ང་ཡི་བོད། སྒོ་ཡོན།

བསམ་བློ་གསར་རྙིང་གི་འགལ་འབྲེལ་ལ་གདོང་གཏད་ཅིང་། སྤྱི་ཚོགས་དཀར་ནག་གི་ལས་རིགས་ལ་ལག་བསྲིངས་ནས་དུས་རབས་དང་རང་ཉིད་མ་བོར་ཙམ་དུ་འཚོ་བའི་སྐབས་འདིར་ཁེལ་དུས། ཁམས་ཕྱོགས་ཀྱི་སྒེར་གཉེར་ཚོགས་པ (དོན་དུ་ཁམས་ཕྱོགས་ནས་གསར་འཛུགས་བྱས་པ་ཙམ་ལས་མདོ་ཁམས་ཀྱི་རྫོང་ཁག་བཅུ་ལྷག་གི་ཚོགས་མིས་གྲུབ་ཡོད)སྔ་ཤོས་གངས་གཞོན་སྨྱུག་ཚོགས་ཁང་ལམ་ལ་བུད་དེ་ལོ་འཁོར་གསུམ་ལོན་འདུག་པ་དང་། ལྷག་ཏུ་ང་ཚོ་སྤྱི་མཐུན་གྱིས་བསྒྲུབས་པའི་བོད་ལོ་དེབ་འདི་ཉིད་ཀྱང་འཁྲུངས་སྐར་གསུམ་ལ་སོན་ཟིན་པས།

ད་ནི་ཅི་ཡིན་ཡང་ང་རྒྱལ་མཐོ་ཙམ་སྐྱེས་ཆོག་པ་ཞིག་ནི། རང་རེས་མཁས་པར་འབོད་པའི་ཆེན་པོ་དག་ལ་བློ་འདོན་པའི་མཇལ་ཕྱག་ཕུལ་མ་མྱོང་ཞིང་། རང་ཉིད་དང་རང་མིང་ལས་དྲན་རྒྱུ་མེད་པའི་བླ་དཔོན་རྫིག་པོ་རྣམས་ལའང་ཡོན་སྦྱོར་བའི་རེ་སྐུལ་མ་བཏང་བར་བོད་ལོ་དེབ་ཀྱིས་བོད་ཁོ་ན་སེམས་ལ་ཐོགས་ཤིང་། བདེན་དོན་ཁོ་ན་གོང་དུ་བཀུར་ཏེ་སྒེར་ལམ་རང་བཞིན་གྱི་ཚད་འདི་འདྲ་ཞིག་ལ་བསླེབས་དུས། ད་དུང་ཡང་གསར་རྙིང་ལས་རྙིང་བ་དང་ཆོས་སྲིད་ལས་ཆོས་ལུགས་གཙོ་བོར་ཤོར་ནས་ཁོར་ཡུག་དང་རྒྱུན་སྲོལ་ཅི་ཞིག་གིས་ཤུགས་རྐྱེན་འདྲ་ཐེབས་ཨེ་སོང་སྙམ་པའི་སྐྲག་སྣང་རེ་ཡང་འཕྲལ་མར་ལྡང་འོང་མོད།

མི་རིགས་འདིའི་ད་ལྟའི་གནད་དོན་གྱི་ཟུར་རེ་གཉིས་ལ་གཞོགས་འདེགས་བྱེད་པར་ཁ་ཕྱོགས་ཤིང་དཀྱེལ་ངས་པའི་བསམ་བློ་མཉམ་གནས་ཀྱི་མཁའ་དབུགས་གཙང་དག་ཅིག་འདུན་མར་བཟུང་བའི་བོད་དང་བོད་ཀྱི་རྩོམ་སྒྲིག་པ་ལ་མཚོན་ན། ལྟ་ལོག་པ་དང་གཏོར་བཤིག་པ་སོགས་ཀྱི་ཚིག་མཚོན་འཇིགས་སུ་རུང་བ་དག་ཐོགས་པའི་གླེན་པ་མགོ་རིལ་ཚོའི་ཐུགས་ཐོག་ཏུ་ལར་ནས་མི་གཞག་པར། སླར་མར་ཡང་ཤོག་དངུལ་དང་སྲིད་ཇུས་ཀྱིས་དབུགས་རྒྱུན་རྩ་བ་ནས་བཅད་མ་སོང་བར་དུ། བོད་ལོ་དེབ་ཚང་གིས་བོད་རང་གི་བདེན་པའི་བསམ་བློ་དང་དྲང་མོའི་སྐད་ཆ་ཁྱེར་ནས་མདུན་བགྲོད་བྱ་རྩིས་ཡོད་པས། བོད་དང་ཁ་འབྲལ་མི་འདོད་པའི་དུས་རབས་གསར་བའི་ན་གཞོན་འགའ་ཞིག་ནི་ནམ་ཡང་བོད་ཀྱི་མཛའ་གྲོགས་སུ་བསྒོམས་ཡོད་པ་མ་ཟད། སྔ་རྗེས་བར་གསུམ་དུ་བོད་ཀྱི་ཚེ་སྲོག་ལ་ཕྱོགས་མང་བོ་ནས་མཐུན་འགྱུར་གནང་བའི་མི་དག་གི་མཛའ་བརྩེ་ནི་བོད་ཀྱིས་དུས་གཏན་དུ་འབོར་མི་སྲིད་དོ།།