ལས་འགུལ་བ་བསོད་ནམས་དབང་ཕྱུག་གིས་བོད་མི་རྣམས་ལ་དགོངས་སེལ་ཞུས་པ་དང་སྦྲགས་བོད་མི་རྣམས་དང་ལ་དྭགས་པ་རྣམས་མཉམ་འབྲེལ་གྱིས་ལས་དོན་གཉེར་རྒྱུ་གལ་ཆེན་ཡིན་སྐོར་སོགས་བརྗོད་འདུག
ཟླ་འདིའི་ཕྱི་ཚེས་ ༢༤ ཉིན་ཏེ་འདས་ལོར་ལ་དྭགས་ནང་ན་གཞོན་གྱིས་ངོ་རྒོལ་བྱས་ནས་མི་ལོ་གཅིག་འཁོར་བའི་དུས་དྲན་དང་བསྟུན། རྒྱ་གར་གྱི་གནམ་གཤིས་འགྱུར་ལྡོག་གི་ལས་འགུལ་བ་དང་སློབ་གསོ་བ་བསོད་ནམས་དབང་ཕྱུག་ལགས་ཀྱིས། ལ་དྭགས་ནང་གི་གནས་བབ་ཅིག་དང་འབྲེལ་ནས། རྒྱ་གར་གྱིས་ལ་དྭགས་མི་མང་ལ་དྲག་གནོན་བྱེད་པ་ནང་བཞིན་རྒྱ་ནག་གཞུང་གིས་ཀྱང་བོད་ནང་གི་བོད་མི་ཚོར་དྲག་གནོན་བྱེད་ཀྱི་མེད་ལུགས་བཤད་ཡོད་སྟབས། དེས་ས་གནས་བོད་མི་དང་བོད་མི་རྣམས་ལ་ཕོག་ཐུག་བཏང་རྐྱེན་ཁོང་གིས་དགོངས་སེལ་གྱི་བརྙན་ཞིག་སྤེལ་འདུག
ཕྱི་ཚེས་ ༢༥ ཉིན་དབུས་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས། དབུས་བོད་མིའི་སྒྲིག་འཛུགས་ཀྱིས་ལ་དྭགས་ནང་སྐུ་ཞབས་བསོད་ནམས་དབང་ཕྱུག་ལགས་ཀྱིས་མང་ཚོགས་ལ་གནང་བའི་གཏམ་བཤད་ཀྱི་ནང་དོན་ཁག་ཅིག་ལ་བློ་འཚབ་ཆེན་པོ་བྱེད་བཞིན་ཡོད། ཁོང་གིས་ལ་དྭགས་ཀྱི་གནས་སྟངས་དེ་བོད་ནང་གི་གནས་སྟངས་དང་བསྡུར་ནས་བཤད་པ་ནི་བོད་ནང་གི་དངོས་ཡོད་ཀྱི་གནས་སྟངས་ཐད་གོ་རྟོགས་མེད་པ་དང་ནོར་འཁྲུལ་ཤོར་བ་ཞིག་ཏུ་ངོས་འཛིན་བྱེད་ཀྱིན་ཡོད་ལ། ཁོང་གི་སྐད་ཆ་ཙམ་གྱིས་བོད་ནང་གི་དངོས་ཡོད་ཀྱི་གནས་སྟངས་མཚོན་ཐབས་བྲལ། བོད་ནི་ད་ལྟའང་རྒྱ་ནག་གི་བཙན་དབང་འོག་གནས་ཡོད་ཅིང་། བོད་མི་ཚོར་རང་ཉིད་ཀྱི་གཞི་རྩའི་ཐོབ་ཐང་དང་། ཆོས་དད་རང་དབང་། དེ་བཞིན་བོད་ཀྱི་རིག་གཞུང་གི་ངོ་བོ་མེད་པར་བཟོ་ཐབས་སུ་སྲིད་ཇུས་ལག་བསྟར་བྱེད་མུས་ཡིན། ཞེས་བརྗོད་འདུག
ཕྱི་ཚེས་ ༢༥ ཉིན་གྱི་དགོང་མོའི་ཆུ་ཚོད་དགུ་པ་ཡས་མས་ཤིག་ལ་བསོད་ནམས་དབང་ཕྱུག་ལགས་ཀྱིས་གནད་དོན་འདི་དང་འབྲེལ་ནས་དགོངས་སེལ་ཞུས་པའི་བརྙན་ཐུང་ཞིག་སྤེལ་བའི་ནང་། ངས་ཉེ་སྔོན་ལ་དྭགས་ནང་བྱུང་བའི་གནས་ཚུལ་དང་བོད་ནང་བྱུང་བའི་གནས་ཚུལ་གཉིས་བསྡུར་བ་དེས་བོད་རིགས་གྲོགས་པོ་འགའ་ཤས་ལ་སེམས་ཁྲལ་བསླངས་པ་དང་ཕོག་ཐུག་བཟོས་ཡོད་ཚེ། ངས་སྙིང་ཐག་པ་ནས་དགོངས་དག་ཞུ་རྒྱུ་ཡིན། འདི་ནི་མཚུངས་བསྡུར་བྱེད་སྟངས་ནོར་འཁྲུལ་ཅན་ཞིག་ཞིག་ཡིན་པ་ངོས་ལེན་དང་། ཆ་རྐྱེན་གང་ཡང་མེད་པའི་སྒོ་ནས་དགོངས་དག་ཞུ་ཡི་ཡིན། བོད་མིས་སྡུག་སྦྱོང་མནར་གཅོད་བཟོད་གླགས་མེད་པ་མྱངས་ཡོད་པ་ནི་ཉེ་བའི་ལོ་ཤས་རིང་ལ་དྭགས་སུ་བྱུང་བའི་གནས་ཚུལ་དང་བསྡུར་ཐབས་མེད། ངས་འདི་གཉིས་བསྡུར་ནས་བཤད་འདོད་དེ་བས་ཀྱང་མེད། ངའི་དམིགས་ཡུལ་ནི་ཉིན་དེར་ལ་དྭགས་མི་མང་གིས་མྱངས་པའི་གཉའ་གནོན་དང་བཙན་གནོན་དེ་གསལ་འདོན་བྱེད་འདོད་པ་ཙམ་ཡིན། ང་དང་ལ་དྭགས་ཀྱི་མི་མང་མང་པོ་ཞིག་གིས་ཉིན་དེར་ལ་དྭགས་མི་མང་ལ་བྱུང་བའི་མནར་གཅོད་ཚབས་ཆེན་དང་། མི་གསོད་ཁྲག་སྦྱོར། རྨས་སྐྱོན། བཙོན་འཇུག་བཅས་ནི་འཛམ་གླིང་ནང་གི་ཆེས་སྡུག་ཤོས་ཤིག་ཡིན་བསམ་གྱི་ཡོད། ན་ཟུག་ནི་མི་སྒེར་གྱི་ཉམས་མྱོང་ཡིན་པས། ང་ཚོར་མཚོན་ན་སྡུག་བསྔལ་ཆེན་པོ་ཡིན་པ་དང་། གཞན་ལ་མཚོན་ན་ཁོ་ཚོའི་སྡུག་བསྔལ་དེ་འཛམ་གླིང་ནང་གི་ཆེ་ཤོས་དེ་ཡིན་སྲིད། དེར་བརྟེན། ང་ཚོས་ཕྱོགས་གཉིས་བསྡུར་དགོས་དོན་མེད། ཅེས་བརྗོད་འདུག
ཡང་ཁོང་གིས། ང་ནི་དུས་རྟག་ཏུ་བོད་དོན་ལ་རྒྱབ་སྐྱོར་བྱེད་མཁན་རྙིང་ཤོས་ཤིག་ཡིན། སུས་ཀྱང་བཤད་མི་ནུས་པའི་དུས་སུ། རྒྱ་གར་ནང་རྒྱ་ནག་གི་དངོས་ཟོག་ཉོ་ཚོང་མཚམས་འཇོག་གི་ལས་འགུལ་སྤེལ་མཁན་དེ་ང་ཡིན། ༧གོང་ས་རྒྱལ་བ་རིན་པོ་ཆེ་མཆོག་གི་སྐོར་ལ་རྩོད་རྙོག་འབྱུང་སྐབས། སུས་ཀྱང་བསམ་ཚུལ་མ་བཤད་པའི་སྐབས་སུ། ང་ནི་མདུན་དུ་ཐོན་ནས་བསམ་ཚུལ་ཤོད་མཁན་དེ་ཡིན། ངས་དུས་རྟག་ཏུ་༧གོང་ས་རྒྱལ་བ་རིན་པོ་ཆེ་མཆོག་ལ་རྒྱ་གར་གྱི་ཆེས་མཐོའི་གཟེངས་རྟགས་དབུལ་དགོས་པར་རྒྱབ་སྐྱོར་བྱེད་ཀྱི་ཡོད། གནད་དོན་འདི་དག་གིས་ངའི་ཀུན་སློང་ལ་དོགས་པ་སྐྱེ་མི་དགོས་པ་གསལ་པོ་མཚོན་ནུས། ངས་བཤད་པའི་ཚིག་འགའ་ཤས་འཚམ་པོ་མེད་པ་བྱུང་ཡོད་སྲིད། དེར་བརྟེན། ངས་དགོངས་དག་ཞུས་པ་དང་མཉམ་དུ་རྩོད་གླེང་འདི་ཚོ་མཇུག་བསྒྲིལ་ཏེ། དགའ་བདེའི་ངང་དང་མཛའ་མཐུན་གྱི་གནས་བབ་འོག་རྟག་ཏུ་མཉམ་གནས་བྱ་ཐུབ་པའི་རེ་བ་ཡོད། ཅེས་བརྗོད་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། ཆོས་རྒྱལ་སྐྱབས།
