སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} སོ་བརྒྱད།

ཉིན་མ་ཁ་ཤས་ཀྱི་རིང་དུ་མཆོད་རྟེན་བྱ་རུང་ཁ་ཤོར་གྱི་འགྲམ་ནས་རང་ཉིད་ལ་མཁོ་བའི་རྒྱབ་ཁུག་དང་གྱོན་པ་སོགས་མི་ཉུང་བ་ཞིག་ཉོས་པ་དང་། ཧིན་སྒོར་དེ་དག་ངོ་ཤེས་གྲྭ་དེའི་ལག་དུ་བཞག་ནས་མི་ལ་བརྒྱ་སྒོར་དུ་བརྗེ་བོ་རྒྱག་དུ་བཅུགས།

ཉིན་ལྔའི་རྗེས་སུ་བློ་བཟང་ལ་ས་ཁུལ་གཅིག་པའི་ལམ་པ་ཞིག་ངོ་སྤྲོད་བྱས་པ་དང་། ཡིན་ཡང་། གྲྭ་བ་དེར་སྒོར་མོ་མང་བོ་མེད་སྟབས་བློ་བཟང་ཁོ་རང་གཅིག་བུ་ངོ་སྤྲོད་བྱེད་སའི་ལམ་པ་དེ་ལ་བལ་སྒོར་གཅིག་ཁྲི་ལྔ་སྟོང་སྤྲོད་རྒྱུ་བྱས་པ་དང་། ལམ་པ་དེས་ཁོ་རང་རླངས་འཁོར་ཆུང་ཆུང་ཞིག་གི་ནང་དུ་འཁྲིད་དེ་འགྲམ་བར་དུ་བདེ་འཇག་ངང་བསྐྱེལ་རྒྱུ་ཡིན་རབས་སོགས་བཤད་པ་དེར་ཡིད་ཆེས་བྱས།

ཞོགས་པ་སྔ་བོ་ཞིག་ལ་ཁོ་རང་དང་ལམ་པ་གཉིས་རླངས་འཁོར་ཆུང་ཆུང་ཞིག་གི་འགྲམ་དུ་སོང་དེ། ཁོ་གཉིས་ཀྱང་ཆུ་ཚ་བོ་ཡོད་ས་དེར་འགྲོ་མཁན་ཡིན་རབས་ཀྱིས་བལ་སྐད་སྟེང་ནས་ལམ་པས་རླངས་འཁོར་ཁ་ལོ་བ་དེར་བཤད་དུས། རླངས་འཁོར་ཁ་ལོ་བ་བལ་མི་དེས་མི་རེ་ལ་བལ་སྒོར་ལྔ་བརྒྱ་ཡིན་རབས་བཤད་པ་ལྟར། ལམ་པ་དེས་བལ་སྒོར་གཅིག་སྟོང་ཅན་ཞིག་སྤྲད།

རླངས་འཁོར་ཆུང་ཆུང་དེའི་ནང་དུ་ཁོ་གཉིས་དང་བལ་ཡུལ་གྱི་མི་གཉིས་བཅས་མི་བཞི་ཡོད། བློ་བཟང་གི་ཅ་དངོས་དེ་དག་མཐོང་ནས་ཁ་ལོ་བའི་ཁོ་རང་ལ་བལ་ཡུལ་གྱི་ཆུ་ཚ་བར་དུ་འགྲོ་ཆོག་པའི་ཡི་གེ་ཡོད་དམ་ཟེར་ནས་ལམ་པ་དེ་ལ་སྐད་ཆ་དྲིས་དུས། ལམ་པ་དེས་ཁ་ལོ་བ་དེར་ཕར་ཁྲིད་ནས་སྐད་ཆ་ཁ་ཤས་ཤིག་བཤད་རྗེས་ཚུར་སླེབས། བློ་བཟང་སེམས་བདེ་མོ་བྱོས། ངས་ཁོ་རང་ལ་དངུལ་ཁ་ཤས་ཤིག་རྔན་པར་སྤྲད་ཡོད། ད་སྐྲག་མི་དགོས་པ་རེད། འགག་མཚམས་རེ་ཐོན་ན་སྣང་མེད་ངང་བསྡོད་རྒྱུ་དང་། ང་ལ་འཁེན་ནས་གཉིད་ཁུལ་བྱེད་པ་སོགས་བྱེད་དགོས་པའི་བསྐོར་སོགས་བཤད།

ཆུ་ཚོད་དྲུག་གི་རྗེས་ཏག་ཏག་ལ་བློ་བཟང་དང་ལམ་པ་གཉིས་ཀྱང་ཆུ་ཚན་ལས་བརྒལ་ནས། འགྲམ་གྱི་འགག་སྒོ་ཟམ་པའི་འགྲམ་བར་དུ་བསྐྱལ་དུས། ལམ་པ་དེས་དབུགས་རིང་ཞིག་འཐེན་ཞོར་དུ། ཅུང་ཙམ་འགྲིག་མི་འདུག ང་རང་གཉིད་དུ་ཤོར་ནས་འུ་གཉིས་ཆུ་ཚ་བོ་ཡོད་ས་ལས་བརྒལ་ནས་ཡར་སླེབས་འདུག ཁྱེད་རང་ཕྱི་ལོག་དུ་མ་འབུད། ངས་འདི་ནས་ཆུ་ཚན་བར་དུ་འགྲོ་མཁན་གྱི་རླངས་འཁོར་ཞིག་འཁྲིད་ནས་འོང་ཞེས། ཁ་ལོ་བ་དེར་ཅུང་ཙམ་སྒུག་རོགས་ཟེར་ནས་ཟ་ཁང་ཞིག་གི་འགྲམ་དུ་མི་ཁ་ཤས་ཡོད་པ་དེ་རུ་སོང་།

ལམ་པ་དེས་བློ་བཟང་གི་ཅ་དངོས་དག་རླངས་འཁོར་གྱི་སྒམ་ཆུང་ནང་ནས་ཕྱི་རུ་འདོན་ཞོར་དུ། བློ་བཟང་ཁྱེད་རང་ཕྱི་ལོག་དུ་བུད་དེ་སྣང་མེད་ངང་དུ་འདི་ནས་ག་ལེར་མར་ལ་འགྲོ་གི་བསྡོད། ངས་འདི་ནས་ཅ་ལག་ཚང་མ་ཕར་ཕྱོགས་ཀྱི་རླངས་འཁོར་དེའི་ནང་དུ་བཞག་ནས། རླངས་འཁོར་དེའི་ནང་དུ་སྔོན་ལ་སོང་ནས། མར་ཕྱོགས་ཀྱི་རི་ཟུར་དེའི་རྒྱབ་དུ་སྒུག་ནས་འདུག

བློ་བཟང་གིས་ལམ་པས་བཤད་པ་ལྟར། སེམས་ནང་དུ་སྐྲག་སྣང་དང་དོགས་པ་སྐྱེ་ཞོར་དུ། ག་ལེར་སྔོན་དུ་མི་འགྲོ་ཐབས་མེད་ལྟ་བུ་ཞིག་ཆགས་ཡོད་དུས། རླངས་འཁོར་ཆུང་ཆུང་དེའི་ཕྱི་རུ་བུད་དེ་མར་ཕྱོགས་སུ་སོང་། དེ་ཁུལ་གྱི་མི་ཚང་མས་ཁོ་རང་ལ་ལྟ་བཞིན་པའི་ཡོད་པ་ལྟ་བུའི་སྣང་བ་ཞིག་ཀྱང་སྐྱེ་ན་ཡང་། ཨུ་ཚུགས་ཀྱིས་མ་ཤེས་ཁུལ་བྱས་དེ་ཚོང་ཁང་དང་ཟ་ཁང་དེ་དག་ལ་ལྟ་ཁུལ་དང་། ཞོར་དུ་ཐ་མག་ཞིག་ལ་མེ་སྒྲོན་ནས་དབུགས་རིང་ཞིག་འཕུད།

ཁྱེད་རང་དངོས་ནས་དལ་མོ་ཞིག་རེད། ངེད་གཉིས་ཀྱིས་འདི་ནས་ཡུན་རིང་ཞིག་ལ་སྒུག་པ་ཡིན། ད་རེམ་ཟེར་ནས་རླངས་འཁོར་ཆུང་ཆུང་དེའི་སྒེའུ་ཁུང་ནང་ནས་ལམ་པ་དེས་བློ་བཟང་མཐོང་མ་ཐག་དེ་ལྟར་བཤད།

ཆུ་ཚ་བོ་ཡོད་ས་དེར་བོད་པའི་མགྲོན་ཁང་ཟེར་བ་ཞིག་ཡོད་པ་དེ་ནི་ལམ་པ་ཁོ་རང་གི་ངོ་ཤེས་ཤིག་ཡོད་རབས་བཤད་པ་ལྟར། ཁོ་གཉིས་དེ་རུ་འདུག་རྒྱུ་གཏན་འཁེལ་བྱས། མགྲོན་ཁང་དེར་རྒན་རྒོན་གཉིས་དང་བུད་མེད་རོང་མོ་ཞིག་ཡོད་པ་དེས་ཀྱང་ཁོ་གཉིས་ལ་རྣམ་འགྱུར་ལེགས་པོའི་ངང་དུ་ཉལ་ས་གྲྭ་སྒྲིག་བྱས་པ་དང་། དགོས་ཟས་ཟ་རན་དུས་སྐད་གཏོང་ཆོག་ཟེར་ནས་ཕྱི་ལ་བུད།

དགོང་མོར་དེར་ལམ་པ་དེས་བློ་བཟང་ལ། ད་ནི་འུ་གཉིས་ཀྱི་གནས་ཚུལ་འགྱུར་བ་ཅུང་ཙམ་ཐེབས་འདུག ང་རང་གི་ནག་རིལ་{བལ་ཡུལ་གྱི་ཐོབ་ཐང་ལག་ཁྱེར་ལ་གོ}འདིས་དེང་སང་འགྲམ་དུ་འགྲོ་ཐུབ་ན་ཡང་། ཕྱིར་ཡོང་དུས། དངོས་ནས་མི་མང་བོ་ཞིག་ལ་དཀའ་ངལ་འཕྲད་ཀྱི་ཡོད་རབས་དེ་རིང་ངའི་ངོ་ཤེས་རྒན་པོ་དེས་ང་རང་ལ་གསལ་བོ་བཤད་སོང་། དེ་ཡིན་དུས། ངས་ཁྱེད་རང་ལ་འདི་ནས་རོང་བ་ལམ་པ་ཡག་པོ་ཞིག་བཙལ་ནས་རྙེད་རེག་བར་དུ་འདུག་རོགས་བྱེད་ཆོག ངས་ཁྱེད་རང་ཐད་ཀར་འགྲམ་བར་དུ་བསྐྱེལ་ཐུབ་ཀྱི་མི་འདུག་ཡང་། ངས་ཁྱེད་རང་འགྲམ་བར་དུ་བདེ་འཇག་ངང་སླེབས་ཐུབ་པ་བྱེད་ཆོག་སོགས་གནས་ལུགས་ཀྱི་སྐད་ཆ་དང་དྲང་བདེན་ཡིན་རབས་ཀྱི་སྐད་ཆ་མི་ཉུང་བ་ཞིག་བློ་བཟང་ལ་བཤད་པ་ལྟར། བློ་བཟང་གིས་ཀྱང་། ད་ནི་ཡོད་ཚད་ཁྱེད་རང་ཡིན། ངས་ཅུང་ཤེས་ནི་མ་རེད་ཅེས་ལན་བཏབ།

བློ་བཟང་ཁོ་རང་ཆུ་ཚ་བོ་ཡོད་སའི་བོད་པའི་མགྲོན་ཁང་དེར་སླེབས་ནས་ཉིན་གཉིས་འགྲོ་བཞིན་ཡོད་ལ། ལམ་པས་བཤད་པ་ལྟར་ཁོ་གཉིས་ཀྱི་ལམ་པ་བརྟན་པོ་ཞིག་ལ་སྒུག་ནས་བསྡད་ཡོད་པ་དང་། ཉིན་གཉིས་ཀྱི་རིང་དུ་བློ་བཟང་ལ་འགྲོ་སོང་སྐར་བཀང་ཡང་གཏོང་དུ་མ་བཅུགས་པ་མ་ཟད། མཚམས་རེར་བོད་པའི་མགྲོན་ཁང་འོག་གི་ཆུ་ཚན་ཡོད་སར་གཟུགས་པོ་དཀྲུ་རུ་སོང་དུས། ལན་རེར་རྒྱ་དམག་རེ་ཟུང་གིས་རླངས་འཁོར་ཆུང་ཆུང་རེ་བཏང་ནས་ཆུ་ཚ་བོ་ཡོད་ས་རུ་ཡོང་དེ་གཟུགས་པོ་རེ་དཀྲུ་བཞིན་ཕྱིར་འགྲོ་བཞིན་པ་དེ་དག་དང་འཕྲད་ཐེངས་རེར། བློ་བཟང་བལ་ཡུལ་གྱི་ས་ཐོག་ན་ཡོད་ཀྱང་། ད་ནི་བོད་ཀྱི་ས་ཁུལ་དུ་སླེབས་ཡོད་པ་ལྟ་བའི་ངང་སྐྲག་རེ་སྐྱེ་བཞིན་ཡོད་པ་རེད།

རོང་མོ་ཞབས་ཞུ་མ་དེ་ལ་ལམ་པ་དེས་གོ་སྐབས་ཡོད་ཚད་དུ་ཁ་རྩེད་བྱེད་པ་དང་ཁོ་གཉིས་ཀྱི་མགྲོན་ཁང་ནང་དུ་ཡང་ཡང་སྐད་བཏང་ནས། ཁོ་གཉིས་ལ་བལ་ཡུལ་གྱི་མཐའ་མཚམས་དེ་ནས་འཐུང་ཐུབ་པའི་ཆང་བཙགས་མ་དེ་ཡང་ཡང་འཁུར་ནས་ཡོང་གི་འཇུག་བཞིན་ཡོད་ལ། སྐབས་རེར་དུས་ཚོད་ཐུང་ཐུང་རེར་ཁོ་གཉིས་དང་ལྷན་དུ་བསྡོད་ཐེངས་རེར། ཁོ་གཉིས་ལ་དངོས་ནས་སྣང་བ་སྐྱིད་པོ་ཞིག་ཆགས་ཡོད་ཀྱང་། བློ་བཟང་གི་གནས་སྐབས་གནས་སྐབས་ཤིག་ལས་རོང་མོ་དེའི་ཕྱོགས་སུ་དོ་སྣང་སྤྲོད་ཐུབ་ཀྱི་མེད་པར། རང་ཉིད་འདི་ནས་ཇི་ལྟར་བོད་དུ་ཐར་ཐུབ་མིན་གྱི་བསྐོར་ལ་སེམས་ཁྲལ་བྱས་དེ་བསྡད་ཡོད།