འདི་ལོའི་རྒྱལ་ཡུམ་ཆེན་མོའི་རྐང་སྤོལ་རྩེད་འགྲན་གྱི་རྟིང་རྩོད་འགྲན་སྡུར་ཁྲོད་མོན་གྷོ་འདོད་རྒུ་གླིང་རུ་ཁག་གིས་སྤོ་ལོ་ ༡ བླུགས་ནས་རུ་ཁག་དེར་རྒྱལ་ཁ་ཐོབ་སོང་།
ཟླ་འདིའི་ཕྱི་ཚེས་ ༥ ནས་ ༡༦ བར་ཉིན་གྲངས་ ༡༢ རིང་རྒྱ་གར་ལྷོ་ཕྱོགས་ཀོ་ལི་གྷལ་དོན་ལྡན་གླིང་དུ། རྒྱལ་ཡུམ་ཆེན་མོའི་དྲན་རྟེན་གསེར་གྱི་བུམ་པའི་རྩེད་འགྲན་ཐེངས་ ༣༡ པ་གོ་སྒྲིག་གནང་སྟེ། དེ་རིང་མོན་གྷོ་འདོད་རྒུ་གླིང་རུ་ཁག་དང་ལྷ་ས་རྐང་སྤོལ་རུ་ཁག་གཉིས་བར་མཐའ་མའི་རྟིང་རྩོད་འགྲན་སྡུར་བྱས་པའི་ཁྲོད། མོན་གྷོ་འདོད་རྒུ་གླིང་རུ་ཁག་གིས་སྤོ་ལོ་གཅིག་བླུགས་ནས་འདི་ལོའི་རྒྱལ་ཡུམ་ཆེན་མོའི་དྲན་རྟེན་གསེར་གྱི་བུམ་པ་དང་། ཧིན་སྒོར་འབུམ་གཉིས་བཀྱགས་སོང་།
བོད་རྒྱལ་ཡོངས་རྩེད་རིགས་ཚོགས་པའི་ཚོགས་གཙོ་བྱང་ཆུབ་རྒྱལ་མཚན་ལགས་ཀྱིས། རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་དེ་བོད་པའི་གཞིས་ཆགས་ཁག་ཏུ་རེས་མོས་བཞིན་འཚོག་རྒྱུའི་ཐབས་ཤེས་བྱེད་ཀྱི་ཡོད། དེ་ཡང་རྒྱ་གར་ལྷོ་ཕྱོགས་ནས་བྱང་ཕྱོགས་དང་། དེ་ནས་དྷ་རམ་ས་ལའི་ས་གནས་བཅས་སུ་རེས་མོས་བྱས་ཏེ་འཚོག་གི་ཡོད་པ་ལྟར། ལོ་རྗེས་མའི་རྒྱལ་ཡུམ་ཆེན་མོའི་རྗེས་དྲན་རྐང་སྤོལ་རྩེད་འགྲན་དེ་ལ་དྭགས་བསོད་ནམས་གླིང་གཞིས་ཆགས་སུ་འཚོག་རྒྱུ་ཡིན། འདི་ལོའི་རྐང་སྤོལ་རྩེད་འགྲན་ནང་ནམ་རྒྱུན་ལས་མཉམ་ཞུགས་བྱེད་མཁན་རུ་ཁག་ཉུང་བ་ཆགས་ཡོད། འགྲོ་ལམ་བདེ་བོ་མེད་པའི་ས་གནས་སུ་འགྲན་ཞུགས་མ་བྱས་པ་དང་། ས་གནས་ཡག་པོར་རུ་ཁག་མང་པོ་འཚང་ཁ་རྒྱག་པ་དེ་བློ་ཕམ་པོ་རེད་བསམ་གྱི་འདུག རྒྱལ་ཡུམ་ཆེན་མོའི་དྲན་རྟེན་གྱི་རྐང་སྤོལ་རྩེད་འགྲན་ས་གནས་གང་དུ་འཚོགས་ཀྱང་། རུ་ཁག་ཚང་མས་མཉམ་ཞུགས་གནང་རྒྱུ་གལ་ཆེན་པོ་རེད། ང་ཚོའི་དམིགས་ཡུལ་ནི་གཞིས་ཆགས་ནང་ཁུལ་དང་རྩེད་འགྲན་རུ་ཁག་ཕན་ཚུན་མཐུན་སྒྲིལ་ཡོང་ཆེད་གོ་སྒྲིག་བྱེད་བཞིན་ཡོད། ཅེས་བརྗོད་སོང་།
འདི་ལོའི་རྐང་སྤོལ་རྩེད་འགྲན་གྱི་གོ་རིམ་ཁྲོད། མོན་གྷོ་རུ་ཁག་གི་རྩེད་འགྲན་པ་ཀརྨ་ཤེས་རབ་ལ་རྩེད་འགྲན་པ་ལེགས་ཤོས་ཀྱི་གཟེངས་རྟགས་ཐོབ། ཤ་བ་རྐང་སྤོལ་རུ་ཁག་གི་རྩེད་འགྲན་པ་བསྟན་འཛིན་ཡོན་ཏན་ལ་སྤོ་ལོ་མང་ཤོས་བླུག་མཁན་གྱི་བྱ་དགའ་ཐོབ། ལྷ་ས་རྐང་སྤོལ་རུ་ཁག་གི་སྒོ་ར་བ་བསྟན་འཛིན་ངག་དབང་ལ་སྒོ་ར་བ་ཡག་ཤོས་ཀྱི་བྱ་དགའ་ཐོབ་སོང་།
བོད་རྒྱལ་ཡོངས་རྩེད་རིགས་ཚོགས་པས་གོ་སྒྲིག་གནང་བཞིན་པའི་རྒྱལ་ཡུམ་ཆེན་མོའི་དྲན་རྟེན་གསེར་གྱི་བུམ་པའི་རྐང་སྤོལ་འགྲན་སྡུར་ནི། ཕྱི་ལོ་ ༡༩༨༡ ལོར་བོད་ཕྲུག་ཁྱིམ་སྡེའི་རྩིས་དཔོན་ཟུར་པ་ཇོ་བོ་ཚེ་རིང་ལགས་ཀྱིས་གསར་འཛུགས་གནང་སྟེ། རྩེད་འགྲན་འདི་ལོ་ལྟར་ཚོགས་ཀྱི་ཡོད་པ་རེད། འོན་ཀྱང་། ཕྱི་ལོ་ ༢༠༢༠ ལོར་ཏོག་དབྱིབས་གཉན་རིམས་ཀྱི་རྐྱེན་གྱིས་རྒྱལ་ཡུམ་ཆེན་མོའི་དྲན་རྟེན་གསེར་གྱི་བུམ་པའི་རྐང་སྤོལ་འགྲན་སྡུར་འཚོགས་ཐུབ་མེད་པ་རེད།
རྒྱལ་ཡུམ་ཆེན་མོའི་རྗེས་དྲན་གསེར་གྱི་བུམ་པའི་རྩེད་འགྲན་དེ་ཕྱི་ལོ་ ༢༠༡༢ ལོར་དྷ་རམ་ས་ལ་དང་། ༢༠༡༣ ལོར་ཧོན་སུར་རབ་རྒྱས་གླིང་། ༢༠༡༤ ལོར་དོན་གྲུབ་གླིང་ (Clementown)། ༢༠༡༥ ལོར་དྷ་རམ་ས་ལ། ༢༠༡༦ ལོར་མོན་གྷོ། ༢༠༡༧ ལོར་ཀོ་ལི་གྷལ་དོན་ལྡན་གླིང་། ༢༠༡༨ ལོར་སྦེལ་ཀོབ་བདེ་སླར་གཞིས་ཆགས། ༢༠༡༩ ལོར་དྷ་རམ་ས་ལ། ༢༠༢༡ ལོར་དོན་གྲུབ་གླིང་དང་། ༢༠༢༢ ལོར་སྤོན་ཊ་ཆོལ་གསུམ་གཞིས་ཆགས། ༢༠༢༣ ལོར་དྷ་རམ་ས་ལ། ༢༠༢༤ ལོར་ཧོན་སུར་རབ་རྒྱས་གླིང་། འདས་ལོའི་རྒྱལ་ཡུམ་ཆེན་མོའི་དྲན་རྟེན་གསེར་གྱི་བུམ་པའི་རྩེད་འགྲན་དེ་རྒྱ་གར་ལྷོ་ཕྱོགས་ཧོན་སུར་རབ་རྒྱས་གླིང་དུ་འཚོགས་ཡོད་པ་རེད།
བོད་རྒྱལ་ཡོངས་རྩེད་རིགས་ཚོགས་པའི་དྲ་རྒྱར་གཞིགས་ན། ད་བར་རྒྱལ་ཡུམ་ཆེན་མོའི་རྩེད་འགྲན་ཐེངས་ ༣༠ རྩེད་འགྲན་བྱས་པའི་ཁྲོད། ཕྱི་ལོ་ ༢༠༡༥ ལོར་མོན་གྷོ་འདོད་རྒུ་གླིང་རུ་ཁག་དང་། ཕྱི་ལོ་ ༢༠༡༦ ལོར་ཊི་ཌི་ཨེལ་སྦེལ་ཀོབ་རུ་ཁག ༢༠༡༧ ལོར་བཀྲིས་གླིང་ཧི་མ་ལ་ཡ་རུ་ཁག ཕྱི་ལོ་ ༢༠༡༨ དང་ ༢༠༡༩ ལོར་མོན་གྷོ་འདོད་རྒུ་གླིང་རུ་ཁག ཕྱི་ལོ་ ༢༠༢༡ ལོར་སིམ་ལ་རུ་ཁག ཕྱི་ལོ་ ༢༠༢༢ ལོར་དོན་གྲུབ་གླིང་རུ་ཁག ཕྱི་ལོ་ ༢༠༢༣ ལོར་དྷ་ས་གཅིག་སྒྲིལ་རུ་ཁག ཕྱི་ལོ་ ༢༠༢༤ དང་ ༢༠༢༥ མོན་གྷོ་འདོད་རྒུ་གླིང་རུ་ཁག་བཅས་ལ་རྒྱལ་ཁ་ཐོབ་ཡོད་འདུག
གསར་འགོད་པ། བྱམས་པ་ཚེ་རིང་།
