱིས་འཐུང་བ་དེ་ཡང་དྲན་གྱི་མེད་པ་འདྲ། འདི་ཟེར་ནས་ཤེལ་དམ་སྟོང་བ་གཉིས་ཀ་ཡར་བཀྱག་ནས་བློ་བཟང་ལ་བསྟན།

བློ་བཟང་ཅུང་ཙམ་ངོ་གནོང་ཞོར་དུ། ཨ་རག་འདི་ངས་འཐུང་རྒྱུ་ཞིག་མིན་པ་འདྲ། དངོས་ནས་དྲན་པ་ཞིག་མི་འདུག དང་བོ་དངོས་ནས་སྐྱིད་པོ་ཆགས་སོང་། དེ་ནས་མགོ་བོ་ན་སོང་། དེ་ནས་ང་རང་ཉལ་བ་ཡིན་ས་ཡོད་ཅེས་བཤད།

སངས་རྡོར་གྱིས་ལྟས་ངན་ཁྱོས། དངོས་ནས་དྲན་གྱི་མེད་ས་རེད། ཁྱེད་རང་གིས་བུ་མོ་ཞིག་གི་མིང་ནས་བོས་དེ། ངས་ལག་དུ་རེག་པ་ཡིན་ན། ད་གཟོད་ངས་འདོད་པ་ཚིམ་ནི་ཡིན། ང་དངོས་ནས་ཁོ་མོར་དགའ་ཟེར་གྱི་འདུག མིང་དེ་གསལ་བོ་ཞིག་གོ་ཐུབ་ཀྱི་མི་འདུག ལྟས་ངན་ཁྱེད་རང་ལ་དགའ་ས་ཞིག་ཡོད་ས་རེད་མོད། ད་ལྟ་གང་དུ་ཡོད་པ་རེད། སུ་རེད་ང་ལ་ཤོད་དང་། གཅིག་བྱས་ན་ཐབས་ཤེས་རེག་ངེས་ཡིན།

བློ་བཟང་གིས། ད་ཁྱེད་རང་གིས་ང་རང་ལ་རྫུན་བཤད་ཀྱི་འདུག དེ་འདྲ་ཞིག་གང་ནས་ཡིན། ང་རང་ལ་དགའ་ས་ཞིག་ཡོད་ན་ཁྱེད་རང་གིས་སྔ་ས་ནས་ཤེས་ཡོད་ངེས་རེད། ད་ངས་འདང་ནུབ་འུ་གཉིས་ཀྱིས་སྐད་ཆ་ཞིག་དྲན་གསོས་སོང་། ཁྱེད་རང་གིས་ང་ལ་བུད་མེད་ཅིག་ངོ་སྤྲོད་བྱེད་ཟེར་བ་དེ་ནི་དངོས་ནས་སུ་རེད། མོ་རང་ད་ལྟ་གང་དུ་ཡོད་པ་རེད་དམ།

སངས་རྡོར་གྱིས་དེང་སང་ཤེས་རབ་དགའ་ཚལ་སློབ་གླིང་དུ་ཡོད་པ་རེད་ལ། མོ་རང་ཁྱེད་ལ་ཐེངས་ཁ་ཤས་ཤིག་ལ་འཕྲད་མྱོང་ཡོད་པ་མ་ཟད། སྐད་ཆ་ཡང་བཤད་མྱོང་ཡོད་པ་རེད། དེ་ནི་ཁྱེད་རང་གི་གྲོགས་པོ་ཞིག་གི་རྒན་མོའི་སྤུན་མཆེད་ཅིག་རེད། མོ་རང་རྒྱ་གར་དུ་སླེབས་ནས་ལོ་གཅིག་ཙམ་ཞིག་འཁོར་གྲབས་ཡོད། ཚོད་དཔག་ཞིག་བྱོས་དང་ཟེར་ནས་བཤད།

བློ་བཟང་གིས་བསམ་བློ་ཞིག་བཏང་ནས། ཨོ་རེད། ད་ཡིན་ན་ངས་ཤེས་སོང་། དེ་ནི་བདེ་གྲོལ་གྱིས་ཆུང་མའི་སྤུན་མཆེད་ཅིག་རེད་མོད། སྔོན་ཆད་ང་རང་ལ་བདེ་གྲོལ་གྱིས་དེ་ལྟར་བཤད་ཀྱང་། ངས་དེ་ལ་གཏན་ནས་ཡིད་ཆེས་མ་བྱས་པ་ཡིན། ད་ཡིན་ན་དངོས་ནས་བུད་མེད་དེ་ནི་ང་རང་ལ་ཚོར་བ་ཞིག་ཡོད་ས་རེད། ཡིན་ཡང་། མོ་རང་ནི་བྱིས་པ་གསུམ་གྱི་ཨ་མ་ཡིན་ས་ཡོད། སྤྱིར་བཏང་བྱིས་པ་གསུམ་གྱིས་ཨ་མ་ཡིན་ཡང་མི་སྐྱོན་མོད། ང་རང་ལ་དེའི་ཐད་དུ་ལྟ་ཚུལ་སྡུག་ཆག་དེ་འདྲ་མེད། རེད་དེ། སྤྱི་ཚོགས་དང་ཁོར་ཡུག ང་རང་གི་ནང་མི་དག་གིས་གོ་ན་སེམས་པ་སྡུག་ངེས་ཡིན་ལ། ང་རང་ལ་ད་ལྟའི་བར་དུ་རེ་བ་བྱེད་མྱོང་བའི་གྲོགས་པོ་དག་ཀྱང་ཡིད་ཆད་འགྲོ་ངེས་ཡིན་ཟེར་ནས་བཤད།

སངས་རྡོར་གྱིས་ལྟས་ངན་ཁྱེད་རང་། ངས་མ་བཤད་ཀྱང་ཁྱེད་རང་གིས་སྔ་ས་ནས་ཤེས་འདུག་མོད། ད་དུང་། ཁྱེད་རང་གཉིས་ཀྱིས་ཁ་བརྡ་ཡང་མང་བོ་ཞིག་བྱེད་མྱོང་ཡོད་འདུག་ལ། ཁྱེད་རང་གི་གྲོགས་པོ་བདེ་གྲོལ་གྱི་རྒན་མོའི་སྤུན་མཆེད་ཡིན་པ་ཡང་ཤེས་འདུག་མོད། རེད་རེད། ངས་བཤད་པ་ཡང་ནོར་བུ་བཟང་མོ་ཡིན་ཟེར་ནས་ཁས་བླངས།

དོན་དངོས་ཐོག བློ་བཟང་གིས་ནོར་བུ་བཟང་མོ་ནི་སྔོན་ཆད་ནས་གྲོགས་པོ་བདེ་གྲོལ་བཟའ་མི་གཉིས་བརྒྱུད་དེ་ཡག་པོ་ཤེས་ཀྱི་ཡོད་ལ། སྤྱིར་བཏང་གི་སྐད་ཆ་ཡང་མི་ཉུང་བ་ཞིག་ཕན་ཚུན་ལ་་བཤད་མྱོང་ཡོད་ལ། གྲོགས་པོ་བདེ་གྲོལ་གྱིས་ཨ་རོགས། ངེད་ཚང་གི་ནོར་བུ་བཟང་མོ་ཁྱེད་རང་ལ་དགའ་བཞིན་འདུག་ཟེར་ནས་བཤད་པ་དེ་ལ་ཡང་བསྐྱར་དུ་བསམ་བློ་ཞིག་འཁོར་དགོས་གྱུར།